Su səyahəti
Astarada bayrama çevrildi
Su birlik,
aydınlıq, saflıq,
paklıq, bolluq rəmzidir. Eyni zamanda su yaranışın dörd
ünsüründən biridir.
Baharın yurdumuza gəlişi ilə xalqımız bu dörd ünsürün və onun ilki
olan su çərşənbəsinin
əziz tutulmasını,
hər il
layiqincə qeyd edilməsini vacib bilir. Bu mənada
ölkəmizdə keçirilən
IV İslam Həmrəyliyi
Oyunları üçün
suyun rəmz kimi seçilməsi böyük məna kəsb edir.
Məlum olduğu kimi, aprelin 5-də Bakıdakı
Daş Salnamə Muzeyində “Bakı-2017” İslam
Həmrəyliyi Oyunlarının
Xəzərdən başlayan
su səyahətinə
start verilmişdir. Tədbirdə
Azərbaycan Respublikasının
Prezidenti İlham Əliyev, Birinci vitse-prezident, “Bakı-2017” İslam
Həmrəyliyi Oyunlarının
Təşkilat Komitəsinin
sədri Mehriban xanım Əliyeva, Səudiyyə Ərəbistanı
Krallığının Şahzadəsi,
İslam Həmrəyliyi
İdman Federasiyasının
və Səudiyyə Ərəbistanı Milli Olimpiya Komitəsinin prezidenti Abdullah bin Mosaad
bin Əbdüləziz Əl
Səud iştirak etmişlər. Ölkə rəhbəri İlham
Əliyev burada Xəzər dənizindən
götürülmüş suyu özləri ilə aparmaq üçün Azərbaycanın
hər bir bölgəsindən gəlmiş
uşaqlara təqdim etmişdir. Həmin uşaqların arasında
Astara şəhər
2 saylı tam orta məktəbin 3-cü sinif
şagirdi, dərs əlaçısı Mirrahil
Ağayev də vardı. Mis qaba doldurulmuş
bu su ilə
məktəbli M.Ağayev
IV İslam Həmrəyliyi
Oyunlarının məramını
doğulub boya-başa
çatdığı Astaraya
gətirib. Bu, bayram
əhvali-ruhiyyəsi yaşayan
Astara camaatının
ovqatını bir az da yüksəldib. Xatırladaq
ki, ölkəmizin
15-dən çox şəhərini,
5 göl, 1 su anbarını, 3 çay,
2 bulaq, 3 şəlaləsini
və Xəzər dənizini əhatə edəcək su səyahəti 3 min kilometrdən
çox məsafə
qət edəcəkdir.
Bu səyahətdəki bulağın 1-i Astaradadır.
Astara rayonu respublikamızın dilbər guşələrindəndir. O, şərqdən
Xəzər dənizi,
cənub-qərbdən isə
meşə örtüklü
Talış dağları
ilə əhatə olunmuşdur. Çayları,
şəlalələri, buz
bulaqları, ətir saçan limon,
naringi, portağal, feyxoa bağları və bir də
ən əsası, zəhmətkeş, vətənpərvər,
qeyrətli insanları
var bu torpağın.
Rayondakı bulaqlar arasında
da Ərçivan qəsəbəsindəki Yanarbulaq
adı ilə məşhur olan su mənbəyinin öz yeri, öz
şöhrəti var. Burada
suyun tərkibində kükürd olduğundan kibrit çəkəndə
alışıb yanır.
Yanarbulaq
Odlar yurdu adlanan məmləkətimizin
bir möcüzəsidir.
Ölkəmizdəki belə yerlər
insanları zaman-zaman düşündürmüş, onların diqqətini özünə çəkmiş,
bəzən də ziyarətgaha çevrilmişdir.
Elə buna görə də tədbir çərçivəsində bu bulaqdan su
götürülməsi qərara
alınmışdır. Bu məqsədlə də rayon idmançıları,
fəallar aprelin 9-da səhər saat 10 radələrində Ərçivan
qəsəbəsinə, Ələt-Astara
magistral şose yolunun kənarında yerləşən Yanarbulağa
gəldilər. Qəsəbə əhalisi, habelə yaxın yaşayış
məntəqələrinin sakinləri də buraya toplaşmışdılar.
İdman ustası, Azərbaycan Respublikasının
əməkdar məşqçisi
Məhərrəm Ağayev
və sərbəst güləş üzrə
50 kiloqram çəkidə
dünya və Avropa birinciliyi yarışlarının qalibi,
idman ustası, gənclərdən ibarət
respublika yığma komandasının üzvü,
18 yaşlı Əliabbas
Rzazadə Yanarbulağa
yaxınlaşdılar. Onlar gətirdikləri
su qablarını bulaqdan doldurduqdan sonra maşınlarla rayon mərkəzinə qayıtdılar.
...Günortaya az qalır.
Astara Olimpiya İdman Kompleksinin qarşısında
böyük bir izdiham var. Rayon idmançılarının,
gənclərin sevimli
yeri olan bu kompleks 2012-ci ildə istifadəyə verilib. Onun təməlqoyma və
açılış mərasimlərində
dövlət başçısı
İlham Əliyev iştirak etmişdir.
İndi idmanın müxtəlif növləri üzrə burada məşqlər, yarışlar keçirilir.
Bütövlükdə rayonda bu gün 151 stadion, idman zalı, meydançası və digər idman qurğuları fəaliyyət
göstərir. 3 min
800 nəfər yeniyetmə
və gənc idmanın bu və ya digər
növü ilə məşğuldur. Görülən işlər, həyata keçirilən tədbirlər
öz bəhrələrini
verməkdədir.
IV İslam Həmrəyliyi Oyunlarının
su səyahəti tədbirində Astara Olimpiya İdman Kompleksində 9-13 yaşlı
100 nəfər uşaq
və yeniyetmənin çıxışı burada
idmanın daha da inkişaf edəcəyini əyani şəkildə nümayiş
etdirdi. Tamaşaçıların gurultulu alqışları
altında onlar nəyə qadir olduqlarını göstərdilər.
Daha çox fərqlənən
uşaqlar təşkilatçılar
tərəfindən mükafatlandırıldılar.
Artıq günəş yavaş-yavaş
qüruba doğru enir. Dənizdən əsən bahar
mehi ürəklərə
sərinlik gətirir.
Hər yerdə olduğu kimi, burada da
ağaclar, güllər
tumurcuq bağlayıb,
alça, ərik, şaftalı ağacları
çiçək açıb.
İnsanlar dəstə-dəstə dənizkənarı bulvara
gəlirlər. Astaradakı bu
şərait artıq
turistlərin diqqətini
özünə cəlb
etməyə başlamışdır.
Qonşu
İran İslam Respublikasından, Rusiya Federasiyasının ayrı-ayrı
şəhərlərindən, vilayətlərindən istirahət
edənlərin sayı
artmaqdadır.
İndi bulvarda böyük izdiham var, necə
deyərlər, iynə
atsan, yerə düşməz. Tədbirin yüksək səviyyədə
keçirilməsi üçün
geniş səhnə düzəldilmişdi. Müğənnilərin oxuduqları mahnıların
səsi dalğa-dalğa
ətrafa yayılır.
Rəqqaslar sümüyə düşən musiqi sədaları altında şıdırğı rəqs
edir, yallı gedirlər. Nurani bir kişiyə
yaxınlaşıb təəssüratlarını
öyrənirik. Bu, Astara şəhər sakini Fuad Musayevdir.
O deyir: “Artıq 70 yaşı adlamışam.
Sovetlər birliyi zamanında
rayon partiya komitəsində
də işləmişəm.
Demək
istəyirəm ki, indi Azərbaycan beynəlxalq tədbirlərin
keçirildiyi məkanlardan
birinə çevrilmişdir.
Elə il
yoxdur ki, burada mühüm əhəmiyyət kəsb
edən tədbir olmasın. Bu günün
özünü götürək.
İslam
Həmrəyliyi Oyunları
Bakıda reallaşır.
Bütün bunlar ölkəmizin,
onun lideri cənab İlham Əliyevin dünyadakı
hörmət və nüfuzunun, uzaqgörən
siyasətinin, səriştəsinin
nəticəsidir. Siz baxın,
indi dünyada İslam ölkələrinin
bir çoxunu sıxışdırırlar. Belə bir zamanda idman
vasitəsilə müsəlman
ölkələrini bir
araya gətirmək böyük istedad, həm də cəsarət tələb
edir. Suyun bu oyunlar üçün rəmz seçilməsinin də xüsusi mənası, əhəmiyyəti var. Su birlik,
paklıq, aydınlıqdır.
Bəli,
İslam da məhz paklığı sevir. Əminik ki, keçirilən
bu tədbir İslam ölkələri
və xalqları arasında birliyin, qarşılıqlı anlaşmanın
yaranmasına öz müsbət təsirini göstərəcəkdir. Arzumuz budur ki, dünyamız
aydınlıq içində
olsun. İnsanlar sülh, bərabərlik,
bolluq içində yaşayıb ömür sürsünlər”.
El ağsaqqalının
dediyi bu sözlər bütün astaralıların, eləcə
də Azərbaycan xalqının ürəyindən
gələn sözlərdir. Su səyahəti konsert sədaları və Astara şəhərinin səmasında gül çələngini xatırladan
atəşfəşanlıqla başa çatdı.
Seyran CAVADOV,
Azərbaycan.- 2017.- 11 aprel.- S. 6.