Avropa “Qarabağ”dan danışır

Xarici mətbuat Ağdam təmsilçisinin tarixi uğuruna geniş yer verir

UEFA Çempionlar Liqasında qrup mərhələsinə vəsiqə qazanmaqla Azərbaycanın futbol tarixində bir ilkə imza atan “Qarabağ” bütün dünyanın diqqət mərkəzindədir. Ağdam təmsilçisinin bu uğurundan Avropanın aparıcı media orqanları materiallar dərc elətdirib, komandanın tarixi, futbol sahəsində gördüyü işlər, təmsil etdiyi şəhər haqqında oxuculara geniş məlumatlar çatdırır. Türkiyənin, Rusiyanın, Fransanın, İtaliyanın, İspaniyanın və s. ölkələrin ən məşhur KİV-də “Qarabağ” futbol klubunun Ermənistanın işğalçılıq siyasəti nəticəsində 24 ildir doğma şəhəri Ağdamdan didərgin düşdüyü, Bakıda məskunlaşdığı qeyd olunur.

Fransanın “footmercato.net” saytında “Qarabağ” komandasının tarixi uğuruna geniş yer ayrılıb. Qeyd edilib ki, Azərbaycan təmsilçisinin matçın 63-cü dəqiqəsində vurduğu qol “Kopenhagen” klubunu çətin duruma salıb. “Qarabağ”ın futbolçularının son dəqiqəyədək inamlı mübarizə ruhu matçın taleyini həll etdi.

Fransanın digər saytı “Bursorama” isə Ağdam klubunun qələbəsini “Qarabağ” UEFA Çempionlar Liqasına yüksələn ilk Azərbaycan komandası kimi yadda qaldı. Bu tarix hələ uzun zaman xatırlanacaq” başlıqlı yazı ilə oxuculara çatdırıb.

Belçikanın nüfuzlu “7sur7.be” saytında qeyd edilir ki, “Qarabağ” komandası rəqibi olan “Kopenhagen” klubunu doğma meydanda 1:0 hesabı ilə məğlub edib. Səfərdə isə 1:2 hesabı ilə uduzmasına baxmayaraq, qrupa vəsiqə qazanıb. Bu, Azərbacan futbolu üçün tarixi nəticədir.

Qardaş Türkiyənin nüfuzlu idman portalları da UEFA Çempionlar Liqasının debütantı olan “Qarabağ”ın uğuruna geniş yer veriblər. “Ntvspor.net”, “Fanatik.com.tr”, “Fotomac.com.tr”, “Sporx.com” və s. saytlarında yer alan “Qarabağ” tarix yazdı”, “İlk dəfə Çempionlar Liqasında” sərlövhəli məqalələrdə bildirilib ki, son 3 mövsümdür Avropa Liqasında təmsil olunan “Qarabağ” avrokuboklarda əldə etdiyi təcrübədən bəhrələnərək bu dəfə Çempionlar Liqasında mübarizə aparacaq.

“Qarabağ” klubunun qələbəsini Rusiya mətbuatının nüfuzlu agentlikləri də işıqlandırıb. “Gazeta.ru” saytı “Azərbaycan klubu tarixdə ilk dəfə olaraq Çempionlar Liqasının qrup mərhələsində”, “Rosbalt.ru” saytı “Qarabağ”ın qələbəsini “Azərbaycan klubu tarixdə ilk dəfə olaraq Çempionlar Liqasının qrup mərhələsinə daxil oldu”, “Segodna.ua” saytı isə “Tarixdə ilk dəfə olaraq Azərbaycan klubu Çempionlar Liqasının qrupunda oynayacaq”, “Ria.ru” saytının idman bölməsi “Azərbaycanın “Qarabağ” klubu tarixdə ilk dəfə ÇL-nın qrup mərhələsində”, “Regnum.ru” portalı isə “Çempionlar Liqasının qrup mərhələsinin bütün iştirakçıları müəyyən edildi” başlıqları ilə “Qarabağ”ın qələbəsindən yazıb, komandanın keçmişi haqqında məlumatlar verilib.

Böyük Britaniyanın “Sky Sports”, İtaliyanın “La Stampa” və s. kimi mətbuat orqanlarında da “Qarabağ”ın uğuru başlıq kimi verilib. “Qarabağ”dan tarixi uğur”, “20 ildən artıqdı evdə oynamayan “Qarabağ” Çempionlar Liqasının qrup mərhələsində”, “Ndlovunun qolu “Qarabağ”ı qrup mərhələsinə daşıdı” kimi başlıqlarla verilmiş xəbərlərin demək olar, hər birində Ağdam təmsilçisinin 20 ildən artıqdır doğma meydanda çıxış etmədiyi xüsusi vurğulanıb.

İtaliyanın “La Stampa” qəzetində dərc olunmuş “20 ildən artıq evində oynaya bilməyən Qarabağ klubu Çempionlar Liqasının yeni iştirakçısıdır” adlı məqalədə qeyd olunur ki, Avropanın yeni möcüzəsi olan və tarixində ilk dəfə olaraq Çempionlar Liqasının qrup mərhələsinə vəsiqə qazanan “Qarabağ” Azərbaycanın Ermənistan tərəfindən işğal edilmiş və dağıdılmış Ağdam şəhərinin klubudur. Ermənistanın hərbi təcavüzü səbəbindən klub 1993-cü ildə Ağdam şəhərini tərk etmiş və 20 ildən artıq evində oynaya bilməyən yeganə klubdur. Yazıda Ermənistanın təcavüzünün nəticəsi olaraq bu gün Ağdamın dağıntılara məruz qaldığı, azərbaycanlıların didərgin salındığı, klubun stadionunun dağıdıldığı bildirilir.

Elçin CƏFƏROV,

Azərbaycan.- 2017.-26 avqust.- S.6.