Müxalifətdən
Prezidentə təbrik:“Azərbaycanın ritmi İlham
Əliyevin nəbzində döyünür”
Sabah Prezident İlham Əliyevin
doğum günüdür. Dünya ölkələrinin liderləri
Azərbaycan Prezidentinə ad günü münasibətilə
təbriklər ünvanlayırlar. Azərbaycanın
tanınmış siyasi və ictimai xadimləri, eləcə
də müxalifət partiyalarının rəhbərləri
dövlət başçısını təbrik edirlər.
Prezidentə ünvanlanan təbriklərdə qeyd edilir ki, Azərbaycanın
bugünkü uğurları, sosial-iqtisadi yüksəlişi
və beynəlxalq siyasi nailiyyətləri məhz cənab
İlham Əliyevin çevik və qətiyyətli siyasətinin
təntənəsidir.
Azərbaycanın
qlobal uğurlarının müəllifi İlham Əliyevdir
Qüdrət
HƏSƏNQULİYEV,
Milli Məclisin
deputatı,
Bütöv
Azərbaycan Xalq Cəbhəsi Partiyasının sədri:
- Cənab İlham Əliyevin
prezidentliyi dövründə Azərbaycan kifayət qədər
ciddi uğurlar əldə edib. Son 14 ildə Azərbaycanın
regionda mövqeyini gücləndirən bir neçə
transmilli layihə gerçəkləşdirilib, güclü
ordu yaradılıb. Ölkədə infrastrukturun
inkişafı istiqamətində mühüm addımlar
atılıb, şəhər və rayonlarda
genişmiqyaslı abadlıq işləri aparılıb.
Azərbaycanın nüfuzunun beynəlxalq
aləmdə gücləndirilməsi istiqamətində kifayət
qədər ciddi işlər görülüb. Eyni zamanda Azərbaycan
mühüm beynəlxalq tədbirlərin keçirildiyi
platform, həmçinin modern və tolerant ölkə kimi
tanınıb. Bu nailiyyətlər Azərbaycan Prezidentinin əldə
etdiyi uğurların bir hissəsidir.
Bütün bunlarla yanaşı,
Azərbaycan Şimal-Cənub və Şərq-Qərb istiqamətində
nəqliyyat dəhlizinə çevrilib, “Əsrin müqaviləsi”
2050-ci ilə qədər uzadılıb. Bütün bu qlobal
uğurların müəllifi, əlbəttə, Azərbaycan
Prezidentidir.
Prezidentin can sağlığı
hər bir Azərbaycan vətəndaşı
üçün önəmlidir. Ölkənin ritmi məhz
onun nəbzində döyünür. Bu baxımdan da, hesab edirəm
ki, bu ritm nə qədər dəqiq və düzgün olarsa,
Azərbaycanın inkişafında daha ciddi irəliləyişlərin
şahidi olarıq.
Cənab İlham Əliyevi ad
günü münasibətilə təbrik edirəm, ona şəxsi
həyatında xoşbəxtlik, güclü iqtisadiyyata malik
olan, demokratik və hüquqi dövlət quruculuğu ilə
bağlı fəaliyyətində uğurlar diləyirəm.
İlham
Əliyev mükəmməl inkişaf modeli müəyyənləşdirib
Asim MOLLAZADƏ,
Milli Məclisin
deputatı,
Azərbaycan
Demokratik İslahatlar Partiyasının sədri:
- Müstəqilliyimizin bərpasından
ötən 26 ildə keçilən yola nəzər
saldıqda aydın şəkildə görərik ki, Azərbaycan
güclü bir dövlətə çevrilib. Bu, Prezident
İlham Əliyevin son 14 ildə həyata keçirdiyi siyasətin
məntiqi nəticəsidir.
Belə ki, bu müddət ərzində
özünün mükəmməl iqtisadi inkişaf modelini
müəyyənləşdirən Azərbaycan İlham
Əliyevin liderliyi ilə mühüm uğurlara imza atıb.
Müasir, demokratik ölkə quruculuğu istiqamətində
düzgün strateji yol seçilib və Azərbaycan bu yolda
uğurla, inamla addımlayır. Dövlət başçısının
təşəbbüsü ilə gerçəkləşən
bütün layihələr ölkənin tərəqqisinə
xidmət edir. Eyni zamanda bu layihələr Azərbaycanın
beynəlxalq imicini yüksəldir. Cənab Prezidentin
multikulturalizm, İslam həmrəyliyi ilə bağlı təşəbbüsləri
də beynəlxalq birlik tərəfindən çox yüksək
qiymətləndirilir. Bütün bunlar müasir, müstəqil
Azərbaycana böyük dividendlər qazandırır.
Azərbaycan Prezidentinin yeni
inkişaf konsepsiyasına uyğun olaraq ölkənin
davamlı inkişafı üçün müvafiq strateji yol
xəritələri təsdiqlənib.
Cənab Prezident Azərbaycanın
taleyüklü problemi olan Dağlıq Qarabağ
münaqişəsinin həlli istiqamətində çox qətiyyətli,
prinsipial mövqeyini dünyaya nümayiş etdirir.
Bütün danışıqlarda, çıxışlarda
Azərbaycanın haqlı mövqeyini qətiyyətlə
müdafiə edir. Lakin bu münaqişənin həll
olunmaması üçün çalışan qüvvələrin
ikili standartlar prinsipi çətinliklər yaradır. Buna
baxmayaraq, dövlət başçısı münaqişənin
sülh yolu ilə həlli üçün əlindən gələni
edir.
Bütün bu uğurların
gerçəkləşməsində yorulmadan
çalışan dövlət başçısına
doğum günü münasibətilə möhkəm
cansağlığı və işlərində uğurlar
arzulayıram.
İlham
Əliyev dəyişməz, düzgün, prinsipial mövqe
sahibidir
Fazil MUSTAFA,
Milli Məclisin
deputatı, Böyük Quruluş Partiyasının
başqanı:
- Cənab İlham Əliyevin
prezidentlik fəaliyyətinin 14 ili daha çox Azərbaycanın
dünyada özünü təsdiq tarixi kimi yadda qaldı.
İstər böyük əhəmiyyət daşıyan beynəlxalq
müqavilələrin imzalanıb həyata keçirilməsi,
istər mötəbər beynəlxalq siyasi və idman tədbirlərində
ölkənin ciddi söz sahibi kimi çıxış etməsi
və uğurlar qazanması ölkə Prezidentinin birbaşa
aktiv fəaliyyəti ilə bağlıdır.
Xarici siyasətdə
ayrı-ayrı güc mərkəzləri ilə balanslı
münasibətlərin qorunması, müstəqil siyasətin
aparılması Azərbaycana dünyada hörmət olunan
dövlət imici qazandırdı. Ölkə daxilində
sabitliyin qalıcı bir dəyərə çevrilməsi Azərbaycanı
bir sıra qonşu ölkələrdə yaşanan xaos və
qarışıqlıq sindromundan xilas edə bildi.
Dağlıq Qarabağ məsələsində Azərbaycanın
öz dəyişməz, düzgün, prinsipial mövqeyini qəbul
etdirməsi də bu 14 ildə müşahidə olunan ən
ciddi məqamlardandır. Prezidentin Dağlıq Qarabağ məsələsinin
həllində qətiyyətli mövqeyini aprel
döyüşləri zamanı real olaraq müşahidə
etdik. Biz müxalifət partiyaları olaraq Prezidentin bu istiqamətdə
atdığı addımları birmənalı dəstəklədik.
Bundan sonra da siyasi və iqtisadi
islahatları davam etdirmək niyyətini bəyan edən
ölkə Prezidentinə uğurlar və
cansağlığı arzulayır, doğum günü
münasibətilə təbrik edirəm.
İlham
Əliyev növbəti seçkilərdə də
böyük qələbə qazanacaq
Fəzail
İBRAHİMLİ,
Milli Məclisin
deputatı, Vətəndaş Həmrəyliyi
Partiyasının üzvü:
- Son 14 ildə Azərbaycanın
iqtisadi-siyasi, mənəvi tarixində kifayət qədər
mühüm addımlar atılıb. Bu gün keçmişə
nəzər saldıqda tam aydın görürük ki, cənab
İlham Əliyev prezidentliyi dövründə ölkənin
simasını büsbütün dəyişmiş, Azərbaycanı
dünyaya yeni libasda təqdim etmişdir.
Ən əsası isə odur ki, Azərbaycan
siyasi cəhətdən nəinki regionda, hazırda dünyada
sabit dövlətlərdən biri kimi özünü təsdiq
etmişdir. Ölkə rəhbərinin xalqına, millətinə,
dövlətinə xidmətinin ən böyük göstəricilərindən
biri də məhz respublikadakı siyasi sabitlikdir. Bu gün
dünya, Yaxın Şərq od-alov içərisində
yanır. Ayrı-ayrı ölkələrdə insanlar sanki səksəkəli
halda yaşayırlar. Dünyanın ən inkişaf etmiş
ölkələrində və bəşəriyyətə
demokratiya dərsi keçən dövlətlərin hər
birində baş verən hadisələr
gözümüzün önündədir. Tanrı cənab
Prezidenti qorusun, onun atdığı addımlar müsbət nəticələrini
verir. Əgər bu gün dünya ölkələrini
sabitlik, əmin-amanlıq baxımından sıralasaq,
mübaliğəsiz deyə bilərik ki, cənab İlham
Əliyevin liderliyində Azərbaycan birinci yerdə qərar
tutacaq...
İkinci vacib məsələ Azərbaycanın
iqtisadi qüdrətinin təzahürüdür. Bu gün
ölkəmiz təkcə regionun deyil, Avropanın və
dünyanın inkişaf etmiş dövlətləri
arasında mətin addım ata biləcək və dünyaya
kömək etmək iqtidarında olan bir dövlətə
çevrilib. Bunun nəticəsidir ki, Azərbaycanı
dünya ictimaiyyəti əlverişli geosiyasi mərkəz
olmaqla yanaşı, münbit iqtisadi zona kimi tanıyır.
Müasir dəmir yollarının çəkilməsi,
qaz-neft borularının ölkə sərhədlərini
aşması Azərbaycan üçün yeni imkanlar
yaradıb. Uğurlu iqtisadi əlaqələr vasitəsilə
Avrasiyada mövcud olan türk körpüsünün bərpası
məhz Azərbaycan tərəfindən edilib. Sözsüz,
bu layihələrin müəllifi cənab Prezidentdir. Qeyd edim
ki, cənab İlham Əliyevin fəaliyyəti,
uğurları haqqında saatlarla danışmaq olar.
Ümumilikdə müasir Azərbaycan dövlətinin siyasi,
iqtisadi və digər istiqamətlərdə
qazandığı uğurların xronologiyası çox zəngindir.
Xüsusilə qeyd etmək istəyirəm
ki, bu uğurların, çoxsaylı nailiyyətlərin
qazanılmasında Azərbaycanın Birinci vitse-prezidenti
Mehriban xanım Əliyevanın da rolu əvəzsizdir. Onun cənab
Prezidentlə birgə fəaliyyəti, qoşa
addımlamağı Azərbaycanın sosial-iqtisadi, siyasi və
mədəni həyatına böyük təsir göstərib,
ölkəmizi müasir, inkişaf etmiş dövlətlər
səviyyəsinə yüksəldib.
Cənab Prezidenti doğum
günü münasibətilə təbrik edirəm. Ona uzun
ömür, cansağlığı, işlərində
uğurlar arzulayıram. Arzu edirəm ki, növbəti prezident
seçkilərində də böyük uğurla qələbə
qazansın və sükanı belə saxlasın...
İlham
Əliyev əsl liderdir
Fərəc
QULİYEV,
Milli Məclisin
deputatı,
Milli
Dirçəliş Hərəkatı Partiyasının rəhbəri:
- Bu gün həqiqətən Azərbaycan
güclü bir ölkəyə çevrilib. Prezident İlham
Əliyevin söylədiyi kimi, 14 il ərzində iqtisadi
islahatlar baxımından Azərbaycan qədər sürətli
inkişaf yolu ilə gedən ikinci ölkə yoxdur.
Biz həmişə elan etmişik
ki, siyasi müxalifət şəxslərə, fərdlərə
qarşı qərəzli olmaq deyil. Əgər bir insan
ölkənin mənafeyinə uyğun fikir səsləndirirsə
və milli maraqlarımıza uyğun addım atırsa, onun yanındayıq.
Kimliyindən asılı olmayaraq ölkənin, xalqın əleyhinə
çirkin kampaniya aparanların isə
qarşısındayıq.
Mən ölkə Prezidentini vətənpərvər
insan kimi tanıyıram, şəxsiyyətinə
böyük hörmət edirəm. Ən azı bir misal
çəkmək yetərlidir. Beynəlxalq yarışlarda
Azərbaycan idmançıları medal qazanarkən
bayrağımız yüksək zirvələrə ucalanda cənab
Prezidentin sevincdən gözləri dolur. Bu, insan
üçün çox mühüm bir keyfiyyətdir.
Son dövrlər yaranmış
beynəlxalq qlobal çətinliklərə baxmayaraq, Azərbaycan
Prezidenti çox ciddi şəkildə cəsarətlə
islahatlara gedərək neftdən asılı olmayan büdcənin
formalaşması üçün əlindən gələni
etdi. Belə bir çətin məqamda bunu həyata
keçirmək riskli idi. Ancaq cənab İlham Əliyev bu
addımı atdı və xeyrini gördük. Yəni
dövlət başçısının bu addımı da təqdirəlayiq
haldır.
Ermənistan-Azərbaycan,
Dağlıq Qarabağ münaqişəsinin həlli istiqamətində
Azərbaycan Prezidentinin ortaya qoyduğu mövqe
xalqımızı hər zaman qürurlandırıb.
Çünki dünyanın ən güclü dövlətlərinin
təzyiqi olmasına baxmayaraq, cənab İlham Əliyev
çox açıq şəkildə xalqın milli iradəsini
ifadə edərək “Biz bir qarış da
torpağımızı güzəştə getməyəcəyik.
Qərbi Azərbaycanda Ermənistan dövləti qurulub, ikinci
Ermənistan dövlətinin qurulmasına razı
olmayacağıq, bütün imkanlardan istifadə edib
torpaqlarımızı geri qaytaracağıq”
çağırışını səsləndirməklə
öz qətiyyətli mövqeyini ortaya qoyub. Hesab edirəm ki,
bu, hamımızın milli iradəmizi ifadə edən bir
fikirdir. Elə buna görə də dövlət
başçısının bu prinsipiallığı ona
böyük rəğbət qazandırıb.
Azərbaycan Prezidentinin
bütün sahələrdə həyata keçirdiyi
islahatlar təqdirəlayiqdir. Cənab İlham Əliyev istər
idarəetmədə mərkəzləşdirmə, istərsə
də kompakt komanda yaratmaq və ixtisarlar aparmaqla
israfçılığın qarşısını
almağa çalışır. Korrupsiyaya qarşı mübarizədə
ciddi addımlar atan Prezident bu məsələdə geri
çəkilmir. Partiyalara ölkədə düşüncə
mübarizəsinin sağlam şəkildə
aparılmasına çağırışlar edir.
Ölkəmizdə heç kim
alternativ fikrə qarşı dayanmayıb. Daim imkan verilib ki, mətbuat
və partiyalar geniş şəkildə inkişaf etsin.
Ən yaxşı fikirlər hər zaman nəzərə
alınıb. Parlamentdə təmsil olunan partiya sədri kimi təkliflərimin
az qala 90-95 faizinin nəzərə
alındığını və həyata keçirildiyini
görürəm. Bu, həm də dözümlülük,
tolerantlıq, təşəbbüslərə yer vermək
baxımından Prezident tərəfindən atılan addım
kimi qiymətləndirilməlidır. Bir sözlə, İlham
Əliyev əsl liderdir.
Bir insan kimi cənab İlham
Əliyev gözəl ailə başçısıdır.
Çox səmimi, təvazökar bir insandır. Cənab
Prezidenti doğum günü münasibətilə təbrik
edirəm və ən xoş arzularımı
çatdırıram.
İlham
Əliyev Azərbaycanı dünyada güclü, modern və
nüfuzlu dövlət kimi tanıdıb
Tahir
KƏRİMLİ,
Milli Məclisin
deputatı,
Vəhdət
Partiyasının sədri:
- On ildən çoxdur ki, Vəhdət
Partiyası Prezident İlham Əliyevin strateji xəttinin
müdafiəsi haqqında qərar qəbul edib və daim buna
sadiq qalmışıq. Bunun da əsas səbəbi odur ki, həqiqətən,
ötən müddət ərzində məhz cənab
Prezidentin fəaliyyəti sayəsində Azərbaycanda sabitlik
və sürətli iqtisadi inkişaf təmin olunub. Hətta
dövlət başçısının müəyyənləşdirdiyi
iqtisadi strategiya sayəsində beynəlxalq qlobal böhran Azərbaycana
o qədər də təsir göstərmədi.
Ümummilli lider Heydər
Əliyevin layiqli davamçısı olduğunu sübuta
yetirən cənab İlham Əliyev Azərbaycanı çox
güclü dövlətə çevirdi. Onun rəhbərliyi
altında Azərbaycanın qazandığı nailiyyətlər
saysız-hesabsızdır. Azərbaycanın
reallaşdırdığı beynəlxalq əhəmiyyətli,
eləcə də Prezident İlham Əliyevin təşəbbüsü
ilə gerçəkləşməkdə olan layihələr
ölkəmizi dünya birliyinin aparıcı neft-qaz
ixracatçısına, mühüm tranzit-logistika məkanına
çevirib. Çindən Qərbi Avropaya, Hindistandan
Şimali Avropaya gedən dəmir magistrallar bu gün Azərbaycandan
keçir. Bütün bunlar cənab İlham Əliyevin təşəbbüsü
sayəsində reallaşıb. Artıq Azərbaycan
Prezidentini dünyada həm də təşəbbüskar
dövlət başçısı kimi tanıyırlar.
İlham Əliyev Azərbaycanı dünyada güclü,
modern və nüfuzlu dövlət kimi tanıdıb.
Cənab İlham Əliyevin həyata
keçirdiyi müstəqil siyasət sayəsində Azərbaycan
bölgədə, işğalçı Ermənistanı
çıxmaqla, bütün dövlətlərlə ikitərəfli
münasibət qurub və dünyada etibarlı tərəfdaş
kimi qəbul olunur. Böyük dövlətlər Azərbaycana
hörmətlə yanaşır və bəzi məsələlərdə
ölkəmizlə hesablaşırlar.
Bu gün İlham Əliyevin Azərbaycanda
həyata keçirdiyi iqtisadi islahatlar gələcəyə
nikbin baxmağa zəmin yaradır. Hazırda Azərbaycanın
42 milyard dollar valyuta ehtiyatları var. Bu da gələcək
üçün yaxşı imkanların
yaradılacağından xəbər verir. Son 14 ildə Prezident
İlham Əliyevin Ermənistan-Azərbaycan, Dağlıq
Qarabağ münaqişəsinin həlli isitiqamətində
gördüyü işlər, prinsipial siyasət də
xalqımız tərəfindən təqdir olunur. Bu müddət
ərzində dövlət başçısı
bütün beynəlxalq konfranslarda, ən ali tribunalarda Ermənistanın
işğalçı siyasətini ifşa edib. Artıq
dünya birliyi Azərbaycan həqiqətlərini qəbul
edir, ərazi bütövlüyümüzü tanıyır.
Əksər beynəlxalq təşkilatlar, böyük
dövlətlər bu işğalçı siyasəti
qınayan bəyanatlar qəbul ediblər. Beynəlxalq
hüquq tam Azərbaycanın tərəfində olduğundan
Ermənistan müharibəsiz işğal etdiyi
torpaqlarımızı geri qaytarmağa məcburdur.
Bütün bunlar cənab İlham
Əliyevin diplomatik bacarığı sayəsində
gerçəkləşib. Bunu bütün Azərbaycan
xalqı çox gözəl bilir. Ona görə də biz
xalqa layiqli xidmət edən dövlət
başçısının daim yanındayıq və Vəhdət
Partiyası prezident seçkilərində yenə də cənab
İlham Əliyevin namizədliyini müdafiə edəcək.
İlham
Əliyev Qarabağı Azərbaycana qaytaracaq
Araz
ƏLİZADƏ,
Milli Məclisin
deputatı,
Azərbaycan
Sosial-Demokrat Partiyasının sədri:
- Bu gün müstəqil Azərbaycan
dövləti sürətli iqtisadi inkişaf
dövrünü yaşayır. Son 14 ildə Prezident İlham
Əliyevin həyata keçirdiyi məqsədyönlü, qətiyyətli
və müstəqil siyasətlə Azərbaycan, sözün
əsl mənasında, mütəhərrik, demokratik və gələcəyini
görən qüdrətli dövlətə çevrilib.
Cənab Prezidentin beynəlxalq aləmdə
öz xalqının milli maraqlarını necə
qoruduğunun, müdafiə etdiyinin, Azərbaycanın haqq səsini
dünya birliyinə necə
çatdırdığının hələ illər
öncə şahidi olmuşuq. Prezidentin AŞ PA-dakı fəaliyyəti
zamanı konfrans zalında olanların əksəriyyəti Azərbaycanın
düşmənləri idi. Ancaq cənab İlham Əliyev dəqiq
arqumentlərə, tutarlı faktlara əsaslanaraq çox
gözəl çıxışlar edirdi. Ardınca isə
ona ünvanlanan suallara çox səlis və dəqiq cavablar
verirdi. Çıxışlarından sonra həmin şəxslərin
əksəriyyəti öz fikirlərini dəyişməsələr
də, qarşılarında güclü, qətiyyətli
siyasətçinin dayandığını etiraf edirdilər.
Bu, həqiqətən də, qürurverici idi. Bu gün Azərbaycan
Prezidentinin adı dünyanın sayılıb-seçilən
liderləri sırasında çəkilir.
Cənab Prezident həm də
gözəl ailə başçısıdır. Dövlət
başçısının xanımı, Azərbaycanın
Birinci vitse-prezidenti Mehriban xanım Əliyeva cənab İlham
Əliyevin ən böyük dəstəkçisidir.
Ötən ilin aprelində biz həm
də şahidi olduq ki, cənab Prezident eyni zamanda qüdrətli,
güclü Ali Baş Komandandır. Onun həyata
keçirdiyi ordu quruculuğu prosesi nəticəsində bu
gün Cənubi Qafqazın ən güclü, modern Silahlı
Qüvvələrinə sahibik. İndi hər kəs əmindir
ki, Azərbaycan Ordusu istənilən döyüş
tapşırığını yerinə yetirməyə
qadirdir. Hesab edirəm ki, aparılan sülh
danışıqları bir nəticə verməsə, cənab
İlham Əliyev öz xalqına, ordusuna güvənərək
işğal altında olan torpaqlarımızı müharibə
yolu ilə geri qaytaracaq. Gün gələcək, bunun da şahidi
olacağıq. Əminəm, İlham Əliyev Qarabağı
Azərbaycana qaytaracaq.
Ümumiyyətlə, hər bir
prezidentin öz fəaliyyət funksiyası var. Dövlət
başçısı xalqına layiqli xidmət etməli,
milli maraqları təmin edən siyasət yürütməli,
ölkəsini istənilən hücumlardan qorumalı və
siyasi-iqtisadi islahatlar həyata keçirməklə xalqın
sosial rifah halını yaxşılaşdırmalıdır.
Bütün bu xüsusiyyətlər cənab İlham
Əliyevdə var və 2003-cü ildə Prezident seçilərkən
“Mən hər bir vətəndaşın Prezidenti olacağam”
ifadəsini işlədən dövlət
başçısı öz fəaliyyəti ilə bunu
artıq sübuta yetirib.
Rəşad
BAXŞƏLİYEV,
Elnur HADIYEV,
Azərbaycan.-
2017.- 23 dekabr.- S.9.