Jurnalistlərin dostu və qayğıkeşi

İlham Əliyev mətbuatın müstəqilliyini daha da möhkəmləndirdi, medianın cəmiyyətdə nüfuzunun yüksəldilməsinə mühüm töhfə verdi

Prezident İlham Əliyev tərəfindən daha 255 jurnalistin yeni mənzillə təmin edilməsi mətbuat tariximizdə əlahiddə hal sayılmasa da, - çünki dörd il öncə 155 həmkarımız da yeni ev sevincini yaşamışdı, - bu, dünya miqyasında media sahəsinə aid ən mühüm olay idi.

İlham Əliyevin artıq ənənəyə çevirdiyi və Azərbaycan timsalında “növbəti qayğı və diqqət” kimi dəyərləndirilən proses beynəlxalq səviyyədə “analoqu olmayan təmənnasız humanist dəstək” aktı tək qarşılandı.

410 və daha 255 mənzil...

Əlbəttə, qələm əhlinin əmlakla mükafatlandırılması faktları bütün ölkələrdə var. Ancaq bu, istisnasız olaraq fərdi və kommersiya xarakteri daşıyır. Yəni konkret jurnalist hansısa qurumun, şəxsin qarşısındakı xidmətlərinə görə mükafatlandırılır və həmçinin bu yönümdə fəaliyyətini davam etdirməklə bağlı üzərinə yeni öhdəlik götürür.

Lakin Prezident İlham Əliyevin ötən dörd il ərzində yeni mənzil təqdim etdiyi 410 jurnalistin, həmçinin üç il sonra bu sevinci yaşayacaq daha 255 həmkarımızın mükafatlandırılmasında məhz mətbuat sahəsindəki fəaliyyəti, xidmətləri, həmçinin sosial ehtiyacları nəzərə alınıb.

İlham Əliyev heç bir yaradıcı baxış və fərdi siyasi mövqe nəzərə alınmadan jurnalistlər arasında mənzillərin ədalətli bölünməsini təmin edib, media mənsubları qarşısında heç bir öhdəlik qoymayıb. Əksinə, onları cəmiyyət həyatında rastlanan problemlərə qarşı daha prinsipial mövqe tutmağa, obyektiv tənqidi materialları, araşdırmaları artırmağa çağırıb.

Ən mühüm həqiqət odur ki, İlham Əliyev KİV əməkdaşlarına mənzil verməklə, əslində, onların müstəqillyini möhkəmləndirdi, şəxsi və yaradıcı azadlıqlarının hüdudlarını genişləndirdi. Yəni evlər artıq o jurnalistlərin şəxsi əmlakıdır, onların əlindən heç bir vəchlə alına bilməz.

Əgər evsiz və sosial problemləri olan qələm əhli hansısa məqamda müxalif mövqeyini ifadə etməkdə tərəddüd edə bilərdisə, artıq o, - problemləri həll olunmuş, əmlak sahibinə çevrilən, sabahına arxayın jurnalist heç nədən çəkinmədən iqtidarı da, Prezidenti də tənqid edə bilər. Necə ki, dörd il öncə Prezident tərəfindən mükafatlandırılan 155 jurnalist arasında bu gün də hakimiyyəti, ölkə rəhbərini kəskin tənqid edənlər var və hər gün onların müxalif mövqeli yazılarına rast gəlirik.

İlham Əliyev bu dəfə də yüzə yaxın müxalif, tənqidçi jurnalisti mənzillə mükafatlandırmaqla sübut etdi ki:

- Hakimiyyətin başçısı olmaqdan öncə, Milli Liderdir;

- Bütün vətəndaşlara, o cümlədən jurnalistlərə siyasi baxışlarına və seçkilərdəki mövqelərinə görə dəyər vermir, əksinə, onları ictimai-siyasi kontekstdə ayrı-seçkilik qoymadan qəbul edir, mükafatlandırır;

- Hər bir azərbaycanlının, həm də hər bir jurnalistin Prezidentidir;

- Azad sözün, azad mətbuatın və jurnalist azadlığının əsas təminatçısıdır;

- Mətbuatın qərəzli tənqidinə hiddətlənməyən möhkəm təmkin sahibi, obyektiv tənqidə həssas və diqqətli yanaşan rəhbər, ən əsası isə medianı ölkə problemlərini işıqlandırmağa səfərbər edən müdrik strateqdir…

Reallıq odur ki, İlham Əliyev media-dövlət, media-cəmiyyət münasibətlərinin sağlam əsasda müəyyənləşməsi prosesinə davamlı əməli töhfə verir. Həmçinin KİV-ə dövlət dəstəyini elə mükəmməl formada həyata keçirir ki, bu dəstək mətbuatı dövlətə-hakimiyyətə yaxınlaşdırmır, tam əksinə, əsl missiyasına - maarifçilik, informasiya və problemlərin işıqlandırılması platformasına yönləndirir.

Elə mənzillə mükafatlandırılan jurnalistlərin siyasi mənsubiyyət təsnifatını aparsaq, bu fikrimizi tam əsaslandıra bilərik. Məlum 255 jurnalistin böyük əksəriyyəti müstəqil mövqelidir, rəsmi mətbuat və iqtidaryönlü media mənsublarının sayı isə müxalif KİV-in əməkdaşları ilə tam eynidir.

Bir məqamı da unutmayaq ki, bu iki kütləvi mənzil təminatından əlavə ötən 14 il ərzində də onlarla jurnalist Prezident tərəfindən yeni evlərlə mükafatlandırılıb, onların sosial problemlərinin həllində əsaslı yardım göstərilib.

İlham Əliyev mətbuatı dövrün təlatümlərindən xilas edən böyük vətənpərvərdir

İlham Əliyevin növbəti dəfə “Jurnalistlərin dostu” elan edilməsi təbii qanunauyğunluqdur və qələm əhlinin ölkə rəhbəri tərəfindən həyata keçirilən mediaya dəstək siyasətinə verdiyi qiymətdir.

Prezident jurnalistlərin himayədarıdır. Heç bir KİV əməkdaşı yazısına görə azadlıqdan məhrum edilə bilməz - bu, İlham Əliyevin qərarı, məhkəmələrə tövsiyəsidir. Ölkə rəhbəri tərəfindən davamlı olaraq təkmilləşdirilən və bu gün dünyanın ən liberal hüquqi sənədlərindən sayılan “Kütləvi informasiya vasitələri haqqında” qanun məmləkətdə mətbu nəşr açmağı şəxsiyyət vəsiqəsi almaq proseduru qədər sadələşdirib.

Fəqət İlham Əliyev bununla kifayətlənmir, diqqəti əsas məsələyə - mətbuatda peşəkarlığın artırılmasına yönəldir, KİV-i mətbuatın dəyişməz məramı üzrə fəaliyyətə təşviq edir. Media sektoruna mütəmadi olaraq maddi dəstək göstərilir, yardım ayrılması prosesi sistemli forma alır, ölkənin 30-dan artıq qəzeti konkret istiqamətlər üzrə araşdırma aparmaları üçün dövlət vəsaiti ilə maliyyələşir. Çoxsaylı yaradıcı müsabiqələr jurnalistlərin fəaliyyətinin stimullaşmasına böyük töhfə verir.

İlham Əliyevin bu yönümlü təşəbbüsləri media əməkdaşlarının professionallığının yüksəldilməsinə və KİV-in üzləşdikləri maddi sıxıntılardan qurtulmasına xidmət edir. Tam əsasla demək olar ki, indiki dövrdə Azərbaycan mətbuatının mövcudluğu və müstəqilliyinin qorunması məhz Prezidentin KİV-ə dəstək siyasətinin nəticəsində mümkün olub.

Azərbaycanda söz azadlığının təmin olunması İlham Əliyevin uğurudursa, bəlkə də ölkə rəhbərinin bundan daha artıq nailiyyəti məhz mətbuatın müstəqillyinin təmin edilməsinə nail olmasıdır. Ölkə rəhbərinin qayğısı və himayəsi nəticəsində KİV-in xarici təsirlərin nəzarətinə keçməsi, məlum antiazərbaycançı şəbəkəninin ruporu olması, - bunlar bir müddət öncəyə qədər ölkə mediasında rast gəlinən adi hallar idi, - kimi proseslərin qarşısı alınıb.

Azərbaycan mediası artıq xaricdən maliyyələşib, antimilli fəaliyyət tribunasına çevrilmir. Əksinə, vətən, dövlət, xalq mənafeyinin fədakar təəssübkeşi, ən əsası isə beynəlxalq miqyasda Azərbaycan həqiqətlərinin fəal təbliğatçısıdır!

İlham Əliyev mətbuatı dövrün təlatümlərindən, ictimai burulğanlarından xilas edib, onu Azərbaycan platformasına çıxaran böyük vətənpərvərdir!

İlham Əliyev mətbuatın əsl cəfakeşi, jurnalistlərin böyük dostudur.

İlham Əliyev missiyası və jurnalistlərin şərəf borcu

Belə bir beynəlxalq deyim var ki, jurnalistin milliyyəti olmaz. O, hadisələrə yanaşanda milli, dini mənsubluğunu yox, gerçəkliyi və faktı əsas götürməlidir. Əlbəttə, bu fikri gündəmə gətirib, tirajlayan xarici təsisatların özlərinin maraqlarını ifadə etdikləri fövqəlgüclərin mənafeyini həyata keçirmək üçün hansı hoqqalardan çıxdığını, elə Azərbaycana, Dağlıq Qarabağ münaqişəsinə baxışlarını əsas götürsək, çox mətləbə aydınlıq gətirmiş olarıq.

Hər bir həmkarımız jurnalist olmaqla yanaşı, həm də azərbaycanlıdır. Azərbaycanda gedən proseslərin yalnız salnaməçi deyil, həm də müşahidəçisidir. Dövlətin müxtəlif sahələr üzrə fəaliyyətini təhlil etməklə yanaşı, onu bir vətəndaş olaraq da dəyərləndirir.

Bu baxımdan, Prezident İlham Əliyevə də yalnız ölkə rəhbəri kimi yanaşmırıq, bu şəxsiyyətin Azərbaycan üçün cahanşümul xidmətlərini dəyərləndirərək, onun beynəlxalq nüfuzunu qürurla seyr edərək əsl liderlik örnəyinin ətrafında sıx səfərbər oluruq!

İlham Əliyev tarixin bütün dövrlərinin ən möhtəşəm Azərbaycanını quran, möhkəmlədən, müstəqilliyi əbədiyyətə çevirən rəhbərdir!

İlham Əliyev sabahkı azərbaycanlıların bugünkü nəsildən daha yaxşı yaşamasına, daha qüdrətli ölkəyə malik olmasına çalışan, buna indidən nail olan dövlət xadimidir!

İlham Əliyev yalnız öz xalqının sabahını deyil, ümumiyyətlə, dünyanın sabahını - sivilizasiyaların perspektiv əməkdaşlığını, bəşəriyyətin daha xoşbəxt gələcəyini düşünən şəxsiyyətdir!

Təsadüfi deyil ki, Azərbaycan Prezidentinin adı son dövrlərdə az qala dünyanın siyasi trendinə çevrilib. İlham Əliyevin personası bu gün beynəlxalq səviyyədə ehtiramla qəbul olunur. Onunla hesablaşırlar, onun rəyini öyrənirlər, onun dostluğunu qazanmağa, onunla münasibət qurmağa çalışırlar. O, aparıcı xarici təşkilatların, fövqəldövlətlərin ən yüksək səviyyədə qarşılanan qonaqlarındandır.

İlham Əliyevin nüfuzu Azərbaycanın nüfuzudur və onu daha da möhkəmləndirən amil isə Prezidentin öz qətiyyətindən, prinsipiallığından zərrə qədər geri çəkilməməsidir!

Dövlətin nüfuzunu yalnız onun iqtisadi potensialı, hərbi gücü müəyyənləşdirmir. Ən azından, Azərbaycanın timsalında görürük ki, dünya xəritəsində nöqtə boyda yer tutan ölkəmizin nüfuzu, onun liderinin sözü qosqocaman dövlətçilik tarixinə, böyük iqtisadi-hərbi qüdrətə malik olan ölkələrdən daha artıq, daha əzəmətlidir!

Prezidentin konkret missiyası var: Heydər Əliyevin banisi olduğu müstəqil Azərbaycanı daha da inkişaf etdirmək, qüdrətləndirmək, dünya birliyinə sivil, modern dövlət kimi təqdim etmək. Bu gün Azərbaycan bölgənin güc mərkəzi və əsas söz sahibidir, Avropanın yeni enerji təhlükəsizliyi siyasətinin başlıca təminatçılarındandır, qitələri birləşdirən enerji və kommunikasiya dəhlizlərinin “strateji dispetçeridir”, ölkəmizi özlərinin marionet vassalına çevirmək istəyən fövqəldövlətlərin arzularını gözündə qoyaraq onlarla strateji müttəfiqlik yaradan respublikadır, ən nəhayət, azad və firavan yaşayan, rəhbərinə və dövlətinə güvənən xalqın qüdrətli dövlətidir. Bütün bu faktlar Prezident İlham Əliyevin fəaliyyət hesabatının yalnız bir hissəsidir. Ümumiyyətlə isə ölkə rəhbərinin fəaliyyəti bütünlüklə inkişaf göstəricisidir!

İlham Əliyev yalnız sayı 10 milyona yaxınlaşan vətəndaşlarının deyil, ümumiyyətlə, 50 milyonluq xalqının hər br üzvünün rəhbəri, lideridir. O, bunu tək şərəfli status kimi qəbul etmir, bu, rəhbərimiz üçün həm də xüsusi məsuliyyətdir. 50 milyon insanın müqəddəratına cavabdeh olmaq, onların hansı dövlətdə yaşamasından asılı olmayaraq hər birinin taleyilə maraqlanmaq, qayğısına qalmaq, yaşamına yardım göstərmək İlham Əliyevin əsl missiyasının Prezidentlikdən də üstün olmasına dəlalət edir.

İlham Əliyev tarix yaradan liderdir!

Onun yaratdığı tarix möhtəşəm olduğu qədər də, bu gün tam mahiyyəti ilə açılması mümkün olmayan uğurlu proseslərin salnaməsidir. Buna zaman lazımdır. Vaxt ötdükcə, 2003-2017-ci illəri tariximizin intibah dövrü kimi daha dəqiq, obyektiv, müfəssəl öyrənəcək, dəyərləndirəcəyik.

Prezident İlham Əliyev şərəfli bir missiya yürüdür - ləyaqətlə, uğurla və məsuliyyətlə!

Bu missiyasında ölkə rəhbərinə daim dəstək vermək, onunla bərabər yürümək, ətrafında səfərbər olmaq vətəndaşlıq vəzifəmizdir, biz jurnalistlər - dövrün salnaməçiləri üçün isə həm də şərəf borcudur...

İxtiyar HÜSEYNLİ

Azərbaycan.- 2017.-22 iyul.- S.1; 5.