Media nümayəndələrinin sosial problemləri dövlət tərəfindən həll edilir

Jurnalistlər Prezident İlham Əliyevin humanist missiyasının onların məsuliyyətlərini daha da artıracağını deyirlər

Media işçilərinin sosial müdafiəsinin gücləndirilməsi ilə bağlı dövlət başçısı tərəfindən imzalanan sərəncamlar təbii olaraq media ictimaiyyəti tərəfindən böyük rəğbətlə qarşılanır. Bu istiqamətdə ilk sərəncam 2010-cu ildə milli mətbuatımızın 135 illiyi ərəfəsində imzalandı.

Sərəncama uyğun olaraq mətbuat işçilərinin mənzil-məişət şəraitinin yaxşılaşdırılması məqsədilə Xəzərin sahilində, gözəl şəhər mənzərəsi olan yerdə ilk binanın tikintisinə başlanıldı. Milli mətbuatın 138 illiyində həmin binanın açılışı oldu. 17 mərtəbəli, ikibloklu, 155 mənzilli bina jurnalistlərin istifadəsinə verildi.

Nəhayət, 2013-cü ildə Prezident İlham Əliyev “Azərbaycan mətbuat işçilərinin sosial müdafiəsinin gücləndirilməsinə dair əlavə tədbirlər haqqında” növbəti sərəncam imzaladı. Son illər dünyada müşahidə olunan iqtisadi böhranlara və bunun Azərbaycan iqtisadiyyatından da yan keçməməsinə baxmayaraq, Prezident İlham Əliyev bu məsələni yenə diqqət mərkəzində saxladı. Nəticədə jurnalistlər üçün 17 mərtəbəli, üçbloklu, 255 mənzilli 2-ci binanın tikintisi reallaşdı. İyulun 20-də isə Prezidenti İlham Əliyevin də iştirakı ilə jurnalistlərin sosial durumunun yaxşılaşdırılmasına xidmət edən bina ehtiyacı olan media nümayəndələrinin ixtiyarına verildi. Heç şübhə yoxdur ki, bu xeyirxahlıq əməli təkcə 255 nəfəri yox, o qədər də ailəni, dostu-tanışı sevindirdi.

Mətbuat Şurasının sədri, Milli Məclisin deputatı Əflatun Amaşov dövlət başçısının bu nəcib, humanist addımını yüksək qiymətləndirərək yüzlərlə jurnalist ailəsinə mənzil sevinci bəxş etdiyi üçün media ictimaiyyəti adından Prezident İlham Əliyevə dərin təşəkkürünü bəyan etdi. Onun sözlərinə görə, hər bir vətəndaş üçün Prezidentin onu qiymətləndirməsindən gözəl yaşantı və qürur ola bilməz: “Razılaşaq ki, jurnalistin özünə mənzil alması çox çətindir. Bu çətinliyə və jurnalistikanın spesifik sahə olduğuna görədir ki, həmkarlarımızın mənzillərlə təminatı məsələsi gündəmə gəlib”.

Ə.Amaşov əminliklə deyir ki, jurnalistlər üçün yeni binadakı mənzillərin bölgüsünə prinsip etibarilə tam ədalətli və vicdanlı yanaşılıb. Bu yanaşma cənab Prezidentin iradəsindən irəli gələn müstəsna tələbdir: “Bu, ölkə rəhbərinin başçılığı ilə Azərbaycan dövlətinin media siyasətinin mühüm göstəricisidir. Nəzərə alaq ki, dünyanın heç bir yerində jurnalistlərin dövlət hesabına mənzillə təmin edilməsinə dair ölkəmizdəki kimi təcrübə yoxdur. Bu təcrübənin qüsursuzluğu, faydalılığı və nümunəviliyi göz önündədir. Odur ki, dəyərli həmkarlarımızın, dostlarımızın xoş gününə sevinməliyik”.

Mənzil alan jurnalistlərin isə sevinclərinin həddi-hüdudu yoxdur. Onlar bu şad günlərinin xoş təəssüratlarını bizimlə də bölüşdülər:

“Şəraiti olan jurnalist gücünü ancaq yaradıcılığa verəcək”

İradə Sarıyeva,

“Bakı-Xəbər” qəzetinin əməkdaşı:

- Azərbaycan dövlətinin jurnalistlərə qayğısı illərdir ki, ənənə halını alıb. Media təmsilçiləri bu hərtərəfli qayğını öz həyatlarında hiss edir. Ölkəmizdə jurnalistlərin mənzillə təmin olunması, dövlətin media mənsublarına təmənnasız mənzil verməsi olduqca nümunəvi bir haldır. Uzun illər kirayələrdə həyat sürən jurnalistlərin evlə təmin olunması doğrudan da onların sosial-məişət qayğılarından uzaqlaşaraq yaradıcılığa daha möhkəm bağlanmasına səbəb olacaq. Mənzili olan jurnalist gücünü ancaq yaradıcılığa yönəldəcək, dövlətə, dövlətçiliyə daha çox fayda verməyə çalışacaq. Bizə bu sevinci yaşadan ölkə rəhbəri İlham Əliyevə təşəkkür edirəm.

Mən uzun illərdir həyat yoldaşım və azyaşlı oğlumla şəraitsiz, rütubətli evdə kirayədə yaşayıram. Bu gün isə dövlət tərəfindən mənzillə təmin olunan 255 jurnalistin içində mən də varam. Prezident mənə ev verməklə sosial qayğılardan xilas etdi. Ona görə də dövlət başçımıza dönə-dönə təşəkkür edirəm, artıq mən də qaranlıq, rütubətli, təmirsiz kirayə mənzildən çıxıb özümün geniş, işıqlı mənzilimə qovuşacağam.

“Ölkə başçısı jurnalistlərə həqiqətləri yazın dedi”

Elşad Paşasoy,

“Yeni Müsavat” qəzetinin parlament müxbiri:

- Budəfəki peşə bayramımız da çox əlamətdar hadisə ilə yaddaqalan oldu. Dörd il əvvəl mənzil sahibi olan 156 media təmsilçisinin ardınca Prezident İlham Əliyevin sərəncamı ilə jurnalistlər üçün inşa olunmuş ikinci binadan daha 255 media təmsilçisi dövlətimizdən mənzil hədiyyəsini məmnunluqla qəbul etdi. Bu, sıradan bir hadisə deyil. Bu, bəzilərinin iddia etdiyi kimi, dövlətin, hakimiyyətin mətbuatı susdurmaq, yaxud tənqidi medianı neytrallaşdırmaq siyasəti də demək deyil. Əksinə, belə bir addım dövlətin medianı stimullaşdırması, tənqidi medianın daha da cəsarətlə ölkəmizdəki neqativlərin üzərinə getməsinə həvəsləndirməsi, Azərbaycanın daha da inkişaf etmiş, demokratik, firavan ölkəyə çevrilməsi istiqamətində töhfə verməsi üçün verilən mesajdır. Bunun əksini düşünənlərə dövlət başçısının elə mənzillərin təqdimatı mərasimində səsləndirdiyi fikirlərə diqqət yetirməyi məsləhət görürəm. Cənab Prezident jurnalist ordusuna xitabən “düzü düz, əyrini əyri” yazmaq çağırışı etdi. Prezidentin “...jurnalistlər bəlkə də özləri də bilmədən mənim köməkçilərimdir” deməsi əslində mətbuata verilən yüksək qiymət, həmçinin jurnalistlərin üzərinə qoyulan məsuliyyətdir. Ölkə başçısı jurnalistlərə “həqiqətləri yazmayın” demədi, əksinə, “Əminəm ki, siz gələcəkdə də bütün cəmiyyəti narahat edən, incidən məsələlər haqqında yazacaqsınız, harada hansı ədalətsizlik var, qanunsuzluq var, dərhal operativ reaksiya verəcəksiniz, cəmiyyətin və dövlət orqanlarının diqqətini bu məsələlərə cəlb edəcəksiniz” söylədi. Hətta buna görə mətbuata minnətdarlığını da bildirdi.

Prezident sərəncamı ilə tikintisinə başlanılan və üç il sonra istifadəyə veriləcək üçüncü binanın açılış törəni həm də mətbuatımızın qarşıya qoyulan vəzifələrlə əlaqədar hesabat dövrü olacaq. Dünyanın heç bir ölkəsində jurnalist Prezidentin köməkçisi statusunda qəbul olunmur, bu dəyər Azərbaycanda verilir. Belə bir şəraitdə mətbuat nümayəndələrinin üzərinə düşən yeganə vəzifə peşə borcunu yerinə yetirməkdir. Sonda bir daha mənzil sahibi olan həmkarlarımızı ürəkdən təbrik edirəm, cənab Prezidentə, bu böyük işdə zəhməti olan hər kəsə minnətdarlığımı bildirirəm.

“Bu hədiyyənin mənim üçün mənəvi dəyəri ölçüyəgəlməzdir”

Qafar Çaxmaqlı,

müstəqil jurnalist:

- Jurnalistika sahəsində uzun illər göstərdiyim fəaliyyət hədər getmədi. Mənim ailəmi mənzillə mükafatlandırdığı üçün Azərbaycan Prezidenti İlham Əliyevə dərin təşəkkürümü bildirirəm. Bu hədiyyənin mənəvi dəyəri də ölçüyəgəlməzdir. Bu, məni rəqiblərimizlə apardığımız ideoloji savaşda bundan sonra daha qərarlı addımlar atmağa sövq edəcək. Prezidentin bu diqqəti Azərbaycanımız üçün qarşıya qoyduğumuz məqsədləri reallaşdırmağımıza daha bir stimul olacaq, şəxsən məni beynəlxalq arenada daha qətiyyətli mübarizə aparmağa ruhlandıracaq.

Müraciətimə diqqətlə yanaşan, bu işdə obyektivlik nümayiş etdirən insanlara sağ olun deyirəm... Mənim bu sevincimə şərik olan hər kəsə təşəkkürümü bildirirəm.

“Həm seçildik, həm də daha məsuliyyətli olmağın ciddiliyini anladıq”

Jalə MütƏllimova,

müstəqil jurnalist:

- Mənim üçün seçdiyim peşə çox gözəl olsa da, bu sahə biznes, pul qazanmaq üçün uğurlu deyil. Yəni ən yaxşı olan, seçilən jurnalist belə biznesmen kimi yaşamır. Bu mənada hətta tanınan jurnalistlərin belə maddi və maliyyə problemi üzündən mənzilsizlik qayğıları olur. Ölkə Prezidentinin mənzil mükafatına layiq görülənlər arasında mən də varam. Əsas o deyil ki, mənə neçə otaqlı mənzil bağışlandı, əsas odur ki, iyirmi dörd illik fəaliyyətimə diqqət yetirildi, araşdırıldı, üstün tutuldu və dəyərləndirildi. Bu, son dərəcə xoş, sevincli duyğudur.

Jurnalistlərə mənzillərin verilməsi onun özündən çox övladının probleminin çözülməsidir. Mənim üçün isə sonrakı fəaliyyətim müddətində böyük məsuliyyətdir. Bu, Azərbaycan dövlətinin mesajıdır: “Sən diqqət mərkəzindəsən!”, “Sən lazımsan!”, “Sənin dediyin sözün önəmi var!” Mənzillərin təqdimatı mərasimində Azərbaycan Prezidenti cənab İlham Əliyevin çıxışında xüsusi məqamlar var idi. Daha çox diqqətimi çəkən “...jurnalistlər bəlkə də özləri də bilmədən mənim köməkçilərimdir” deməsi oldu. Bu, ölkə Prezidentinin baş verənləri olduğu kimi göstərmək təklifi idi. Bu həm də yazarları daha məsuliyyətli olmağa çağırış idi. O üzdən biz təkcə mükafat almadıq, həm də seçildik və daha məsuliyyətli olmağın ciddiliyini anladıq. Tanrı bizi ölkə, vətən və dövlət qarşısında utandırmasın!

Bu, mənim bütün həyatım boyu yaşadığım səmimi duyğumdur. Artıq daha çox inanıram, ədalət var və mütləqdir. Buna inanıb seçdiyim həyat tərzi çətin olduğu qədər doğru seçim imiş. İnsan ona dəyər verildiyini görəndə daha qüdrətli olur, böyük işlər görməyi arzulayır. Hər sınaqdan qalib çıxacağına əmin olur və çıxır da. Odur ki, deyirəm: cənab Prezident, bu özgüvəni bir qadın, vətəndaş və jurnalistdə daha da möhkəmləndirdiyiniz üçün Sizə minnətdaram.

“Artıq dostlarımı, qohumlarımı ürəklə öz evimə dəvət edə biləcəm”

Lalə Mehralı,

müstəqil jurnalist:

- 16 il televiziya və mətbuatda çalışan, evləndikdən sonra 13 ildir kirayələrdə yaşayan, çox ağır şəraitdə iki övlad böyüdən bir ana kimi həyatımın ən xoşbəxt gününü iyunun 20-si hesab edirəm. Həmin gün hörmətli Prezidentin jurnalistlər üçün inşa etdirdiyi 2-ci binadan mənzillərin paylanması mərasimində bizim ailə də o xoşbəxt anları yaşadı. Həyat yoldaşım 20 ildir mətbuatda çalışıb, həyatının 40 ilini kirayələrdə yaşayıb, kirayədə doğulub, kirayədə böyüyüb. Bir jurnalist ailəsi olaraq biz bütün bu müddətdə vicdanla, heç bir təmənna güdmədən işləmişik, ev məsələsindən çox-çox illər əvvəl öz fəaliyyətimizlə milli dövlətçiliyimizə, xalqımızın maariflənməsinə töhfəmizi verməyə çalışmışıq. Bunun dövlətimiz tərəfindən ən yüksək səviyyədə qiymətləndirilməsi təkcə bizə yox, yüzlərlə həmkarıma da diqqət və qayğının hansı səviyyədə olduğunu aydın ifadə edir. Mənzillərin paylanması mərasimində Prezident İlham Əliyevin jurnalistlərlə mehriban söhbətləşməsi, bizimlə xatirə şəkli çəkdirməsi həyatımızın ən xoş anları idi. Bu elə bir hissdir ki, hətta peşəkar jurnalist belə onu ifadə etməkdə çətinlik çəkir.

Artıq övladlarımın “ana, bizim niyə evimiz yoxdur, niyə başqa adamın evində qalırıq, niyə pulumuzun çoxunu ona veririk” kimi suallarına cavab verə bilməyəndə bir kənara çəkilib ağlamayacam, onlara ürəklə “dövlətimiz və cənab Prezidentimiz sizin nümunəvi vətəndaş kimi formalaşmağınızı, vətənə və xalqa layiqli övlad olmağınız üçün bu geniş və işıqlı evdə sağlam böyüməyinizi istədi” deyə biləcəm. Kirayəyə hər ay ödədiyim pulu övladlarımın təhsilinə sərf edə biləcəm. Artıq dostlarımı, qohumlarımı ürəklə öz evimə dəvət edəcəm. Bir sözlə, normal insan kimi yaşaya biləcəyik. Bu səbəbdən də xalqımızın maarifləndirilməsi, Azərbaycan həqiqətlərinin dünyaya çatdırılması, informasiya müharibəsində daha yaxşı mübarizə apara bilməmiz mümkün olacaq. Dövlətimizin, onun rəhbərinin əsas məqsədi də budur. Mənzillərin obyektiv və şəffaf şəkildə bölüşdürülməsinə, haqqı və ehtiyacı daha çox olanların düzgün seçilməsinə görə Prezidentə çox sağ olun deyirəm. Tanrı həmişə köməyiniz olsun...

Elgün MƏNSİMOV

Azərbaycan.- 2017.-23 iyul.- S.4.