Jurnalistlərin mənzil problemlərinin həlli böyük xeyirxahlıqdır

Nəinki media adamları, bütövlükdə cəmiyyət bu hadisəni böyük minnətdarlıqla qarşıladı

Jurnalistlərin sosial müdafiəsinin gücləndirilməsi ilə bağlı dövlət başçısı tərəfindən imzalanan müvafiq sərəncamlar media ictimaiyyəti tərəfindən böyük rəğbətlə qarşılanır. Bu istiqamətdə ilk irimiqyaslı sərəncam 2010-cu ildə milli mətbuatımızın 135 illiyi ərəfəsində imzalandı. Sərəncama uyğun olaraq mətbuat işçilərinin mənzil-məişət şəraitinin yaxşılaşdırılması məqsədilə Xəzərin sahilində, gözəl şəhər mənzərəsi olan yerdə ilk binanın tikintisinə başlanıldı. 2013-cü ildə 17 mərtəbəli, ikibloklu, 155 mənzilli bina jurnalistlərin istifadəsinə verildi.

Elə həmin ildə Prezident İlham Əliyev “Azərbaycan mətbuat işçilərinin sosial müdafiəsinin gücləndirilməsinə dair əlavə tədbirlər haqqında” növbəti sərəncam imzaladı. Nəticədə jurnalistlər üçün 17 mərtəbəli, üçbloklu, 255 mənzilli 2-ci binanın tikintisi reallaşdı. İyulun 20-də isə Prezident İlham Əliyevin də iştirakı ilə jurnalistlərin sosial durumunun yaxşılaşdırılmasına xidmət edən binadakı mənzillər ehtiyacı olan media nümayəndələrinin ixtiyarına verildi.

Mənzil alan jurnalistlərin sevinclərinin həddi-hüdudu yoxdur. Onlar bu şad günlərinin, sevincli anlarının xoş təəssüratlarını bizimlə də bölüşdülər:

“255 evdə, 255 ailədə işıq yandırmaqdan böyük, nəcib iş ola bilməz”

Qulu Ağsəs,

“Ulduz” jurnalının baş redaktoru

- Mətbuat Şurasının yeni binasının açılışında jurnalistlərin mənzil problemlərinin yaxşılaşdırılması ilə bağlı Prezident İlham Əliyevə xoş bir niyyət kimi təklif səsləndirildi. Əlbəttə, bu elə bir məsələ idi ki, reallaşa da bilərdi, reallaşmaya da. Çünki dünyada belə bir anoloji hal yox idi ki, jurnalistlərin sosial problemlərini həll etmək üçün onlara bina tikilib verilsin. Amma cənab Prezident bu təklifə gözlənildiyindən daha isti, daha səmimi reaksiya verdi.

Birinci binadakı bölgü zamanı açıq-aydın göründü ki, ev verilən jurnalistlərin siyasi baxışları, Azərbaycan hakimiyyətinə qarşı mövqeyi fərqinə varılmadı. Əsas məsələ jurnalistlərin evsizlik problemi idi. İkinci binanın bölgüsü zamanı da bu prinsip əsas götürüldü. Xəbər verildiyi kimi, növbəti binanın da təməli qoyulub. Bu dəfə də rəsmi şəkildə açıqlandı ki, ev verilən və ya veriləcək jurnalistlərin siyasi mövqeyi, əqidəsi qətiyyən nəzərə alınmır. Çünki ev alanların içərisində nə qədər istəsəniz Azərbaycan hakimiyyətinə müxalif olan qələm adamlarına rast gəlmək olar. Onlar yenə də öz mövqelərindədirlər. Hətta ev alanlar sırasında elələri var ki, siyasi baxışlarının fərqli olmasına görə onlara ev verilməyəcəyini bəyan edən statuslar da paylaşırdılar. Amma evlər paylanıldıqdan sonra ədalətin bir daha şahidi olduq, nəinki mətbuat adamları, bütövlükdə cəmiyyət bunu böyük sayğı və sevgiylə qarşıladı.

Mənim uzun illər idi ki, mənzil problemim vardı. Biz köhnə “xruşovka” deyilən binada birotaqlı mənzildə yaşayırdıq. Yazıçılar Brliyində düz 18 il idi ki ev növbəsində dayanmışdım. İş elə gətirmişdi ki, mənzil sahibi ola bilməmişdim. Ona görə üç namizədlə Kütləvi İnformasiya Vasitələrinin İnkişafına Dövlət Dəstəyi Fonduna müraciət etdik. Amma sonda bir nəfərə-mənə mənzil nəsib oldu. Təbii ki, bu mənim üçün çox gözlənilməz oldu. Həyat yoldaşımın jurnalist olması da nəzərə alındı, Bu, mətbuat günü ərəfəsində ailəmizin ən böyük hədiyyəsi idi.

Bu evin özəlliyi ondadır ki, bunu Prezident bağışlayıb. Təbii ki, Prezidentin verdiyi ən kiçik hədiyyə belə ən böyük dəyər sayılır. Həm ailəm adından, həm də bizim sevincimizi bölüşən dostlarım və qohumlarım adından cənab Prezidentə təşəkkür edirik, ona uzun ömür arzulayırıq. İki-üç ildən sonra da görün nə qədər jurnalistə mənzil veriləcək. Bu, dünyada analoqu olmayan çox yüksək xeyirxahlıqdır. 255 evdə, 255 ailədə işıq yandırmaqdan böyük, nəcib iş ola bilməz...

“Xidməti olanlar mükafatlandırıldı”

Xalid Kazımlı,

“Yeni Müsavat” qəzetinin redaktoru

- Jurnalistlərə paylanası mənzillərlə bağlı keçirilən mərasimdə arxa sıralarda oturmuşdum. Mən tribunada çıxış edən Prezident İlham Əliyevi görürdüm, amma o, məni təbii ki, görmürdü. Ancaq bir ara mənə elə gəldi ki, Prezident sırf məni nəzərdə tutaraq bir cümlə işlətdi. Həmin cümlə beləydi ki, bəzi jurnalistlərin müxalif siyasi partiyaların üzvü olmasına baxmayaraq, ayrı-seçkilik etmədik, tənqidçi jurnalist olub-olmamaları bu seçimdə rol oynamadı. Hətta yanımda oturan tanınmış jurnalist də dirsəyimə toxundu ki, “səni deyir”.

Mərasimdə çoxlu tanış sima gördüm. Aralarında 20-25 il, hətta 30-40 il öncədən tanıdıqlarım vardı. İlqar Əlfi ilə söhbətləşdik. Onun 35 il öncə yazdığı “Xof” povestini xatırladıq. Müstəqil mediamızın təəssübkeşlərindən olan Hüseynbala Səlimovu, Bahəddin Həziyevi, Azər Rəşidoğlunu mərasimdə görmək xoş idi. Bu, onların da mükafatlandırılacağı anlamına gəlirdi.

Ehtiyacı olan şəxslər isə çox idi. Bu tədbir təkcə evsizlərə ev paylamaq mənası daşımırdı, bu, əsasən ölkə mediasının inkişafında rolu olan, uzun illər parlaq yazılara imza atan mətbu ustaların mükafatlandırılması idi. Biz mənzil şəraitinin yaxşılaşdırılması bəndindən yararlanan qrupdan idik. Mənzillər bölüşdürülərkən diqqət etdik ki, bu barədə siyasi qərar verənlər hər şeyi diqqətlə, yerli-yataqlı incələyiblər, çox adama bəlli olmayan detalları öyrəniblər və nəzərə alıblar. Elə olmasaydı, hazırda gözləntisi olmayan şəxslərə mənzil verilməzdi, jurnalist cütlüklər nəzərə alınmazdı.

Bəziləri deyir ki, bu aksiya jurnalistlərin ələ alınmasıdır. Elə şey yoxdur. Mərhum jurnalist İbrahim Bayandurlu (eləcə də digər mərhum həmkarlarımız) neçə ildir həyatda yoxdur, onların ələ alınmasından, susdurulmasından necə söhbət gedə bilər?! Eləcə də veteran jurnalistlər. Artıq yazmırlar. Onlardan mədh uman da yoxdur. Təkcə elə onlara görə bu siyahını gerçəkdən də “möhtəşəm siyahı” adlandıranlar haqlıdırlar.

Özümə gəlincə, deyim ki, mən tənqidçi jurnalist olaraq qalacağam. Məndən mədhiyyə tələb edən yoxdur. Üstəlik, Prezident jurnalistlərin ölkədəki neqativ hallardan yazmalarına yaşıl işıq yandırdı. Bir daha bizim mənzil sahibi olmağımızda rolu olan, buna görə sevincini bölüşən hər kəsə, ilk növbədə isə Prezident İlham Əliyevə təşəkkürümü bildirirəm.

“Səbr həm də uğurun açarıdır”

Arzu Şirinova,

“Xalq cəbhəsi” qəzetinin redaktoru:

- Artıq kirayə qalmağa əlvida dedim! Bu sevinci mənə, ailəmə, balalarıma yaşatdığınız üçün var olun, cənab Prezident! Dualarını əskik etməyən, bu gün sevincimə şərik olan dostlarıma, “Xalq Cəbhəsi”nin rəhbərliyinə minnətdaram. Mənzil alan bütün həmkarlarımı təbrik edirəm, almayanlara da bu sevinci yaşamağı arzulayıram. Ev ala bilməyən həmkarlarımın, bəzən narazılıqlarını sosial şəbəkələrdən oxuyuram. Bəziləri də mənim 4 il bundan əvvəl etdiklərimi - ev alanları təbrik edib, uğurlar arzulayır, xeyir-dualarını verir, sevinclərinə şərik olurlar. Mənzil ala bilməyənlərə isə səbrli olun deyirəm. Çünki səbr həm də uğurun açarıdır.

Əziz həmkarlar, məni və siyahıda digər adı keçən dostlarınızı ürəkdolusu təbrik edin ki, üç ildən sonra siz də qarşılığını alasınız. Mənzil alan hər bir jurnalisti təbrik edirəm və bunun sevincini yaşamağı arzulayıram!

“Sizi mənzil almağınız münasibəti ilə təbrik edirik” zəngi gələndə...

Fazil Əhməd,

“Reytinq” qəzetinin baş redaktor müavini

- Prezident İlham Əliyevin “Azərbaycan mətbuat işçilərinin sosial müdafiəsinin gücləndirilməsi tədbirləri haqqında” 22 iyul 2013-cü il tarixli sərəncamı əsasında inşa edilmiş çoxmərtəbəli yaşayış binasından mənə də mənzil ayrılıb. Əlbəttə, bu, ilk növbədə cənab Prezidentin, dövlətin, mətbuata, onun əməkdaşlarına, bütövlükdə jurnalistlərə yüksək diqqət və qayğısının təzahürü olmaqla yanaşı, həm də yüzlərlə ailənin böyük və əsas probleminin həlli deməkdir. Şəxsən mən buna görə 17 il işlədiyim “Reytinq”in kollektivi və bütövlükdə həmkarlarım adından bir daha ölkə Prezidenti cənab İlham Əliyevə dərin təşəkkürümü bildirirəm.

Bilirsiniz, bəzən insanın həyatında elə anlar olur ki, onu sözlə ifadə etmək mümkün deyil. Cənab Prezident bizə o unudulmaz anları yaşatdı. Təkcə 255 jurnalisti deyil, onların ailələrini, övladlarını, bütün qohum-əqrəbalarını sevincə qərq etdi. İnanın, Prezident Administrasiyasından “Sizi mənzil almağınız münasibəti ilə təbrik edirik” zəngi gələndə, ailəmdə yaşanan o sevinci təsəvvür etmək mümkün deyildi. Prezident İlham Əliyev 255 jurnalistə və onların ailə üzvlərinə sözlə ifadə edilməyəcək hədsiz sevinc yaşatdı. İnanırıq ki, “Siz jurnalistlər mənim qeyri-rəsmi köməkçilərimsiniz” deyən cənab Prezident hər zaman olduğu kimi, bundan sonra da öz diqqət və qayğısını jurnalistlərin üzərindən əsirgəməyəcək.

Elgün MƏNSİMOV,

Azərbaycan.- 2017.- 28 iyul.- S.2.