Azərbaycanla Mərakeş arasında əməkdaşlıq
əlaqələri genişlənir
İslam Həmrəyliyi
ili - 2017
Qədim və zəngin mədəniyyətə malik olan Mərakeş bu gün Afrikanın ən çox inkişaf edən ölkələrindən olmaqla yanaşı, İslam dünyasının da mühüm subyektlərindən biridir. Ölkə əhalisi hər il iyulun 30-nu başlıca milli bayram - Taxt-Tac Günü kimi qeyd edir. Həmin gün eyni zamanda Kral VI Məhəmmədin taxta çıxmasının növbəti ildönümü də bayram edilir.
Ölkədə XVI əsrdən bəri hakimiyyətdə olan Ələvilər sülaləsinin nümayəndəsi Kral VI Məhəmməd Mərakeş tarixində xüsusi şəxsiyyətdir, ölkənin ictimai-siyasi sisteminin başlıca təsisatçısı olmaqla yanaşı, həm də böyük nüfuz və hörmət sahibidir. Məhəmməd Peyğəmbərin bilavasitə nəslindən olan Mərakeş Kralı dünyəvi hakimiyyətlə yanaşı, həm də ali dini hakimiyyətə də malikdir və “Əmir əl-Möminin” titulunu daşıyır. Əsas Qanuna görə, kral ölkənin müstəqilliyinin və bütövlüyünün, həmçinin öz vətəndaşlarının şəxsi azadlığının təminatçısı kimi çıxış edir.
Afrikanın şimal-qərbində yerləşən Mərakeş Krallığı həm Afrikada, həm də beynəlxalq münasibətlər sistemində mühüm strateji əhəmiyyət kəsb edir. Ölkənin adı ərəbcə “Tanrı ölkəsi” mənasını verir. Əhali isə öz ölkəsini “Əl-Məğrib” adlandırır. Son əsrlər ərzində böyük dövlətlərin hərbi müdaxiləsinə məruz qalan Mərakeş 1901-ci ildə Fransa tərəfindən işğal edilsə də, 1956-cı ildə öz istiqlaliyyətini bərpa etmiş, 1976-cı ildə isə Qərbi Saxaranı İspaniyadan geri almışdır.
XXI əsrin əvvəlləri bir sıra ərəb ölkələri üçün təlatümlü olsa da, sosial-iqtisadi sahədə Mərakeş üçün islahatlar və tərəqqi dövrü oldu. Ərazisinə görə Misir və Sudandan sonra üçüncü böyük ərəb dövləti olan Mərakeş xalq təsərrüfatının inkişaf etdirilməsi üçün əlverişli şəraitə malikdir. Ölkə varlı olmasa da, tədrici iqtisadi artım və sabitliklə xarakterizə olunur. Maraqlıdır ki, bütün dünya iqtisadiyyatı qlobal böhranın təsirinə məruz qaldığı bir dövrdə bu cür artım kənd təsərrüfatı sahəsində 26 faizə bərabər idi. Əlverişli hava şəraiti ilə əldə edilmiş bu yüksəliş xalq təsərrüfatının digər sahələrindəki tənəzzülün yerini doldurmuşdu.
Ölkənin ümumi təsərrüfat şəraitinin inkişafında kənd təsərrüfatı mühüm rol oynayır. Torpaqları münbit, təbiəti gözəl olduğundan bu sahə də çox inkişaf edib. Ümummilli məhsulun həcmində onun payı 15 faizə çatır. Ölkə əhalisinin 40 faizi kənd təsərrüfatı sahəsində çalışır.
Ölkə həyatında
sənaye və xidmət sahələrində də tədrici
canlanma müşahidə olunur.
Dağ-mədən sənayesi başlıca olaraq
fosfat emalı ilə təmsil olunur. Dünyada mövcud olan 50 milyard ton fosfat ehtiyatının 21 milyard tonu Mərakeşin payına düşür. Fosfat xammalı,
fosfor turşusu və gübrə ixracı ölkənin mühüm gəlir mənbələri hesab olunur.
Mərakeşin iqtisadi inkişafı hökumətin 2006-cı ildə
işləyib hazırladığı
plana əsasən müəyyən olunmuşdur. Nəticədə
keçən müddət
ərzində yarım
milyondan çox yeni iş yeri
açılmışdır. Bu plana əsasən
ölkə sənaye bazasının inkişafı
həm ənənəvi
sənaye sahələrində
(kimya, toxuculuq, yeyinti), həm də ölkə üçün yeni sahələrdə (avtomobilqayırma,
elektrik malları və aviasiya texnikası üçün
ehtiyat hissələri,
tullantıların yığılaraq
təmizlənməsi, telekommunikasiya
və informasiya texnologiyaları) rəqabət
qabiliyyətinin yüksəldilməsi
kursunu götürmüşdür.
Təsadüfi deyil ki, bu məqsədlərə
yetişmək üçün
dövlət fəal investisiya siyasəti həyata keçirir.
Ölkədə xalq təsərrüfatının
ən perspektivli sahələrindən biri maşınqayırmadır. Hökumət bu sahədə məşğul olan müəssisələrə vergi
güzəştləri vasitəsilə
dəstək verir, bürokratik maneələri
aradan qaldırır, həmçinin ölkə
ərazisində xarici
kampaniya zavodlarının
tikintisi üçün
əlverişli şərait
yaradır.
Eyni zamanda hökumət xərclərinin əhəmiyyətli
hissəsi ölkənin
içməli su ilə təmin edilməsi ilə əlaqədar işlərə
ayrılır. Bu hal
məğrib ölkələri
üçün xarakterik
haldır. Afrikada külək
enerjisindən daha çox Mərakeşdə
istifadə olunur.
Tanjer şəhəri
yaxınlığında yaradılmış
və elektrik enerjisi hasil etməyə imkan verən qurğular buna misal ola bilər.
Son illər
Mərakeş iqtisadiyyatı
yüksək inkişaf
mərhələsinə qədəm
qoymuşdur. İnfrastruktur sahələrdə xeyli sayda iri
layihələrin həyata
keçirilməsi tikintidə
canlanma yaratmışdır.
Mənzil fondu obyektlərinin
inşası daha sürətlə gedir.
Ölkənin valyuta gəlirlərinin bir hissəsi Mərakeş üçün
son dərəcə mühüm
əhəmiyyət kəsb
edən xarici ticarət sahəsindən
əldə olunur. Ümumi daxili
məhsulda xarici ticarətin payı 43 faiz təşkil edir. Bu da
ölkə iqtisadiyyatının
xarici bazara meyillənmə dərəcəsini
əks etdirir.
Son illər
ölkənin daxili-siyasi
həyatında dövlət
rəhbərliyinin həyata
keçirdiyi bütöv
bir silsilə tədbirlər əhalinin
müxtəlif təbəqələri
tərəfindən müsbət
qarşılanmışdır. Mərakeşdə çoxpartiyalı sistem fəaliyyət göstərir.
Hələ 1962-ci ildə qəbul
edilmiş konstitusiyaya
əsasən parlamentin
səlahiyyətləri müəyyən
dərəcədə genişləndirilmiş
və seçicilərə
ölkənin siyasi həyatında daha fəal iştirak etmək imkanı verilmişdir.
Mövcud qanunlara əsasən kral ölkənin dini və siyasi
lideridir, həmçinin
dövlətin möhkəmliyinin
və fəaliyyətinin
təminatçısıdır. Xarici siyasətin
bütün əsas məsələləri kral
tərəfindən müəyyən
olunur. Mərakeşin
xarici siyasətinin əsas istiqamətləri
bir çox amillərlə əlaqədardır:
Qərbi Saxara ərazisi məsələsi,
Mərakeşi Avropa bazarına çıxarmaq
səyləri və Avropa İttifaqına üzvlük vasitəsilə
öz mövqelərini
möhkəmləndirmək istəyi, qarşılıqlı
ittihamlar və ərazi iddiaları səbəbindən Məğrib
ölkələri ilə
(Mərakeşlə yanaşı
Mavritaniya, Qərbi Saxara, Əlcəzair, Tunis
və Liviyanın daxil olduğu Şimali Afrika Dövlətləri Birliyi)
yaşanan mürəkkəb
qarşılıqlı münasibətlər,
ölkənin strateji cəhətdən mühüm
ərazilərinin hərbi
bazalara verilməsi yolu ilə ABŞ ilə davamlı əməkdaşlıq və
NATO hərbi blokuna dəstək verilməsi, avropalı qonşularla - Fransa və İspaniya ilə əlverişli ticarət-sənaye
və qarşılıqlı
investisiya münasibətlərinin
saxlanılması.
Mərakeşin xarici siyasət sahəsində Azərbaycanla
münasibətləri siyasi,
iqtisadi-ticarət və
mədəni sahələri
əhatə edir. Bu krallıq
Azərbaycan Respublikasının
müstəqilliyini 1991-ci il dekabrın 30-da tanımışdır. İki
dövlət arasında
diplomatik əlaqələr
isə 1992-ci il avqustun 25-də yaradılmışdır.
Dövlətlər arasında yüksəksəviyyəli
əlaqələrin əsası
1994-cü ildə qoyulmuşdur. Ulu öndər
Heydər Əliyev həmin ilin dekabrında Kasablankada keçirilən İKT-yə
üzv ölkələrin
dövlət və hökumət başçılarının
7-ci zirvə görüşündə
iştirak edən zaman Kral II Həsənlə
görüşmüşdü.
2006-cı ildən
etibarən hökumət
üzvlərinin qarşılıqlı
səfərləri müntəzəm
xarakter aldı. Buna parlament nümayəndələrinin
qarşılıqlı səfərlərini
də əlavə etmək olar. Artıq Azərbaycan-Mərakeş parlamentlərarası
əlaqələr üzrə
işçi qrupu da fəaliyyət göstərir. Qarşılıqlı münasibətlər ədliyyə,
fövqəladə hallar,
təhsil və digər sahələri də əhatə edir.
Mərakeş Azərbaycanın
ərazi bütövlüyünü
BMT səviyyəsində dəstəkləyən
dost ölkələrdən biridir. Beynəlxalq təşkilatların, forumların
iş prosesi zamanı əlaqələr
qurulması, bir-birinə
qarşılıqlı dəstək
verilməsi iki ölkə arasında münasibətləri daha
da yaxşılaşdırmışdır.
Azərbaycan-Mərakeş hökumətləri arasında
ikitərəfli əməkdaşlıq
üzrə birgə komissiya fəaliyyət göstərir.
Digər tərəfdən, vizasız
gediş-gəliş haqqında
sazişin imzalanması
mədəni əlaqələrin
inkişafına müsbət
təsir göstərmişdir. Bu, özünü xüsusilə
incəsənət, turizm,
idman sahələrində
daha qabarıq təzahür etdirmişdir.
Mərakeş Krallığının ölkəmizdəki səfiri
Məhəmməd Adil
Ambarş iki ölkə arasında siyasi əlaqələrin çox yaxşı səviyyədə olduğunu
vurğulamaqla yanaşı,
əməkdaşlıq üçün
potensial imkanların böyük olduğunu da qeyd etmişdi.
Enerji, turizm sahələrində
xeyli birgə layihələr reallaşdırmaq
olar. Hər il milyonlarla
xarici turist qəbul edən Mərakeşin bu sahədəki təcrübəsindən
Azərbaycan faydalana bilər.
Azərbaycanın son illər mötəbər
beynəlxalq tədbirlərə
evsahibliyi etməsi bütün dünyada olduğu kimi, Mərakeşdə də maraqla qarşılanmışdır. Təsadüfi
deyil ki, bu il IV
İslam Həmrəyliyi
Oyunlarının uğurla
keçirilməsi Azərbaycanı
Mərakeşdə daha
çox tanıtmışdır.
Azərbaycan kimi, Mərakeş
də Şərq və Qərb mədəniyyətlərinin kəsişdiyi
bir regionda yerləşir. Hər iki
dövləti birləşdirən
ən mühüm cəhətlərdən biri
də onların
tolerant ölkələr olmasıdır.
Mərakeş son illər sosial-iqtisadi sahədə bir sıra nəzərəçarpacaq
uğurlara imza atmışdır. Ölkə həyatının müxtəlif sahələrində
modernizasiya prosesi davam edir. Burada tədrici liberallaşdırma
və demokratikləşdirmə
xəttinin ardıcıllıqla
davam etdirilməsi iqtisadi inkişaf üçün möhkəm
zəmin yaradır.
Atamoğlan MƏMMƏDLİ,
BDU-nun dosenti
Azərbaycan.-
2017.-30 iyul.- S.4.