Sərgi iştirakçıları Azərbaycanın enerji təhlükəsizliyindəki böyük rolunu bir daha vurğulayırlar
XXIV Beynəlxalq Xəzər Neft və Qaz Sərgisi öz işini davam etdirir. Sərgi iştirakçıları Prezident İlham Əliyevin Bakı Ekspo Mərkəzində olmasından, açılış mərasimindəki nitqindən məmnun qaldıqlarını bildirirlər. Onlar eləcə də dünyanın bir sıra dövlətlərinin rəsmi nümayəndələrinin burada iştirakını, o cümlədən ABŞ Prezidenti Donald Trampın sərgiyə göndərdiyi təbrik məktubunu yüksək dəyərləndirirlər.
Builki sərgidə 30 ölkədən gəlmiş 300-dən çox şirkət iştirak edir. Onların bir çoxu neft-qaz sərgisinin “veteranlar”ıdır. Bununla belə, tədbirə bir neçə ildir qoşulanlar, hətta “debüt” edən şirkətlər də az deyil.
XXIV Beynəlxalq Xəzər Neft və Qaz Sərgisi Azərbaycanın həm bölgədə, həm də Avropada enerji təhlükəsizliyi sahəsində önəmli rol oynadığını bir daha təsdiqləyir. Sərgi pavilyonlarının yaratdığı təəssürat və iştirakçıların sözləri göstərir ki, hazırkı tədbirin leytmotivi məhz budur. Sərginin platin sponsorunun Azərbaycan Respublikası Dövlət Neft Şirkəti - SOCAR-ın olması da təsadüfi deyil. Sərgi pavilyonlarında SOCAR-ın ayrı-ayrı şirkət və müəssisələri də öz nailiyyət və perspektivlərini geniş nümayiş etdirirlər.
İştirakçılar istər bu müəssisələrlə, istərsə də öz ekspozisiyalarını göstərən digər ölkələrin şirkətləri ilə öz əməkdaşlıq əlaqələrini genişləndirmək, sərginin yaratdığı imkanlardan səmərəli istifadə etmək məqsədində olduqlarını bildirdilər.
“BOS ŞELF” şirkətinin
baza meneceri Moumen Qayor dedi:
- “BOS ŞELF” SOCAR-a
məxsus şirkətdir.
Bu müəssisə Heydər
Əliyev adına
Bakı Dərin Özüllər Zavodunun,
eləcə də Azərbaycanda iri neft-qaz layihələrinin əməliyyatçısı olan BP-nin dünyadakı
ən böyük bazasının operatorudur.
Hazırda bütün
səy və bacarığımız “Cənub
qaz dəhlizi”nin reallaşmasına
yönəldilib. Belə ki,
bu dəhlizin ehtiyat mənbəyi olan “Şahdəniz” yatağının işlənməsinin
ikinci mərhələsi
üçün tikilən
dəniz qurğularının
bir çoxu məhz burada inşa edilir. Yataqda quraşdırılacaq hər
iki platformanın dayaq bloklarının tikintisini artıq başa çatdırmışıq.
Birinci dayaq bloku keçən il sentyabrın
1-də Prezident İlham
Əliyevin iştirakı
ilə dənizə yola salındı. Bu ilin mart ayında
ikinci qurğunu da öz daimi
yerinə göndərdik.
İndi “Şahdəniz-2”nin
sualtı qurğuları
ilə məşğuluq.
Qeyd edim ki, bu
qurğular ilk dəfədir
Azərbaycanda tikilir.
Mənə neft-qaz mütəxəssisi
olaraq belə bir müəssisədə
çalışmaq çox
xoşdur. İlk dəfə ölkənizə
1999-cu ildə gəlmişdim
və bir müddət sonra mənə tapşırılan
işi başa çatdırıb geriyə
qayıtdım. Lakin yeni
layihələrdə çalışmağımla
əlaqədar təkrarən
Azərbaycana döndüm.
Artıq
bu diyara sıx tellərlə bağlanmışam. Özüm mərakeşliyəm,
ancaq Fransada yaşamışam.
Oğlum isə 2004-cü ildə Bakıda, Leyla Şıxlinskaya klinikasında
dünyaya gəlib.
Biz ailəliklə
özümüzü burada
çox yaxşı,
təhlükəsiz hiss edirik. Xalqınız sülhsevərdir və zəngin ənənələrə
malikdir. Son 15 ildə qazandığınız
böyük nailiyyətlər
isə bütün dostlarınız kimi bizi də ürəkdən
sevindirir.
Hüseyn Abdi, İran Milli Qaz Şirkətinin meneceri:
- Çalışdığım
şirkət İranın
Neft Nazirliyinin dörd ən böyük müəssisəsindən
biridir. Bu şirkət
ölkənin böyük
hissəsini enerji ilə təmin edir, eləcə də onlarca neft-kimya və sənaye kompleksinə yanacaq verir.
Həmkar olaraq Azərbaycanın neft-qaz sənayesi haqqında geniş məlumatımız
var. Qaz alqı-satqısı
sahəsində əməkdaşlığımız,
həmçinin üçüncü
dəfədir Beynəlxalq
Xəzər Neft və Qaz Sərgisində
iştirakımız ölkəniz
haqqında bilgilərimizi
daha da zənginləşdirir.
Doğrudur, mən özüm Azərbaycana birinci dəfədir gəlmişəm. 20 il əvvəl valideynlərim burada olmuşdular. Onların danışdıqlarından da Bakı, Azərbaycan
haqqında təsəvvürüm
vardı. Deyim ki,
təəssüratım gözlədiklərimi
xeyli üstələyir.
Azərbaycan xalqının çox müdrik Prezidenti var, qısa müddətdə ölkədə
bu qədər xoş yeniliklər yaradıb. Bir sözlə, Azərbaycan
çox inkişaf edib.
İştirak etdiyimiz
neft-qaz sərgisi isə bizə imkan verir ki,
həm azərbaycanlı
həmkarlarımızın gördüyü işlərlə
ətraflı tanış olaq, həm də ümumiyyətlə, əməkdaşlıq
çevrəmizi genişləndirək.
Sərgidə iştirak edən
xarici şirkətlərin
mütəxəssisləri ilə söhbətlər
aparırıq. Məqsədimiz budur ki, İranda
işləmək istəyi
olan servis müəssisələrini ölkəmizə
dəvət edək.
Dilmurad Şəripov,
Özbəkistan Neft-Qaz
Elmi-Tədqiqat Layihə
İnstitutunun İdarə
Heyətinin sədri:
- Özbəkistanın neft-qaz müəssisələri, bu sahədə fəaliyyət göstərən elmi-tədqiqat institutları son illərdə əməkdaşlıq əlaqələrini xeyli genişləndiriblər. Rusiyanın “LUKoyl”, Koreyanın bir neçə şirkəti ilə birgə işləyirik. Üç ildən çoxdur ki, SOCAR-la da əməkdaşlıq və tərəfdaşlıq edirik. Daşkənddə birgə müəssisə yaratmağa da müvəffəq olmuşuq.
Bu ilə qədər Xəzər neft və qaz sərgisində yalnız nümayəndə heyətimiz iştirak edirdi. Yəni Daşkənddən gələn bir qrup mütəxəssis sərgi və konfransdakı müzakirə və diskussiyalara qatılırdı. Bu il isə ilk dəfədir öz stendimizi nümayiş etdiririk. Müxtəlif ölkələrdən olan həmkarlarımız deyirlər ki, sərgiyə stendimizlə çoxdan gəlməli idik. Çünki bu, sıx əməkdaşlıq qurmağa çox kömək edir. İndi biz bunu əyani görürük. Məktublaşmaq, internet vasitəsilə daim əlaqə saxlamaq yaxşıdır. Qarşı-qarşıya oturub söhbət etmək, məsləhətləşmək, vacib məsələləri müzakirə etmək isə daha çox fayda verir. Bu mənada sərginin əhəmiyyəti çox böyükdür.
Sərgidə iştirakım da, Azərbaycana gəlişim də birincidir. Təəssüratımı ifadə etməyə çətinliklə söz tapıram və hər sözün sonunda nida işarəsi qoymaq istəyirəm. Buradakı gözəlliklərə valeh olmamaq mümkün deyil.
XXIV Beynəlxalq Xəzər Neft və Qaz Sərgisinin pavilyonlarında görüşlər, işgüzar söhbətlər, seminarlar davam edir. Sərgi iştirakçılarının davranışlarından görünür ki, onlar hər dəqiqədən səmərəli istifadə etməyə, bu tədbirin yaratdığı imkanlardan gələcək uğurlu işlər üçün bəhrələnməyə çalışırlar. Sərgi öz işini iyunun 3-də başa çatdıracaq.
Flora SADIQLI,
Azərbaycan.- 2017.- 2 iyun.- S.1; 10.