190 ölkədən 500 milyondan çox tamaşaçı...

Dünyanın diqqəti yenə Azərbaycana yönəlib

İdman ölkəsinə çevrilən Azərbaycanda son onillikdə onlarla dünya və Avropa miqyaslı yarış keçirilib. Beynəlxalq idman federasiyalarının qərarları ilə turnirləri, idman müsabiqələrini layiqincə təşkil edən ölkəmiz hər dəfə tarixini möhtəşəm nailiyyətlə zənginləşdirib. Respublikamız təkcə yüksək evsahibliyi nümunəsi ortaya qoymayıb, həm də sübut edib ki, iradə, qətiyyət olan yerdə hər şey mümkündür.

Dünyanın idman nəbzi Bakı ilə döyünür

Bu günlər dünyanın diqqəti yenidən Azərbaycana yönəlib. Uğurla başa çatan IV İslam Həmrəyliyi Oyunlarından sonra Bakı növbəti dəfə “Formula-1” yarışlarının Azərbaycan Qran-prisinə evsahibliyi edir. Dünəndən etibarən yarışa start verilib və qarşıdakı iki gündə dünyadakı bütün avtomobil idmanı həvəskarlarının nəbzi Bakı ilə döyünəcək. Beləliklə, dünyada avtomobil həvəskarlarının əsas bayramı hesab edilən “Formula-1” Avropa Qran-prisinə ölkəmizin evsahibliyi etməsinin qürur və sevincini yaşamaqdayıq. Belə bir möhtəşəm yarışın Bakıda keçirilməsi dünyaya növbəti dəfə azərbaycanlıların mehribanlığı, qonaqpərvərliyi, qədim tarixi, füsunkar təbiəti, mentaliteti, sürətlə inkişaf edən müasir ölkə ilə tanışlıq fürsəti verib.

“Formula-1” dairəvi və sürətli avtoyürüş üzrə dünya çempionatıdır. Hər il keçirilən bu yarışın müxtəlif şəhərlərdə qran-pri mərhələləri təşkil olunur. Bu mərhələlərdə toplanan xallara əsasən pilotlar və komandalar ilin sonunda çempionluq titulu qazanırlar. Onu da qeyd edək ki, bolid adlandırılan müasir “Formula-1” avtomobilləri bir sıra özəllikləri ilə fərqlənir. Onlar təkadamlıq olur, üstəlik, sürücü yeri və təkərləri açıqdadır. Komandalar avtomobilləri özləri istehsal etsələr də, hər biri tanınmış avtomobil markalarının motorlarını, yağını və ya istehsal etdiyi digər detalları istifadə edirlər.

Builki “Formula-1” Qran-pri yarışlarına mart ayında Melburn şəhərində start verilib. Pilotlar və komandalar noyabr ayına qədər 21 yarış mərhələsi keçməlidirlər. Son yarış noyabrda Abu-Dabidə baş tutacaq. Hazırda isə yüz milyonlarla izləyici auditoriyasına malik olan “Formula-1” yarışlarının həyəcanı Azərbaycanda yaşanır. Artıq dünəndən etibarən Bakıda dünyanın bir nömrəli avtomobil yarışı çempionatının növbəti qran-pri mərhələsinə start verilib. Bakı Şəhər Halqasında dünyanın ən məşhur pilotları - Luis Hamilton, Fernando Alonso, Sebastian Fettel, Valtteri Bottas və digərləri yarışırlar. Bu günlər planetimizdə avtomobil idmanına maraq göstərən hər kəsin diqqəti paytaxtımıza yönəlib.

Ümumiyyətlə, Bakı “Formula-1” yarışlarının yeni ünvanıdır. Çünki ötən ilədək Bakıda bu yarış keçirilməmişdi. Bu mənada xüsusi olaraq inşa olunmuş Bakı Şəhər Halqası “Formula-1” təqviminə ən yeni əlavədir. Bakı Şəhər Halqasının, trekin uzunluğu 6 kilometrdən bir qədər artıq idi.

Bu, uzunluğuna görə dünyada ikincidir. Bakı Şəhər Halqası paytaxımızın tam mərkəzindən və gözəl məkanlarından keçirdi. Təşkilatçılar trekin marşrutunu seçərkən məhz bu məqamı qarşıya məqsəd qoymuşdular.

İdeal evsahibliyi nümunəsi

Yarışa dünəndən start verilsə də, Bakıda uzun müddətdən bəridir ki, bu idman hadisəsinin ab-havası yaşanır. Çünki hazırlıq işlərinə aylar öncədən başlanılıb. Məqsəd 2017-ci il üçün 8-ci olan və Azərbaycan Qran-prisi adlanan Bakı mərhələsini layiqincə təşkil etmək, ideal evsahibliyi nümunəsini növbəti dəfə nümayiş etdirməkdir. Fərəhli haldır ki, aparılan hazırlıq işlərini Beynəlxalq Avtomobil Federasiyasının rəsmiləri, o cümlədən yarışda iştirak edən pilotlar təqdir ediblər. Beləliklə, bu günlərdə bir daha bütün dünya və ölkəmizə təşrif buyuran xarici qonaqlar Azərbaycanın yüksək evsahibliyinin şahidi olmaqdadır.

Bakıya gələn hər kəs Azərbaycanın inkişafını, xalqımızın qonaqpərvərliyini, zəngin mədəniyyətini gözləri ilə görür, bunları təqdir edir. Bütövlükdə bu mötəbər tədbir ölkəmizi növbəti dəfə beynəlxalq aləmə daha yaxından tanıdır. Hər kəs Azərbaycanda keçirilən sürət yarışına hazırlıq işlərinin yüksək səviyyədə aparıldığının şahidinə çevrilir. Bunu dünən start verilən ilk yarış günündə aydın şəkildə görmək olurdu. İlk növbədə, Azneft dairəsindən Dəniz vağzalına kimi qurulan əyləncə zonaları bilet sahiblərinin üzünə qapılarını açıb. Dünəndən etibarən tamaşaçılar onlar üçün qurulmuş möhtəşəm əyləncə məkanlarından istifadə edirlər. Tədbirlər isə hər kəs üçün inanılmaz dərəcədə maraqlı və unudulmayacaq məqamlarla yadda qalır.

“Formula-1”in dünyada kifayət qədər azarkeşi var. Bakı Şəhər Halqasında da tamaşaçıların yarışı canlı və təhlükəsiz izləmələrinə hər cür imkan yaradılıb. Bunun üçün Bakı Şəhər Halqasının müxtəlif yerlərində tamaşaçı tribunaları quraşdırılıb. Həmin tribunalar elə yüksək səviyyədə quraşdırılıb ki, daim istifadədə olsa belə, dağılıb sıradan çıxmaz. Bütün dünyada isə “Formula-1” Azərbaycan mərhələsini 190 ölkədən 500 milyondan artıq tamaşaçı izləyir. Bu göstərici ilə “Formula-1” azarkeş sayının çoxluğuna görə futboldan sonra ikinci idman növü sayılır.

Bu mötəbər yarışın yüksək səviyyədə işıqlandırılmasına müxtəlif ölkələrdən təcrübəli müxbir və fotoqraflar cəlb edilib. Hazırda dünyanın ən böyük kütləvi informasiya vasitələri, eləcə də 100-dən çox ölkənin xəbər agentlikləri Bakıda keçiriləcək “Formula-1” yarışı barədə xəbərləri dünyaya yayırlar.

Tək yarışın keçirilməsi deyil, qonaqların, tamaşaçıların ölkəmizlə, milli dəyərlərimizlə tanışlığı, şəhərimizdə olduğu günlərdə vaxtlarını səmərəli keçirmələri üçün yaradılan şərait, dünyada sevilən populyar müğənnilərin iştirakı ilə konsert proqramlarının təşkili Azərbaycanın mükəmməl evsahibliyi nümunəsinin ayrı-ayrı detallarıdır. Beləliklə, Azərbaycan yüksək təşkilatçılıq ənənəsinə bu dəfə də sadiqdir.

Beləliklə, yenidən Azərbaycan dünya idmansevərlərinin diqqət mərkəzində olacaq. Ölkəmizə bu münasibətlə gələn qonaqlar, habelə paytaxt sakinləri yarışları canlı şəkildə izləyə bilirlər. Şübhə yoxdur ki, “Odlar ölkəsində, sürət zirvəsində” devizi ilə keçirilən bu yarışlar da insanlara uzun müddət xatırlanacaq həyəcanlı və sevincli dəqiqələr bəxş edəcək. Başqa cür ola da bilməz. Çünki bu yarışların təşkilatçısı dünyanın idman mərkəzi olan Azərbaycan dövlətidir!

Rəşad CƏFƏRLİ,

Azərbaycan.- 2017.- 24 iyun.- S.1; 11