Şəki daha bir festivala evsahibliyi etdi

VIII “İpək yolu” Beynəlxalq Musiqi Festivalı həm yerli sakinlərdə, həm də qonaqlarda xoş ovqat yaratdı

Artıq festivallar şəhəri kimi tanınan qədim Şəki son illər bir çox beynəlxalq tədbirlərə evsahibliyi edib. Dünyanın fərqli ölkə və qitələrini təmsil edən ayrı-ayrı sənət sahiblərinin qatıldıqları tədbirlər istər şəkililərdə, istərsə də qonaqlarda xoş ovqat yaradır. Hazırda Şəkidə növbəti musiqi bayramı keçirilir. Bu festival artıq ənənəvi hal alıb. Festival çərçivəsində konsertlər memarlıq abidələrinin önündə təşkil edilir. Bununla da Şəkinin tarixi, memarlığı, folkloru geniş şəkildə təbliğ edilir.

Şəki Xan Sarayı da daxil olmaqla UNESCO-nun Dünya Mədəni İrs Siyahısına daxil edilmək üçün təqdim olunan 84 tarixi abidə var. Həmçinin Şəki əsrlər boyu ipəyin vətəni sayılıb və bu gün də burada ipək istehsal olunur.

Mədəniyyət və Turizm Nazirliyi, Azərbaycan Bəstəkarlar İttifaqı və Şəki Şəhər İcra Hakimiyyətinin birgə təşkilatçılığı ilə təşkil olunan Şəki “İpək yolu” VIII Beynəlxalq Musiqi Festivalında Azərbaycanın tanınmış musiqi kollektivləri ilə yanaşı, Türkiyə, Yaponiya, Polşa, Macarıstan, İran və Gürcüstandan gəlmiş rəqs və musiqi qrupları, ifaçılar çıxış edirlər.

İyunun 27-də axşam saatlarında “Marxal” müalicə-istirahət kompleksinin Yay Teatrında festivalın təntənəli açılış mərasimi keçirilib. Mərasimdə festivalın təşkilatçı qurumlarının rəhbərləri, şəhər ictimaiyyətinin nümayəndələri, musiqisevərlər iştirak ediblər.

Tədbirin bədii rəhbəri, Azərbaycan Bəstəkarlar İttifaqının sədri, UNESCO-nun Sülh Naminə artisti Firəngiz Əlizadə çıxış edərək möhtəşəm musiqi bayramı kimi gözəl ənənəyə çevrilən və artıq səkkizinci dəfədir keçirilən Şəki “İpək yolu” Beynəlxalq Musiqi Festivalının bu dəfə də şəkililərə və qonaqlara unudulmaz anlar yaşadacağını söyləyib. O bildirib ki, 2017-ci ilin Prezident İlham Əliyev tərəfindən “İslam həmrəyliyi ili” elan edilməsi ilə əlaqədar hazırkı festivalda müsəlman ölkələrindən olan iştirakçılara üstünlük verilib. Firəngiz Əlizadə festivalın proqramında Azərbaycan musiqi mədəniyyətinin də geniş təmsil olunduğunu bildirib: “İnanırıq ki, musiqi, dostluq və həmrəylik bayramına çevriləcək, Şəki “İpək yolu” VIII Beynəlxalq Festivalı yenə də insanların qəlbində gözəl duyğular, silinməz izlər buraxacaq”.

Şəki Şəhər İcra Hakimiyyətinin başçısı Elxan Usubov qədim mədəniyyət mərkəzlərindən olan Şəkinin beynəlxalq festivalların təşkili üçün gözəl məkan olduğunu, onun artıq “festivallar şəhəri” kimi tanındığını vurğulayıb. Qeyd edib ki, hər il bu şəhərdə keçirilən beynəlxalq festivallarda dünyanın bir çox ölkələrindən gəlmiş musiqi kollektivləri, sənətçilər iştirak edir. “İpək yolu” Beynəlxalq Musiqi Festivalı isə Şəkinin mədəni həyatında mühüm hadisədir.

Ölkəmizdə mədəni irsin qorunub saxlanmasına, xalqımıza xas zəngin mədəniyyətin təbliğinə daim yüksək diqqət və qayğı göstərildiyini bildirən Elxan Usubov Prezident İlham Əliyevin və Azərbaycan Respublikasının Birinci vitse-prezidenti, UNESCO-nun xoşməramlı səfiri Mehriban Əliyevanın bu sahədə gördüyü işlərin əhəmiyyətini xüsusi vurğulayıb.

Qeyd edək ki, 2016-cı ildə Şəkinin TÜRKSOY tərəfindən “Türk dünyasının mədəniyyət paytaxtı” elan olunması və “paytaxt ili” çərçivəsində keçirilən Şəki “İpək yolu” VII Beynəlxalq Musiqi Festivalı Şəki şəhərinin, eyni zamanda nadir Azərbaycan mədəniyyətinin təbliğində əhəmiyyətli rol oynayıb.

Şəkinin mədəni inkişafının sürətləndirilməsinə göstərdiyi böyük dəstəyə, şəhərin zəngin mədəni irsinin dünya səviyyəsində tanıdılması və təbliği sahəsində xidmətlərinə görə Firəngiz Əlizadə “Şəkinin fəxri vətəndaşı” adına layiq görülüb.

Rəsmi hissədən sonra musiqisevərlərə festivalın ilk konserti əməkdar incəsənət xadimi, bəstəkar Aygün Səmədzadənin müəllif gecəsi təqdim olunub.

Xalq artisti Ənvər Sadıqov (qarmon), əməkdar artistlər İlqar Muradov, Elnur Əhmədov (kamança), Aygün Bəylər, Nurlan Növrəsli, müğənnilər Leyla İdrisova, Vüsal Hacıyev və başqaları bəstəkarın əsərlərini səsləndiriblər. Onları xalq artisti Teymur Göyçayevin bədii rəhbərliyi və dirijorluğu ilə Qara Qarayev adına Azərbaycan Dövlət Kamera Orkestri müşayiət edib.

Uğurla başa çatan konsertin sonunda Aygün Səmədzadəyə və orkestrin bədii rəhbəri Teymur Göyçayevə xatirə hədiyyəsi - festivalın simvolu təqdim olunub.

Festival çərçivəsində iyunun 28-də günorta saatlarında Yay Teatrında Yaponiyanın “Va-Liqa” musiqi qrupunun, axşam isə Şəki Xan Sarayının həyətində Ania Broda (Polşa) və “GuessousMesi Trio” qrupunun (Macarıstan) konserti təşkil olunub.

Həmçinin Şəki Musiqi Kollecində Cövdət Hacıyevin 100 illiyi ilə əlaqədar tədbir keçirilib. Axşam saatlarında Marxal yay teatrında isə Təbriz rəqs qrupunun konserti olub.

Ardınca Şəki Xan Sarayında Türkiyə qrupunun, Yuxarı Karvansarada isə Gürcüstan uşaq mahnı və rəqs ansamblının konsertləri reallaşdırılacaq.

Əli SƏLİMOV

Azərbaycan.- 2017.- 30 iyun.- S.16.