Xalq və dövlət naminə şərəfli missiya

Mehriban xanım Əliyevanın Birinci vitse-prezident vəzifəsinə təyinatı ölkə vətəndaşlarının obyektiv sosial sifarişidir

İstisnasız olaraq bütün dövrlərdə cəmiyyətin mütərəqqi yolla inkişafı məhz sağlam əqidəli, xalqa, dövlətə təmənnasız xidməti başlıca həyat amalına çevirən nəcib insanların fəaliyyəti ilə bağlı olmuşdur. Belə insanlar qısa zamanda cəmiyyətin sayılıb-seçilən şəxsiyyətlərinə çevrilmiş, üzərlərinə düşən sosial məsuliyyəti düzgün dəyərləndirmiş, xoş məram və məqsədləri ilə milyonların rəğbətini qazanmışlar.

Bütün dövrlərin belə parlaq simaları üçün səciyyəvi keyfiyyətlərdən biri də onların qlobal miqyasda insanlığın nicatına xidmət edən ictimai təşəbbüslərlə çıxış etmələri olmuşdur. Bu baxımdan qürur hissi ilə deyə bilirik ki, narahat dünyamızda nəcib və ali məqsədlər, bəşəri ideyalar naminə əzmlə çalışan, insan amilini daim uca tutan sülh elçiləri sırasında Azərbaycanın birinci xanımı, Heydər Əliyev Fondunun prezidenti, UNESCO və ISESCO-nun xoşməramlı səfiri Mehriban xanım Əliyevanın adı xüsusi çəkilir.

Azərbaycanın birinci xanımının çoxşaxəli fəaliyyətinin nəinki Azərbaycanda, ölkə hüdudlarından kənarda da rəğbətlə qarşılanmasının səbəbləri kifayət qədər sadədir: O, əzmkar fəaliyyəti ilə təkcə milli-mənəvi dəyərlərin, mənəvi və qeyri-maddi irsin dünya miqyasında təbliğini deyil, həm də sivil dünyada sülhü, sabitliyi, sivilizasiyalararası dialoqu, multikulturalizmi, bir sözlə, insanlığın tərəqqisinə yönələn ali ideyaların reallaşdırılmasını, bu sahələrdə səylərin birləşdirilməsini hədəfə almışdır.

Yaradılarkən çoxlarının yalnız xeyriyyəçilik yönümündə fəaliyyət göstərəcəyini zənn etdiyi Fond zaman baxımından qısa müddətdə reallaşdırdığı çoxşaxəli layihələrin miqyası ilə gözlənildiyindən xeyli böyük amalları uğurla gerçəkləşdirmişdir. Ümummilli liderin ideallarını yaşadaraq, qısamüddətli fəaliyyəti dövründə elm, təhsil, mədəniyyət, incəsənət, səhiyyə və idmanın inkişafına xidmət edən layihələrin reallaşdırılması, milli-mənəvi ideallara, humanist, insanpərvər dəyərlərə sadiq gənc nəslin formalaşdırılması, gender bərabərliyinin təmini, sivilizasiyalararası dialoqun təşviqi, nüfuzlu beynəlxalq qurumlarla əməkdaşlığın dərinləşdirilməsi, Azərbaycan həqiqətlərinin dünya ictimaiyyətinə çatdırılması - xüsusilə Ermənistan-Azərbaycan, Dağlıq Qarabağ münaqişəsi ilə bağlı ölkəmizin haqlı mövqeyinin beynəlxalq aləmdə dəstəklənməsi istiqamətində son dərəcə uğurlu nəticələrə imza atmış, dərin ictimai rəğbət qazanmışdır.

Çoxşaxəli vətənpərvər fəaliyyəti ilə xalqa və dövlətə böyük faydalar vermiş nəcib bir şəxsiyyətin bu günlərdə yüksək dövlət idarəçiliyinə təyinatı da ölkəmizin ən yeni tarixinə əlahiddə hadisələrdən biri kimi düşmüşdür. Dövlət başçısı cənab İlham Əliyevin 21 fevral 2016-cı il tarixli sərəncamı ilə Mehriban xanım Əliyevanın Azərbaycanın Birinci vitse-prezidenti vəzifəsinə təyin olunması ölkənin modernləşməsi prosesinin keyfiyyətcə yeni mərhələyə qədəm qoyduğunu əminliklə söyləməyə ciddi əsaslar verir. İctimai həyatın bütün sahələri üzrə mühüm yeniliklərə, qlobal böhranın tələblərindən irəli gələn səmərəli iqtisadi islahatlara müəlliflik edən müstəqil respublikamızın bundan sonrakı inkişaf strategiyasının reallaşdırılmasında Azərbaycanın birinci xanımının da müstəsna rolu və xidmətləri olacaqdır.

Azərbaycan gəncliyinin də inam və etimad ünvanına çevrilmiş Mehriban xanım Əliyevanın əlahiddə və yüksək məsuliyyət tələb edən dövlət vəzifəsinə təyinatı bir tərəfdən onun indiyə qədərki fəaliyyətinin yüksək dəyərləndirilməsidirsə, digər tərəfdən cəmiyyətin səmimi istək və gözləntilərinin nəzərə alınmasıdır. 26 sentyabr 2016-cı il tarixli ümumxalq referendumunun nəticəsi olaraq təsis edilmiş Azərbaycan Respublikasının Birinci vitse-prezidenti vəzifəsinə yüksək mənəvi dəyərlərə sadiqliyi, idarəçilik keyfiyyətləri ilə seçilən, ölkə daxilində və hüdudlarından kənarda böyük nüfuza malik olan bir şəxsin irəli çəkilməsi ümumən cəmiyyətin mənafeyinə xidmət edən obyektiv qərardır. Yalnız bu səbəbdən ki, Azərbaycanın birinci xanımı son 15 illik fəaliyyəti ilə ictimai həyatın bütün sahələri üzrə mövcud çatışmazlıqlara, problemlərə yaxından bələd olduğunu sübuta yetirmişdir. Ötən illərdə Heydər Əliyev Fondunun prezidenti, Milli Məclisin deputatı, YAP sədrinin müavini kimi yüksək vəzifələrdə uğurla reallaşdırdığı layihələri ilə cəmiyyətdə milyonlarla insanın rəğbətini qazanmışdır.

Azərbaycan Prezidenti cənab İlham Əliyev Təhlükəsizlik Şurasının iclasında Mehriban xanım Əliyevanın idarəçilik keyfiyyətlərini yüksək dəyərləndirərək demişdir: “Mehriban Əliyeva 2005-ci ildən Azərbaycan Respublikası Milli Məclisinin deputatıdır. O, deputat kimi çox böyük işlər görüb, təmsil etdiyi dairənin sosial-iqtisadi problemlərinin həlli istiqamətində çox böyük addımlar atıb. Seçicilərlə daim təmasdadır və onun deputat kimi əsas fəaliyyəti seçicilərin problemlərinin həlli ilə bağlıdır. Eyni zamanda, Mehribanın deputat kimi çox geniş beynəlxalq fəaliyyəti də var. Bu fəaliyyət nəticəsində müxtəlif ölkələrdə qazandığımız dostların sayı artıb.

2004-cü ildən bu günə qədər Mehriban Əliyeva ulu öndərin adını daşıyan Heydər Əliyev Fondunun prezidentidir. Heydər Əliyev Fondu onun rəhbərliyi ilə nəinki Azərbaycanın, hesab edirəm ki, regionun ən böyük və nüfuzlu ictimai təşkilatına çevrilmişdir. Heydər Əliyev Fondunun çoxşaxəli fəaliyyəti Azərbaycan xalqı tərəfindən yüksək qiymətləndirilir”.

Ümumilikdə, Heydər Əliyevin dövlətçilik, azərbaycançılıq, vətənpərvərlik fəlsəfəsinin davam etdirilməsini ali məqsədlərdən biri kimi müəyyənləşdirmiş Mehriban xanım Əliyevanın mövqeyi bundan ibarətdir ki, hər bir insanı, təşkilatı, təmtəraqlı sözlər, parlaq epitetlər yox, gördüyü işlər, əldə edilən nəticələr xarakterizə etməlidir. Hər bir insanın həyatda öz yaşam fəlsəfəsinin olduğunu deyən Mehriban xanım Əliyevanın fikrincə, heç də vacib deyil ki, şəxs bu fəlsəfəni sözlərlə izah etsin. Bu həyat fəlsəfəsi, istər-istəməz, onun hərəkətlərində, əməllərində özünü büruzə verəcəkdir. Azərbaycanın birinci xanımı hesab edir ki, xoş əməllərlə, mərhəmətli və humanist yanaşma ilə dünyada çox şeyi yaxşılığa doğru dəyişdirmək mümkündür.

Bu da təsadüfi deyildir ki, Heydər Əliyev Fondunun nəcibliyə, insanpərvərliyə və humanizmə əsaslanan çoxşaxəli fəaliyyəti ilk gündən həyatın bütün sahələrində milli-mənəvi və intellektual tərəqqini təmin etməyə yönəlmişdir. Qurumun uğurlarını təmin edən başlıca amillərdən biri də ictimai dəstəyə ehtiyac duyan sahələri dəqiqliklə müəyyənləşdirərək dövlət səviyyəsində gerçəkləşdirilən layihələrə əlavə təkan verməsi olmuşdur. Fond, bu mənada, həm də cəmiyyətin müxtəlif təbəqələrini milli məqsəd və ideallar uğrunda səfərbər edən, ümumi səyləri bir nöqtədə birləşdirən əlahiddə statuslu mərkəzə çevrilmişdir.

Rusiyada təhsil alan azərbaycanlı kimi onun da şahidiyəm ki, Azərbaycan Respublikasının Birinci vitse-prezidenti Mehriban xanım Əliyeva beynəlxalq səviyyədə tanınan və hörmət bəslənilən xanım siyasətçidir. Heydər Əliyev Fondunun prezidenti ötən illərdəki fəal təşəbbüsləri həm də Azərbaycanın bəşəri miqyasda tanınmasına, ölkəmiz haqqında obyektiv rəyin formalaşmasına, həmçinin respublikamızın beynəlxalq miqyaslı tədbirlərin təşkilatçısına çevrilməsinə xidmət etmişdir. Azərbaycanın birinci xanımı ingilis dilində səlis nitq söyləməklə, Avropanın siyasi leksikonunda ölkə həqiqətlərini dünyaya çatdırır. Çıxışlarında bəşəriyyəti sülhə, sabitliyə, qarşılıqlı faydalı əməkdaşlığa, qlobal problemlərin birgə həllinə səsləyən qlobal çağırışların yer alması ölkənin birinci xanımının timsalında Azərbaycan qadını haqqında dolğun təsəvvür formalaşdırır.

Yüksək vəzifə tutan hər bir dövlət məmurunun uğurlarını şərtləndirən vacib amillərdən biri də onun yüksək təşkilatçılıq qabiliyyətidir. Heydər Əliyev Fondunun prezidentinin təşəbbüsü ilə son illərdə Bakıda təşkil edilmiş beynəlxalq tədbirlərin miqyası və əhəmiyyəti bu baxımdan xüsusilə diqqətəlayiqdir. UNESCO, ISESCO, UNİSEF və digər beynəlxalq qurumlarla birgə keçirilən beynəlxalq tədbirlər Azərbaycanın qlobal sferada sülh, tərəqqi və iqtisadi əməkdaşlıq mərkəzi kimi tanındığını, nüfuzunun yüksəldiyini göstərir. Həmin tədbirlərdə dini-etnik ayrı-seçkiliyin, gender bərabərsizliyinin, savadsızlığın aradan qaldırılması məsələləri, habelə səhiyyə, elm, təhsil, mədəniyyət sahəsindəki qlobal problemlərin aradan qaldırılması yolları geniş müzakirə olunur.

2005-ci ildən indiyədək “UNESCO-Azərbaycan: Azərbaycanın təhsil problemləri və perspektivləri”, “Gender bərabərliyi: de-yure və de-fakto gender bərabərliyinin təmin olunması”, UNESCO-nun “Dünyada savadlılığın dəstəklənməsi”, “Davamlı inkişaf üçün Azərbaycanda təhsil islahatları”, “Mədəniyyətlərarası dialoqda qadınların rolunun genişləndirilməsi” və digər mövzularda keçirilən konfransların əhəmiyyəti xüsusi qeyd olunmalıdır: Heydər Əliyev Fondunun prezidenti həmin tədbirlərin iştirakçılarında Azərbaycan haqqında obyektiv təsəvvür formalaşdıra bilmiş, onları ölkə həqiqətləri ilə yaxından tanış etmişdir.

Heydər Əliyev Fondunun prezidentinin milli mədəniyyətin dünya miqyasında təbliği və qorunması naminə həyata keçirdiyi nəcib missiya son illərlə məhdudlaşmır. Xatırlatmaq lazımdır ki, 1995-ci ildə “Azərbaycan Mədəniyyətinin Dostları” Fondunu yaratmış Mehriban xanım Əliyeva hələ o dövrdən məhz bu missiyanı qarşıya qoymuş, yüksək təşəbbüskarlığı, fitri idarəçilik keyfiyyətləri ilə milli mədəniyyətin inkişafına layiqli töhfələrini vermişdir.

Heydər Əliyev Fondu ötən 13 ildə “Azərbaycan Mədəniyyətinin Dostları” Fondu ilə birgə xalqın milli varlığını özündə yaşadan maddi-mənəvi, intellektual irsin qorunması məqsədinə hesablanan müxtəlif layihələr həyata keçirmişdir. Fondun birbaşa himayəsi ilə son illər Azərbaycanda muğam sənətinin qorunması, inkişafı və təbliği sahəsində böyük işlər görülmüşdür. Azərbaycan muğamının, aşıq musiqisinin, Novruz bayramının UNESCO-nun bəşəriyyətin qeyri-maddi irsinin şah əsərləri siyahısına daxil edilməsi də məhz bu əzmkar fəaliyyətin nəticəsidir. Fondun milli mədəniyyətin təbliği sahəsində həyata keçirdiyi uğurlu layihələrdən biri də “Qarabağ xanəndələri” albomunun hazırlanması olmuşdur.

Heydər Əliyev Fondunun təşkilatçılığı ilə 2005-ci ildən bəri keçirilən, Azərbaycan televiziyası ilə canlı yayımlanan muğam müsabiqələri də Azərbaycanın milli sərvəti olan muğamın təbliğinə layiqli töhfədir. Bakıda dənizkənarı bulvar ərazisində Beynəlxalq Muğam Mərkəzinin tikilib istifadəyə verilməsi də fondun qlobal mədəniyyət layihələri sırasında mühüm yer tutur. 2005-ci il aqvustun 24-də Azərbaycan Prezidenti İlham Əliyev və UNESCO-nun sabiq baş direktoru Koişirio Matsuuranın iştirakı ilə əsası qoyulan Beynəlxalq Muğam Mərkəzinin 2008-ci ilin dekabr ayında təntənəli açılış mərasimi olmuşdur.

2011-ci ilin may ayında Azərbaycanın gənc ifaçılarının Almaniyada keçirilən “Evrovision-2011” musiqi yarışmasındakı parlaq qələbəsində fondun fəal dəstəyi, təşkilatçılıq səyləri mühüm rol oynamışdır. Heydər Əliyev Fondunun prezidentinin “Eurovision-2012”nin, I Avropa Oyunlarının, İslam Həmrəyliyi Oyunlarının Bakıda keçirilməsi ilə bağlı yaradılmış təşkilat komitələrinin sədri təyin edilməsi də təsadüfi deyildir. Onun yaxından iştirakı ilə reallaşan və reallaşacaq bu tədbirlər ölkəmizin beynəlxalq nüfuzunun yüksəlməsini təmin edir.

Qloballaşan dünyada hər bir dövlətin öncüllüyü, milli inkişaf səviyyəsi və gələcək taleyi təhsilin mövcud durumu ilə şərtlənir. Bu baxımdan Azərbaycanda elm və təhsilin davamlı inkişaf konsepsiyasının uğurla gerçəkləşdirilməsində ictimai təsisat kimi fəaliyyət göstərən Heydər Əliyev Fondunun xidmətləri xüsusi vurğulanmalıdır. Fondun xeyriyyəçilik fəaliyyətinin prioritet istiqamətləri sırasında təhsilin mühüm yer tutması təsadüfi deyildir. “Yeniləşən Azərbaycana yeni məktəb” layihəsi bu baxımdan cəmiyyətdə ciddi dəstəklə qarşılanmışdır. Ölkə başçısının da qeyd etdiyi kimi, layihənin icrasına başlanıldığı 2005-ci ildən bu günədək 3000-dək yeni məktəb əsaslı təmir və bərpa edilmiş, yeniləri tikilmişdir.

2005-ci ildən Mehriban xanım Əliyeva Milli Məclisin fəal deputatı kimi həm də öz seçiciləri qarşısında verdiyi hər bir vədi əməli işi ilə doğrultmuşdur. Azərbaycanın birinci xanımı qısa müddətdə deputatı olduğu Xəzər rayonunda böyük layihələrin həyata keçirilməsinə nail olmuşdur. Məhz onun təşəbbüsü və dəstəyi ilə yaradılan “Xəzər rayonunun İnkişaf Fondu” Ədliyyə Nazirliyində qeydiyyatdan keçərək əməli fəaliyyətə başlamışdır. Bundan əlavə, Azərbaycanın birinci xanımının təşəbbüsü ilə Milli Məclisdə 4 dəfə amnistiya haqqında qərar qəbul olunmuş, minlərlə ailəyə sevinc bəxş edilmişdir.

Ölkəyə rəhbərlik etdiyi son 10 ildə milli maraqlara söykənən fəal xarici siyasət yeridərək, “Biz müdafiədə deyil, hücumda olmalıyıq!” - deyən Prezident İlham Əliyev Ermənistanın Azərbaycana təcavüzü ilə bağlı həqiqətlərin beynəlxalq aləmə çatdırılmasını, işğalçının ən müxtəlif səviyyələrdə ifşasını, bədnam erməni lobbisinə qarşı effektiv əks-hücumun təşkilini vətəninə bağlı hər bir azərbaycanlının ümdə vəzifəsi sayır. Heydər Əliyev Fondunun Azərbaycan həqiqətlərinin dünya ictimaiyyətinə çatdırılması, ölkəmizin milli-mənəvi irsinin beynəlxalq miqyasda tanıdılması istiqamətindəki ardıcıl və sistemli fəaliyyəti bu baxımdan xüsusi vurğulanmalıdır.

Fondun prezidenti Mehriban xanım Əliyeva ötən illərdə Ermənistan-Azərbaycan, Dağlıq Qarabağ münaqişəsi ilə bağlı həqiqətlərin beynəlxalq aləmə çatdırılması üçün bütün mövcud imkanlardan istifadə etmiş, mədəniyyət, təhsil, səhiyyə və digər sahələrdə həyata keçirilən layihələrin məhz bu məqsədə yönəlməsinə çalışmışdır. Fond Ermənistanın ölkəmizə qarşı təcavüzünün acı nəticələrinin dünya birliyinə çatdırılması üçün müxtəlif səviyyəli tədbirlər keçirmiş, Dağlıq Qarabağ münaqişəsində xalqımızın üzləşdiyi faciələri əyani şəkildə göstərən filmlərin, fotosənədlərin, kitabların, digər kütləvi nəşrlərin çapını və yayılmasını təmin etmişdir. İngilis, fransız, ərəb, alman, rus dillərində “Qarabağ həqiqətləri” bukletlər toplusunun hazırlanması, Azərbaycanın xaricdəki səfirlikləri, diaspor təşkilatları, habelə yerli qeyri-hökumət təşkilatları vasitəsilə yayılması bu istiqamətdə son dərəcə uğurlu layihələrdən biri olmuşdur.

Heydər Əliyev Fondunun beynəlxalq əhəmiyyətli quruma çevrilməsi istiqamətində işlər son illər daha da genişlənmişdir. Rusiyada, Rumıniyada, Türkiyədə, Böyük Britaniyada, ABŞ-da filiallarını açan fond fəaliyyətini beynəlxalq müstəvidə genişləndirmək imkanı qazanmışdır. Rusiyada ali təhsil alan tələbə kimi deyə bilərəm ki, fondun Moskva filialının fəaliyyəti bu baxımdan daha qabarıq hiss olunur. Azərbaycanın müasir gəncliyinin ən layiqli, vətənpərvər təmsilçisi kimi bu missiyanı üzərinə götürmüş Leyla Əliyeva fondun Rusiya nümayəndəliyinə yüksək səviyyədə rəhbərlik edir. Bu da təsadüfi deyildir ki, Azərbaycan diasporunun formalaşmasındakı xidmətlərinə görə Leyla xanım Əliyeva Azərbaycan Prezidentinin 5 iyul 2011-cu il tarixli sərəncamı ilə “Tərəqqi” medalı ilə təltif olunmuşdur.

İslam Konfransı Təşkilatının gənclər forumu ilə birgə “Xocalıya ədalət!” beynəlxalq kampaniyasına start verilməsi də fondun Rusiya nümayəndəliyinin fəaliyyəti ilə bağlıdır. Tunisdə İSESCO-nun Baş Assambleyasının 10-cu sessiyasında imzalanmış protokol “Xocalıya ədalət!” Beynəlxalq Məlumat Təşviqat kampaniyasına dəstək verilməsini və dünya miqyasında təhsil, elm və mədəniyyət sahələrində birgə tədbirlərin həyata keçirilməsini nəzərdə tutur. Aksiyanın əsas məqsədi beynəlxalq birliyi Xocalı faciəsi haqda ədalətli məlumatlandırmaqdır.

Fondun nümayəndəliyinin Rusiya ilə Azərbaycan arasında mədəni dialoqunun genişləndirilməsi istiqamətində həyata keçirdiyi tədbirlər də bu baxımdan təqdirəlayiqdir. Fond bu cür məktəblərin açılmasını təşviq edir və onların tədris ədəbiyyatı, kompüterlərlə təchiz olunmasına kömək göstərir. Fond indiyə qədər İvanovo, Tula, Tver və Surqut şəhərlərindəki bazar günü məktəblərinə kömək edir.

Ümumiyyətlə, Azərbaycan cəmiyyətinin Birinci vitse-prezidentin təyinatı ilə bağlı nikbin ovqatı Mehriban xanım Əliyevanın dövlət idarəçiliyində xalqa və dövlətə daha çox xeyir vermək imkanlarının genişlənməsi ilə bağlıdır. Yeni vəzifəyə təyinatla bağlı ona ünvanlanan çoxsaylı təbriklərlə əlaqədar insanlara təşəkkürünü bildirən Mehriban xanım Əliyeva demişdir: “İndiyədək Heydər Əliyev Fondu bir çox əhəmiyyətli layihələr reallaşdırıb və mən bununla fəxr edirəm. Bu illər ərzində biz Azərbaycanın həyatında baş verən müsbət dəyişikliklərə öz töhfəmizi verməyi bacarmışıq. Amma yeni təyinat qarşıma artıq yeni hədəflər qoyur, yeni imkanlar açır. Mən gələcəyə nikbin baxıram. Çünki bu gün Azərbaycan qüdrətli, özünü təsdiq etmiş bir dövlətdir. Bizim inkişaf üçün böyük potensialımız, ən əsası isə insan kapitalımız vardır. Əziz dostlar, mən öz ölkəmə, sizə, bizim yaradıcılıq enerjimizə inanıram. Ölkəmizin gələcəyi, onun inkişafı və firavanlığı üçün bizim hər birimiz cavabdehik. Bu gün sizin səmimi diləkləriniz və dəstəyiniz mənim üçün çox vacibdir. Mən bu dəstəyi hər zaman, fəaliyyətimin bütün mərhələlərində hiss etmişəm. Hesab edirəm ki, əsl minnətdarlıq özünü yalnız sözdə deyil, konkret əməldə göstərməlidir. Sizi əmin edirəm ki, indiyədək önəm verdiyim prinsiplərə - öz Vətənimə və xalqıma xidmət, mərhəmət və ədalət, tolerantlıq və ümumbəşəri dəyərlərə bundan sonra da sadiq qalacağam”.

Əsl insan üçün ən dəyərli xəzinə məhz çalışmaq və başqalarına yaxşılıq etmək bacarığıdır. Heydər Əliyev Fondunun prezidenti, UNESCO və ISESCO-nun prezidenti Mehriban xanım Əliyeva da dəyərli vaxtını, enerjisini məhz insanların nicatına, rifahına, firavanlığına xidmət edən layihələrə yönəldir. İnsan amilinin yüksəlişinə xidmət edən bu layihələr, ilk növbədə, Heydər Əliyev ideyalarına sədaqətin, Azərbaycan Prezidenti cənab İlham Əliyevin Vətən, xalq naminə apardığı məqsədyönlü siyasətə dəstək vermək istəyinin təzahürüdür.

Şahsultan HƏSƏNOV,

Rusiya Federasiyasının Prezidenti yanında

İdarəçilik və Dövlət Qulluğu Akademiyasının magistri

Azərbaycan.- 2017.- 1 mart.- S. 1, 3.