Dünya belə gəlib, belə gedəcək

Həmişə yaxşılı, yamanlı olub,

“Bir yandan boşalıb, bir yandan dolub”.

Yazda çiçək açıb, payızda solub.

Budur gördüyümüz həyatda gerçək,

Dünya belə gəlib, belə gedəcək.

Kiminin dövləti, kiminin adı,

Kiminin qəlbində sevgisi, andı.

Zaman çay misallı, axarındadı.

Kimlər boğulacaq, kimlər üzəcək,

Dünya belə gəlib, belə gedəcək.

Sevgi də, nifrət də, hiylə də onda,

Bir gün bir dondadır, bir gün min donda.

Udan olmayıbdır onu oyunda.

Bəxti həmişəlik şeş gətirəcək,

Dünya belə gəlib, belə gedəcək.

Birinin əlində olum - şücaət,

Birinin əlində ölüm - cinayət.

Əkiz doğulubdur nifrət, məhəbbət,

Biri ağlayanda biri güləcək.

Dü

nya belə gəlib, belə gedəcək.

Kim deyib bu sözü, düzünə deyib.

Düz sözü dünyanın üzünə deyib.

Heyif gərdişinə, heyif, səd heyif.

Nə qədər desək də, düzəlməyəcək,

Dünya belə gəlib, belə gedəcək.

Yüz illər, min illər ötüb-keçsə də,

Gələnlər yığışıb bir-bir köçsə də.

Gəlir qulağıma belə bir səda:

“O öz bildiyini yenə edəcək,

Dünya belə gəlib, belə gedəcək”.

Seyran, baş aparma onun işinə,

Bütün yaranmışlar fənddir dişinə.

Baxıb qəhqəh çəkir öz keçmişinə.

Az düşün, az daşın, bəsdir, gəl əl çək.

Dünya belə gəlib, belə gedəcək.

Seyran CAVADOV,

Azərbaycan.- 2017.- 10 mart.- S. 8.