Ulu öndər Heydər Əliyev milli parlamentarizmin banisidir

Mayın 1-də Milli Məclisdə gənclər və idman komitəsinin, Yeni Azərbaycan Partiyası (YAP) Nəsimi rayon təşkilatının və YAP Gənclər Birliyinin birgə təşkilatçılığı ilə “Heydər Əliyev milli parlamentarizmin banisidir: Gənclərin gözü ilə” mövzusunda “dəyirmi masa” keçirilib.

AZƏRTAC xəbər verir ki, “dəyirmi masa”da çıxış edən Milli Məclisin gənclər və idman komitəsinin sədri Fuad Muradov Azərbaycan gənclərinin hər zaman ulu öndər Heydər Əliyevin siyasətini dəstəklədiyini bildirib. O deyib: “Bu gün hər bir gənc fəxr edir ki, Azərbaycan məhz əsası Ulu Öndər tərəfindən qoyulmuş siyasət nəticəsində güclü, nüfuzlu bir dövlətə çevrilib”. Komitə sədri əminliklə bildirib ki, bugünkü gənclərimiz gələcək fəaliyyətləri ilə Azərbaycanı daha da yüksəkliklərə qaldıracaqlar.

Milli Məclisin deputatı, YAP Nəsimi rayon təşkilatının sədri Məlahət İbrahimqızı deyib ki, bu gün respublikamızda elə bir sahə yoxdur ki, orada ümummilli lider Heydər Əliyevin xeyir-duası olmasın. Azərbaycan Prezidenti İlham Əliyevin də söylədiyi kimi, müasir Azərbaycan dövləti Ulu Öndərin şah əsəridir.

Azərbaycanın inkişafında, müstəqilliyinin möhkəmlənməsində Ulu Öndərin misilsiz xidmətlərindən söz açan M.İbrahimqızı bildirib ki, 1993-cü il iyunun 15-də Ümummilli Liderin ikinci dəfə hakimiyyətə qayıdışından sonra ölkəmizdə milli parlamentarizmin əsası qoyuldu və inkişaf etməyə başladı.

Tədbirdə müasir müstəqil Azərbaycan dövlətinin qurucusu, ümummilli lider Heydər Əliyevə həsr olunan videoçarx nümayiş etdirilib.

Sonra çıxış edən Yeni Azərbaycan Partiyası Gənclər Birliyinin sədri Seymur Orucov gənclərə Milli Məclisin binası ilə tanışlıq imkanı verildiyinə görə parlament rəhbərliyinə təşəkkürünü bildirib. O deyib: “Əminəm ki, bugünkü gün gənclərimizin xatirəsindən heç zaman silinməyəcək. Çünki bu gün gənclərimiz Milli Məclisin binası ilə tanış olmaqla yanaşı, buradakı iş prinsipi haqqında da məlumatlandırılıblar”.

Ulu öndər Heydər Əliyevin ikinci dəfə hakimiyyətə qayıdışından sonra ilk görüşlərindən birinin məhz gənclərlə olduğunu qeyd edən S.Orucov bildirib ki, gənclər də öz növbəsində Azərbaycanın inkişafı, çiçəklənməsi üçün daim fəal olmalı, dövlətimiz üçün əllərindən gələni etməlidirlər.

Milli Məclisin gənclər və idman komitəsinin sədr müavini, Azərbaycan Karate-do Federasiyaları Assosiasiyasının prezidenti Ülvi Quliyev bildirib ki, müasir müstəqil Azərbaycanın qurucusu olan Ulu Öndər haqqında Azərbaycanda, ölkəmizdən kənarda çoxsaylı tədbirlər, konfranslar keçirilir. Heydər Əliyev müstəqil Azərbaycan dövlətini yaratdı, onu beynəlxalq arenaya çıxardı, gücləndirdi. Ulu Öndərin böyüklüyü, müdrikliyi, iradəsi, qətiyyəti sayəsində müstəqil Azərbaycan güclü iqtisadiyyata maliq qüdrətli dövlətə çevrilib. Müasir dövrün gəncləri bu tarixi öyrənməlidirlər.

Tədbir müzakirələrlə davam etdirilib.

Azərbaycan.- 2017.- 2 may.- S. 4.