Ulu öndər
Heydər Əliyev Azərbaycan dövlət gənclər
siyasətinin banisidir
Ulu
öndər Heydər Əliyev 1993-2003-cü illərdə 43
dəfə gənclərlə bağlı tədbirdə
iştirak edib, çıxışlarında onlara dəyərli
tövsiyələrini verib. Ümummilli Lider on il ərzində
gənclərlə bağlı 20 fərman, sərəncam və
qanun imzalayıb. MDB ölkələrinin rəhbərləri
arasında gənclərlə ən çox görüşən,
onların problemlərinə ən çox diqqət ayıran
məhz ulu öndər Heydər Əliyev idi.
AZƏRTAC
xəbər verir ki, bu sözləri Prezident
Administrasiyasının ictimai-siyasi məsələlər
şöbəsinin müdir müavini Tahir Süleymanov
mayın 4-də Bakıda Azərbaycan Respublikasının
Prezidenti yanında Gənclər Fondunun təşkilatçılığı
ilə ümummilli lider Heydər Əliyevin anadan
olmasının 94-cü ildönümünə həsr olunan
“Heydər Əliyev Azərbaycan dövlət gənclər
siyasətinin banisidir” adlı tədbirdə deyib.
Müstəqilliyin
ilk illərində Azərbaycanda anarxiya və xaosun, hərc-mərcliyin
baş alıb getdiyini, ölkə iqtisadiyyatının tənəzzülə
uğradığını, Ermənistanın Azərbaycana hərbi
təcavüzünün daha da şiddətləndiyini
vurğulayan Prezident Administrasiyasının rəsmisi qeyd edib:
“Belə bir vəziyyətdə o dövrkü hakimiyyətin gənclərlə
məşğul olmağa nə vaxtı, nə həvəsi,
nə də səriştəsi vardı. Azərbaycanda
dövlət gənclər siyasəti yalnız ulu öndər
Heydər Əliyevin hakimiyyətə
qayıdışından sonra başladı. Gənclər
siyasətinin önəmini dərk edən Ulu Öndər belə
çətin şəraitdə 1993-cü ilin sentyabrında -
Ali Məclisin sədri işləyərkən gənclərin
böyük bir qrupu ilə görüşdü, ətraflı
müzakirələr aparıldı, təkliflər irəli
sürüldü. Məhz həmin təkliflər əsasında
1994-cü ilin iyununda Azərbaycanda dövlət gənclər
siyasətini həyata keçirməli olan Gənclər və
İdman Nazirliyi yaradıldı. Artıq həmin vaxtdan 23 il
keçib və bu nazirliyin gördüyü işlər Ulu
Öndərin nə qədər uzaqgörən addım
atdığını təsdiqləyir. Bir qədər sonra
Heydər Əliyevin təşəbbüsü ilə Azərbaycan
gənclərinin birinci forumu keçirildi. Bu, müstəqilliyimizi
əldə etdikdən sonra gənclərlə bağlı
keçirilən ən böyük tədbir idi. Ulu Öndər
həmin forumda geniş nitq söylədi. O, nitqində gənclər
siyasətinin məqsəd və vəzifələrini,
prioritetlərini dəqiqliklə açıb göstərmişdi.
Həmin gündən sonra gənclərlə iş ən
yüksək səviyyədə və konkret hədəfə
yönəlməklə aparılmağa başlandı”.
Dövlət
gənclər siyasətinin bu gün Prezident İlham Əliyev
tərəfindən uğurla davam etdirildiyini vurğulayan
T.Süleymanov qeyd edib ki, Azərbaycanda gənclərin asudə
vaxtlarını səmərəli keçirmələri
üçün müasir infrastruktur, o cümlədən gənclər
evləri, təhsil mərkəzləri, mədəniyyət
müəssisələri, idman kompleksləri yaradılıb.
“Avropa
Şurasının üzvü olan 47 ölkə var ki, onlardan
yalnız ikisində - Azərbaycanda və Gürcüstanda həm
Gənclər və İdman Nazirliyi, həm də Gənclər
Fondu fəaliyyət göstərir. Azərbaycan Gənclər
Fondu gənclər təşkilatlarının, həmçinin
gənclərin fərdi layihələrinə böyük dəstək
göstərir. Əminəm ki, gənclərimiz onlar
üçün yaradılan bu şəraitdən faydalanacaq və
yeni layihələrlə çıxış edəcəklər”,
- deyə T.Süleymanov bildirib.
Gənclər
Fondunun icraçı direktoru Fərhad Hacıyev
çıxışında diqqətə
çatdırıb ki, müasir müstəqil Azərbaycan
ulu öndər Heydər Əliyevin siyasəti nəticəsində
dünyanın sürətlə inkişaf etməkdə olan
ölkələrindən birinə çevrilib. O qeyd edib ki, məhz
Ulu Öndərin 1993-cü ildə hakimiyyətə
qayıdışından sonra ölkədə sabitlik
yaranıb, respublika iqtisadiyyatı dirçəlməyə
başlayıb. Heydər Əliyevin həyata keçirdiyi
uğurlu siyasət Azərbaycan gəncliyinin inkişafı
üçün də yeni imkanlar yaradıb. Məhz Ulu
Öndərin rəhbərliyi ilə dövlət gənclər
siyasətinin təməli qoyulub və bu gün bu siyasət
uğurla reallaşdırılır.
Ulu öndər Heydər Əliyevlə bağlı xatirələrini bölüşən Milli Məclisin deputatı, Azərbaycan Ağsaqqallar Şurasının sədri Fəttah Heydərov Ümummilli Liderin ölkəmizə rəhbərliyinin hər iki dövründə gənclərə göstərdiyi diqqət və qayğıdan danışıb. Bildirib ki, Azərbaycana rəhbərliyinin hər iki dövründə Ulu Öndər respublikamızı inkişaf yoluna çıxarıb, ölkəmizin firavan gələcəyinin istiqamətini müəyyənləşdirib. Azərbaycan gəncliyi bu amalın gerçəkləşməsi üçün daim Heydər Əliyevin yanında olub, onu dəstəkləyib. Bu gün bu siyasət Prezident İlham Əliyev tərəfindən uğurla həyata keçirilir. Azərbaycan gəncliyi Prezident İlham Əliyevin rəhbərliyi ilə gələcəyə doğru inamla irəliləyir.
Gənclər Təşkilatları Milli Şurasının sədri Seymur Hüseynov, “İrəli” İctimai Birliyinin sədri Mirhəsən Seyidov, “Gənclər üçün Təhsil Mərkəzi” İctimai Birliyinin sədri Fəxrəddin Həsənzadə, “Asan Könüllüləri Gənclər Təşkilatı” İctimai Birliyinin sədri Bəxtiyar İslamov çıxışlarında bildiriblər ki, ümummilli lider Heydər Əliyev gənclərlə bağlı məsələləri həmişə öz siyasətinin əsas tərkib hissələrindən biri hesab edib. Heydər Əliyevin 1969-1982-ci illərdə respublikaya rəhbərlik etdiyi dövrlərdə yüzlərlə yeni tədris ocaqları, gənclik mərkəzləri, hərbi məktəblər açılıb, minlərlə azərbaycanlı gənc keçmiş SSRİ-nin nüfuzlu ali məktəblərində təhsil alıb, müasir ixtisaslara yiyələniblər. Ulu Öndərin bu sahədə həyata keçirdiyi siyasət gənc nəslin mənəvi-əxlaqi tərbiyəsinin gücləndirilməsinə, sosial rifahının yaxşılaşdırılmasına və zəngin elmi potensialın yaradılmasına xidmət edirdi. Heç də təsadüfü deyil ki, Heydər Əliyev hər zaman gənclərə qayğı ilə yanaşır, onların problemlərini həll etməyə çalışırdı. Gənclərin ictimai-siyasi həyatda fəallığını artırmaq üçün həyata keçirilən Dövlət Proqramının tətbiqi, idarəetmə orqanlarında gənc mütəxəssislərə üstünlük verilməsi ümummilli lider Heydər Əliyev tərəfindən müəyyənləşdirilmiş gənclər siyasətinin uğurlu nəticəsidir.
Gənclər Fondunun elan etdiyi qrant müsabiqəsinin qaliblərindən olan Gülnar Xəlilova, Könül Əlizadə və Cəbrayıl Fərzəliyev ölkəmizdə uğurla reallaşdırılan gənclər siyasətinin onların həyatında oynadığı roldan danışıblar.
Sonda ümummilli lider Heydər Əliyevin anadan
olmasının 94-cü ildönümü ilə bağlı
film nümayiş etdirilib.