Azərbaycanda mebel sənayesinin inkişafi üçün böyük potensial var

Respublikamızda həyata keçirilən islahatların mühüm istiqamətlərindən biri qeyri-neft məhsulları ixracının artırılması, yeni bazarlara çıxışın təmin olunmasıdır. Təbii ki, bu işdə mühüm rol yenə də sahibkarların üzərinə düşür. Qeyri-neft sektorunun aparıcı sahələri çoxdur. Bu sırada mebel sənayesinin xüsusi çəkisi var.

Bu gün Azərbaycanın mebel bazarında idxal məhsulları üstünlük təşkil edir. Amma xaricdən gətirilən mebellərin heç də hamısı keyfiyyətli sayıla bilməz. Odur ki, qeyri-neft sektorunun inkişafının stimullaşdırıldığı indiki dövrdə bu cür məsələlər xüsusilə diqqət mərkəzində olmalı, istehsalın təşviqi ilə yanaşı, yerli mebellərin alışı da təbliğ olunmalıdır. Fəxr hissi ilə deyə bilərik ki, yerli istehlakçıların rəğbət göstərdiyi, həm də “Made in Azerbaijan” brendi ilə dünya bazarlarına çıxan mebellərimiz də var. “Saloğlu” mebel brendi məhz belə məhsullardandır.

“Saloğlu” mebel fabriki 2000-ci ildən fəaliyyətə başlamışdır. Əsas fəaliyyəti mebel istehsalı və satışı olan “Saloğlu” hazırda Azərbaycanın ən böyük müasir mebel istehsalçılarından biridir və bu müvəffəqiyyətini dünya səviyyəsinə çatdırmağı qarşıya hədəf qoyub. Şirkət dünyada tanınan bir marka kimi tanınmaq üçün uğurla irəliləyir, daim müştərilərinə keyfiyyətli məhsullar təqdim etmək üçün çalışır.

Mebel istehsalçıları içərisində özünəməxsus yeri olan “Saloğlu” mebel fabriki ölkənin ən böyük müəssisələrindən biri olmaqla yanaşı, həm də yeni avadanlıqların və texnoloji xətlərin quraşdırılması sahəsində seçilir. “Saloğlu” müəssisəsinin nəzdində yaradılan və oktyabrın 19-da Azərbaycan Prezidenti cənab İlham Əliyevin Qazax və Ağstafa rayonlarına səfəri zamanı açılışı olan “Modern” mebel fabriki bunu təsdiq edir.

Fabrikin inşasına 2015-ci ilin dekabrında başlanılıb. İki hektar ərazisi olan fabrik 7 istehsal sahəsindən ibarətdir. Ağac yonqarı lövhələrinin və laminatların kəsilməsi və quraşdırılması, mebellər üçün metal hissələrin və mexanizmlərin yığılması, yumşaq mebellər üçün taxta-karkasların, dəri və parça üzlüklərin, döşəklərin, yataq və qonaq otaqları üçün mebel dəstlərinin istehsalı ən müasir səviyyədə qurulub. Fabrik Almaniya və İtaliyanın aparıcı şirkətlərinin avadanlıqları ilə təchiz olunub. Burada 200 nəfərin daimi işlə təmin edilməsi nəzərdə tutulur. Müəssisə yüksək keyfiyyətli məhsul istehsal etmək üçün geniş texniki imkanlara malikdir. Bu cür müəssisənin istifadəyə verilməsi yalnız Qazax və Ağstafa rayonlarının deyil, ümumilikdə, regionun iqtisadi inkişafına mühüm töhfə verəcək.

“Saloğlu” mebel istehsalı müəssisəsinin nəzdində “Venzana” mebel fabriki də yaradılacaq. Bu fabrik 4 istehsal sahəsindən ibarət olacaq. İstehsal ediləcək məhsulların daxili bazarla yanaşı, Almaniyaya, Belçikaya, Fransaya, Hollandiyaya, İtaliyaya, İspaniyaya və İsveçə ixracı nəzərdə tutulur. İşçilərin istirahəti, onların məişət şəraitinin yaxşılaşdırılması üçün burada körpələr evi-uşaq bağçasının, əyləncə və ticarət mərkəzlərinin inşası planlaşdırılır. Bundan başqa, ərazidə mebel mərkəzi ilə yanaşı, “Yaşıl Bazar” satış kompleksi və mehmanxana da tikiləcək. Layihə üzrə inşaat işlərinin 2017-ci ilin dekabrında başa çatdırılması nəzərdə tutulub. Layihənin icrası nəticəsində 2500 nəfər daimi işlə təmin ediləcək. Bizim üçün fəxrdir ki, bu fabrikin təməlini Qazax və Ağstafa rayonlarına səfəri zamanı Prezident İlham Əliyev qoydu və xeyir-duasını verdi.

“Saloğlu” mebel fabrikinin yeni istehsal sahələrinin yaradılması göstərir ki, dünyada hökm sürən iqtisadi böhrana baxmayaraq, ölkəmizin sənaye potensialının möhkəmləndirilməsi istiqamətində məqsədyönlü tədbirlər uğurla davam edir. Bu cür müəssisələrin istifadəyə verilməsi ölkəmizdə sənayenin inkişafına əhəmiyyətli dərəcədə töhfə verir, daxili bazarın tələbatını ödəmək baxımından müstəsna əhəmiyyət daşıyır. Qeyri-neft sənayesinin şaxələndirilməsi, mövcud təbii və iqtisadi resursların dövriyyəyə cəlb edilməsi istiqamətində görülən işlər həm də yüzlərlə yeni iş yerinin açılmasına geniş imkan yaradır.

Azərbaycanın mebel sənayesini inkişaf etdirmək üçün kifayət qədər imkanlar var. Bunun üçün müəyyən stimullaşdırıcı tədbirlərin həyata keçirilməsi, istehsalda istifadə olunan yan sənaye məhsullarının idxalında sahibkarlara müəyyən güzəştlər olunmalıdır. Eyni zamanda idxal olunan həmin komponentlərin yerli istehsalçılar tərəfindən istehsalının təşkili stimullaşdırılmalıdır. Təsadüfi deyil ki, ötən il “Saloğlu” mebel müəssisəsində olarkən cənab İlham Əliyev bu məsələ ilə xüsusi maraqlandı. Hazırda biz komponentlərin 70 faizini xarici ölkələrdən idxal edirik. Lakin Prezident İlham Əliyev bu məhsulların da ölkəmizdə istehsalını tövsiyə etdi. Xaricdən idxal etdiyimiz komponentlərin həcmini azaltmaq üçün layihə və planlar hazırlamışıq. Əgər layihə uğurla icra edilsə, xaricdən idxal etdiyimiz komponentlərin həcmini 30 faizə endirəcəyik.

Hər yerdə olduğu kimi, ölkəmizdə də ümumi daxili məhsul istehsalında özəl sektorun xüsusi çəkisi böyükdür. Bu mənada iqtisadiyyatın şaxələndirilməsinin, qeyri-neft məhsullarının istehsalının artırılmasının, idxaldan asılılığın azaldılmasının və digər strateji vəzifələrin həllinin xüsusilə aktual olduğu indiki dövrdə özəl sektorun rolu mühüm əhəmiyyət kəsb edir. Özəl sektorun iştirakçıları isə sahibkarlardır. Əsl sahibkar millətini, dövlətini, dövlətçiliyini sevən insan olmalıdır. Sahibkarlığın inkişafı həm də milli şüurun formalaşmasında mühüm rol oynayır. Fəxrlə deyə bilərik ki, ulu öndər Heydər Əliyevin başlatdığı islahatlar, Prezident İlham Əliyevin reallaşdırdığı yeni inkişaf strategiyası nəticəsində Azərbaycanda həm vətənpərvər sahibkarlar sinfi , həm də əlverişli biznes mühit formalaşıb. Reallıq ondan ibarətdir ki, Prezident İlham Əliyev sahibkarların iqtisadiyyatda rolunu və yerini düzgün qiymətləndirir.

Dünyada neftin qiymətinin aşağı düşməsindən sonra yaranmış situasiya ölkəmizdə də neqativ ssenarilərə qarşı mütləq qoruyucu və qabaqlayıcı mexanizmlərin həyata keçirilməsini və gücləndirilməsini zəruri edirdi. Bununla əlaqədar olaraq Prezident İlham Əliyevin elan etdiyi yeni iqtisadi siyasətlə əlaqədar həyata keçirilən islahatların bir istiqaməti iqtisadi sektorun inkişafına yol açacaq tədbirlərdən ibarətdir. Bu sırada qarşıya qoyulan biznes mühitinin yaxşılaşdırılması, bu sahədə bürokratik əngəllərin aradan qaldırılması, sahibkarlığın inkişafına dövlət dəstəyinin davam etdirilməsi, iş adamlarına güzəştli kreditlərin verilməsi kimi məsələlər sırf sahibkarlıq fəaliyyətinin təşviqinə hesablanıb. Odur ki, son 4 ayda ölkədə yeni iqtisadi siyasətin reallaşması istiqamətində həyata keçirilən tədbirlərin bir hissəsi sahibkarlıq sahəsini əhatə edib. Bu məqsədlə qanunlar qəbul olunub, sərəncamlar imzalanıb. Yoxlamaların minimuma endirilmsi, apelyasiya şuralarının yaradılması, vergi sahəsində həyata keçirilən islahatlar biznes mühitini daha əlverişli edib və bu sahədə vaxtilə mövcud olmuş bəzi neqativ halların qarşısını alıb. Lisenziyalaşdırma sisteminin təkmilləşdirilməsi, satınalmalarda yerli sahibkarlara üstünlük verilməsi, gömrük və vergi sahəsində görülən işlər, ixracın və investisiyaların təşviqi mexanizmlərinin tətbiqi sahibkarlıq fəaliyyətinə diqqətin davamı olmasını göstərməklə yanaşı, özəl bölmənin inkişafında xüsusi əhəmiyyət daşıyır. Bu mənada sahibkarlar davamlı bu sahədə həmişə dövlət başçısının dəstəyini və iradəsini hiss edirlər.

Məmurlar da Prezident

İlham Əliyevdən nümunə götürərək sahibkarlara kömək etməli, bürokratik əngəllərin aradan qaldırılmasına çalışmalıdırlar. Çünki sahibkarlığın inkişafı yeni iş yerləri, yüksək əməkhaqqı və büdcəyə daha çox vəsaitin ödənilməsi deməkdir. Sonuncu məsələ dolayısı ilə büdcədən əməkhaqqı və təqaüd alan insanların da rifahının yüksəlməsi deməkdir. Bütün inkişaf etmiş ölkələr məhz bu amillər üzərində hərtərəfli yüksəlişə nail olublar. Cənab Prezidentin dediyi kimi, biz də bu yolla getməliyik. Son illərin reallıqları göstərir ki, bu yolun alternativi yoxdur və biz sahibkarlar Prezident İlham Əliyevin ətrafında sıx birləşərək dövlətimizin daha da inkişafına nail olacağıq.

Tacəddin MUSTAFAYEV,

“Saloğlu” mebel fabrikinin təsisçisi

Azərbaycan.- 2017.- 7 may.- S. 12.