Əsas Media Mərkəzi fəaliyyətə başladı

IV İslam Həmrəyliyi Oyunları Əməliyyat Komitəsinin Əsas Media Mərkəzi mayın 8-dən etibarən fəaliyyətə başladı. Mərkəz İslamiada ərzində ayrı-ayrı idman obyektlərinin media mərkəzləri ilə bərabər bütün akkreditasiyadan keçmiş media nümayəndələri üçün fəaliyyət göstərəcək. Jurnalistlər burada Oyunları canlı olaraq monitorlar vasitəsilə izləyəcək və informasiyanı rahatlıqla çalışdıqları media orqanına ötürə biləcəklər.

Media nümayəndələri, həmçinin Mərkəzdən Oyunlar barədə ətraflı məlumat və Media Bələdçisi kitabçasını əldə edə bilərlər. Oyunların açılış və bağlanış mərasimləri üçün biletləri də buradan götürmək mümkündür. Bunun üçün mərkəzdə çalışan əməkdaşlara akkreditasiya sənədini göstərmək kifayətdir.

Oyunlar zamanı media nümayəndələri üçün 10 idman obyektini əhatə edən nəqliyyat sistemi fəaliyyət göstərəcək. 6 idman obyektinə isə ictimai nəqliyyatla rahatlıqla getmək mümkündür. Nəqliyyat cədvəlində hər hansı dəyişiklik olarsa, media nümayəndələrinə bu barədə sms vasitəsilə məlumat veriləcək. Açılış və bağlanış mərasimləri günü də media nümayəndələri üçün nəqliyyat təşkil olunacaq. Nəqliyyat vasitələri Əsas Media Mərkəzinin qarşısından yola düşəcək.

Media əməliyyatları meneceri Rəna Ağayevanın sözlərinə görə, Əsas Media Mərkəzinin fəaliyyətə başlamasında məqsəd media nümayəndələrinə yardımçı olmaq, onların işlərini asanlaşdırmaqdır: “Mərkəz səhər saat 9:00-dan axşam saat 10:00-a kimi fəaliyyət göstərəcək.

Akkreditasiyadan keçmiş bütün media nümayəndələri, fotoqraflar və rəsmi yayım hüququ olmayan operatorlar istisna olmaqla gəlib öz biletlərini əldə edə bilərlər. Mərkəzdə jurnalistlər üçün hər cür şərait yaradılıb. Burada mayın 13, 15, 17, 19 və 21-i tarixlərində media konfranslar keçiriləcək. Bu konfranslarda gənclər və idman naziri Azad Rəhimov da daxil olmaqla bir neçə rəsmi şəxsin iştirak etməsi gözlənilir”.

Qeyd edək ki, Media Əməliyyatları Komandası IV İslam Həmrəyliyi Oyunlarında akkreditasiyadan keçmiş Media nümayəndələri üçün bütün növ lazımi xidmətlərin planlaşdırılmasına və onlar üçün müvafiq iş şəraitinin yaradılmasına cavabdehdir. IV İslam Həmrəyliyi Oyunlarını işıqlandırmaq üçün təxminən 650 nəfər jurnalist, fotoqraf və rəsmi yayım hüququ olmayan TV şirkətlərin nümayəndələri akkreditasiyadan keçib.

Elgün MƏNSİMOV

Azərbaycan.- 2017.- 9 may.- S. 12.