İslamiadanın zəfər estafeti Azərbaycandadır

Ölkəmiz həm təşkilatçılığı, həm də medal sayına görə IV İslam Həmrəyliyi Oyunlarının tarixinə öz möhürünü vurur

İslam dünyasının maraqla izlədiyi “Bakı-2017” IV İslam Həmrəyliyi Oyunlarının hər keçən günü maraqlı anlarla yadda qalır. Azərbaycan atletlərinin uğurlu çıxışları davam edir. Elə gün yoxdur ki, idmançılarımız fəxri kürsüyə qalxmasınlar. Əyarından asılı olmayaraq qazanılan hər bir medal uğur göstəricisidir.

Azərbaycan Milli Olimpiya Komitəsinin (MOK) parlaq qələbələri ilə ümidləri doğruldan idmançılarımızın şərəfinə təşkil etdiyi “Zəfər Günləri” isə bayram əhval-ruhiyyəsini daha da artırır.

İki il öncə “Bakı-2015” I Avropa Oyunları zamanı MOK tərəfindən həyata keçirilməyə başlanan bu xoşməramlı layihə İslamiadanın da bəzəyinə çevrilib. Medal qazanan idmançılarımızın, onların məşqçilərinin, ailə üzvlərinin və media nümayəndələrinin iştirak etdikləri “Zəfər Günləri” Azərbaycan idmanının şanlı tarixində yeni səhifələr açır.

Artıq İslamiadada medal qazanan 50 idmançımız “Zəfər Günləri”nin qonağı olub. Mayın 14-dən start götürən silsilə xarakterli tədbirlərdə Milli Olimpiya Komitəsinin və İslam Həmrəyliyi İdman Federasiyasının vitse-prezidenti Çingiz Hüseynzadə, gənclər və idman nazirinin müavini İsmayıl İsmayılov, MOK-un baş katibi Ağacan Abıyev, Ağır Atletika Federasiyasının vitse-prezidenti, MOK-un baş katibinin müavini Azər Əliyev, Milli Paralimpiya komitəsinin prezidenti İlqar Rəhimov və Taekvondo Federasiyasının vitse-prezidenti Füzuli Musayev iştirak ediblər.

MOK-un vitse-prezidenti Çingiz Hüseynzadə bildirib ki, mayın 12-də paytaxtımızda möhtəşəm açılış mərasimi ilə start götürən “Bakı-2017” IV İslam Həmrəyliyi Oyunları müsəlman ölkələri üçün böyük önəm kəsb edir: “Fəxr hissi ilə qeyd edə bilərik ki, əvvəlki oyunlardan fərqli olaraq, “Bakı-2017”də 50-dən çox İslam dövlətinin idmançıları iştirak edir. Bu, Azərbaycanın uğuru və yeni rekordudur. Hər zaman İslam dəyərlərinə sadiq olan Azərbaycan bu Oyunları yüksək səviyyədə keçirməklə bir daha idman ölkəsi olduğunu sübut edir”.

MOK-un vitse-prezidenti İslamiadanın qalibi olan qadın həndbolçulardan ibarət Azərbaycan yığmasının uğurunu xüsusi ilə qeyd edib: “Yarışların ikinci günü daha möhtəşəm oldu, idmançılarımız 28 medal qazandı. Bu, Azərbaycanın idman dövləti olduğunu bir daha təsdiqlədi. Komanda idman növləri üzrə beynəlxalq yarışlarda böyük uğur qazanmamışdıq. Fərəhlidir ki, qadınlardan ibarət həndbol millimiz çempion oldu”.

Ç.Hüseynzadə vurğulayıb ki, Avropa Oyunlarında olduğu kimi, yenə də çempionlarımızı Azərbaycanın dövlət başçısı, Milli Olimpiya Komitəsinin prezidenti İlham Əliyev təltif edir. Bu, artıq ənənəyə çevrilib. Prezidentin idmançıları təltif etməsi növbəti günlərdə yarışlara qatılacaq atletlərimizdə böyük ruh yüksəkliyi yaradır.

Azərbaycan idmançılarının mötəbər idman yarışının iki günü ərzində 50 medal qazandığını böyük nailiyyət hesab edən Ç.Hüseynzadə qeyd edib ki, ölkəmiz həm yüksək səviyyəli təşkilatçılığına, həm də medal sayına görə İslamiada tarixinə öz möhürünü vurur.

Gənclər və idman nazirinin müavini İsmayıl İsmayılov isə bu uğurların əsasında dövlətin idmançılara göstərdiyi qayğının durduğunu söyləyib: “Artıq idman ölkəsinə çevrilən Azərbaycan idmançılarının “Bakı-2017”nin ilk gündən rekord sayda medallar qazanması Prezident İlham Əliyevin bu sahəyə olan diqqət və qayğısının bəhrəsidir”.

Milli Paralimpiya Komitəsinin prezidenti İlqar Rəhimov isə paralimpiyaçılarımızın İslamiadada uğurlu çıxışından bəhs edib. Vurğulayıb ki, paracüdoçular İslamiadanı 4 qızıl, 4 gümüş, 3 bürünc olmaqla 11 medalla başa vurublar. Bu, həqiqətən də böyük nailiyyətdir.

Çıxışlardan sonra medalçılar İslamiadanın naxışlı lövhəsinə imzalarını atıblar və onlara MOK-un xüsusi hədiyyələri təqdim edilib. Mərasimdən sonra isə çempionlarımız xoş təəssüratlarını media nümayəndələri ilə bölüşüblər.

“Fəxri kürsüdə himn oxumaq böyük şərəfdir”

Marina Durunda,

IV İslam Həmrəyliyi Oyunlarının beşqat mükafatçısı

“Bədii gimnastika üzrə Azərbaycan yığma komandası İslam Həmrəyliyi Oyunlarındakı nəticələrindən çox razıdır. Biz xoşbəxtik ki, ölkəmizin ümidlərini doğrultduq. Fəxri kürsüdə himn oxumaq həqiqətən, böyük şərəfdir.

Qazandığımız uğurlarda Gimnastika Federasiyasının, məşqçilərimizin xüsusi əməyi var. Bizə çox böyük dəstək göstərdilər və nəticəsi də yaxşı oldu. İslamiadada ilk dəfə keçirilən gimnastika yarışlarında Azərbaycan öz sözünü dedi və yeni rekordlara imza atdı.

Onu da deyim ki, azarkeşlərin dəstəyi komandanı çox həvəsləndirirdi. Bu da bizə mübarizədə əlavə stimul verirdi. Hər kəsə təşəkkür edirəm”.

“Nə qədər karatedə varam, Vətənimə qızıl medallar qazandırmağa çalışacam”

Rafael Ağayev,

IV İslam Həmrəyliyi Oyunlarının qızıl medalçısı

“İdmançının özündən çox şey asılıdır. Qalib gəlmək olar, lakin əsas məsələ titulu qorumaqdır. İslamiadada həm karatedə, həm də digər idman növlərində qızıl medallarımızın sayı çoxdur. Medal qazanan idmançılarımızı təbrik edirəm.

Bütün qələbələrə önəm verirəm. Uğurun arxasında ağır məşqlər dayanır. İstər respublika birinciliyi olsun, istərsə də Avropa və ya dünya çempionatı fərqi yoxdur. Çünki hər bir medal üçün əziyyət çəkirsən, ciddi zədələrlə üzləşirsən. Ancaq himnimizin səslənməyi və bayrağımızın yüksəlməyi insanda əvəzsiz hiss yaradır.

İslamiadada Azərbaycanın bayraqdarı idim və bundan qürur duyurdum. Bu mənim üçün böyük şərəfdir. Əlim qırıq olsaydı belə, o bayrağı tutacaqdım. Bayraqdar olmaq hər bir idmançıya nəsib olmur. Nə qədər bu idmanda varam, Vətənimə qızıl medallar qazandırmağa çalışacağam.

Hazırda 32 yaşım var və 2020-ci ildə keçiriləcək Yay Olimpiya Oyunlarına hazırlaşıram. Orada nəinki iştirak etmək, qızıl medalla Vətənə dönməyə çalışacağam”.

“Qızıl medalı Prezident İlham Əliyevin təqdim etməsi həyatımın ən sevincli anı oldu”

Nicat Şıxəlizadə,

IV İslam Həmrəyliyi Oyunlarının qalibi

“Əsas məqsədimiz qızıl medal uğrunda mübarizə aparmaq idi. Çox şükür ki, istəyimizə nail olduq. Qızıl medalı mənə Prezident İlham Əliyevin təqdim etməsi həyatımın ən sevincli anı oldu. Doğma divarlar arasında qalib olduğum üçün çox sevincliyəm.

Yarışa ciddi hazırlaşmışdım. Bir neçə təlim-məşq toplanışında iştirak etmişdik. Əsas odur ki, əziyyətimizin bəhrəsini gördük. İdmançı üçün bu, vacib məsələdir. Çəkdiyin zəhmət hədər getməyəndə daha da həvəslənirsən. Bütün rəqiblərimə qarşı ciddi hazırlaşmışdım. Onların sırasında yeni sima yox idi. Hamısını tanıyırdım, əvvəllər güləşmişik. Sevinirəm ki, bütün rəqiblərimin üzərində təmiz qələbə qazandım. Qarşına məqsəd qoymamısansa, uğur əldə edə bilməyəcəksən. Yayda bizi dünya çempionatı gözləyir. Ona ciddi hazırlaşacağıq. İnşaallah, yenə xalqımızı sevindirərik. Sonra da yarışlar olacaq. Amma indiki məqamda əsas məqsədimiz dünya çempionatı ilə bağlıdır. Bizdən həmin turnirdə də uğurlu nəticə gözlənilir. Bunun fərqindəyik və ümidləri doğrultmaq üçün əlimizdən gələni edəcəyik”.

“İslamiadada məğlub ola bilməzdim”

Fəridə Abıyeva,

IV İslam Həmrəyliyi Oyunlarının çempionu

“Azərbaycanda keçirilən I Avropa Oyunlarında uğur qazana bilməmişdim. Ancaq çox çalışdım və İslam Həmrəyliyi Oyunlarına ciddi hazırlaşdım. İslamiadada məğlub ola bilməzdim, çünki Vətənimdə çıxış edirdim.

Hisslərimi ifadə etməyə çətinlik çəkirəm. Mən çox xoşbəxtəm və qələbəmi Azərbaycan xalqına həsr edirəm.

Avropa Oyunlarında olduğu kimi, bu Oyunlarda da azarkeşlər fəaldırlar. İdmançılarımıza böyük dəstək olurlar və bu, atletlərimizi daha da ruhlandırır.

Artıq karate Olimpiya idman növü kimi proqrama daxil edilib. Ən böyük arzum Olimpiya Oyunlarında Azərbaycan bayrağını yüksəklərə qaldırmaqdır. Bunun üçün çox çalışmalıyam və inanıram ki, bu istəyimə də nail ola bilərəm”.

“Bu, zəfər karyerama qızıl hərflərlə yazıldı”

Ramilə Kaştayeva,

IV İslam Həmrəyliyi Oyunlarının paracüdo üzrə qalibi

“Mən dünya və Avropa birinciliklərinin mükafatçısı və Paralimpiadanın iştirakçısı olmuşam. Amma İslamiadaya xüsusi hazırlaşırdım. Doğma meydanda yalnız birinci yeri tutmağı hədəfləmişdim. Bu qələbə karyerama qızıl hərflərlə yazıldı.

Yarışlara qədər ciddi hazırlıq keçdiyim üçün mənə inananların etimadını doğrultdum. IV İslam Həmrəyliyi Oyunlarında Özbəkistan, Türkiyə, Əlcəzair və digər müsəlman ölkələrindən güclü idmançılar yarışırlar. Mənim ilk rəqibim Özbəkistan təmsilçisi Olimpiya Oyunlarının mükafatçısı idi. Çox sevinirəm ki, belə güclü rəqiblərin mübarizə apardıları yarışda qalib gələrək Azərbaycana qızıl medal qazandıra bildim.

Əsas məqsədim 2020-ci ildə Tokioda keçiriləcək Yay Olimpiya və Paralimpiya Oyunlarında qızıl medal qazanmaqdır. Amma əvvəlcə bu ilin avqustunda keçiriləcək qitə çempionatına, ondan sonra qran-pri turnirlərinə və gələn il təşkil ediləcək dünya çempionatına hazırlaşmalıyam”.

“Qələbəyə gedən yol həmişə çətin olur”

Orxan Səfərov,

IV İslam Həmrəyliyi Oyunlarının qalibi

“İki il öncə ölkəmizdə keçirilən Avropa Oyunlarında gümüş medal qazanmışdım. Ancaq qarşıma məqsəd qoymuşdum ki, İslamiadada qızıl medala sahib çıxım və istəyimə nail oldum. Bu, çox sevindiricidir. Finalda qalib gəldiyim rəqiblə artıq 4-cü dəfədir qarşılaşıram. 3 dəfə mən qələbə qazanmışam, bir dəfə o. Burada dünya reytinqində yaxşı yerlərdə qərarlaşan idmançılar yarışır.

Qələbəyə gedən yol həmişə çətin olur. Doğma divarlar arasında mübarizə aparanda isə idmançıda ikiqat məsuliyyət yaranır. Şükür ki, ümidləri doğruldaraq hər kəsi sevindirə bildim. İndi qarşıdakı yarışlar barədə düşünürəm. IV İslam Həmrəyliyi Oyunlarında qızıl medal qazandıqdan sonra növbəti hədəfim 2020-ci il Tokio Olimpiya Oyunlarında birinci yer tutmaqdır. 2016-cı il Olimpiya Oyunlarında mən beşinci olmuşdum, Tokioda isə qızıl mükafatı qazanmağa çalışacağam”.

“Qızıl medalı Azərbaycan şəhidlərinə həsr edirəm”

Orxan Mamayev,

IV İslam Həmrəyliyi Oyunlarının çempionu

“Bu, çox möhtəşəm yarışdır və mən şadam ki, ikinci dəfə İslam Həmrəyliyi Oyunlarında çempion oldum. 2013-cü ildə də İslamiadada qızıl medal qazanmışdım. İki il sonra Bakıda keçirilən I Avropa Oyunlarında da Azərbaycan himnini səsləndirmişdim.

Çox sevincliyəm həm də ona görə ki, Vətənimdə bir dəfə də olsun məğlub olmamışam. Ən böyük arzum qələbə qazanmaq idi. Şükür ki, arzuma çatdım və qazandığım qızıl medalı bütün Azərbaycan şəhidlərinə həsr edirəm. Medal qazanan hər bir idmançımızı təbrik edirəm. Mən və Rafael Ağayev Dünya Oyunlarına lisenziya qazanmışıq. Bu da 4 ildən bir keçirilən yarışdır. Hər çəkidə 8 idmançı dəvət olunub. O yarışlara hazırlaşacağıq. Ən böyük məqsədimiz Olimpiya Oyunlarına lisenziya qazanmaqdır”.

“Zəhmətim hədər getmədi”

İrina Zaretska,

IV İslam Həmrəyliyi Oyunlarının qızıl medalçısı

“İslam Həmrəyliyi Oyunlarına ciddi hazırlaşmışdım. Çünki rəqiblərimi tanıyırdım. Onlar çox güclü karateçilər idilər. Fikirləşdim ki, əgər birinci döyüşü udsam, o zaman bu çempionatda qalib olacağam. Belə də oldu. Məşqçimə təşəkkür edirəm. Hər kəs məni dəstəkləyirdi. Medalı həyat yoldaşıma həsr edirəm.

İki il öncə “Bakı-2015” I Avropa Oyunlarında da yarışlara böyük həvəslə hazırlaşmışdım. Yarışda da çətin döyüşlərim oldu. Amma zəhmətim hədər getmədi. Finala yüksəldim və Azərbaycan bayrağını ən yüksəklərdə dalğalandırdım. İndi də İslam Həmrəyliyi Oyunlarında qızıl medala sahib çıxdım. Sevincimin həddi-hüdudu yoxdur”.

“İki qardaş olaraq İslamiada tarixində bir ilkə imza atdıq”

Elçin Talıbov,

IV İslam Həmrəyliyi Oyunlarının paracüdo üzrə çempionu

“İslamiadada yarışlar çox gərgin keçdi. Əksər ölkələr güclü komandalarla iştirak edirdilər. Buna baxmayaraq, Azərbaycan Milli Paralimpiya Komitəsinin cüdoçuları yarışlarda yaxşı nəticə göstərdilər.

İstəyimiz Azərbaycanın adını yüksəltmək idi və buna da nail olduq. Bir ailəyə iki medal apardıq. Böyük qardaşım Natiq Talıbov paracüdoçudur. O da bürünc medal qazandı. Ailəmizin sevincinin həddi-hüdudu yoxdur. İslamiada tarixində ilk dəfədir ki, iki qardaş bir Oyunda iştirak edir və medallar qazanır. Bu xoşbəxtlik bizim ailəyə qismət oldu. Ancaq hər şey bununla bitmədi. Hər ikimiz gələcəkdə keçiriləcək yarışlara da qatılacağıq və ölkəmizi layiqincə təmsil edəcəyik”.

“Azarkeş dəstəyindən yaxşı ruhlandırıcı heç nə ola bilməz”

Roman Heydərov,

IV İslam Həmrəyliyi Oyunlarının qalibi

“İslamiadaya çox ciddi hazırlaşmışdım. 18 yaşım olsa da, özümə çox arxayın idim. Qalib gəlməyimin bir səbəbi də yarışların Bakıda keçirilməsi oldu. Həm də onu deyim ki, azarkeş dəstəyindən yaxşı ruhlandırıcı heç nə ola bilməz. Azarkeşlərə güvənib döyüşdüm və qalib oldum.

Hər bir idmançının ən böyük arzusu dövlətinin bayrağını ən yüksək zirvələrə qaldıraraq ölkəsini dünyaya tanıtmaqdır. Elə bir mötəbər yarış yoxdur ki, orada bayrağımız dalğalanmasın. İdmançılarımız bütün yarışlarda uğurla çıxış edərək Vətənə medallarla dönürlər. Yeniyetmələr, gənclər də bundan ruhlanıb öz üzərlərində ciddi çalışırlar. Qarşıda gənclər arasında dünya çempionatı keçiriləcək. Orada da iştirak edəcəyəm və əsas məqsədim 2020-ci il Olimpiya Oyunlarına qatılmaqdır”.

Rəşad BAXŞƏLİYEV,

Azərbaycan.- 2017.- 16 may.- S. 6-7.