İslamiadanın ən sərrast nişançısı

IV İslam Həmrəyliyi Oyunlarının atıcılıq yarışlarında Azərbaycan snayperçilərinin uğurlu çıxışları davam edir. Atletlərimiz hər gün yeni-yeni nailiyyətlərə imza atırlar. Mayın 13-dən Bakı Atıcılıq Mərkəzində start götürən yarışların ən sərrast nişançısı Azərbaycan idmançısı Ruslan Lunyovdur desək yanılmarıq. Çünki atletimiz artıq Azərbaycana 4 qızıl medal qazandırıb.

IV İslam Həmrəyliyi Oyunlarının atıcılıq yarışlarının dördüncü günündə kişilər arasında 10 metr məsafədən pnevmatik tapança ilə atəşaçma yarışında da Ruslan Lunyov rəqiblərindən daha dəqiq olub. İdmançımız İslamiadada dördüncü qızıl medala sahib çıxıb. Bu yarışda ikinci yeri türkiyəli Yusuf Dikec, üçüncü yeri isə pakistanlı Muhammad Şehzad Aktar tutub.

Ruslan Lunyov bundan öncə kişilər arasında 25 metr məsafədən tapança ilə atəşaçma, 25 metr məsafədən tapança ilə sürətli atəşaçma və 25 metr məsafədən standart tapança ilə atəşaçma yarışında hamıdan sərrast olaraq 3 qızıl medal qazanmışdı.

Qazandığı qızıl medalların xoş təəssüratlarını bölüşən idmançımız deyib ki, IV İslam Həmrəyliyi Oyunlarına çox ciddi hazırlaşıb. Çünki yarışın Azərbaycanda keçirilməsi üzərinə böyük məsuliyyət qoyub: “Bu yarış Vətəndə keçirilir və istəyirsən ki, ən yüksək səviyyədə çıxış edəsən. Çox şadam ki, İslamiadada bugünə qədər iştirak etdiyim yarış növlərində fəxri kürsünün ən yüksək zirvəsinə qalxdım. Mən valideynlərimə təşəkkürümü bildirmək istəyirəm. İslamiadadakı qələbələrimi onlara həsr edirəm. Məşqçi heyətinin peşəkar və sistemli proqramı sayəsində mənim nəticələrim ilbəil yaxşılaşır. Buna görə də IV İslam Həmrəyliyi Oyunlarında atıcılıq idmanı üzrə indiyə qədər çıxış etdiyim dörd növün hər birində qalib gəlmişəm. Lakin bununla kifayətlənmək fikrində deyiləm. Gələn il dünya çempionu adı uğrunda mübarizə aparmaq niyyətindəyəm. Düşünürəm ki, “Tokio-2020”də olimpiadanın mükafatçısı, bəlkə də çempionu olacağam”.

Qeyd edək ki, dünən atıcılıq yarışlarının dördüncü günündə kişilərin dairəvi stend yarışının finalı, kişilərin 50 metrdən 3 vəziyyətdə tüfəng ilə atəş, kişi və qadınların 10 metrdən pnevmatik tapança ilə atəş yarışları keçirilib. Yarışlarda Azərbaycanın 6 idmançısı mübarizə aparıb.

Öncə kişilər arasında 50 metr məsafədən üç vəziyyətdə tüfənglə atəşaçma yarışı baş tutub. Bu yarışın qalibi İran idmançısı olub. İranlı Pourya Norouziyan 454.6 xalla bütün rəqiblərini üstələyərək qızıl medal qazanıb. İkinci yerə iranlı Xosseyin Bağeri, üçüncü yerə isə Oman idmançısı Həmid Səid Əlxətiri çıxıblar.

Kişilər arasında dairəvi stend yarışının qalibi adını Səudiyyə Ərəbistanı idmançısı Almutari Səid qazanıb. Gümüş və bürünc medallar isə Birləşmiş Ərəb Əmirliyinin idmançıları Əl Məktum Şeyx Səid və Bin Futais Saifə nəsib olub.

Qadınların 10 metr məsafədən pnevmatik tapança ilə atəşaçma yarışında da qalib İran idmançısı olub. Qolnouş Sebhatullah 239.3 xal toplayaraq qızıl medala sahib çıxıb. Gümüş medalı misirli Afaf Elhodhod, bürünc medalı isə Azərbaycan idmançısı Nigar Nəsirova qazanıb.

Beləliklə, atıcılıq yarışlarının dördüncü günündə Azərbaycan idmançıları daha bir qızıl və bir bürünc medala sahib çıxıblar.

Rəşad BAXŞƏLİYEV,

Azərbaycan.- 2017.-17 may.- S.5.