İdmançılarımıza böyük mənəvi dəstək

Azarkeşlərin fəallığı atletlərimizin qələbə şansını daha da artırdı

Mayın 12-dən start götürən IV İslam Həmrəyliyi Oyunları maraqlı anları ilə davam edir. Sabah bitəcək yarışların mühüm tərəflərindən biri də o idi ki, Azərbaycan tamaşaçısı daim milli komandamızın yanında oldu, öz dəstəyini idmançılarımızdan əsirgəmədi. Bunun nəticəsidir ki, atletlərimiz müxtəlif yarış növləri üzrə çox uğurlu nəticələr əldə etdi. Azərbaycan qızıl medalların sayına görə bütün İslam ölkələri arasında birinci yerə yüksəldi. Bu baxımdan, deyə bilərik ki, atletlərimizin IV İslam Həmrəyliyi Oyunlarında bu günə qədər 66 qızıl, 39 gümüş və 29 bürünc medal qazanmasında yerli tamaşaçıların da payı var. Çünki onların alqışları, həyəcanlı hayqırtıları idmançılarımızı ancaq və ancaq qələbəyə ruhlandırdı.

Əvvəlcə onu deyək ki, yarışların keçirildiyi hər bir arenada tamaşaçı tribunalarında yüksək əhval-ruhiyyə yaşandığını gördük. Xüsusən də idmançılarımızın çıxışları zamanı tribunalarda yaşanan tamaşaçıların hərarətli alqışlarının birbaşqa hiss olduğunu duyduq. Bu mənada Oyunları izləyən tamaşaçıların da təəssüratlarını öyrənməyi özümüzə borc bildik:

Bu cür idman tədbirləri gənclərimizin idmana olan marağını artırır

İslam Əliyev,

Bakı şəhər sakini:

- Ölkəmizdə keçirilən IV İslam Həmrəyliyi Oyunları həm Azərbaycanın, həm də dünyanın diqqət mərkəzindədir. Bu yarışlar zamanı ölkəmizə xeyli sayda xarici qonaqlar gəlib. Bunun özü ölkəmizə turistərin axını üçün son dərəcədə faydalıdır. Digər tərəfdən, bu cür idman tədbirləri gənclərimizin idmana olan marağını artırır. Məsələn, görürlər ki, idmana ölkə səviyyəsində necə ciddi önəm verilir. Ona görə də valideynlər çalışırlar ki, övladlarını hər hansı bir idman sahəsinə yönəltsinlər.

İdmançılarımız da çox yaxşı nəticələr göstərdi. Sevindirici haldır ki, qızıl medallarımızın sayı günbəgün artır. Buna görə idmançılarımızı təbrik edirəm.

Onlar nə qədər güclü olsalar, biz də o qədər qürur duyarıq

Rauf Məmmədov,

Abşeron rayon sakini:

- Yarışlar çox maraqlı keçir. Azərbaycan idmançıları ilə qürur duydum. Mənim güləşə marağım olduğundan bütün güləş yarışlarına bilet almışam. İki il əvvəl Birinci Avropa Oyunlarını da canlı olaraq izləmişdim. Elə o vaxtdan böyük oğlumu güləşə yazdırmaq qərarına gəlmişəm. Əvvəla, idman sağlamlıqdır. Digər tərəfdən isə ölkəmizdə idmana, xüsusən də güləşə böyük maraq var.

İslam Həmrəyliyi Oyunları da Avropa Oyunları kimi həyəcanlı keçir. Nəinki güləşçilərimizə, bütün Azərbaycan idmançılarına uğurlar arzulayıram. Onlar nə qədər güclü olsalar, biz də o qədər qürur duyarıq!

Bütün dünya inanılmaz şouya şahidlik etdi

Sevil Məmmədova,

Abşeron rayon sakini:

- İdmançılarımızın qazandığı qələbələr bizi çox sevindirir. Arzu edirəm ki, sona kimi bu qalibiyyət davam etsin. Qızıl medallar nə qədər çox olsa, bu, ölkəmizin gücünü, qüdrətini göstərəcəkdir. IV İslam Həmrəyliyi Oyunlarının açılış mərasimini də canlı şəkildə izlədim. Hər şey çox möhtəşəm idi. Bütün dünya inanılmaz şouya şahidlik etdi. Xüsusən də Qarabağ atlarının müxtəlif manevrləri məni heyrətləndirdi. Gözlərimə inanmırdım ki, bunlar həqiqətən də atlardır. Düşünürdüm ki, bu an biri o tərəf-bu tərəfə qaçaraq nizamı pozacaq. Amma elə olmadı. Atlar saat əqrəbi kimi dəqiq manevrlər etdilər. Çox maraqlı şou idi.

IV İslam Həmrəyliyi Oyunlarının yüksək səviyyədə təşkili Azərbaycanın baş ucalığıdır. Nəinki İslam ölkələri, bütün dünya şahid olur ki, Azərbaycan inkişaf etmiş bir idman ölkəsidir, onun güclü idmançıları var. Bu, bir vətəndaş kimi bizi də qürurlandırır.

Bu, bizim vətəndaşlıq borcumuzdur

Salman Şirinov,

Bakı şəhər sakini:

- Bu cür tədbirlərin keçirilməsi ölkəmizdə idmanın inkişafına böyük töhfə verir. Övladlarımın hər ikisi idmançı olduğundan ailəmizdə idmana böyük maraq var. Bu gün cüdo yarışlarını izləmək üçün gəlmişik. Yarışları buradan izləmək daha həyəcanlıdır. Televizor ekranlarına baxanda elə də maraqlı olmur. Amma tribunadan canlı olaraq idmançılarımıza dəstək oluruq, onları qələbəyə ruhlandırırıq. Bu da bir növ bizim vətəndaşlıq borcumuzdur.

IV İslam Həmrəyliyi Oyunları da Birinci Avropa Oyunları kimi çox möhtəşəm və maraqlı keçir. Artıq tam əminliklə demək olar ki, Azərbaycan bu cür idman tədbirlərinin keçirilməsində mahirləşib. Arzu edirəm ki, ölkəmizdə Yay Olimpiya Oyunları keçirilsin. Biz də tamaşaçı kimi gəlib idmançılarımıza dəstək olaq.

Belə maraqlı olacağını bilsəydim...

Anar Baxşəliyev,

Tərtər rayonunun Dəmirçilər kənd sakini:

- Bakıya dünən gəlmişəm. Rayonda Bakıda belə bir Oyunların keçiriləcəyindən xəbərdar idim. Amma inanmırdım ki, mən də təsadüfən yarışları canlı izləyə bilərəm. Dostumun boks yarışlarına iki bileti vardı. Birini verdi ki, mən də yarışa canlı baxım. Razılaşdıq və bir yerdə döyüşləri izləməyə gəldik. Açığını deyim ki, bura gözlədiyimdən də maraqlıdır. İdmançılarımız çox yaxşı döyüşürlər.

Təəssüf edirəm ki, digər yarışlara gedib baxmaq üçün biletim yoxdur. Belə maraqlı olacağını bilsəydim, əvvəlcədən bilet alardım. Bütün idmançılarımıza uğurlar arzulayıram.

İdmançılarımızın uğurlu çıxışlarını görmək məni sevindirir

Elnur Ziyaoğlu,

Bakı şəhər sakini:

- Biz müstəqil ölkə olaraq dünyada bir çox ilklərə imza atmışıq. İki il əvvəl ölkəmizdə Birinci Avropa Oyunları, indi isə İslam Həmrəyliyi Oyunları keçirilir. Mən özüm idmançıyam. Bir neçə il sərbəst güləşlə məşğul olmuşam. Ona görə də idmanın necə vacib bir məsələ olduğunu yaxşı bilirəm. Hazırda İslam ölkələrinin idmançıları Bakıda toplaşıb. Oyunların adından da göründüyü kimi, bunun özü həmrəylikdir, birlikdir. İdmanda bu, çox önəmli amildir. Azərbaycan İslam Həmrəyliyi Oyunlarını keçirməklə dünyaya birlik mesajı göndərir. Eyni zamanda, İslam dünyasını həmrəy olmağa səsləyir.

Təəssüf ki, bu Oyunlarda idmançı kimi deyil, tamaşaçı kimi iştirak edirəm. Amma burada idmançılarımızın uğurlu çıxışlarını görmək məni sevindirir. Bütün yarışlar boyu idmançılarımızı dəstəkləməyə çalışacam. Hər kəsə uğurlar!

Belə bir tarixi Oyunları canlı izlədiyim üçün sevincliyəm

Seymur Quliyev,

Bakı şəhər sakini:

- Oyunlar çox yaxşı keçir. Tamaşaçıların tribunalarda öz yerlərində əyləşməsi üçün könüllülər hər cür dəstək göstərirlər. Birinci Avropa Oyunları zamanı da bir neçə yarış növünü canlı izləmişəm. Yarışların maraqlı keçəcəyini bilirdim. Bu səbəbdən İslam Oyunlarının da bir neçə idman növü üzrə yarışlarına tamaşa etmək üçün bilet aldım. Əsasən, Azərbaycan və Türkiyə komandalarını dəstəkləyirəm. Şükürlər olsun ki, idmançılarımız ümidlərimizi doğruldurlar. Onların hər bir qələbəsi bizi daha da coşdurur. Belə bir tarixi Oyunları canlı izlədiyim üçün sevincliyəm.

Digər tərəfdən, beynəlxalq əhəmiyyətli bu Oyunların ölkəmizdə keçirilməsi təbii ki, bizim üçün qürurvericidir. İnanıram ki, digər beynəlxalq tədbirlər kimi, Azərbaycan IV İslam Həmrəyliyi Oyunlarını da yüksək səviyyədə yekunlaşdıracaq. Hamımız bu işdə dövlətimizin, dövlət başçımızın yanında olmalıyıq. Mən də öz payıma düşəni edərək bir tamaşaçı kimi Azərbaycan idmançılarını dəstəkləyirəm. Hər kəs bu məsələdə öz töhfəsini əsirgəməməlidir. Ümid edirəm ki, Oyunların medallarının əksəriyyəti elə bizim olacaq. İdmançılarımızdan böyük nailiyyətlər gözləyirəm.

Elgün MƏNSİMOV,

Azərbaycan.- 2017.- 21 may.- S. 8.