Kiyevdə Azərbaycan
mədəniyyəti günü
Azərbaycanın Ukraynadakı səfirliyinin təşəbbüsü ilə Kiyevin Borispol Beynəlxalq Hava Limanında Azərbaycan mədəniyyəti günü keçirilib.
Səfirlikdən AZƏRTAC-a bildirilib ki, Azərbaycan ilə Ukrayna arasında diplomatik əlaqələrin yaradılmasının 25 illiyinə həsr olunmuş tədbirdə xalqımızın qədim tarixi, zəngin musiqi mədəniyyəti, milli mətbəxi və əsrarəngiz turizm imkanları nümayiş etdirilib.
Gün ərzində dünyanın müxtəlif ölkələrindən olan minlərlə sərnişin bu dəfə Borispol hava limanında Azərbaycanın qədim və zəngin musiqi sədaları altında qarşılanıb və yola salınıb.
Tədbirdə Azərbaycanın Ukraynadakı səfiri Azər Xudiyev çıxış edərək xalqımızın qədim və zəngin adət-ənənələrindən söz açıb. Azərbaycanın Qərb ilə Şərqin multikulturalizm mərkəzinə çevrildiyini bildirən səfir Borispol hava limanından dünyanın müxtəlif ölkələrinə gedən turistləri, qədim abidələr diyarı kimi tanınan odlar yurduna səyahət etmək fürsətini əldən verməməyə çağırıb.
Azərbaycan ilə Ukrayna arasında qurulmuş diplomatik əlaqələrin 25 illik uğurlarından söz açan Azərbaycan parlamentlərarası dostluq qrupunun rəhbəri Maksim Kuryaçiy, Borispol Beynəlxalq Hava Limanının baş direktoru Pavel Ryabkin və Ukrayna Nazirlər Kabinetinin nümayəndəsi Svetlana Podlesna ölkəmizin beynəlxalq arenada əldə etdiyi nailiyyətlərdən bəhs ediblər. Azərbaycanı tolerantlıq və multikultural dəyərlərin vətəni adlandıran natiqlər son dövrlər səfirlik tərəfindən həyata keçirilən rəngarəng tədbirlərin, ölkələrimiz arasındakı dostluq əlaqələrinin möhkəmləndirilməsi ilə yanaşı, Azərbaycanın zəngin mədəniyyətinin təbliğ olunmasına xidmət etdiyini bildiriblər.
Ukraynanın nüfuzlu televiziya və kütləvi
informasiya vasitələrinin
işıqlandırdığı tədbirdə Azərbaycanın
tanınmış tarzəni Arslan Növrəslinin, gənc və
istedadlı müğənni Vaqif Nağıyevin,
Ukraynanın Xalq Artisti Qurban Abbasovun və Anna Mariya
bacılarının ifasında geniş konsert proqramı
nümayiş olunub. Azərbaycan milli rəqs ansamblının
rəngarəng rəqsləri böyük maraqla
qarşılanıb. Həmçinin, dünyanın müxtəlif
ölkələrinə gedən sərnişinlərə Azərbaycanın
qədim tarixini və əsrarəngiz turizm imkanlarını əks
etdirən fotobukletlər təqdim olunub.