İslamiada paytaxtı Avropa Qran-prisinə hazırlaşır

500 milyon insan Bakı Şəhər Halqasında təşkil olunacaq möhtəşəm yarışı izləyəcək

Son illər böyük inkişaf yolu keçən Azərbaycan bir çox sahələrdə mühüm uğurlara imza atıb. İndiyədək ölkəmizdə beynəlxalq təşkilatların çoxlu sayda tədbirləri keçirilib. Bu, dünya miqyaslı idman turnirlərinə də aiddir.

Bir sıra beynəlxalq idman tədbirlərinə uğurla evsahibliyi edən paytaxtımız bu günlərdə daha bir mötəbər yarışı - IV İslam Həmrəyliyi Oyunlarını yüksək səviyyədə təşkil etməklə dünyaya növbəti dəfə nümunə göstərdi. Beynəlxalq ictimaiyyət bir daha Azərbaycanın iqtisadi qüdrətinin, müasir şəhər infrastrukturunun, qlobal tədbirləri yüksək səviyyədə təşkil etmək əzminin, təhlükəsiz ölkə olmasının, ən nəhayət, yüksək tolerantlığının və qonaqpərvərliyinin əyani şahidi oldu.

54 ölkədən 3 mindən çox atletin mübarizə apardığı İslamiadada Azərbaycan növbəti dəfə idman dövləti olduğunu göstərdi. 75 qızıl, 50 gümüş, 37 bürünc olmaqla 162 medal qazanan idmançılarımız İslam dünyasının lideri oldular. Azərbaycan mötəbər yarışla təkcə yüksək evsahibliyi nümunəsi ortaya qoymadı. Həm də sübut etdi ki, iradə, qətiyyət olan yerdə hər şey mümkündür.

Odlar ölkəsində sürət festivalı başlayır

Azərbaycan növbəti möhtəşəm idman tədbiri ərəfəsindədir. İyunun 23-25-də paytaxtımızda “Formula-1” Azərbaycan Qran-prisi keçiriləcək. Sürət və adrenalin sevən Azərbaycan azarkeşləri Bakı Şəhər Halqasında təşkil olunacaq möhtəşəm yarışdan zövq alacaqlar.

Qeyd edək ki, birnəfərlik, açıq təkərli avtomobil yarışları üzrə dünya çempionatı olan “Formula-1” 1950-ci ildən etibarən müntəzəm olaraq keçirilir. Beynəlxalq Avtomobil Federasiyasının müəyyən etdiyi qaydalara əsasən təşkil olunur. “Formula-1” il ərzində müxtəlif ölkələrdə keçirilən mərhələlərdən ibarət olur.

Hər mərhələyə Qran-pri adı verilir. İlin sonunda bütün Qran-prilərdən toplanan xalların əsasında pilotlar və komandalar arasında qalib müəyyən edilir və mükafatlandırılır. Misal olaraq, ötənilki mövsümə mükəmməl başlanğıc etməklə ardıcıl 4 yarışın qalibi olan “Mercedes” komandasının pilotu Niko Rosberq 3 yarış sonrası Bakıda ilk dəfə keçirilən Avropa Qran-prisində inamlı qələbə qazandı və çempionatda liderliyini qoruyub saxladı.

Gələn ay təşkil olunacaq “Formula-1” Azərbaycan Qran-prisində dünyanın ən məşhur pilotları birincilik uğrunda mübarizə aparacaqlar. Möhtəşəm yarışda dünya çempionu adını qazanmış bir neçə pilot iştirak edəcək.

Ötən il Bakıda start götürən sürət yarışının növbəti Bakı mərhələsinə artıq bir aydan da az vaxt qalıb. Buna görə də hazırda “Formula-1” bolidlərinin şütüyəcəyi Bakı trekində ciddi hazırlıq işləri aparılır. Xatırladaq ki, ötən il Bakıda keçirilən “Formula-1” Avropa Qran-prisinin yüksək səviyyədə təşkili Azərbaycanın beynəlxalq nüfuzunu daha da artırdı. Dünyada yarım milyard tamaşaçı auditoriyası olan bu yarışın Bakıda keçirilməsi ölkəmizin beynəlxalq idman aləmində qazandığı uğurları əks etdirdi. I Avropa Oyunlarından sonra “Formula-1” kimi mühüm yarışın Bakıda keçirilməsi Azərbaycanın idman dövləti olduğunu, bu missiyanın ölkəmizin timsalında hər zaman özünü doğrultduğunu təsdiqlədi.

Dünyanın ən uzun 2-ci treki pilotları gözləyir

Uzunluğu 6 kilometrdən bir qədər artıq olan Bakı Şəhər Halqası, trekin uzunluğuna görə dünyada ikincidir. Unikal xüsusiyyətlərə sahib Bakı Şəhər Halqası elə təşkil olunub ki, yarış zamanı “Formula-1” avtomobilləri UNESCO-nun Ümumdünya İrsi siyahısına daxil olan İçərişəhər tarixi-memarlıq qoruğunu, şəhərin müasir göydələnlərini və Xəzərin sahilboyu hissəsini özündə birləşdirən Bakının ecazkar simasını əhatə edəcək.

Bakı Şəhər Halqası şəhərin tam mərkəzindən və ən gözəl məkanlarından keçir. Təşkilatçılar trekin marşrutunu seçərkən məhz bu məqamı qarşıya məqsəd qoymuşdular. Bundan başqa, trekdə yarış avtomobillərinin hərəkəti saat əqrəbinin əks istiqamətində olacaq. Trekin ən geniş yeri 13 metrdir. Ən dar hissəsi trekin İçərişəhər ətrafında olan bölmələrində, o cümlədən 7-ci və 8-ci döngələrdə 7.6 metr təşkil edəcək. Start və Finiş xətti Azadlıq meydanında olacaq.

Asfalt örtüyü yarış üçün hazır vəziyyətə gətirilib

Aprel ayının 15-dən etibarən Bakı trekini əhatə edən asfalt örtüyünün yarışa hazır vəziyyətə gətirilməsi məqsədilə təmir-bərpa işlərinə başlanılıb. Aparılan hazırlıq işləri ilə yaxından tanış olmaq üçün Bakı trekinə yollandıq. Trekə daxil olan yolların kənarlarına artıq beton bəndlər yerləşdirilib və setkalar çəkilib. Asfalt örtüyündə kiçik bərpa işləri də tamamlanıb. Bakı Şəhər Halqası üzrə Niyazi küçəsində yolun daşlı hissəsinə asfalt örtüyü çəkilib.

Ümumiyyətlə, trekin əhatə olunduğu yollarda kiçik təmir-bərpa işləri mayın 1-dək tamamən yekunlaşıb. İndi əsasən tamaşaçı tribunalarının bəlli yerlərdə quraşdırılması prosesi gedir. Eyni zamanda, trek boyunca müxtəlif “Formula-1” lövhələrinin və piyada keçidlərinin quraşdırılması işləri aparılır.

Trekin asfalt qatının yarışa hazır vəziyyətə gətirilməsi ilə əlaqədar aparılan işlər üç mərhələdə həyata keçirilib. İlkin mərhələdə 19 aprel tarixədək trekin 15 və 16-cı döngələri arasında yerləşən daşlı hissəsinə qoruyucu qat çəkilərək yol hamarlaşdırılıb. 20-23 aprel tarixlərini əhatə edən ikinci mərhələdə daşlı hissəyə sonuncu asfalt qatı çəkilib. Asfalt çəkilişinin sürətli şəkildə reallaşdırılması üçün 15-23 aprel tarixləri ərzində trekin İstiqlaliyyət küçəsinin Şeyx Şamil küçəsi ilə kəsişməsindən Niyazi küçəsinədək olan hissəsi və həmçinin buradan da Azneft dairəsinədək olan hissəsi nəqliyyatın hərəkəti üçün bağlı olub. Sonuncu mərhələyə 23 aprel tarixində start verilib. Bu mərhələdə Bakı Şəhər Halqasının bütün asfalt örtüyünə ümumi baxış keçirilib və ehtiyac olan yerlərdə təmir-bərpa işləri aparılaraq trekin asfalt hissəsi yarış üçün tam hazır vəziyyətə gətirilib.

Əməliyyat şirkəti tərəfindən 23-25 iyun tarixlərində Bakıda baş tutacaq növbəti “Formula-1” yarışı trekinin keçdiyi küçələrdə nəqliyyat vasitələrinin və piyadaların fasiləsiz hərəkətinin təmin olunmasına xüsusi diqqət yetirilir. Belə ki, müvafiq piyada keçidi və döngələrdə yol kənarlarına düzülmüş beton sədlər tamam qapadılmayıb. Odur ki, həm piyadalar, həm də avtomobillər trekin istənilən hissəsində hərəkətlərini davam etdirə bilirlər.

30 min tamaşaçı yarışları eyni vaxtda canlı izləyəcək

Trek boyu hərəkət edərkən qarşılaşdığımız paytaxt sakinləri, eləcə də sürücülərlə söhbətləşdik. “Formula-1” yarışlarına hazırlıqla bağlı görülən işlərin onlarda hər hansı bir narahatlıq yaradıb-yaratmaması ilə maraqlandıq. Bildirdilər ki, müəyyən küçələrdə hərəkətin məhdudlaşdırılması, yaxud texniki avadanlıqların səsi onlara elə də mane olmur. Bunun müvəqqəti olduğunu başa düşürlər. Əvəzində ölkəmizdə belə bir mötəbər beynəlxalq tədbirin keçirilməsi ilə qürur duyurlar.

Şəhər sakini Aqil Məmmədovun sözlərinə görə, o, ötən il müəyyən səbəblərə görən “Formula-1” yarışlarına canlı baxa bilməyib. Amma bu dəfə yarış həyəcanını yaşamaq üçün bilet almağı planlaşdırır.

Taksi sürücüsü Sabir Məmmədov isə bu il də yarışların yüksək səviyyədə keçirilməsi üçün ölkəmizə uğurlar arzuladı: “Ötən il keçirilən “Formula-1” yarışlarına mən böyük maraqla baxdım. Bildiyimə görə, bu yarışa dünyada böyük həvəs göstərənlər var. Bu yarış harada keçirilirsə, həmin ölkəyə səfər edirlər. Bunun nəyi pisdir?! Qoy gəlsinlər, Bakını görsünlər, ölkəmizi tanısınlar”.

Ötən il olduğu kimi, bu il də 20 minə yaxın oturacaqlı tribunalardan əlavə, yarışı ayaqüstü izləməyə imkan verən ərazilər daxil olmaqla ümumilikdə 30 minə qədər tamaşaçı eyni vaxtda yarışları canlı izləyə biləcək.

Beləliklə, son iki il ərzində I Avropa Oyunları çərçivəsində bütün Avropa qitəsini bir araya gətirərək tarix yazan, dörd qitənin İslam dünyasının insanlarını Bakıda birləşdirən ölkəmiz bu dəfə də bütün dünyanın sürət məkanına və diqqət mərkəzinə çevrilərək yenidən adını tarixə yazacaq. Belə mötəbər yarışın Bakıda təşkili irimiqyaslı idman tədbirlərinin keçirilməsində Azərbaycanın malik olduğu potensial imkanları növbəti dəfə nümayiş etdirəcək və ölkəmizin beynəlxalq idman aləmində nüfuzunun artmasını təmin edəcək.

Elgün MƏNSİMOV,

Elçin CƏFƏROV,

Azərbaycan.- 2017.- 26 may.- S.1;5.