Türkiyə İlham Əliyevi ən yaxın dost, ən etibarlı müttəfiq kimi qəbul edir

Türk mediası prezidentlərin müzakirələrini böyük güclərin görüşü və qardaşlıq nümunəsi kimi təqdim etdi

Artıq bir çox beynəlxalq əhəmiyyətli iqtisadi təşəbbüslərin həyata keçirilməsi ilə dünya gündəminə gəlməyi bacaran Azərbaycan müəllifi olduğu daha bir möhtəşəm layihəni uğurla tamamladı. Məhz ölkəmizin strateji təşəbbüsünün nəticəsi olan Bakı-Tbilisi-Qars dəmir yolu xətti istismara verildi. Bu yeni beynəlxalq nəqliyyat dəhlizi həm də Azərbaycan və Türkiyə arasında qardaşlıq bağlarını daha da gücləndirəcək.

Bütün bunların kontekstində prezidentlər İlham Əliyev və Rəcəb Tayyib Ərdoğanın iştirakı ilə Azərbaycan-Türkiyə Yüksək Səviyyəli Strateji Əməkdaşlıq Şurasının altıncı iclası da ölkələrimiz arasında qardaşlıq bağlarının daha da möhkəmlənməsinin növbəti ifadəsi oldu.

Aydındır ki, Azərbaycan-Türkiyə Yüksək Səviyyəli Strateji Əməkdaşlıq Şurasının iclası iki ölkə arasında bütün sahələrdə münasibətləri daha da gücləndirəcək. İclas və burada imzalanan sənədlər, müzakirə edilən məsələlər Azərbaycan-Türkiyə strateji əməkdaşlığının nə qədər möhkəm olduğunu bir daha sübut edir.

Siyasi, təhlükəsizlik, iqtisadi cəhətdən bu münasibətlərin yüksələn xətlə inkişaf etməsi gələcəkdə sülhün, əmin-amanlığın da qorunub saxlanmasına imkan verəcək. Məsələyə bu fonda türk mediası da xüsusi diqqət ayırıb. İki ölkənin liderlərinin Bakı görüşü Türkiyədə bir neçə yüzminlik qəzetlərin manşet mövzusu olub. Aparıcı televiziya şirkətləri, internet portalları bu mövzu ətrafında materiallar təqdim ediblər. Onlardan bəzilərini diqqətinizə çatdırırıq.

“Hürriyyət”:

İnşallah, o günləri görəcəyik

Türkiyənin ən çox oxunan qəzetlərindən “Hürriyət” qəzeti “İnşallah, o günləri görəcəyik” adlı xəbəri manşetdə başlığa çıxarıb. Qeyd edilir ki, prezidentlər İlham Əliyev və Rəcəb Tayyib Ərdoğanın iştirakı ilə Azərbaycan-Türkiyə Yüksək Səviyyəli Strateji Əməkdaşlıq Şurasının altıncı iclası keçirilib.

Azərbaycan və Türkiyə prezidentlərinin fikrinə yer verən qəzetdə bildirilib ki, Azərbaycandan Türkiyəyə 10 milyard, Türkiyədən Azərbaycana isə 11 milyard dollar sərmayə qoyulub: “Bu sərmayələrin həcmi artacaq və Azərbaycandan Türkiyəyə yatırılacaq sərmayə 20 milyard dollara çatdırılacaq. Hazırda TANAP ilə bağlı işlər intensiv şəkildə davam edir. İnşallah, çox davam etməyəcək, qısa müddətdən sonra Azərbaycan qazı buradan Avropaya nəql olunacaq”.

“Milliyyət”:

TANAP razılaşması

“Milliyyət” qəzeti “TANAP razılaşması” adlı xəbəri manşetə çıxarıb. Bildirilib ki, enerji xətləri məsələsində də davamlı olaraq belə bağlantıların qurulması Türkiyə ilə Azərbaycan arasındakı bu əlaqələrin, bu həmrəyliyin nə qədər güclü olduğunu göstərir: “TANAP bunun ən gözəl nümunəsidir. Hazırda TANAP ilə bağlı işlər intensiv şəkildə davam edir. Qısa müddətdən sonra Azərbaycan qazı buradan Avropaya nəql olunacaq”.

“Sabah”:

TANAP bəzilərini narahat edib

“Sabah” qəzeti “TANAP bəzilərini narahat edib” başlıqlı xəbər verib. İlham Əliyevin çıxışına yer ayıran qəzet Azərbaycan Prezidentindən sitat gətirib: “TANAP layihəsi yaxın zamanlarda başa çatacaq. Bu layihənin icrası ilə bağlı heç bir problem yoxdur. Bu tarixi günü biz qardaşımla birlikdə, bizim Türkiyədən gəlmiş qardaş-bacılarımızla birlikdə qeyd etdik. Bu, bizim böyük uğurumuzdur, böyük qələbəmizdir”.

Daha sonra yazılıb ki, İlham Əliyevlə R.T.Ərdoğanın təkbətək görüşdən sonra hər iki liderin səmimi söhbəti sosial şəbəkədə paylaşılan fotoda əks olunub: “Türkiyə-Azərbaycan dostluğu, qardaşlığı, birliyi bu gün ən yüksək zirvədədir. Bu gün iqtisadi sahədə imzalanmış sənəd böyük əhəmiyyət kəsb edir. Preferensial, yəni imtiyazlı ticarət sazişi böyük məna daşıyır”.

“Axşam”:

Yalnız deyilsən, Naxçıvan

“Axşam” qəzetinin manşetində isə “Yalnız deyilsən, Naxçıvan” başlıqlı xəbər yer alıb. Qeyd olunub ki, Naxçıvandan Türkiyəyə ildə 120 milyon dollarlıq idxal həcmi hədəfi qoyulub. Beləliklə, Naxçıvanı daha da inkişaf etdirmək, canlandırmaq üçün “Sən yalnız deyilsən, qardaş” deməyin, inşallah, addımı atılacaq. O da bildirilib ki, Bakıda Azərbaycan və Türkiyə prezidentləri mətbuata bəyanatlarla çıxış ediblər.

Azərbaycan Prezidenti İlham Əliyevin fikirlərinə yer verən xəbərdə Ermənistan-Azərbaycan, Dağlıq Qarabağ münaqişəsinə də diqqət yetirilib. Qeyd edilib ki, Dağlıq Qarabağ münaqişəsi beynəlxalq hüququn normaları əsasında, Azərbaycanın ərazi bütövlüyü çərçivəsində öz həllini tapmalıdır: “İlham Əliyev Prezident R.T.Ərdoğana Türkiyənin bu məsələ ilə bağlı Azərbaycana verdiyi dəstəyə görə bir daha öz minnətdarlığını bildirib. Türkiyə bütün zamanlarda Azərbaycanın haqq işini dost kimi, qardaş kimi dəstəkləyir”.

“Vətən”:

Yalnız deyilsiniz

“Vətən” qəzeti də liderlərin Bakıdakı görüşünü “Yalnız deyilsiniz” başlıqlı xəbərlə oxuculara çatdırıb. Prezident İlham Əliyevin “Türkiyə dünya miqyasında böyük bir gücə çevrilib” fikrinə yer ayıran qəzet yazır: “Türkiyə-Azərbaycan dostluğu, qardaşlığı, birliyi bölgə üçün önəmli amildir, bölgədə sabitləşdirici rol oynayır”.

“Yeni Şəfəq”:

Türkiyə gücləndikcə biz də güclənirik

“Yeni Şəfəq” qəzeti manşetə “Türkiyə gücləndikcə biz də güclənirik” başlıqlı xəbər çıxarıb. Prezident İlham Əliyevin fikirlərinə yer verilən xəbərdə bildirilib: “Türkiyə-Azərbaycan əlaqələri ən yüksək səviyyədədir. Dünyada bir-birinə yaxın olan, bir-birinə bu qədər dəstək verən ikinci ölkələr yoxdur. Türkiyə-Azərbaycan dostluğu, qardaşlığı, birliyi bu gün ən yüksək zirvədədir. Bütün beynəlxalq təşkilatlarda Türkiyə-Azərbaycan həmişə bir-birinin yanındadır”.

“Star”:

Dünya lideri qardaşım

“Star” qəzetində isə “Dünya lideri qardaşım” başlıqlı xəbərə yer ayrılıb. Hər iki dövlət başçısının fikirlərinin yer aldığı yazıda bildirilib ki, Bakıda Azərbaycan-Türkiyə Yüksək Səviyyəli Strateji Əməkdaşlıq Şurasının altıncı iclası keçirilib. Türkiyə ilə Azərbaycan arasındakı qardaşlığın, dostluğun necə yüksək səviyyəyə çatdırıldığı sevinc içərisində müşahidə edildi.

“Türkiyə”:

Azərbaycanla böyük ortaqlıq

“Türkiyə” qəzeti “Azərbaycanla böyük ortaqlıq” başlıqlı xəbərə yer ayırıb. Yazılıb ki, İlham Əliyevlə R.T.Ərdoğan Bakıda görüşdülər. TANAP və ikili münasibətlər haqqında fikir mübadiləsi aparıldı. Xəbərdə həmçinin R.T.Ərdoğanın “Türkiyə və Azərbaycan arasında 1,6 milyard dollarlıq ticarət dövriyyəsinin həcmidir ki, - neftin qiymətlərinin aşağı düşməsi ilə əlaqədar bir qədər çətinlik oldu, ancaq indi yenidən vəziyyət düzəldi, - əminəm, bunu qısa müddətdə 5 milyard dollara çatdıra bilərik. İnşallah, buna nail olacağıq. Türkiyə və Azərbaycan hər sahədə bu addımları atacaq” -fikri verilib.

“Təqvim”:

Dünya gücü

“Təqvim” qəzeti də Azərbaycan və Türkiyə prezidentlərinin Bakı görüşünü “Dünya gücü” başlıqlı xəbərlə manşetdə verib. Hər iki dövlət başçısının fikirlərinin yer aldığı xəbərdə yazılır ki, rəsmi qarşılanma mərasimindən sonra Azərbaycan Prezidenti İlham Əliyevin Türkiyə Prezidenti Rəcəb Tayyib Ərdoğan ilə təkbətək görüşündə iki liderin səmimi söhbəti maraqlı fotolarda əks edilib: “Türkiyə Prezidenti R.T.Ərdoğanın sosial şəbəkədə İlham Əliyevlə birlikdə şəklini paylaşıb və yazıb: “Səmimi və xoş qonaqpərvərliyinə görə dost və qardaş Azərbaycanın Prezidenti cənab İlham Əliyev qardaşıma təşəkkür edirəm”.

Türkiyənin rəsmi “Anadolu” xəbər agentliyi isə Azərbaycan Prezidenti İlham Əliyevin və Türkiyə Prezidenti Rəcəb Tayyib Ərdoğanın fikirlərini əsas xəbər başlığı kimi verib. “İlham Əliyev: İki ölkənin əlaqələrini ən yüksək səviyyədə görməkdən məmnunluq duyuram” başlıqlı xəbərdə Azərbaycan Prezidentinin “Həm təkbətək görüşdə, həm nümayəndə heyətlərinin iştirakı ilə keçirilmiş görüşdə bir daha biz gördük ki, Türkiyə-Azərbaycan əlaqələri ən yüksək səviyyədədir” fikrinə yer ayırıb.

“TRT”:

BTQ-nin həyata keçməsi bizi həyəcanlandırır

Qardaş ölkənin TRT Haber kanalı isə “Bakı-Tbilisi-Qars dəmir yolu xəttinin həyata keçməsi bizi həyəcanlandırır” başlıqlı xəbər paylaşıb. Qeyd olunub ki, Türkiyə ilə Azərbaycan arasındakı qardaşlığın, dostluğun necə yüksək səviyyəyə çatdırıldığı böyük sevinc yaradıb. Prezident İlham Əliyev və R.T.Ərdoğanın fikirlərinə yer verilən xəbərdə deyilir: “Bakı-Tbilisi-Qars dəmir yolunun istifadəyə verilməsini, atdığımız addımın nəticəsini görmək bizi çox qürurlandırır. Dünən 15 dəqiqəlik dəmir yolu səyahətimizi vətəndaşlarımız, xalqlarımız gördülər. İnşallah, onların tezliklə təkcə Qarsdan Bakıya deyil, Pekinə, Londona getdikləri günləri də hamımız birlikdə görəcəyik və dualarını eşidəcəyik.”

“A Haber”:

R.T.Ərdoğan Bakıda rəsmi mərasimlə qarşılandı

Türkiyənin “A Haber” kanalı isə “Prezident R.T.Ərdoğan İlham Əliyev tərəfindən rəsmi mərasimlə qarşılandı” başlıqlı xəbərə yer verib. Qeyd olunub ki, Azərbaycanın və Türkiyənin dövlət və hökumət nümayəndələri prezidentlərlə görüşdülər. Daha sonra iki dövlət başçısının təkbətək görüşü olub. Azərbaycan-Türkiyə Yüksək Səviyyəli Strateji Əməkdaşlıq Şurasının altıncı iclası keçirilib. Yekunda sənədlərin imzalanması mərasimindən sonra Azərbaycan və Türkiyə prezidentləri mətbuata bəyanatlarla çıxış ediblər.

“NTV”:

Bakıda pencəksiz diplomatiya

“NTV” kanalı isə yayımladığı xəbərə “Bakıda pencəksiz diplomatiya” başlığı qoyub. Bildirilib ki, Yüksək Səviyyəli Strateji Əməkdaşlıq Şurasının toplantısı çox uğurlu nəticə verib. İclas əlaqələrin perspektivlərinin müəyyənləşdirilməsi baxımından önəmli olub.

“TGRT Haber”:

Dostlar sevinir, düşmənlər məyus olur

“TGRT Haber” kanalı da “Prezident R.T.Ərdoğana Bakıda rəsmi qarşılanma mərasimi keçirildi” başlıqlı xəbər paylaşıb. Bildirilib ki, Türkiyə-Azərbaycan Yüksək Səviyyəli Əməkdaşlıq Şurasının növbəti toplantısı keçirilib. İki ölkənin başçısı təkbətək görüşüb, mətbuata birgə bəyanatla çıxış ediblər. Qeyd olunub ki, Türkiyə bu gün dünya miqyasında böyük gücə çevrilibdir. Dostlar sevinir, düşmənlər isə məyus olur.

Bundan başqa, “Posta”, “Akit” qəzetləri, “İhlas Xəbər Agentliyi”, “beyazgazete.com.tr”, “memleket.com”, “haberaktuel.com”, “medyatrabzon.com”, “haberler.com”, “dunya.com”, “habervaktim.com”, “aydın24haber.com”, “sondakika.com” və s. xəbər agentliklərində və bir sıra televiziya qurumlarında Azərbaycan və Türkiyə prezidentlərinin çıxışlarından sitat gətirərək ölkələrimizin bir-birini hər zaman dəstəklədiyi qeyd olunub.

Beləliklə, bunlar həm də onun göstəricisidir ki, Türkiyə-Azərbaycan qardaşlığı səmimi əməkdaşlığa söykənir. Bu, əsl qardaşlıq, real əməkdaşlıq nümunəsi olmaqla yanaşı, həm də qarşılıqlı münasibətləri daha da möhkəmləndirir, dünya miqyasında dövlətlərimizin nüfuzunun daha da yüksəlməsinə əlavə zəmin yaradır.

Elçin CƏFƏROV

Azərbaycan.- 2017.-2 noyabr.- S.1; 6.