Azərbaycan Qara Dəniz İqtisadi Əməkdaşlıq Təşkilatında fəal iştirak edir

QDİƏT PM-in son komitə iclasında Ermənistanın nümayəndə heyətinin təklifləri bütün üzv ölkələr tərəfindən yekdilliklə rədd edilib

Xəbər verildiyi kimi, oktyabrın 24-26-da Rusiya Federasiyasının Rostov şəhərində Qara Dəniz İqtisadi Əməkdaşlıq Təşkilatı Parlament Məclisinin Hüquqi və siyasi məsələlər üzrə və Mədəniyyət, elm və təhsil komitələrinin iclasları keçirilib. İclaslarda Azərbaycan Milli Məclisinin QDİƏT PM-dəki nümayəndə heyətinin rəhbəri, parlamentin Aqrar siyasət komitəsinin sədr müavini Eldar Quliyev iştirak edib. Eldar Quliyevlə söhbətimiz də iclaslarda müzakirə olunan məsələlərlə bağlı idi.

Azərbaycanın haqlı mövqeyi tam müdafiə olundu

Eldar Quliyev hər iki komitənin iclasında çıxış edib. Bu barədə danışan müsahibim dedi ki, ilk olaraq Hüquqi və siyasi məsələlər üzrə komitənin iclası keçirilib və iki məsələ müzakirə edilib. Bunlardan biri QDİƏT PM-in yaradılmasının gələn il tamam olan 25 illiyi ilə bağlı hazırlıq işlərinin həyata keçirilməsi idi. “Bununla bağlı ayrı-ayrı çıxışlar oldu, o cümlədən mən də münasibət bildirdim və təkliflər irəli sürdüm. 1993-cü ildə QDİƏT PM-in yaradılmasında 8 dövlət iştirak edib ki, onlardan biri də Azərbaycandır. Respublikamız, o cümlədən Milli Məclis ötən 24 ildə bu təşkilatla sıx əməkdaşlıq edib. Bu mənada 25 illik yubileyə Azərbaycan tərəfinin də - hökumətin və parlamentin mühüm töhfələri olacaq. Digər respublikaların təmsilçiləri də bu məsələdə təkliflərini bildirdilər”.

Daha sonra komitədə deklarasiya qəbul olundu. Amma Ermənistan nümayəndə heyəti deklarasiyaya üç əlavənin edilməsini təklif etdi. Bu barədə danışan Eldar Quliyev dedi ki, düzdür, hansısa sənədin qəbulu zamanı nümayəndə heyətləri birbaşa onunla bağlı təklif və qeydlər irəli sürürlər. Amma Ermənistan tərəfinin təkliflərinin heç biri deklarasiyanın mahiyyətinə uyğun deyildi: “Bunlardan biri komitənin siyasi məsələlərə münasibət bildirməsinin dayandırılması idi. Onlar bunu onunla izah edirdilər ki, təşkilat iqtisadi profillidir. Lakin adından göründüyü kimi, bu komitə hüquqi və siyasi məsələlərlə məşğuldur və ona görə QDİƏT iqtisadi məsələlərlə yanaşı, siyasi məsələlərlə də məşğuldur. Ermənilərin ikinci təklifi QDİƏT tədbirləri zamanı müzakirələrdə ərazilərin işğalı məsələsinin qaldırılmaması idi. Üçüncü təklifləri isə ondan ibarət idi ki, Ermənistanın iqtisadi blokadası aradan qaldırılsın. Ermənilərin təklifləri ilə bağlı ilk olaraq mən çıxış etdim və bildirdim ki, komitə, adından da göründüyü kimi, siyasi məsələlərə münasibət bildirməlidir. Çünki müasir dövrdə dövlətlər arasındakı iqtisadi münasibətlərin məzmunu ilk növbədə siyasi münasibətlərin səviyyəsindən asılıdır. Digər tərəfdən, qeyd etdim ki, bu təklifin qəbul olunan deklarasiya ilə bağlı məntiqi bağlılığı yoxdur. Digər suallara gəldikdə isə, bildirdim ki, ermənilər onların cavablarını ilk növbədə özlərində axtarmalıdırlar və o zaman niyə blokadada olduqlarını yaxşı anlayacaqlar”.

İclasda daha sonra Rusiya nümayəndəsi çıxış etdi. O qeyd etdi ki, erməni nümayəndə heyətinin təklifləri absurddur və deklarasiyada nəzərə alınması hüquqi baxımdan məqbul deyil. Çıxış edən Rumıniya, Bolqarıstan və digər ölkələrin təmsilçiləri də erməni deputatın təkliflərinə qarşı çıxdılar. Ermənistan nümayəndəsi daha sonra israrla heç olmasa birinci və ikinci məsələlərin qəbul olunmasını təklif etdi. Lakin iki dəfə keçirilən səsvermə zamanı bütün ölkələr erməni deputatın təkliflərinin əleyhinə səs verdilər. Beləliklə, Ermənistan nümayəndə heyəti QDİƏT PM-in komitə iclasında pərt vəziyyətə düşdü. İclasdan sonra Ermənistan nümayəndə heyətinin rəhbəri məğlub olduqlarını etiraf edib.

Azərbaycan təmsilçisinə böyük etimad

Xatırladaq ki, iclasda komitənin rəhbərliyinə seçkilər də keçirilib. Rusiya nümayəndəsi Mixail Yemelyanov komitənin sədri, Eldar Quliyev isə komitə sədrinin müavini vəzifəsinə seçiliblər. Azərbaycan nümayəndə heyəti rəhbərinin QDİƏT PM-in İqtisadiyyat komitəsinin sədri seçilməsi imkanı olsa da, o, Hüquqi və siyasi məsələlər üzrə komitənin sədr müavini seçilməyə üstünlük verib. Çünki iqtisadi qurum olmasına baxmayaraq, QDİƏT PM-in aparıcı komitəsi Hüquqi və siyasi məsələlər üzrə komitədir. İki ildən sonra Rusiya təmsilçisinin səlahiyyətləri başa çatdıqdan sonra komitəyə sədrlik Azərbaycan nümayəndəsinə keçəcək.

Eldar Quliyev Rostovda Mədəniyyət, elm və təhsil komitəsinin iclasında da iştirak edib. Komitənin əsas müzakirə mövzusu sosial məsələlər olub. Çıxış edən Eldar Quliyev ölkəmizdə uğurla həyata keçirilən sosial siyasətdən bəhs edib. Qeyd olunub ki, bu gün Azərbaycanın dövlət büdcəsinə nəzər saldıqda ilk növbədə onun sosialyönümlü olduğunu görərik. “Azərbaycan dövləti öz vətəndaşlarının yüksək sosial rifahının təmin edilməsi üçün lazım olan bütün addımları atır. Bunu yeni yaradılan iş yerləri, yoxsulluğun minimuma endirilməsi, gənc ailələrin mənzillə təminatı üçün sosial evlərin tikintisi, kadr seçimində gənclərin irəli çəkilməsi, əhaliyə göstərilən tibbi xidmətlərin ildən-ilə yüksəlməsi, hər kəsin təhsil almaq hüququ və sair bu kimi məsələlər təsdiq edir”, - deyə Eldar Quliyev çıxışında vurğulayıb.

Qəhrəman həmvətənlərimizin xatirəsi əbədiləşir

Eldar Quliyev onu da bildirdi ki, Rostovda olduqları müddətdə onları qarşılayan Rostov vilayətinin parlament nümayəndələrindən və vilayət rəhbərliyindən xoş münasibət görüblər. Hətta hava limanında nümayəndə heyətimizi yüksək çinli rəsmilər qarşılayıblar. Bunun bir səbəbi əgər iki ölkə arasındakı mehriban qonşuluq münasibətləridirsə, digər səbəbi Rusiyanın bu regionda Azərbaycan xalqına olan böyük ehtiramıdır. Bu da ondan irəli gəlir ki, İkinci Dünya müharibəsində azərbaycanlılardan ibarət 416-cı Taqanroq diviziyası Şimali Qafqazda alman faşistlərinə qarşı qəhrəmanlıqla mübarizə aparmışdır. Şimali Qafqazdan Berlinədək şərəfli döyüş yolu keçmiş 416-cı Azərbaycan atıcı diviziyası cəbhədə göstərdiyi hünərlə, qazandığı qələbələrlə adını tarixə yazdırmışdır. Rostov vilayətinin Taqanroq şəhərinin azad edilməsindən sonra isə göstərdiyi şücaətlərə görə diviziyaya “Taqanroq diviziyası” fəxri adı verilmişdir. “Rostovda keçirdiyimiz görüşlərdə istər yerli deputatlar, istər vilayət rəhbərliyi “Taqanroq diviziyası”ndan ağızdolusu söz açdılar, azərbaycanlıların burada göstərdiyi qəhrəmanlığın daim yaddaşlarında yaşadığını bildirdilər. Hər il mayın 9-da Qələbə Günündə yerli rəhbərlik və sakinlər mütləq Taqanroqda diviziyanın şərəfinə ucaldılmış abidəni ziyarət edir, həlak olan azərbaycanlıların xatirəsini dərin ehtiramla yad edirlər”, - deyə Eldar Quliyev bildirdi.

Eldar Quliyev dedi ki, Taqanroqda 416-cı Azərbaycan atıcı diviziyasının şərəfinə ucaldılmış abidə Rostov vilayətinin sakinləri üçün müqəddəs and yeridir. Bu abidə ulu öndər Heydər Əliyevin dəstəyi nəticəsində qurularaq ərsəyə gətirilib. Hələ ötən əsrin sonlarında Rostov vilayətinin sakinləri o dövrdə Azərbaycana rəhbərlik edən Heydər Əliyevdən bu torpaqlarda döyüşən azərbaycanlıların xatirəsinə memorial abidənin yaradılması üçün kömək göstərməyi xahiş ediblər: “Onların xahişini yerinə yetirən Heydər Əliyevin dəstəyi ilə 416-cı və 130-cu diviziyaların əsgərlərinin xatirəsinə Taqanroqda abidə ucaldılmışdır. 1980-ci il mayın 7-də abidənin açılışı olub və mərasimdə xalqımızın böyük oğlu Heydər Əliyev iştirak edib”.

Xatırladaq ki, ulu öndər Heydər Əliyev sonralar bu barədə “Mən iftixar hissi keçirirdim ki, Rusiyanın mərkəzi nöqtələrindən birində Azərbaycan əsgərinin, diviziyasının qəhrəmanlığını sübut edən böyük bir kompleks, - o, adi bir heykəl deyil, böyük bir kompleksdir, Stalinqrad kompleksinə bərabərdir, - yaratdıq”, - deyə bildirmişdir.

Prezident İlham Əliyevdən böyük töhfə

Rostov vilayəti ictimaiyyətində Azərbaycana ehtiramı artıran digər səbəb isə Azərbaycanın dəstəyi ilə bu abidənin restavrasiya edilməsidir. Bu barədə danışan Eldar Quliyev dedi ki, Prezident İlham Əliyevin göstərişi ilə bir neçə il əvvəl bu abidənin bərpası üçün vəsait ayrılıb. 2012-ci il mayın 9-da isə abidə kompleksinin əsaslı təmirdən sonra təntənəli açılışı olub. Abidənin Azərbaycan tərəfindən təmiri bu gün Rostov ictimaiyyəti tərəfindən yüksək qiymətləndirilir və bunu Eldar Quliyevlə görüşlərdə Rostov vilayətinin qubernatoru və parlamentin spikeri xüsusi qeyd ediblər. Onlar bu abidənin yaradılmasına görə Azərbaycan xalqının ümummilli lideri Heydər Əliyevin xatirəsini daim uca tutduqlarını bildiriblər.

Azərbaycan Milli Məclisinin QDİƏT PM-dəki nümayəndə heyəti və QDİƏT PM-in baş katibi Asəf Hacıyev Taqanroqda İkinci Dünya müharibəsində həlak olmuş soydaşlarımızın xatirəsinə ucaldılmış bu abidəni də ziyarət ediblər. Eldar Quliyevin sözlərinə görə, abidə kompleksinə yaxınlaşdıqda insanı həssas hislər bürüyür: “Mənim ailəmdən və yaxın qohumlarından 7 nəfər, o cümlədən atam və əmilərim İkinci Dünya müharibəsində iştirak ediblər. Onlardan beşi döyüşlərdə həlak olub. Taqanroq abidəsi də məhz azərbaycanlıların şərəfinə ucaldılıb. Ona görə bu kompleksi ziyarət etmək hər birimiz üçün təsirli idi. Orada gördüklərimiz bizi həm də çox qürurlandırdı. Çünki Rostov vilayəti və Taqanroq ictimaiyyətinin müharibədə həlak olmuş soydaşlarımıza olan ehtiramını görmək olduqca fərəhli və qürurverici idi. Və abidəni ziyarət edərkən, ulu öndər Heydər Əliyevin dediyi kimi, azərbaycanlı olmağımızla bir daha fəxr etdik”.

Beləliklə, Azərbaycan nümayəndə heyətinin QDİƏT PM-in komitə iclaslarında iştirak etmək üçün Rusiyanın Rostov şəhərinə səfəri həm məhsuldar, həm də maraqlı keçib.

Söhbəti yazdı:

Rəşad CƏFƏRLİ,

Azərbaycan.- 2017.-3 noyabr.- S.5.