Şahdağda beynəlxalq rəqs festivalı keçirilib

“Şahdağ” turizm mərkəzində çoxdan gözlənilən Latın Amerikası rəqsləri festivalı keçirilib. Festivala ABŞ və İspaniyadan dünya şöhrətli salsa ustaları - İvana Adler və Shaka Brown, Alba Fernandez və David Moyano cütlükləri də qatılıblar. “Badi Kuba”, “Baila Baku”, “Profi Dance”, “Let's dance studio”, “Buta Salsa” və “Street Salsa” məktəblərinin təmsilçiləri də daxil olmaqla tədbirdə 220-dən çox rəqqas iştirak edib.

Festivalın birinci hissəsində İvana Adler və Shaka Brown “Salsa”, Alba Fernandez və David Moyano isə “Baçata” rəqsləri üzrə təlim keçiblər. İkinci hissəsində rəqqaslar öz bacarıqlarını nümayiş etdirərək iştirakçılarda əsl bayram əhvali-ruhiyyəsi yaradıblar.

Festival çərçivəsində Gürcüstan Milli Sosial Rəqs Federasiyasının prezidentinin iştirakı ilə “Kizomba” rəqsi üzrə də təlimlər təşkil olunub və bu da rəqs həvəskarları tərəfindən maraqla qarşılanıb.

Azərbaycanda ilk olmasına baxmayaraq, festival xaricdən, həmçinin Bakıdan və regionlardan gələn qonaqlar tərəfindən alqışlanıb. Bu marağı nəzərə alan təşkilatçılar festivalı ənənəvi olaraq hər il və daha geniş miqyasda keçirməyi düşünürlər.

Xatırladaq ki, “Şahdağ” Qış-Yay Turizm Kompleksi Qusar şəhərindən 30 kilometr şimaldakı Şahdağ Milli Parkının ərazisində inşa edilib, Mədəniyyət və Turizm Nazirliyinin tabeliyindədir. Kompleksdə qış turizmi, həmçinin mədəni istirahət və əyləncə üçün yüksək komfortlu infrastruktur və digər lazımi şərait yaradıldığından “Şahdağ” istər xarici, istərsə də yerli turistlər arasında populyardır. Bu səbəbdən beynəlxalq səviyyəli festival və ya digər tədbirləri burada keçirməyə can atan da çoxdur, iştirak etmək istəyən də.

Akif ƏLİYEV,

Azərbaycan.- 2017.-18 noyabr.- S.7.