İkinci Bakı Şopinq Festivalı yenilikləri ilə əvvəlki festivaldan fərqlənir

Festivalda 467-dən artıq ticarət obyekti iştirak edir

Bu qızılı payız günlərində Bakıda başqa bir xoş ovqat yaşanır. Prezident İlham Əliyevin “Azərbaycan Respublikasında turizmin inkişafı ilə bağlı əlavə tədbirlər haqqında” 1 sentyabr 2016-cı il tarixli sərəncamına əsasən, ölkəmizdə turizmin rəqabət qabiliyyətinin artırılması, bu sektorun iqtisadiyyatın prioritet sahələrindən biri kimi inkişaf etdirilməsi məqsədi ilə oktyabrın 15-dən noyabrın 15-dək II Şopinq Bakı Festivalı keçirilir. Bakılılar və şəhərimizin qonaqları müxtəlif ünvanlarda bu festivala qatılan super-marketlərə, ticarət şəbəkələrinə daha tez-tez üz tuturlar.

Belə ticarət festivalları inkişaf etmiş dünya ölkələrində keçirilir. Məqsəd ölkəyə daha çox turist cəlb etməkdir. Bu təcrübə İstanbul və Dubay kimi şəhərlərdə yaşanıb və özünü doğruldub. Xatırladaq ki, ilk Bakı Şopinq Festivalı bu ilin 10 aprel - 10 may tarixlərində keçirilib. İldə iki dəfə keçirilməsi nəzərdə tutulan festival beynəlxalq təcrübəyə əsaslanır. Çünki kütləvi turizm inkişaf etdikcə, ölkəyə daha çox valyuta axını cəlb olunur. Bakıda təşkil olunan “Şopinq festival” Qafqazda və Orta Asiyada ilk dəfə Azərbaycanda keçirilib. Bu isə nəinki Qafqaz respublikaları, hətta Fars körfəzi ölkələrində də ölkəmizə marağın yaranmasına səbəb olub. Belə bir festivalın Bakıda keçirilməsi ekspertlər tərəfindən də yüksək qiymətləndirilir. Hətta bu barədə Strateji Yol Xəritəsində də qeyd olunub. Artıq ikinci təcrübə olduğuna görə festivala hazırlıq yüksək səviyyədə aparılıb. Bazara keyfiyyətli və daha çox tələbat olan məhsullar çıxarılıb. Tədbirin keçirilməsi təkcə ticarət deyil, xalqımızın milli-mədəni irsini və tarixini tanıtmaq baxımından maraqlıdır.

İkinci Bakı Şopinq Festivalı bir sıra yeniliklərlə müşayiət olunur. Birinci və ikinci festivallar arasında həm mövsüm, həm də təbliğat baxımından müəyyən fərqlər mövcuddur. Xüsusi turist paketləri hazırlanaraq turizm agentliklərinə təklif edilib. Bu paketlərə aviabilet, transfer, sığorta, hoteldə qalma, festival mağazalarına şopinq turların təşkili daxildir. Alıcılar festival boyunca xüsusi hədiyyə kartları qazanacaq, uduşlu lotereyalar və endirim kuponları əldə edəcəklər. Turistləri və alıcıları həvəsləndirmək üçün ticarət mərkəzlərində interaktiv oyunlar təşkil olunub. Paytaxtın Fəvvarələr meydanında “Fan” zonası fəaliyyət göstərir.

Festivala hipermarketlər, supermarketlər şəbəkəsi də ilk dəfə olaraq qatılıb. Hətta bir sıra apteklər də festivalda ilkin olaraq təmsil olunurlar. Festivala qoşulan ticarət və xidmət obyektlərinin sayında ciddi artım var. Əgər ilk festivalda tərəfdaş qismində çıxış edən müəssisələrin sayı 33 idisə, budəfəki festivalda 111-dir. Bu da keçən dəfəkindən üç dəfə çoxdur. Birinci festivalda əlavə dəyər vergisini (ƏDV) cəmi 172 şirkət qaytarıb. Budəfəki festivalda isə 467 müəssisənin ƏDV-ni qaytarması nəzərdə tutulur. Bu tədbirə ümumilikdə 578 müəssisə qatılıb. Festival günlərində alıcılar üçün xüsusi mükafatlar təsis edilib, bu da alış-verişi artırır. Ölkəmizə gələn turistlərin sonralar da keçiriləcək festivallarda iştirakına nail olmaq üçün xüsusi imtiyaz kartları verilir. Müştərilər dünya brendlərinə məxsus geyim, elektronika, məişət texnikası, mebel, ətriyyat və kosmetika, eləcə də digər məhsulları ticarət mərkəzlərindən xüsusi kampaniya və endirimlərlə əldə edirlər. Bu ünvanlarda interaktiv oyunlar, moda nümayişləri və digər əyləncə xarakterli tədbirlər də yer alıb. Festivalda əcnəbilərlə yanaşı, Azərbaycan vətəndaşları da “Tax-Free” sistemindən istifadə edə bilirlər, bu da dünya təcrübəsində bir ilkdir.

Ötən ilin sentyabrı ilə bu ilin sentyabr ayını müqayisədə Azərbaycana gələn turistlərin sayında 7 faiz artım var. Ölkə rəhbərinin 2017-ci il fevralın 20-də imzaladığı “Ticarət festivalları dövründə fiziki şəxslər tərəfindən Azərbaycan Respublikasının ərazisində alınmış istehsal, yaxud kommersiya məqsədləri üçün nəzərdə tutulmayan mallara görə ödənilmiş əlavə dəyər vergisinin qaytarılması Qaydası” haqqında fərman festivalın yüksək səviyyədə təşkilinə böyük təsir göstərib. İkinci Şopinq Festivalının yüksək səviyyədə keçirilməsi üçün Vergilər Nazirliyi bütün imkanları səfərbər edib. Nazirliyin 30 əməkdaşı iki növbədə işləyir. Azərbaycan Beynəlxalq Bankı və AzərTürk Bank da festivala xidmətlərini təklif edib. Əlavə dəyər vergisinin qaytarılması qaydaları festivalın iştirakçısı olan bütün ticarət obyektlərində tətbiq edilib. Bu kampaniyadan Vergilər Nazirliyində qeydiyyatdan keçmiş iştirakçı-sahibkarlar mal aldıqları zaman yararlanırlar. Həmin mağazalar “Tax Free” nişanı ilə fərqlənirlər.

Bu günlərdə şəhərin əsas parklarında mədəni tədbirlərin keçirilməsi üçün lazımi şərait yaradılıb. Paytaxtın mərkəzi küçələri, mehmanxana və ticarət mərkəzlərində informasiya köşkləri qurulub, “Çağrı” mərkəzi istifadəyə verilib.

Azərbaycan Konqreslər Bürosunun peşəkar mütəxəssisləri istirahət günlərində də ənənəvi iş rejimində çalışırlar. Festivalın rəsmi internet saytında iştirakçıların qeydiyyatı, onları maraqlandıran informasiyalar və festivalla bağlı bütün məlumatlar yer alıb. İştirakçılar müştəri xidmətlərinə 157-yə zəng etməklə üzləşdikləri problemlə bağlı istədikləri məlumatı ala bilərlər. Alış-veriş zamanı ƏDV-nin qaytarılması şopinq mərkəzlərində quraşdırılan xüsusi məntəqələrdə həyata keçirilir. Festival günlərində “Tax Free” sistemi üzrə ƏDV-nin qaytarılması ən azı 100 manat məbləğində alış-veriş edən yerli vətəndaşlara da şamil edilib. Festivalda daha çox xarici markalar təmsil olunur. Burada ən önəmlisi odur ki, yerli şirkətlər nə qədər fəal olsalar, bizneslərini daha da inkişaf etdirə və məhsullarının xarici bazarlara çıxışını asanlıqla təmin edə bilərlər.

Bir çox yenilikləri ilə fərqlənən və noyabrın 15-dək davam edəcək İkinci Bakı Şopinq Festivalının iştirakçısı olmaq hamı üçün maraqlıdır.

Rəhman SALMANLI

Azərbaycan.- 2017.-18 oktyabr.- S.10.