Şəkidən Kolmara aparan yol

Bu, Azərbaycan-Fransa regionları arasında dostluq əlaqələrinin yaranmasında böyük perspektivlər vəd edir

Azərbaycanla Fransa arasında əlaqələr bütün sahələrdə yüksək səviyyədə inkişaf edir. Dövlət başçısının yeritdiyi xarici siyasətin nəticəsidir ki, artıq hər iki dövlətin regionları arasında da yaxın əlaqələr yaranıb, dostluq və əməkdaşlıq xartiyası imzalanıb. Azərbaycan-Fransa regionları arasında dostluq əlaqələrinin yaranmasında Şəki şəhərinin də öz rolu var. Şəki ilə Kolmar arasında əlaqələrin təməli 2013-cü ilin iyununda qoyulub. Həmin dövrdə Kolmar merinin başçılıq etdiyi nümayəndə heyəti Şəkiyə səfər edib və şəhərlə yaxından tanış olub. Səfərin nəticəsi olaraq, bu şəhərlər arasında əlaqələrin daha da genişləndirilməsi qərara alınıb. 2015-ci il may ayının 19-da Şəkidə, noyabrın 19-da isə Kolmarda Şəki şəhəri ilə Fransanın Kolmar şəhəri arasında dostluq və əməkdaşlıq xartiyası imzalanıb. Xartiyaya əsasən Şəki və Kolmar şəhərləri dost və tərəfdaş şəhərlər elan edilib. Hər iki şəhərin sakinləri arasında mədəni, turistik və iqtisadi əlaqələrin yaranması nəzərdə tutulub.

Şəki Şəhər İcra Hakimiyyəti başçısının müavini - ictimai-siyasi və humanitar məsələlər şöbəsinin müdiri Zərinə Cavadova bildirdi ki, Şəki ilə Kolmar şəhərlərini birləşdirən bir çox ümumi cəhətlər var.

Hələ XIX əsrdə böyük fransız yazıçısı Aleksandr Düma Qafqaza səfəri zamanı Şəkidə olub və bu şəhərin təbiətinə, tarixi abidələrinə, görməli yerlərinə, zəngin mətbəx mədəniyyətinə heyran qalıb. Şəkidə fransız dilinin öyrənilməsinə böyük maraq və həvəs var. Hazırda şəhərin 12 ümumtəhsil məktəbində fransız dili tədris olunur. Azərbaycan Pedaqoji Universitetinin Şəki filialında fəaliyyət göstərən “Fransız dili” fakültəsində 84 nəfər tələbə təhsil alır. Şəkinin 4 nəfər fransız dili müəllimi “Akademik Palma” medalı ilə təltif edilib. Onlara “Təhsil Kavaleri” diplomu verilib. Hər il Şəkinin orta məktəblərində “Frankofoniya” bayramı keçirilir.

Şəki ilə Kolmar arasında əlaqələr getdikcə daha da möhkəmlənir. 2015-ci ildə Kolmarda ənənəvi Milad bayramı bazarınıda Şəki öz yarmarkası ilə iştirak edib.

Bu yaxınlarda Kolmar şəhər rəhbərliyinin dəvəti ilə Şəki şəhərini təmsil edən nümayəndə heyəti növbəti dəfə Kolmarda olub. Görüşlərdə dostluq əlaqələrinin daha da inkişaf etdirilməsi, mədəniyyət, turizm və iqtisadiyyat sahələrində ikitərəfli əlaqələrin gücləndirilməsinin vacibliyi qeyd olunub. Nümayəndə heyətinin üzvləri Kolmarda un məmulatları və şərabçılıq müəssisəsində istehsal təcrübəsi ilə tanış olublar. Turizm bölgəsi baxımından xarici qonaqların Şəkiyə daha çox səfər etdiyini nəzərə alan iş adamları dünyada məhşur olan “Baget” adlanan Fransa çörəyinin burada istehsalını önəmli hesab ediblər. Nümayəndə heyəti həmçinin ölkələrimiz arasında tekstil sənayesinin əlaqələndirilməsi məqsədilə Kolmarda fəaliyyət göstərən tekstil fabrikində olaraq burada istehsal edilən mallar haqqında ətraflı məlumatlanıblar. Turizm bürosunda keçirilən görüşdə ölkəmizin bu sahədəki potensialına toxunulub və bu istiqamətdə təcrübə mübadiləsi nəzərdən keçirilib.

Mədəniyyət və təhsil sahələrində əməkdaşlıq da uğurla davam edir. Kolmar şəhərinin fransız dili müəllimləri Şəki şəhərinin məktəblərində fransız dilinin tədrisində iştirak edirlər. Bu proqram müvəffəqiyyətlə davam etdirilir. Gələcəkdə mədəniyyət və humanitar sahələrdə bir sıra birgə tədbirlərin təşkili nəzərdə tutulur.

Şəki ilə Kolmar arasında gələcəkdə daha yaxın iqtisadi əlaqələrin qurulması üçün rayonun iqtisadi potensialı da genişdir. Konkret olaraq, rayonda meyvəçiliyin müasir texnologiyalar əsasında inkişafi və ixrac potensialının artırılması məqsədilə sahibkarlar tərəfindən yeni layihələr həyata keçirilir. Belə ki, “Green Faktory” MMC-nin təşkilatçılığı ilə müqavilə əsasında icarə qaydasında götürülmüş 78 hektar ərazidə İtaliyadan və Fransadan gətirilmiş müxtəlif meyvə - ərik, şaftalı, nektarin, armud və gavalı tingləri əkilib. Artıq növbəti mövsümdə ekoloji cəhətdən yüksək keyfiyyətli məhsulların Avropa, o cümlədən Fransa bazarlarına çıxarılacağı nəzərdə tutulur.

Hazırda Şəkidə “Şəki İpək” ASC-də təbii ipəkdən hazırlanan müxtəlif məhsullar - kəlağayılar, şərflər, ipək xalçalar Fransa bazarına çıxarıla bilər.

Şəki rayonu ərazisində yaradılmış illik istehsal gücü 50 ton olan özəl forel balıqçılıq təsərrüfatı və illik istehsal gücü 800 ton olan istixana təsərrüfatının genişləndirilməsi istiqamətində də işlər həyata keçirilib. Qeyd edilən sahələrdə də fəaliyyəti genişləndirmək və yeni əməkdaşlıq layihələrinin həyata keçirilməsi onların bir-birini daha yaxından tanımasına imkan verəcək və gələcəkdə iki şəhərin həyata keçirdiyi birgə layihələrin sayı daha da artırılacaq.

Əli SƏLİMOV,

Azərbaycan.- 2017.- 7 yanvar.- S.5.