İlham Əliyevin “ASAN” inqilabı

Artıq vətəndaşlar kommunal xidmətlərlə bağlı istənilən məsələni bir ünvanda - “ASAN kommunal” mərkəzində həll edəcəklər

Azərbaycan brendi sayılan “ASAN xidmət” öz fəaliyyətini davamlı olaraq genişləndirir. Xidmət mərkəzlərinin sayı artıq 11-ə çatıb. Son illər ərzində bu mərkəzlərə ümumilikdə 13 milyon müraciətin olması və vətəndaşların bəyənmə əmsalının təxminən 100 faizə yaxınlaşması ictimai xidmətlər, ümumiyyətlə, ictimai münasibətlər sahəsində əsaslı inqilab deməkdir.

Modern bina, yüksək keyfiyyət və mükəmməl şərait

Bir müddət əvvəl “ASAN kommunal” mərkəzinin fəaliyyətə başlaması “ASAN xidmət”in çoxfunksiyalı və sosialyönümlü layihə olduğunu bir daha təsdiqlədi. Artıq vətəndaşlar kommunal xidmətlərlə bağlı istənilən müraciəti də bir mərkəzə ünvanlayacaqlar. “ASAN kommunal” mərkəzində insanların bütün növ müraciətlərinə operativ baxılacaq və müvafiq tədbirlər görüləcək. Hələlik pilot layihə kimi fəaliyyət göstərən 1 saylı “ASAN kommunal” mərkəzi yaxın vaxtlarda fəaliyyətini daha da genişləndirəcək. Mərkəz Bakı şəhəri, Həsən Əliyev 34 ünvanında yerləşən möhtəşəm və müasir görünüşü ilə diqqət çəkən binada yerləşir. Beş mərtəbədən ibarət binanın hələlik iki mərtəbəsi xidmət üçün ayrılıb. Yaxın gələcəkdə “ASAN kommunal” öz fəaliyyətini genişləndirdikdə binanın digər mərtəbələrindən də istifadə ediləcək.

Ötən il dekabrın 28-də Prezident İlham Əliyevin iştirakı ilə 1 saylı “ASAN kommunal” mərkəzinin təntənəli açılış mərasimi keçirildi. Dövlət başçısı bina ilə tanışlıqdan sonra “ASAN xidmət”in fəaliyyətini çox yüksək qiymətləndirdi: “ASAN xidmət” öz fəaliyyətini genişləndirir. “ASAN xidmət”, o cümlədən “ASAN kommunal” mərkəzlərində ən yüksək xidmət göstərilir və göstəriləcək. Bina da çox yaraşıqlıdır, çox gözəldir. Həm burada işləyənlər, həm də vətəndaşlar üçün yaxşı şərait yaradılıb. Bu, ölkəmizin müasirliyini, inkişafını göstərir, bizim siyasətimizi əks etdirir... 2016-cı ilin sonunda bu yeni mərkəzi ziyarət edərkən bir daha görürəm ki, bizim təşəbbüslərimiz bu gün reallığa çevrilir, siyasətimiz konkret işlərdə özünü göstərir. Bu, belə də olmalıdır. Düzgün göstərişlər verilib, ancaq gərək yerlərdə də onlar icra edilsin. Mən bu mərkəzlərin - 11 mərkəzin, bu, 12-cisidir, - hamısının açılışında olmuşam. Mən bu açılışlara gəlməyimlə bu hərəkata bir daha öz dəstəyimi göstərirəm və sizin fəaliyyətinizə yüksək qiymətimi ifadə edirəm”.

Prezident İlham Əliyev sözügedən mərasimdə “ASAN xidmət”lə bağlı builki yenilikləri də anons etdi. Bildirdi ki, 11 mərkəzdən altısı bölgələrdə yerləşir. Bu il Quba və Mingəçevir şəhərlərində iki yeni mərkəz açılacaq. Eyni zamanda, digər iki şəhərdə - Şəkidə və İmişlidə növbəti mərkəzlərin tikintisi başlanacaq.

Təkcə bu fakt onu göstərir ki “ASAN xidmət”in coğrafi əhatəsi sürətlə genişlənir və funksiyaları artır. Təbii ki, “ASAN kommunal” layihəsi də həmin funksiyaların tərkib hissəsidir. Bu xidmət sahəsi vətəndaşlarımız üçün yeni olduğundan qərara gəldik ki, mərkəzin xidmətləri ilə yaxından tanış olaq və oxucuları bəzi vacib mətləblərdən agah edək.

Dövlət ödənişləri sektorunun ilk mobil tətbiqi

Ümumi sahəsi 2800 kvadratmetr olan mərkəzdə 3 qurum - “Azərişıq” və “Azərsu” açıq səhmdar cəmiyyətləri, həmçinin “Azəriqaz” İstehsalat Birliyi tərəfindən vətəndaşlara 45 növ xidmət göstərilir. Burada eyni zamanda, bank və sığorta xidmətləri də təşkil edilib. Foyedə Prezident İlham Əliyevin “ASAN xidmət” binalarının açılışı, həmçinin “Azərişıq”, “Azərsu”, “Azəriqaz” qurumlarının müxtəlif tədbirləri zamanı çəkilən fotolarından ibarət stendi xüsusi diqqət çəkir.

Burada 85 əməkdaş və 20 könüllü çalışır. Müasir İKT avadanlığı ilə təchiz olunan binada istirahət və stress əleyhinə otaqlar, kafe, ana-uşaq otağı, uşaq əyləncə mərkəzi fəaliyyət göstərir. Mərkəzdə növbə sisteminin tənzimlənməsi üçün xüsusi monitorlar, daim internetə açıq özünəxidmət kompüterləri, rüsumlar, xidmətlər haqqında məlumatları və ərizə nümunələrinin doldurulmasını əks etdirən “elektron məlumat köşkü”, “ASAN ödəniş” terminalları və “108 Çağrı mərkəzi”nə zəng köşkü quraşdırılıb. Mərkəzin xüsusi arxitekturalı binasında havalandırma və işıqlandırma sistemi çox yüksək səviyyədə təchiz edilib.

Xidmət sahələrində müxtəlif gül dibçəklərinin, rəsm və dekorların quraşdırılması isə binanın interyerinə əlavə gözəllik bəxş edir. Binada 40 avtomobil üçün yeraltı dayanacaq da var.

Mərkəzdə həmçinin “ASAN ödəniş” sisteminin mobil tətbiqi sistemi yaradılıb. Bu sistemlə istifadəçilər abonent kodlarını, bank hesablarını, protokol nömrələrini və digər ödəniş təyinatlarını tətbiqin yaddaşında saxlaya və bir toxunuşla ödəniş edə bilərlər. Mobil tətbiqdə nəzərdə tutulmuş avtomatlaşdırılmış ödənişlərin vaxtı gəldiyində ödənişləri istifadəçilərin əvəzinə icra edərək, bu barədə istifadəçini məlumatlandıracaq. Bu, mobil əməliyyat sisteminin Azərbaycan dilində yazılmış dövlət ödənişləri sektorunun ilk mobil tətbiqidir.

Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədr müavini Ülvi Mehdiyevin sözlərinə görə, pilot layihə çərçivəsində 1 saylı “ASAN kommunal” mərkəzinin xidmətlərindən ilkin mərhələdə Bakı şəhərinin Nəsimi, Nərimanov və Binəqədi rayonlarında qeydiyyatda olan sakinlər yararlana bilərlər. Onun sözlərinə görə, Prezident İlham Əliyevin ötən ilin mayında imzaladığı fərmanla “ASAN kommunal” mərkəzlərinin yaradılması Vətəndaşlara Xidmət və Sosial İnnovasiyalar üzrə Dövlət Agentliyinə tapşırılmışdı. Qısa müddətdə “ASAN kommunal” xidmətinin yaradılması üçün aidiyyəti qurumlarla bir yerdə tədbirlər görüldü.

Vətəndaşlara hansı xidmətlər göstərilir

“ASAN kommunal” ilk pilot layihə olaraq 1 saylı “ASAN xidmət” mərkəzinin tərkibində fəaliyyətə başlayıb. Bundan sonra Bakı Dəmir Yol Vağzalında və Xətai rayonunun Ukrayna dairəsi ərazisində “ASAN kommunal” mərkəzləri işə başlayacaq. Növbəti illərdə bu xidmət regionlarda da fəaliyyət göstərəcək. İl ərzində bütün Bakı sakinləri “ASAN kommunal” xidmətdən yararlana biləcəklər. Göstəriləcək əsas xidmətlər isə məişət abonentlərinin elektrik, su, qaz şəbəkəsinə qoşulması ilə əlaqədar müqavilələrin bağlanması, texniki şərtlərin verilməsi, elektrik, su və qaz sayğaclarının quraşdırılması, dəyişdirilməsi, sayğaclar üçün smart kartların verilməsi, bərpası və yenilənməsi, abonentlərin şəxsi məlumatlarında dəyişikliklərin edilməsi, qüsurlu ödənişin bərpa edilməsi, abonentin ödəniş tarixcəsinin verilməsi və sairədir.

Gələcəkdə istilik təchizatı, rabitə-telefon xidmətləri, poçt, kabel televiziyaları, internet xidmətləri və kommunal sahədə fəaliyyət göstərən digər dövlət və özəl qurumların xidmətlərinin də “ASAN kommunal” mərkəzlərdə təşkil edilməsi nəzərdə tutulub.

Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin İnformasiya təminatı şöbəsinin müdiri Anar Hüseynov bildirdi ki, 1 saylı “ASAN kommunal” mərkəzi 15 yanvar 2017-ci il tarixindən etibarən vətəndaşlara xidmət göstərir. Fəaliyyətdə olduğu ilk bir həftə ərzində mərkəz ümumilikdə 1069 vətəndaşın müraciətini qeydə alıb. 632 nəfərə “Azəriqaz”da, 227 nəfərə “Azərişıq”da, 142 nəfərə isə “Azərsu”da birbaşa xidmət göstərilib. Ən çox müraciət olunan xidmətlər qüsurlu ödənişlərin bərpası, enerji təchizatı şəbəkəsinə qoşulma, “Azərsu” abonentlərinin şəxsi məlumatlarında dəyişikliklərin edilməsi və digər məsələlərdir.

Qeyd edək ki, 1 saylı “ASAN kommunal” mərkəzi Azərbaycan Respublikası Dövlət Neft Şirkəti, “Azərişıq” ASC və “Azərsu” ASC-nin vəsaiti hesabına yaradılıb. Mərkəzin yaradılması Azərbaycanda dövlət qurumlarının fəaliyyətində informasiya-kommunikasiya texnologiyalarının tətbiqi istiqamətində son illərdə görülən əhəmiyyətli işlərin ardıcıl xarakter aldığını bir daha nümayiş etdirir. Belə layihələrin icrası dövlət qulluqçusu-vətəndaş münasibətlərində yeni yanaşmanı formalaşdırır.

Elgün MƏNSİMOV,

Azərbaycan.- 2017.- 25 yanvar.- S. 1, 5.