"ASAN qatar" yola düşür...

Dəmir yol şəbəkəsinə malik bütün rayonların sakinlərinə səyyar “ASAN xidmət”göstəriləcək

“ASAN xidmət” Azərbaycanda aparılan ciddi islahatların təzahürüdür”. Prezident İlham Əliyevin bu sözləri artıq real təsdiqini tapıb. Bu gün milyonların rəğbətini qazanmış “ASAN xidmət” həqiqətən də dövlət xidmətlərinin vətəndaşlar üçün daha rahat, yeni və innovativ üsullarla əlçatanlığını təmin etməkdədir. Burada əsas məqsəd təkcə paytaxt sakinlərinin deyil, region əhalisinin də bu imkanlardan yararlanmasına şərait yaratmaq və onların məmnunluğuna nail olmaqdır.

Düzdür, artıq bir neçə rayonda “ASAN xidmət” mərkəzləri fəaliyyət göstərir. Lakin hələlik belə mərkəzlərin sayı yetərli olmadığından ayrı-ayrı vaxtlarda bölgələrə səyyar “ASAN xidmət”lər təşkil edilir. Bunun üçün Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agnetliyi tərəfindən 10 ədəd xüsusi avtobus ayrılıb. 2013-cü ilin iyunundan bəri bu avtobuslar vasitəsilə 915 minə yaxın vətəndaşa səyyar xidmət göstərilib.

Vaqonda möcüzə

İndi isə səyyar “ASAN xidmət” sahəsinə yeni və daha innovativ bir konsepsiya əlavə olunur. Belə ki, Prezident İlham Əliyevin tapşırığı əsasında “ASAN xidmət” mərkəzlərinin olmadığı regionlarda vətəndaşların dövlət xidmətləri ilə təmin edilməsi üçün müasir texniki avadanlıqla təchiz olunmuş səyyar “ASAN qatar” konsepsiyası reallaşdırılıb. “ASAN xidmət” sferasında qeyri-adi layihələrdən olan səyyar “ASAN qatar” fevralın 1-dən etibarən fəaliyyətə başlayacaq. Bakı vaqon deposunda xüsusi hazırlanmış və müasir avadanlıqlarla təchiz edilmiş bu qatar hər dəfə bir bölgəyə səfər etməklə insanları müjdələyəcək.

Xatırladaq ki, Prezident İlham Əliyev ötən il dekabrın 28-də səyyar “ASAN qatar”la tanış olarkən görülən işləri, mövcud şəraiti yüksək qiymətləndirmiş və səyyar “ASAN qatar” xidmətinin fəaliyyətə başlamasını bildirən düyməni basmışdır.

“ASAN qatar” yola düşməmiş biz də vaqonlarda yaradılan şəraitlə tanış olmaq imkanı qazandıq. Bakı Dəmir Yolu Vağzalında gözləmə mövqeyində olan qatarın al-əlvanlığı hələ uzaqdan diqqət çəkirdi. Bələdçilərin müşayiəti ilə vaqonların birindən içəri keçdik. Ənənəvi vaqonlardan fərqli olaraq burada aydın işıqlandırma vardı. Vaqonları gəzdikcə isə qatarda olduğuna inanmaq istəmirsən. “Bura qatar, yoxsa “ASAN xidmət” mərkəzidir?”-deyə düşünürsən. Döşəmə, divar və tavanlar xüsusi zövqlə işlənilib. Burada ölkəmizdə dəmir yolu nəqliyyatının inkişafında böyük xidmətləri olan ümummilli lider Heydər Əliyevin və Prezident İlham Əliyevin bu sahəyə diqqət və qayğısının, həmçinin “ASAN xidmət” mərkəzlərinin açılışlarında iştirakının əks olunduğu fotoguşə də yaradılıb. 100 FM tezliyindən yayımlanan “ASAN radio”nun həzin musiqi sədaları və maarifləndirici məlumatları isə vaqonları daha da canlandırır.

Xidmət sahələrindən başqa, səyyar “ASAN qatar”da gözləmə zalı, laboratoriya, əməkdaşların istirahət kupeləri, mətbəx, aptek və tibb mərkəzi də yer alıb. Burada vətəndaşlar müvafiq qiymətlərə müxtəlif çek-ap müayinələrdən keçə və analizlər də verə biləcəklər. Həmçinin elektron şikayət və məlumat köşkləri, eləcə də özünəxidmət və ərizə doldurma masaları da vətəndaşların xidmətində olacaq.

4 dövlət orqanı tərəfindən 9 növ xidmət

Səyyar “ASAN qatar” vasitəsilə ölkəmizdə geniş dəmir yolu şəbəkəsindən, mövcud infrastrukturdan, kommunikasiya xətləri və ən müasir texnologiyalardan istifadə edərək yerlərdə vətəndaşlara yeni konsepsiya ilə xidmət göstərilməsi nəzərdə tutulur. Səyyar “ASAN qatar” vasitəsilə 4 dövlət orqanı - Ədliyyə, Daxili İşlər, Əmək və Əhalinin Sosial Müdafiəsi nazirlikləri, həmçinin Əmlak Məsələləri Dövlət Komitəsi tərəfindən 9 növ xidmət göstəriləcək. Bunlar Vətəndaşlıq vəziyyəti aktlarının dövlət qeydiyyatı; Şəxsiyyət vəsiqələrinin verilməsi və dəyişdirilməsi; Ümumvətəndaş pasportlarının verilməsi və dəyişdirilməsi; Sürücülük vəsiqələrinin dəyişdirilməsi; Əmək pensiyalarının təyin edilməsi; Mənzillər üzərində mülkiyyət hüquqlarının ilkin və təkrar dövlət qeydiyyatına alınması barədə çıxarışların, texniki pasportların verilməsi; Daşınmaz əmlakın təsvirinə, dövlət qeydiyyatına alınmış hüquqlara və onların məhdudlaşdırılmasına (yüklülüyünə) dair dövlət reyestrindən arayışların verilməsi; Fərdi yaşayış evləri üzərində mülkiyyət hüquqlarının təkrar dövlət qeydiyyatına alınması barədə çıxarışların, texniki pasportların verilməsi; tibb xidmətləri; Azərbaycan Dəmir Yolları QSC - bilet satışının həyata keçirilməsi və sairədən ibarətdir. Qatarda 3 növ funksional yardımçı xidmətlər - foto və tibb xidməti, o cümlədən “Azərpoçt” MMC tərəfindən göstərilən bank xidmətləri təşkil edilib. Burada ilk dəfə olaraq “Azərbaycan Dəmir Yolları” QSC-nin xidmətləri üçün ayrıca pəncərə yaradılıb. “ASAN qatar”da 25 əməkdaş, 6 könüllü işləyəcək.

“ASAN qatar”ın ilk səfəri Qazaxadır

Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agnetliyinin İnformasiya təminatı şöbəsinin müdiri Anar Hüseynov bizimlə söhbətində bildirdi ki, fevral ayının 1-dən etibarən Səyyar “ASAN qatar” vasitəsilə ilk olaraq Qazax rayonunda sakinlərə 15 gün müddətində xidmət göstəriləcək. Növbəti səfərin Tovuz rayonuna olacağı nəzərdə tutulub. Rayonlara hərəkət trayektoriyası ilə bağlı cədvəl artıq hazırdır. Bu cədvələ uyğun olaraq səyyar “ASAN qatar” mövcud dəmir yolu şəbəkəsi olan rayonlarda fəaliyyət göstərəcək. Qatar növbəli qaydada ölkədə bütün istiqamətlərdə hərəkət edərək əvvəlcədən təyin olunan yerdə dayanacaq və əhaliyə xidmət edəcək.

Beləliklə, ölkəmizin hər bölgəsində - şimal, cənub, şərq və qərb istiqamətlərində dəmir yolu şəbəkəsinin olduğunu nəzərə alaraq, deyə bilərik ki, bütün bölgələrimizin sakinləri səyyar “ASAN qatar”ın xidmətlərindən yararlana biləcəklər.

Elgün MƏNSİMOV,

Azərbaycan.- 2017.- 28 yanvar.- S. 2.