Qüdrətli dövlətin güclü ordusu

Azərbaycanda hərbi quruculuq kompleks həyata keçirilir

Güclü ordu dövlətin və onun xalqının təhlükəsizliyinin əsas təməl prinsiplərindən biridir. Ona görə Azərbaycan Ordusunun döyüş qabiliyyətinin daim artırılması torpaqlarımızın işğal altında qaldığı bir vaxtda qarşımızda dayanan ən əsas vəzifədir. Nizami Azərbaycan Ordusunun təməlinin qoyulduğu 1993-cü ilin payızından sonra bu istiqamətdə mühüm addımlar atılıb. Ulu öndər Heydər Əliyevin rəhbərliyi ilə qısa vaxtda bütün qoşun növlərinin mövcud olduğu, müasir döyüş imkanlarına malik Azərbaycan Silahlı Qüvvələri formalaşdırılıb.

Ordumuzun arsenalı ən modern silah və texnikalarla zənginləşir

Azərbaycan Prezidenti, Silahlı Qüvvələrin Ali Baş Komandanı İlham Əliyevin fəaliyyətində ordu quruculuğu məsələləri daim prioritetdir. Bu istiqamətdə Heydər Əliyevin başladığı işləri davam etdirən ölkə rəhbərinin qarşıya qoyduğu vəzifə Silahlı Qüvvələrin döyüş qabiliyyətinin ən yüksək səviyyəyə çatdırılmasıdır. Bu mənada güclü iqtisadiyyata mütənasib güclü ordu formulu ötən 13 ildə Prezident İlham Əliyevin fəaliyyətinin əsas qayələrindən biri kimi diqqəti cəlb edib. Reallıq ondan ibarətdir ki, respublikamızın artan maliyyə imkanları Silahlı Qüvvələrimizin müasir standartlara cavab verən peşəkar orduya çevrilməsində mühüm rol oynayıb.

Hazırda Cənubi Qafqazın ən qüdrətli ordusuna malik Azərbaycanın Silahlı Qüvvələri öz döyüş hazırlığına görə MDB məkanında ön sıralarda gedir. Azərbaycan vətəndaşları Silahlı Qüvvələrimizdə baş verən keyfiyyət və kəmiyyət dəyişikliklərini ordumuzun keçirdiyi təntənəli hərbi paradlarda da görüb. Ölkəmizin hərbi qüdrətinin nümayişi olan belə paradlarda xalqımız və beynəlxalq ictimaiyyət Azərbaycanın mükəmməl hərbi gücə malik olduğuna şahidlik edib. Təsdiq olunub ki, Azərbaycan Ordusu arsenalını ən modern silah və digər hərbi texnika ilə zənginləşdirir. Ən fərəhlisi odur ki, bu gün dünyanın hərbi baxımdan inkişaf etmiş dövlətlərinin malik olduqları strateji silahlar Azərbaycanda var.

Qoşunların döyüş qabiliyyətini yüksək səviyyədə saxlamaq məqsədilə hərbi hissə və bölmələr ən müasir artilleriya qurğuları, reaktiv yaylım atəşi sistemləri, toplar, taktiki raket, zenit-raket kompleksləri, ağır odatan sistemləri, pilotsuz uçuş aparatları, yeni növ döyüş sursatları, müxtəlif təyinatlı təmir və komanda müşahidə maşınları ilə təmin edilib. Hərbi hissə və bölmələrə müasir T-90S, BMP-3, BTR-82A zirehli-tank texnikaları, müxtəlif təyinatlı təmir-təxliyə maşınları və tədris trenajorları daxil olub.

Bunun nəticəsidir ki, Azərbaycan Silahlı Qüvvələrinin adı dünyanın güclü, müasir standartlara uyğun yenidən qurulan və təchiz edilən orduları sırasında çəkilir. Bundan başqa, son illər dövlət başçısı, Ali Baş Komandanın diqqəti sayəsində ölkəmizdə yaradılan müdafiə sənayesi kompleksi Azərbaycanda ən müasir hərbi texnikanın istehsalına geniş imkanlar yaradır. Təsadüfi deyil ki, indi ölkəmizin silah-sursatları bir çox parametrlərinə görə dünyada ilk yerlərdən birini tutur.

Hərbçilərin mənzil-sosial şəraiti diqqət mərkəzindədir

Son illər ordumuzda aparılan əsas islahatlardan biri də hərbi şəhərciklərin, kazarmaların yenidən qurulması, hərbçilərin, onların ailə üzvlərinin yaşayış şəraitinin yaxşılaşdırılmasıdır. Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin göstərişinə əsasən, bu məqsədlə son illər 20-dən çox yeni hərbi şəhərcik inşa olunub. Xatırladaq ki, Prezident İlham Əliyev son olaraq yanvarın 11-də Naxçıvan Muxtar Respublikasına səfəri çərçivəsində digər obyektlərlə yanaşı, Əlahiddə Ümumqoşun Ordusunun “N” saylı hərbi hissəsindəki əsgər yataqxanasının və Əsgəri-Məişət Kompleksinin açılışında da iştirak etmişdi.

Yanvarın 23-də Prezident İlham Əliyevin açılışında iştirak etdiyi Müdafiə Nazirliyinin “N” hərbi hissəsinin yeni inşa edilmiş hərbi şəhərciyi Azərbaycan Silahlı Qüvvələrinin infrastrukturunun müasirləşdirilməsi tədbirlərinin sürətlə davam etdirildiyini göstərir. Şəhərcikdə zabit, gizir və çavuşlar üçün 9 yaşayış binası inşa edilib. Onlardan 4-ü ailəli, 5-i isə subay hərbi qulluqçular üçündür. Ərazidə ümumilikdə 13 əsgər yataqxanası tikilib. Hərbi şəhərcikdə inzibati, xidməti və texniki binalar da inşa olunub.

Hərbçilər qarşısında çıxış edən Prezident İlham Əliyev Azərbaycanda ordu quruculuğuna çox böyük diqqət yetirildiyini deyib: “Şəhərciklə tanış olarkən görürəm ki, xidmət aparmaq, yaşamaq üçün bütün şərait var. Ən müasir standartlar tətbiq olunub, xidmət şəraiti ən yüksək səviyyədədir. Hesab edirəm ki, bu hərbi şəhərcik dünya miqyasında nümunəvi hərbi şəhərcikdir. Bu şəhərciyin inşa edilməsi bir daha onu göstərir ki, Azərbaycanda ordu quruculuğuna çox böyük diqqət yetirilir. Son bir neçə il ərzində iyirmidən çox hərbi şəhərcik tikilib və əsaslı şəkildə təmir edilib. Bu gün hərbi hissələrimizin mütləq əksəriyyəti demək olar ki, bu səviyyədədir. Ümid edirəm ki, növbəti bir-iki il ərzində yararsız vəziyyətdə bir dənə də hərbi infrastruktur olmayacaq”.

Belə müasir şəhərciklərin salınması hərbi qulluqçuların mənzil-məişət şəraitinin yaxşılaşdırılmasına yönəlməklə yanaşı, ordumuzun qüdrətinin artmasına da mühüm təsir göstərir. Hərbi hissələrdə yaradılan şərait göstərir ki, Prezident, Ali Baş Komandan İlham Əliyevin rəhbərliyi ilə son illər maddi-texniki bazası daha da gücləndirilən Azərbaycan Silahlı Qüvvələri həm də dünyanın ən təminatlı ordularından biridir.

Silahlı Qüvvələrə nə qədər vəsait lazımdırsa, ayrılacaq

Bu cür hərbi şəhərciklərin inşası ilk növbədə onu sübut edir ki, Azərbaycanda ordu quruculuğu sahəsində aparılan islahatlar kompleks şəkildə həyata keçirilir. Həm ordunun arsenalına ən modern silahlar daxil edilir, həm qoşun növlərinin döyüş qabiliyyəti artırılır, həm də hərbçilərin sosial şəraiti yüksəldilir. Təbii ki, bütün bunlar Azərbaycanın işğalçı Ermənistanla müqayisədə əzici üstünlüyünü daha da artırır. Ermənistanın cinayətkar və terrorçu hakimiyyəti də bunu yaxşı anlayır və haqlı olaraq təlaş keçirir.

Azərbaycanın uğurlu hərbi islahatlarını isə Dağlıq Qarabağ danışıqlarındakı siyasi-diplomatik üstünlüyü tamamlayır. Bu məsələdə beynəlxalq hüquq Azərbaycanın tərəfindədir. Beynəlxalq hüquq onu tələb edir ki, Azərbaycanın ərazi bütövlüyü qeyd-şərtsiz bərpa edilməli, işğalçı Ermənistanın hərbi qüvvələri zəbt olunmuş Dağlıq Qarabağ və ətraf rayonlardan çıxmalıdırlar. Öz ata-baba yurdlarından məcburi köçkün düşmüş soydaşlarımız isə doğma torpaqlarına, o cümlədən Dağlıq Qarabağa qayıtmalıdırlar.

Azərbaycan hələlik sülh danışıqlarına sadiqdir. Amma səbrin də bir həddi var. Bu mənada Prezident İlham Əliyevin istər mülki vətəndaşlar, istərsə də hərbçilərlə keçirdiyi görüşlərində Dağlıq Qarabağ problemi ilə bağlı prinsipial mövqedən çıxış etməsi və bu məqsədlə ordu quruculuğu ilə bağlı həyata keçirilən konkret tədbirlərdən, xüsusilə müvafiq yöndə əldə olunan uğurlardan danışması Azərbaycanın ərazilərini işğaldan azad etmək üçün kifayət qədər güclü potensiala malik olmasından xəbər verir. Hərbçilərlə son görüşdə Prezident

İlham Əliyev ordumuzun ehtiyaclarının davamlı təmin olunacağını bəyan edərək dedi: “Biz hərbi gücümüzü artırmışıq və artıracağıq. Siyasi addımlar atılacaq ki, beynəlxalq ictimaiyyət bu məsələ ilə bağlı öz mövqeyini daha da geniş ifadə etsin. Biz öz iqtisadi gücümüzü artıracağıq və bütün böhranlara baxmayaraq, ordumuza nə qədər vəsait lazımdırsa, o qədər də təmin ediləcəkdir. Bu gün də bizim büdcə xərclərimizin strukturunda hərbi xərclər birinci yerdədir. Bizim başqa ehtiyaclarımız da var. Sosial məsələlərin həlli, infrastruktur layihələrinin icrası, digər vacib məsələlər var. Onlar da öz həllini tapır. Amma ilk növbədə ordu quruculuğudur. İlk növbədə, ordumuzun ehtiyacları təmin edilməlidir və biz gücləndikcə, əlbəttə ki, münaqişənin həllini yaxınlaşdıracağıq”.

Ötən ilin aprel ayında cəbhə xəttində düşmənin təxribatının qarşısının alınması zamanı ordumuzun keçirdiyi əməliyyatların nəticələri Azərbaycan Silahlı Qüvvələrinin döyüş qabiliyyətinin artırılması ilə bağlı deyilənlərin hərb meydanındakı təsdiqi oldu. Prezident İlham Əliyevin qeyd etdiyi kimi, aprel döyüşləri göstərdi ki, kimin ordusu yenilməzdir. Ordumuzun apreldə nümayiş etdirdiyi döyüş ruhu və qabiliyyəti bu sahədə görülən tədbirlərin nəticəsidir. Ən əsası, bu kimi hərbi uğurlar ondan xəbər verir ki, Azərbaycanın ərazi bütövlüyünün bərpa ediləcəyi tarix uzaqda deyil.

Rəşad CƏFƏRLİ,

Azərbaycan.- 2017.- 29 yanvar.- S.1.