Böyük qayıdışı başladan Prezidentimiz, var olun!

Vətəndaşlarımız dövlət başçısına ünvanladıqları məktublarda böyük sevinc, səmimi minnətdarlıq və qürur ifadə edirlər

Azərbaycan Prezidentinin Cəbrayıl rayonunun Cocuq Mərcanlı kəndinin bərpası ilə bağlı sərəncamı ölkə vətəndaşlarında, ordumuzda böyük ruh yüksəkliyi yaradıb və bütün məcburi köçkünlərdə doğma torpaqlarına qayıdacaqları günün uzaqda olmadığı ilə bağlı inam hissini daha da gücləndirib. Böyük qayıdışın başlanğıcı olan bu sərəncam eyni zamanda xalqımız, xüsusən də məcburi köçkünlər üçün olduqca xoş müjdədir.

Cocuq mərcanlılıların yurd həsrətinə son qoyulub. Prezident İlham Əliyevin imzaladığı sərəncama əsasən onların doğma yurd yerləri abadlaşdırılacaq, yaşayış məntəqəsinin infrastrukturu yaradılacaq və sakinlər dədə-baba torpaqlarında rahat və təhlükəsiz yaşayacaqlar. Bir sözlə, Cocuq Mərcanlı kəndinin sakinləri 25 il həsrətini çəkdikləri möhtəşəm qayıdışın ilk addımlarını atacaqlar. Qeyd edək ki, sərəncama uyğun olaraq Cocuq Mərcanlıda hələlik 50 fərdi yaşayış evi, məktəb binası tikiləcək və müvafiq infrastruktur yaradılacaq. Artıq 190 ailə doğma yurda dönmək üçün müraciət edib. Kənd sakinlərinin keçirdikləri hədsiz sevinc hislərini dövlət başçısına ünvanlanan minnətdarlıq məktublarında da aydın görmək mümkündür.

Böyük qayıdışın ilk müjdəsini verən sərəncam

N.F.Aslanov adına Cocuq Mərcanlı kənd tam orta məktəbinin müəllim kollektivi adından Prezidentə minnətdarlıq məktubu yazılıb. Əzizə Abbasovanın kollektiv adından dövlət başçısına ünvanladığı məktubda qeyd edilir ki, hələ köçkün həyatı yaşadıqları ilk illərdə ümummilli lider Heydər Əliyevin rayonun sakinlərinə göstərdiyi qayğını, məcburi köçkünlərlə çoxsaylı görüşlərini, hətta bir ailənin toy mərasimində rəqs etməsini çox gözəl xatırlayırlar. Cocuq Mərcanlı kənd tam orta məktəbinin pedaqoji kollektivi Vətənimizin müstəqilliyi, inkişafı və onun daim çiçəklənməsi üçün həmişə ön sıralarda olub. Onlar dədə-baba torpaqlarından ayrı düşsələr də, kəndin orta məktəbinin fəaliyyətini davam etdirmiş, yetişməkdə olan gənc nəslin milli ruhda tərbiyə olunması üçün yorulmadan çalışmışlar. Dövlət başçısının Cocuq Mərcanlı kəndinin bərpası ilə əlaqədar imzaladığı sərəncam işğal altındakı torpaqlarımıza böyük qayıdışın ilk müjdəsini verdi və eyni zamanda Azərbaycan Prezidentinin işğal atında olan torpaqlarımızı geriyə qaytarmaq əzmini bir daha qəti şəkildə nümayiş etdirdi.

“Biz inanırıq ki, doğma Qarabağımız və işğal altında olan digər bölgələrimiz də Sizin rəhbərliyiniz ilə tezliklə düşmən tapdağından azad olunacaq. Göstərdiyiniz qayğıya və uzun illər həsrətlə gözlədiyimiz bu sevinci bizə yaşatdığınıza görə Sizə dərin təşəkkürümüzü bildirir, uzun ömür, möhkəm cansağlığı və həyata keçirdiyiniz müdrik siyasətinizdə uğurlar arzulayırıq”, - deyə Cocuq Mərcanlı kənd tam orta məktəbinin müəllim kollektivi dövlət başçısına minnətdarlıq edir.

Bu sərəncam aprel döyüşlərindəki tarixi qələbənin davamıdır

Cəbrayıl rayonu 3 saylı qəsəbə sakini, Prezident təqaüdçüsü Kamilxan Rüstəmova və başqaları adından dövlət başçısına ünvanlanan məktubda isə qeyd edilir ki, Azərbaycan Prezidenti, Ali Baş Komandan İlham Əliyevin Cocuq Mərcanlı kəndinin bərpası ilə əlaqədar verdiyi sərəncam aprel ayındakı tarixi qələbənin davamıdır. Bu sərəncam qəsəbə sakinlərini həddən artıq sevindirir və bütün Qarabağ torpaqlarının, eləcə də Cəbrayıl rayonunun işğaldan azad olunmasına ümidlərini daha da artırır.

Məktubda deyilir: “Cənab Prezident, Cəbrayılın azad olunmuş ilk kəndinə göstərdiyiniz diqqətə görə rayonumuzun ağsaqqalları və ağbirçəkləri adından Sizə dərin minnətdarlığımızı bildiririk. Allah Sizi qorusun”.

Cocuq Mərcanlının bərpasını yenidən qurulacaq Cəbrayılın təməli kimi qiymətləndiririk

Cəbrayıl rayonu 7 saylı qəsəbənin sakini Abış Səfərov və başqalarının adından Prezidentə ünvanlanan minnətdarlıq məktubunda bildirilir ki, dünyada maliyyə-iqtisadi böhranının dərinləşdiyi bir vaxtda işğaldan azad olunmuş ərazilərimizin bərpası üçün dövlət tərəfindən vəsait ayrılması ölkəmizin qüdrətindən xəbər verir. Sakinlər Cocuq Mərcanlı kəndinin bərpasını yenidən qurulacaq Cəbrayılın təməli kimi qiymətləndirirlər: “Sizin Ali Baş Komandanlığınız altında 2016-cı ilin aprel ayında mənfur düşmənimizə sarsıdıcı zərbə vurulması nəticəsində işğal edilmiş əzəli torpaqlarımızın bir hissəsinin azad olunmasına və Cəbrayıl rayonunun Cocuq Mərcanlı kəndinin bərpası ilə əlaqədar imzaladığınız sərəncama görə minnətdarlığımızı bildirir, həyata keçirdiyiniz bütün işləri alqışlayırıq”.

Prezidentə paytaxt sakinləri də minnətdarlıq məktubları ünvanlayırlar. Bakının Nəsimi rayonunun sakini Fərid Əhmədlinin məktubunda deyilir: “Hörmətli cənab Prezident, işğaldan azad edilmiş Cəbrayıl rayonunun Cocuq Mərcanlı kəndinin bərpası ilə bağlı tədbirlər haqqında imzaladığınız sərəncama görə Əhmədovlar ailəsi adından Sizə dərin minnətdarlığımızı bildiririk. Arzu edirik ki, tarixən burada yaşamış əhali tez bir zamanda öz doğma yurduna qayıtsın”.

Bütün bu fikirlər xalqımızın keçirdiyi sevinc hislərinin təcəssümüdür. Cocuq Mərcanlı kəndinin bərpasından sonra insanların doğma torpaqlarına qayıdışı xalqımızda dövlətinə və rəhbərinə inam hissini daha da gücləndirib. Prezident İlham Əliyevin bu sərəncamı da işğal olunmuş torpaqlara qayıdacağımız günün uzaqda olmadığını bir daha təsdiqləyir. Bu, böyük yolun başlanğıcıdır! Gün gələcək, dövlət başçısı Xankəndiyə, Xocalıya, Şuşaya, Ağdama, Kəlbəcərə, Laçına qayıdışla bağlı sərəncamlar imzalayacaq!

Rəşad BAXŞƏLİYEV,

Azərbaycan.- 2017.- 31 yanvar.- S. 1, 7.