Azərbaycan xalqı son 15 ilin uğurlarını layiqincə dəyərləndirdi

11 aprel prezident seçkiləri demokratiyanın təntənəsi olmaqla yanaşı, xalqımızın ulu öndər Heydər Əliyevin siyasətinə inamını, etimadını bir daha nümayiş etdirdi. Son 15 ildə Azərbaycanın ayrı-ayrı sahələrdə əldə etdiyi uğurların miqyasına diqqət yetirdikdə harada yaşamasından, siyasi əqidəsindən, milli mənsubiyyətindən asılı olmayaraq hər bir Azərbaycan vətəndaşı bundan yalnız və yalnız qürur duya bilər. Ərazi baxımından kiçik olan bir dövlətin möhtəşəm uğurları ilə dünyanın diqqətində olması, ən əsası, inkişafın Azərbaycan modelindən bəhs edilməsi düşünülmüş və məqsədyönlü siyasətin nəticəsidir. Dövlətimizin başçısı cənab İlham Əliyev andiçmə mərasimində bir daha diqqəti bu reallığa yönəltmişdir: “Mən 2003-cü ildə prezident seçkiləri ərəfəsində xalqa müraciət edərək demişdim ki, əgər mənə xalq etimad göstərərsə, mən ulu öndər Heydər Əliyev siyasətinə sadiq qalacağam, bu siyasəti davam etdirəcəyəm. Mən fəxr edirəm ki, xalq mənə inandı, məni dəstəklədi və mən də öz növbəmdə sözlərimə əməl etdim. Son 15 il ərzində Azərbaycanda hərtərəfli inkişaf təmin edilmişdir. Bunun əsas şərti ondan ibarətdir ki, biz ulu öndərin yolu ilə gedirik. Onun qoyduğu yol yeganə düzgün yoldur və Azərbaycanın müstəqillik tarixi bunun əyani sübutudur”.

Xalq-iqtidar birliyi uğurlarımızın əsas şərtidir

Son 15 ildə sabitliyin, təhlükəsizliyin təminatı əsas məsələ kimi öndə olub. Sabitliyi hər bir inkişafın əsası kimi dəyərləndirən cənab İlham Əliyev daim diqqəti dünyada cərəyan edən proseslərə yönəldərək, müqayisəli təhlil əsasında Azərbaycandakı mövcud sabitliyi möhkəm təmələ əsaslanan siyasətin nəticəsi kimi qeyd edir. Son 15 ildə dünyanın müxtəlif bölgələrində, Avropada çox təhlükəli proseslər baş verib - qanlı toqquşmalar, müharibələr, vətəndaş müharibələri, dövlət çevrilişləri. Bu fonda Azərbaycanın sabitləşdirici faktor kimi möhkəmlənən mövqeyi daha aydın görünür və dəstəklənir. Sabitlik olmadan hansısa inkişafdan söhbət gedə biməz. Bu günümüzü müstəqilliyimizin ilk illəri ilə müqayisə etdikdə sabitlik faktorunun nə kimi rola malik olduğu daha aydın görünür. Baxmayaraq ki, Azərbaycan bütün dövrlərdə yerləşdiyi coğrafi məkana, malik olduğu təbii resurslara görə daim dünyanın diqqət mərkəzində olub, amma müstəqilliyimizin ilk illərində ölkədə xaos və anarxiyanın hökm sürməsi Azərbaycanla iqtisadi əlaqələrin qurulmasında maraqlı olan dövlətlərin, şirkətlərin tərəddüdlərinə səbəb olmuşdu. 1993-cü ildə ulu öndər Heydər Əliyevin xalqın təkidli tələbilə hakimiyyətə qayıdışından sonra ölkədə daxili sabitliyin yaradılması bu kimi tərəddüdlərin aradan qalxmasına səbəb oldu. Azərbaycan çox qısa zamanda sabitlik diyarına, eyni zamanda, böyük investisiyalar məkanına çevrildi. Məhz bu sabitliyin nəticəsidir ki, bu gün ölkə iqtisadiyyatına yatırılan investisiyaların həcmi 231 milyard dollardan artıqdır. Azərbaycanın bu gününə və gələcəyinə inamdan irəli gələn bu addım, eyni zamanda, həyata keçirilən siyasətə dəstəkdir.

Bugünkü Azərbaycan ulu öndərin görmək istədiyi Azərbaycandır

Bu gün böyük inam hissi ilə qeyd edə bilərik ki, ulu öndər Heydər Əliyevin xalqın təkidli tələbi ilə ikinci dəfə hakimiyyətə qayıdışının ilk çağlarında söylədiyi “Biz bu çətin günləri keçib gedəcəyik, müstəqil Azərbaycan Respublikası dünya birliyində öz layiqli yerini tutacaq. Hər bir Azərbaycan vətəndaşı özünün bu müstəqil dövlətə mənsub olduğunu böyük qürur hissi ilə bəyan edəcəkdir” fikirləri artıq reallıqdır. Ümummilli lider Heydər Əliyevin bu fikirlərinin davamı olaraq cənab İlham Əliyev bildirir ki, bugünkü Azərbaycan ulu öndərin görmək istədiyi Azərbaycandır. Azərbaycanın müstəqilliyi əbədidir, dönməzdir, ən əsası, Heydər Əliyev siyasəti bu əbədiliyin təminatçısıdır.

Son 15 ildə demokratik təsisatların inkişafı istiqamətində atılan addımlar da təqdirəlayiqdir. Dövlət siyasətinin əsasını təşkil edən insan hüquq və azadlıqlarının təminatı, azad mətbuatın inkişafı, siyasi partiyaların normal fəaliyyəti üçün yaradılan əlverişli şərait, eyni zamanda, seçkilərin demokratik, beynəlxalq standartlara uyğun keçirilməsi istiqamətində atılan addımlar davamlılığı ilə diqqət çəkir. Konstitusiyamıza son 15 ildə iki dəfə əlavə və dəyişikliyin edilməsi məqsədilə ümumxalq səsverməsinin keçirilməsi, cəmiyyətin idarə olunmasında əsas rola malik olan qanunlarımızın təkmilləşdirilməsi insan amilinə verilən dəyərin təsdiqidir. Cəmiyyətin güzgüsü, hüquqi dövlətin əsası kimi dəyərləndirilən müstəqil mətbuatın inkişafına xidmət edən addımlar da göz önündədir. Dünyada analoqu olmayan addımı - jurnalistlərin mənzil-məişət şəraitinin yaxşılaşdırılması məqsədilə imzalanan sərəncamları xüsusi qeyd etmək istərdim. Dövlət başçısı cənab İlham Əliyevin sərəncamlarına uyğun olaraq jurnalistlər üçün artıq iki bina tikilib istifadəyə verilib, üçüncu binanın təməli qoyulub. Cənab İlham Əliyevin sərəncamı ilə təsdiqlənən Kütləvi İnformasiya Vasitələrinin İnkişafına Dövlət Dəstəyi Konsepsiyasının icrası, eyni zamanda, bu sənədə uyğun olaraq 2009-cu ildə Azərbaycan Respublikasının Prezidenti yanında KİV-in İnkişafına Dövlət Dəstəyi Fondunun yaradılması azad mətbuatın inkişafına xidmət edən addımlar sırasındadır. Bu gün zamanın, dövrün tələblərinə uyğun təkmilləşmə digər sahələr kimi, mətbuatda da öz əksini tapmaqdadır.

Təbii ki, bir yazı çərçivəsində Azərbaycanın son 15 ildə əldə etdiyi uğurları əhatə etmək qeyri-mümkündür. Reallıq budur ki, Azərbaycan bu müddət ərzində özünün dövlətlər, xalqlar arasında körpü rolunu daha da möhkəmləndirmişdir. “Multikulturalizm ili”, “İslam həmrəyliyi ili” çərçivəsində görülən işlər, Azərbaycanda dünyaya ünvanlanan mesajlar bir daha bu həqiqəti ortaya qoydu ki, Azərbaycan hər addımı, eyni zamanda, gerçəkləşdirdiyi layihələri ilə dövlətləri, xalqları daha da yaxınlaşdırır, birgə səylərin qarşıya qoyulan məqsədlərə nə kimi yol açdığını dünyaya çatdırır. Azərbaycanda keçirilən çoxsaylı mötəbər beynəlxalq tədbirlər, forumlar, konfranslar ölkəmizi dünyada tolerantlıq məkanı, dözümlülük, multikulturalizm mərkəzi kimi təqdim etmişdir.

Azərbaycanın nüfuzu artdıqca, imkanları da genişlənir

Bu uğurlarımıza yol açan əsas amillərdən biri təbii ki, iqtisadi inkişafdır. Son 15 ildə neft siyasətinin məntiqi davamı olaraq qeri-neft sektorunun inkişafı istiqamətində atılan uğurlu addımların nəticələri bugünkü sosial-iqtisadi göstəricilərdən daha aydın görünür. Son on beş ildə bir milyon 500 min yeni iş yeri açılıb. İşsizliyin səviyyəsi 5 faizdir. Regional inkişaf proqramlarının uğurlu icrası nəinki rəqəmlərdə, insanların gündəlik həyatında da özünü göstərir. Neft gəlirlərinin idarə olunmasında şəffaflıq, ədalət prinsipinin öndə saxlanılması ölkənin maliyyə imkanlarının genişlənməsində və mühüm sosial-iqtisadi layihələrin həyata keçirilməsində özünü təsdiqləyir. Dövlət başçısı cənab İlham Əliyevin qeyd etdiyi kimi, Azərbaycanın çəkisi artdıqca, imkanları da genişlənir. Bütün bu nailiyyətlər isə ulu öndər Heydər Əliyevin müəllifi olduğu neft strategiyasının uğurlu icrasına söykənir. “Əsrin müqaviləsi” imzalanmasaydı, Azərbaycanın bugünkü iqtisadi imkanlarını, beynəlxalq aləmdə siyasi mövqeyini düşünmək çətin deyildi. Cənab

İlham Əliyev bildirir: “Əgər bizdə bu güclü təbii resurs olmasaydı, qeyri-neft sektorunu nəyin hesabına inkişaf etdirə bilərdik?”

Son 15 ildə enerji sektorunda əldə olunan uğurların da miqyası genişdir. “Əsrin müqaviləsi”nin 23 illiyi ərəfəsində “Yeni əsrin müqaviləsi”nin imzalanması Azərbaycanın etibarlı tərəfdaş kimi mövqeyinin möhkəmlənməsindən xəbər verir. Cari ildə “Cənub qaz dəhlizi”nin əsas tərkib hissəsi olan TANAP layihəsinin icrasının başa çatması ilə Azərbaycana investisiya axını daha da sürətlənəcək. Bir sözlə, Azərbaycanın iştirakçısı və təşəbbüsçüsü olduğu hər bir layihənin uğurlu sonluqla başa çatması yeni layihənin gündəmə gətirilməsini şərtləndirir. Prezident İlham Əliyev andiçmə mərasimində bir daha bu reallığı diqqətə çatdırmışdır ki, iqtisadi inkişaf templərinə görə son on beş ildə Azərbaycan qədər inkişaf edən ikinci ölkə olmamışdır. 15 ildə iqtisadiyyat 3,4 dəfə artıb. Əvvəlki illərdə bu artımın neft amili sayəsində olduğunu önə çəkən Prezident İlham Əliyev bu əminliyi ifadə edir ki, hazırda qeyri-neft sektorunun inkişafı bu artımı təmin edir və gələcəkdə də təmin edəcəkdir.

Həyata keçirilən siyasətin əsasında vətəndaş amilinin dayanması sosial müdafiənin gücləndirilməsi yönümündə atılan addımların miqyasından da aydın görünür. Diqqətəlayiq haldır ki, bu müddət ərzində Azərbaycan özünü dünyaya sosial dövlət kimi təqdim edib. Cənab Prezidentin başlıca tələb kimi irəli sürdüyü iqtisadi resursların insan kapitalına çevrilməsi əsas tezis kimi önə çəkilib. Son 15 ildə müasir dövrün tələblərindən biri kimi kadr hazırlığına diqqət artıb.

İnsan amili, insan kapitalı

Ölkəmizin hərtərəfli inkişafı, verilən hər bir vədin konkret əməli işdə öz təsdiqini tapması, ən əsası, hər bir addımda xalqa arxalanmaq, əhalinin sosial müdafiəsinin gücləndirilməsinə çalışmaq xalq-iqtidar birliyini daha da möhkəmləndirir. Dövlət başçısının xalqa xidməti hər bir dövlət məmurundan tələb etməsi də ölkə əhalisinə qayğının təzahürüdür: “İnsan amili, insan kapitalı. Mən hələ bunu 2003-cü ildə demişəm, biz neft kapitalını insan kapitalına çevirməliyik. Bunu deyəndə təkcə elmə, texnologiyalara, təhsilə qoyulan vəsaitdən söhbət getmir. Söhbət ondan gedir ki, Azərbaycan vətəndaşına hər yerdə hörmət olmalıdır, dövlət qurumları tərəfindən normal rəftar edilməlidir, təhdid edilməməlidir, incidilməməlidir”. Dövlət başçısının hər bir rayonun sosial-iqtisadi inkişafının sürətləndirilməsinə dair ayrılıqda sərəncamlar imzalaması və dövlət büdcəsində nəzərdə tutulmuş Azərbaycan Respublikası Prezidentinin Ehtiyat Fondundan vəsait ayrılması da bu diqqət və qayğıdan irəli gəlir. Möhtərəm Prezidentin vurğuladığı kimi, ən önəmlisi budur ki, Azərbaycan cəmiyyətində islahatların aparılması üçün çox böyük həvəs, maraq, ruh yüksəkliyi var.

Əvvəldə də qeyd etdiyimiz kimi, uğurlarımız Azərbaycanın beynəlxalq münasibətlər sistemində möhkəmlənən yeri və rolunda da özünü qabarıq şəkildə büruzə verir. Ölkəmizin 2011-ci ildə 155 ölkənin dəstəyini qazanaraq BMT-nin Təhlükəsizlik Şurasına qeyri-daimi üzv seçilməsi diplomatiyamızın, xarici siyasətimizin mühüm uğuru kimi dəyərləndirildi. Bu sayda ölkənin səsini qazanmaq həyata keçirilən siyasətə, eyni zamanda, Azərbaycanın ədalətli mövqeyinə dəstək kimi də dəyərləndirildi. Dövlət başçısı İlham Əliyev dünyanın ən nüfuzlu təşkilatlarının tribunasından ölkəmizin dəyişməz olan mövqeyini bəyan edərək bildirir ki, beynəlxalq hüququn norma və prinsipləri bütün dövlətlərə eyni şəkildə tətbiq olunmalıdır. Ötən il BMT-nin Baş Assambleyasının 72-ci sessiyasında cənab İlham Əliyevin çıxışını xatırlayaq. 2016-cı ilin aprel döyüşlərini xatırladan dövlət başçısı İlham Əliyev Azərbaycana qarşı hər bir təxribatın qarşısının qətiyyətlə alınacağını bəyan etmişdir. Bu günlərdə Bakıda Qoşulmama Hərəkatının nazirlər konfransının keçirilməsi də Azərbaycanın diplomatik uğurları sırasındadır. Cənab İlham Əliyevin qeyd etdiyi kimi, dünyanın ən böyük təşkilatlarından olan, beynəlxalq hüququn normalarına, ərazi bütövlüyü prinsiplərinə, bütün üzvlərin suverenliyinə və müstəqilliyinə sadiq olan Qoşulmama Hərəkatının qəbul etdiyi qətnamədə Azərbaycanın Dağlıq Qarabağ problemi ilə bağlı mövqeyi dəstəklənir. Dövlət başçısı İlham Əliyev bir vacib məqamı da diqqətə çatdırır ki, Azərbaycan Qoşulmama Hərəkatının yeganə üzvüdür ki, “Expo 2025”ə öz namizədliyini irəli sürüb. Bu addımın özü göstərir ki, ölkəmiz belə mühüm qlobal tədbiri keçirməyə qadirdir. Müstəqilliyini cəmi 26 il öncə bərpa etmiş ölkə üçün bu kimi tədbirlər böyük nailiyyətdir.

Aprel döyüşləri bizim şanlı tariximizdir

Bu gün davamlı uğurları ilə dünyanın diqqətində olan Azərbaycanın yeganə problemi Ermənistan-Azərbaycan, Dağlıq Qarabağ münaqişəsidir. Son 15 ildə diplomatik uğurlarımız, münaqişənin həlli üçün yaradılan möhkəm hüquqi baza, ordumuzun artan gücü və qüdrəti bu problemimizin də ədalətli həllini tapacağına böyük əminlik yaradır. Cənab İlham Əliyev “Dağlıq Qarabağ Azərbaycanın tarixi torpağıdır. Hüquqi baza var. Biz 15 il ərzində bu bazanı möhkəmləndirdik. Biz son 15 il ərzində münaqişə ilə bağlı həqiqətləri dünya birliyinə çatdıra bilmişik, kitablar yazıldı, xəritələr, qədim xəritələr ortaya qoyuldu, təqdimatlar, sərgilər keçirildi. Ondan çox ölkə Xocalı qətliamını soyqırımı kimi tanıdı. Bizim diplomatik və siyasi uğurlarımız öz nəticəsini verməkdədir” fikirləri ilə Azərbaycanın beynəlxalq aləmdə möhkəmlənən mövqeyinə, eyni zamanda, Dağlıq Qarabağ probleminin ədalətli həllinə inamı şərtləndirən amillərə işıq salır. “Sülh danışıqlarının cəsarətlə aparılması üçün güclü ordunun olması vacibdir” tezisi 2016-cı ilin aprel döyüşlərində bir daha özünü təsdiqlədi. Azərbaycan Ordusu bir qarış belə torpağımızın düşmənə verilməyəcəyini, torpaqlarımızı işğaldan azad etməyə hazır olduğunu bir daha dünyaya nümayiş etdirdi. Cocuq Məcrcanlıya qayıdış işğal altında olan bütün torpaqlarımıza Böyük Qayıdışa əminliyi daha da artırdı. Bu gün Cocuq Mərcanlı qəsəbəsi bizim dirçəliş rəmzimizə çevrilib. Dövlət başçısı bildirir: “Cocuq Mərcanlıya qayıdan həyat hər bir Azərbaycan vətəndaşını ürəkdən sevindirir, onu qürurlandırır.”

Dövlətçiliyimizdə yeni mərhələ

Göründüyü kimi, gələcəyə nikbinliklə baxmaq üçün ciddi əsaslar mövcuddur. Möhkəm təmələ əsaslanaraq, son 15 ildə əldə olunan uğurların miqyası genişdir. Təkmil islahatları ilə davamlı inkişafa geniş yol açan cənab İlham Əliyev daim çıxışlarında bildirir ki, Azərbaycanın hərtərəfli inkişafı, əhalinin sosial rifah halının daha da yaxşılaşdırılması dövlət siyasətinin əsasını təşkil edir. Bu istəkdən irəli gələrək imzalanan fərman və sərəncamlara diqqət yetirmək kifayətdir. “Azərbaycan 2020: gələcəyə baxış” İnkişaf Konsepsiyası, eyni zamanda, müxtəlif istiqamətləri əhatə edən strateji yol xəritələri qarşıdakı illər üçün müəyyənləşdirilən əsas hədəflərimizin təqdimatında yardımçıdır. Bu hədəf Azərbaycanı inkişaf etmiş ölkələr sırasında görməkdir. Uğurlarımızın davamlılığı fonunda cənab İlham Əliyev bildirir: “...biz əldə edilmiş nailiyyətlərlə kifayətlənməməliyik. Biz gələcəyə baxmalıyıq və baxırıq.” Təbii ki, hər dövrün, zamanın tələbinə uyğun olaraq təkmilləşmənin həyata keçirilməsi mütləqdir. 2016-cı ilin sentyabrında ölkəmizdə keçirilən ümumxalq səsverməsi bir daha Azərbaycanın yeniləşməyə, təkmilləşməyə nə qədər önəm verdiyini nümayiş etdirdi. Belə ki, Konstitusiyaya əlavə və dəyişikliklərin bir hissəsi insan hüquq və azadlıqlarının qorunmasına, digər qismi isə idarəçilik sistemində təkmilləşməyə xidmət edir. Vitse-prezidentlik institutunun yaradılması, Mehriban xanım Əliyevanın Azərbaycanın Birinci vitse-prezidenti təyin edilməsi dövlətçiliyimizdə yeni mərhələ kimi beynəlxalq standartlara uyğun idarəetmə sisteminə inteqrasiyanın ilkin addımları kimi özünü doğruldur. Mehriban xanım Əliyevanın təyinatından sonra ünvanına gələn təbrik məktubları da təsdiqlədi ki, yeni institut Azərbaycanın sosial-iqtisadi inkişafına təsir edəcək yeni mərhələ olmaqla perspektivlərin müəyyənləşdirilməsində də önəmini qoruyacaq. Dövlət başçısı cənab

İlham Əliyev məhz uğurlarımıza söykənərək bildirir ki, növbəti illərdə görüləcək işlər haqqında çox aydın təsəvvür, planlar, proqramlar mövcuddur. Azərbaycanı daha da qüdrətli ölkəyə çevirəcəyik. Hamımızın amalı ondan ibarətdir ki, ölkəmiz daha da güclənsin, daha da qüdrətli dövlətə çevrilsin, Azərbaycan vətəndaşları daha da yaxşı yaşasınlar.

YAP növbəti 7 ilin hədəflərinin gerçəkləşməsinə öz töhfəsini verəcək

Fəaliyyətində bu hədəfləri əsas tutan Yeni Azərbaycan Partiyası 11 aprel prezident seçkilərində cənab İlham Əliyevin qələbəsi ilə bir daha qələbələr, qaliblər partiyası olduğunu təsdiqlədi. Xalq cənab İlham Əliyevə səs verməklə, eyni zamanda, ulu öndər Heydər Əliyevin yaradıcısı olduğu Yeni Azərbaycan Partiyasının bu gününə və gələcəyinə inamını nümayiş etdirdi.

Ulu öndər Heydər Əliyevin qeyd etdiyi kimi, YAP dünənin, bu günün və gələcəyin partiyasıdır. Müstəqil Azərbaycanımızın hər uğurunda öz payı olan Yeni Azərbaycan Partiyası dövlətimizin başçısı, özünün əvəzolunmaz sədri, möhtərəm Prezident

İlham Əliyevin rəhbərliyi ilə növbəti 7 ilin hədəflərinin gerçəkləşməsinə öz töhfəsini verəcək, uğur səhifələrini daha da genişləndirəcək. Bir sözlə, ulu öndər Heydər Əliyevin müəyyənləşdirdiyi yol Azərbaycana ancaq və ancaq uğurlar gətirir. Dövlət başçısı İlham Əliyevin sərəncamı ilə 2018-ci ilin ölkəmizdə “Azərbaycan Xalq Cümhuriyyəti ili” elan edilməsi də dövlətçilik, müstəqillik ənənələrinə töhfə kimi dəyərləndirilir. Əbəs yerə deyilmir ki, tarixinə sahib çıxan xalq məğlub olmaz. Prezident İlham Əliyevin imzaladığı Cümhuriyyətin 100 illiyi ilə bağlı sərəncamda da qeyd olunduğu kimi, Azərbaycan Xalq Cümhuriyyəti təcavüzə məruz qaldığı üçün qarşıya qoyduğu məqsədlərə tam müvəffəq ola bilmədən süquta uğrasa da, onun şüurlarda bərqərar etdiyi müstəqillik ideyası unudulmadı. Azərbaycan xalqı ötən dövr ərzində milli dövlətçilik atributlarını qoruyub saxlaya bildi. Ümummilli lider Heydər Əliyevin respublikada uğurla gerçəkləşdirdiyi siyasət xalqımızın tarixi-mədəni yaddaşını özünə qaytararaq milli mənlik şüurunu inkişaf etdirdi, azərbaycançılıq məfkurəsi işığında müstəqillik arzularının güclənməsinə və həqiqətə çevrilməsinə zəmin yaratdı. Ümummilli liderin şah əsəri olan müstəqil Azərbaycan bu gün möhtərəm Prezident İlham Əliyevin rəhbərliyi ilə daha möhtəşəm uğurlara imza atır, müstəqillik tarixini önəmli səhifələrlə zənginləşdirir.

Vüqar RƏHİMZADƏ,

YAP Siyasi Şurasının üzvü, əməkdar journalist

Azərbaycan.- 2018.-25 aprel.- S.8.