Bakı möhtəşəm Azərbaycan Qran-prisinə hazırdır

Yarım milyarddan çox azarkeşi olan “Formula-1” yarışları ölkəmizin turizm potensialının yüksəlməsinə yenə də böyük töhfə verəcək

Dünyanın idman paytaxtı yenə də möhtəşəm yarış astanasındadır. Artıq iki ildi ki, “Formula-1” Qran-prisinə yüksək səviyyədə evsahibliyi edən Azərbaycan planetin ən güclü pilotlarının əzmkar mübarizəsinin canlı şahidi olmaq üçün sürətsevərləri yenidən Bakıya toplayır.

Azərbaycan istənilən beynəlxalq yarışı keçirməyə qadir ölkədir

Öncə onu vurğulayaq ki, “Formula-1” həm əhatə dairəsi, həm də miqyasına görə tam fərqli idman yarışıdır. Yəni hər ölkənin keçirə biləcəyi yarış deyil. Bu mənada Azərbaycan həm məsuliyyətli, həm də şərəfli layihəni həyata keçirməklə nəyə qadir olduğunu bir daha nümayiş etdirir.

Hələ 3 il öncə “Bakı-2015” I Avropa Oyunlarının standartlarını müəyyənləşdirərkən dünyaya bəlli oldu ki, Azərbaycan istənilən beynəlxalq yarışı keçirməyə qadir ölkədir. Buna həm daxili təhlükəsizliyi, həm də iqtisadi gücü imkan verir. Daha sonra “Bakı-2017” IV İslam Həmrəyliyi Oyunlarına yüksək səviyyədə evsahiblyi ilə Azərbaycan İslam dünyasının da lider dövləti olduğunu bir daha təsdiqlədi. Bir sözlə, Avrasiya ölkəmizin gücünün, bacarığının, qüdrətinin şahidi oldu.

İki il öncə 500 milyondan çox azarkeşi olan “Formula-1” Qran-prisi özü ilə yeni texnika nümunələrini, super-motorları ölkəmizə gətirdi. Bu yarış Bakıya çox sayda azarkeş, media mənsubları, turist gətirdi ki, onların da hesabına qazanan Azərbaycan oldu. Ölkə və ən əsası, paytaxtımız Bakı imic kapitalı əldə etdi.

Ölkəmizdə bu sahədə ixtisaslaşmış yerli kadrlar yetişib

Bu sirr deyil ki, xalqımız təbiətcə dinamik, hərəkətli və eyni zamanda sürəti sevən xalqdır. Yarışmağı sevirik və həm də mübarizə etməyi yaxşı bacarırıq. Bununla yanaşı, gördüyümüz hər işi sevərək, can qoyaraq edirik. Bunu həm indiyədək idmançılarımızın qazandıqları böyük uğurlarla, həm də ölkəmizin beynəlxalq yarışlara yüksək səviyyədə evsahibliyi etməsi ilə sübuta yetirmişik. Bütün bu xüsusiyyətlər dünyada 500 milyondan çox azarkeşi olan “Formula-1” üçün də xarakterikdir.

Xalqımız bu idman növünü də maraqla qarşılayaraq tez bir zamanda onun daimi azarkeşlərinə çevrilib. Azərbaycan sürətsevərləri bundan öncəki Qran-pri yarışlarını böyük coşqu ilə qarşılayıb həvəslə izlədilər. Çox güman ki, növbəti Azərbaycan Qran-prisində də analoji hal yaşanacaq.

Digər tərəfdən, ölkəmizdə qlobal səviyyədə idman yarışlarını keçirmək üzrə ixtisaslaşmış çox sayda yerli kadr yetişdi. Yüzlərlə könüllü və marşal iş karyerası ilə əlaqədar arzularını bu yarış vasitəsilə reallaşdırdı. Nəticədə, həm Azərbaycan daha çox insan tərəfindən güclü dövlət kimi tanındı, həm də xalqımız, xüsüsən də gənclərimiz bu və ya digər şəkildə yarışın verdiyi iqtisadi və karyera imkanlarından faydalana bildilər.

Bəzi tribunalar üçün biletlər tam satılıb

Həftəsonu Bakı yenidən dünyanın diqqət mərkəzində olacaq. Artıq paytaxtımızdakı yarışa dünyanın sürət həvəskarları böyük maraq göstərirlər. Belə ki, yarışlara fərqli ölkələrdən biletlər alınıb. Hətta Azərbaycan Qran-prisi üçün Filarmoniya tribunasına olan biletlərin hamısı satılıb.

Dördgünlük biletlərin qiyməti tribunadan asılı olaraq, 250-690 manat arasında dəyişir. Bu biletlər azyaşlılar üçün endirimli qiymətlərə təklif olunur. Bundan başqa, yarış üçün ayaqüstü zonalara birgünlük biletlər də satışdadır. Həmin biletlərin qiyməti günlərdən asılı olaraq 60-150 manat təşkil edir.

Həmçinin bilet sahiblərinə həm dünya ulduzlarının iştirakı ilə baş tutacaq axşam konsertlərində, həm də məşhur DJ-lərin çıxış edəcəyi gecə əyləncə proqramlarında “Qızıl dairə”də olmaq imkanı verilir. Bunun üçün tamaşaçılar aldıqları biletə ya gündəlik əlavə 80, ya da birdəfəyə üç gün üçün cəmi 200 manat ödəniş etməlidirlər.

Bilet sahibləri trekdə yarışla yanaşı, Dənizkənarı Milli Park boyunca uzanan əyləncə zonasında olan bütün tədbirlərdə iştirak edə, həftəsonunun hər axşamı “Baku Crystal Hall”da keçiriləcək konsert və əyləncə proqramlarına qatılmaq üçün “Bakı Şəhər Halqası” Əməliyyat Şirkətinin Azneft dairəsindən təşkil edəcəyi xüsusi avtobuslarla rahat gedib-gələ biləcəklər.

Onu da qeyd edək ki, hazırda xaricilərlə müqayisədə yerli vətəndaşlara biletlər 25 faiz aşağı qiymətə təklif olunur. Bu endirim yarış başlayana qədər davam edəcək.

Dəniz və hava yolu ilə gələn bütün yüklər artıq Bakıya çatıb

Artıq yarışlara hazırlıq işlərinin 90 faizi başa çatıb. Pit və komanda binaları, eləcə də qarajlar yarışa tam hazırdır.

“Bakı Şəhər Halqası” Əməliyyat Şirkətinin (BŞH) yarış obyektinin tikintisi üzrə rəhbəri Tom Butçer bildirib ki, tribunalarla bağlı işlərin 95 faizi yekunlaşıb: “Bizi həftə sonu çox gözəl yarış gözləyir və hamı Bakı küçələrində sürücülərin mübarizəsinə şahid olacaq. Ötən il olduğu kimi, trekin düşdüyü mərkəzi küçələr nəqliyyatın hərəkəti üçün bağlanacaq”.

T.Butçer qeyd edib ki, dəniz və hava yolu ilə gələn bütün yüklər artıq Bakıya çatıb. Beynəlxalq Avtomobil Federasiyasının rəsmiləri Bakı trekinə baş çəkib, inspeksiya işlərini həyata keçirəcəklər.

Onun sözlərinə görə, Bakı treki standartlara uyğundur və yağışlı, eyni zamanda küləkli hava şəraitinə hazırdır.

Dünya bir daha qədimliklə müasirliyin uğurlu tandeminin şahidi olacaq

Ötən illə müqayisədə bu il Azərbaycanda keçiriləcək növbəti “Formula-1” yarışına xaricdən daha çox maraq var və yarış ərəfəsində Bakıya minlərlə turist gəlməkdədir. Əməliyyat şirkəti Azərbaycan Qran-prisini izləməyə gələn azarkeşləri böyük qonaqpərvərliklə qarşılamağa hazırlaşır.

Əlavə edək ki, “Formula-1” azarkeşlərinin Azərbaycanla tanışlığı, milli mətbəximiz, tarixi abidələrimiz, xalqımızın qonaqpərvərliyi, tolerantlığı ölkəmizə olan marağı daha da artırıb. Ölkəmizə gələn turistlər xalqımızın gülərüz, mehriban, qonaqpərvər olduğunu etiraf edir, Bakıda qədimiliklə müasirliyin maraqlı tandem yaratdığını söyləyirdilər. Bunun da gələcəkdə ölkəmizin turizm potensialının yüksəlməsinə böyük töhfə verəcəyi bəlli idi. Dünyanın müxtəlif ölkələrindən gələcək azarkeşlər və televiziya qarşısında yarışları canlı izləyəcək fanatlar bir daha Bakının əsrarəngiz gözəlliyinin şahidi olacaqlar.

Hər ölkə üzərinə bu cür ağır məsuliyyət götürə bilmir

Prezident İlham Əliyev də bu yarışların Bakıda keçirilməsinin əhəmiyyətindən və görülən işlərdən danışarkən qeyd edib ki, “Formula-1” yarışının keçirilməsi hər bir ölkəyə nəsib olmur. Çünki hər bir ölkə bu məsuliyyəti öz üzərinə götürə bilmir və çətinlik çəkir. Ancaq Azərbaycan bu yarışı da uğurla keçirib: “Formula-1” yarışının Azərbaycanda keçirilməsinin ölkəmizin dünyada tanıdılması üçün müstəsna əhəmiyyəti vardır. Beş yüz milyon tamaşaçı auditoriyası olan bu yarışa bütün qitələrdə baxmışlar və şəhərimizin gözəlliyini, insanlarımızın qonaqpərvərliyini bütün dünya görübdür. Təsadüfi deyil ki, biz də bunu nəzərdə tuturduq, planlaşdırırdıq ki, bu yarışdan sonra ölkəmizə gələn turistlərin sayı dəfələrlə artacaq və artıb”.

Bu beynəlxalq idman yarışı vasitəsilə iqtisadiyyatını, tarixini, keçmişini, gələcəyini dünyaya tanıdan Azərbaycan növbəti dəfə “Formula-1” Qran-prisinə çox yüksək səviyyədə evsahibliyi edəcək. Təhlükəsizlik, infrastruktur hazırlığı, kütləvi tədbirlərin keçirilməsi ilə bağlı təşkilati, texniki bazanın mövcudluğu da bunun əyani göstəricisidir.

Rəşad BAXŞƏLİYEV

Azərbaycan.- 2018.- 25 aprel.- S.1; 11.