Bakı “Formula-1”in üçüncü zirvəsini fəth edir

Yerli azarkeşlərin səbirsizliklə gözlədiyi gün başladı

Bu gün paytaxtda “Formula-1” Azərbaycan Qran-prisinin ilk günüdür. Sürət azarkeşləri artıq sayca üçüncü dəfə adrenalin dolu günlər yaşayacaqlar. Odur ki, azarkeşlərin həyəcanı yüksəkdir. Əvvəlki yarışqabağı ərəfədə olduğu kimi, bu dəfə də paytaxt sakinləri və şəhərimizin qonaqları arasında canlanma müşahidə olunur. Xüsusilə, son günlər ölkəyə gələn turistlərin sayı nəzərəçarpacaq dərəcədə artıb. Hər gün Bakı bulvarı, qədim İçərişəhər və şəhərimizin digər gözəl yerlərində onların necə maraqla gəzdiklərinin şahidi oluruq. Turistlərin “Formula-1” və Bakı təəssüratlarını öyrənmək bizim üçün də maraqlı idi. Odur ki, onların fikirlərini bölüşmək qərarına gəldik.

Anar BÜNYAD, musiqiçi:

- Açığı, birinci dəfə “Formula-1” kimi mötəbər bir yarışın doğma şəhərimizdə keçirilməsi mənim üçün gözlənilməz olmuşdu. Artıq indi üçüncü dəfədir bu yarışa evsahibliyi edirik. İlk dəfəyə nisbətən həyəcan az olsa da, bu dəfə məsuliyyətim daha böyükdür. Çünki təkcə azarkeş kimi yox, həm də müsiqiçi kimi yarışa qatılıram. Təmsil etdiyim “Dərviş” qrupu ilə bu gündən etibarən üç gün mərkəzdə konsert verəcəyik. Ümumilikdə isə Azərbaycanda, paytaxt Bakıda keçirilən beynəlxalq tədbirləri çox dəstəkləyirəm. Bu, hər şeydən öncə, ölkəmizin inkişafı, beynəlxalq aləmdə qazandığı uğurun göstəricisidir.

Savalan ALLAHVERDİYEV, mühəndis:

- Sürət həvəskarıyam, ümumiyyətlə, mübarizəni xoşlayıram. Bu mənada ölkəmizdə keçirilən “Fomula-1” mənim üçün çox maraqlıdır. Pilotların gərgin mübarizəsi, şəhərin küçələri ilə şütüməsi adamı həyəcanlandırır. Sözsüz ki, bu, yüksək sürücülük bacarığı, manevr etmək qabliyyəti tələb edir, yəni, asan məsələ deyil. Nəhayət, səbirsizliklə gözlədiyimiz adrenalin dolu günlər gəlib çatıb. Bütün dünyada çox yüksək reytinqi olan yarışı canlı müşahidə edəcəyik... Onu da qeyd edim ki, belə bir tədbirin Bakıda keçirilməsini birmənalı olaraq ölkəmizin uğuru hesab edirəm. Bütün dünyanın diqqəti Bakıda olacaq. Əlbəttə, bununla fəxr etmək olar...

“Əvvəllər belə bir mötəbər yarışın ölkəmizdə keçirilməsini yalnız xəyal edərdik”

Tural ŞƏfiyev, sahibkar:

- Hələ kiçik yaşlarımdan “Formula-1” yarışmasının azarkeşi olmuşam. Əvvəllər televiziya vasitəsi ilə dünyanın ən gözəl şəhərlərində keçirilən sürət mübarizəsini böyük həvəslə izləyərdim. Heç ağlıma gəlmirdi ki, nə vaxtsa belə bir möhtəşəm yarış ölkəmizdə keçirilə bilər, sadəcə, bunu xəyal edə bilərdim. Ancaq bu gün bu, reallıqdır: doğma Bakı üçüncü ildir “Formula-1” mübarizəsinə qapı açır. Sumqayıt şəhərində yaşayıram, biletim əlimdədir, bu günü səbirsizliklə gözləyirdim. Yarışın ümumi əhəmiyyəti isə çox böyükdür, yarım milyarddan artıq azarkeşi var və bu da onu göstərir ki, “Formula-1” dünya səviyyəli idman tədbiridir və belə bir yarışın keçirilməsi üçün Bakının seçilməsi ölkəmizin dünya səviyyəsində yüksək reytinq sahibi olması deməkdir.

Seymur AYDINLI, maliyyəçi:

- Birinci dəfə “Formula-1” Bakıda keçiriləndə həyəcan daha çox idi, indi isə özümü təcrübəli azarkeş kimi hiss edirəm. Sürət insana ayrıca zövq verir, ona görə “Formula-1” yarışmalarını həvəslə izləyirəm. Artıq bir neçə saatdan sonra paytaxtda başlayacaq sürət yarışmasını yaxından izləməyə hazıram. Konkret olaraq Rikardonun azarkeşiyəm, gərgin mübarizə zamanı yürüşün başa çatmasına az qalmış rəqiblərini keçməsini çox bəyənirəm.

Anar SƏFƏROV, idmançı:

- İdman mənim üçün ən vacib və heç vaxt ayrıla bilməyəcəyim bir sənətdir. Ona görə bütün idman yarışlarını böyük həvəslə izləyirəm. Bakıda keçirilən əvvəlki “Formula-1” yarışlarında olduğu kimi, bu dəfə də bilet almışam, yarışı yaxından izləmək fikrindəyəm, sürət əladır, hədsiz zövq verir. Belə yarışlar zamanı şəhərdəki canlanma və səliqə-sahman, Bakının gözəlliyi təkcə əcnəbi qonaqları yox, bizləri də valeh edir. Yerli azarkeş olaraq həm də Azərbaycanın idman uğurlarından, dünyanın diqqətinin doğma paytaxtımıza yönəlməsindən mənəvi zövq alırıq.

Royal RAMİZOĞLU, tələbə:

- Üçüncü ildir ki, tələbə yoldaşlarımla birlikdə Bakıda keçirilən “Formula-1” yarışmasına şahidlik edirik. Bu, bizim üçün böyük şansdır. Üç gün çəkən mübarizə çox maraqlı keçir. Bu ərəfədə yeni dostlar da qazanırıq. Turistlərlə söhbət edib ölkəmiz, gözəl şəhərimiz haqqında onlara ətraflı məlumat veririk.

Paytaxt sakinləri özlərini artıq “Formula-1”in təcrübəli azarkeşləri hesab edirlər

Xatırladaq ki, son illər ölkəmizdə keçirilən beynəlxalq əhəmiyyətli tədbirlər, xüsusən də I Avropa Oyunları, Dünya Şahmat Olimpiadası, İslam Həmrəyliyi Oyunları, “Formula-1”in bu ilə qədər keçirilən iki yarışı, Humanitar və Mədəniyyətlərarası Dialoq forumları və digər beynəlxalq əhəmiyyətli tədbirlər Azərbaycanın və onun paytaxtının beynəlxalq imicini yüksək səviyyəyə qaldırıb. Bakıda reallaşan belə silsilə tədbirlər Azərbaycanın idman ölkəsi kimi tanıdılmasında xüsusi rol oynayıb. Bu, ölkəmizə gələn turist axınına güclü təkan verməklə yanaşı, yerli sakinlərin idmana, idman yarışlarına maraqlarını da birə min artırıb.

Şəhər sakinləri ilə söhbət zamanı bir daha əmin olduq ki, Bakıda “Formula-1”in minlərlə yerli azarkeşi var. Onların bəziləri hətta özlərinin “qəhrəman”larını da seçiblər. Müşahidə etdiyimiz bir özəllik də o oldu ki, üç il öncə - Bakıda ilk dəfə keçirilən “Formula-1” sürət yarışmasından sonra azərbaycanlılar artıq özlərini “Formula-1”in təcrübəli azarkeşləri hesab edirlər. Təbii ki, bunun üçün real əsaslar var. Çünki uzun müddət yalnız televiziya ekranlarından, son illər isə internet üzərindən izlədikləri yarışı canlı olaraq birbaşa müşahidə etmək onlara bu haqqı və üstünlüyü verib.

Hər yarış yerli azarkeşlər üçün xüsusi anlarla yadda qalır. Onlar yarış bitdikdən sonra uzun müddət müşahidə etdikləri maraqlı və adrenalin dolu günlərin təəssüratlarını bir-birləri ilə bölüşürlər. Bakıda keçirilən digər beynəlxalq tədbirlər kimi, “Formula-1” sürət yarışması da ölkəmizi tanıtmaqla bərabər, hər bir azərbaycanlının xaricdə özünəgüvən hissini artırır. Bu da həmyerlilərimiz üçün dəyərli ünsiyyət, hörmət, qazanc və üstünlük deməkdir.

Elnur HADIYEV

Azərbaycan.- 2018.- 27 aprel.- S.8.