Azərbaycan Respublikasının Prezidenti Zati-aliləri cənab İlham Əliyevə

Möhtərəm cənab Prezident.

Yenidən Azərbaycan Respublikasının Prezidenti seçilməyiniz münasibətilə Sizi səmimi qəlbdən təbrik edirəm.

Azərbaycan Beynəlxalq Əməliyyat Şirkətində (ABƏŞ) erkən neft layihəsi çərçivəsində Sizinlə çalışdığım illəri fərəh hissi ilə xatırlayıram. Siz Azərbaycanın maraqlarını daim hər şeydən üstün tutaraq, ABƏŞ-in fəaliyyətə başlamasına və qarşısına qoyulan tapşırıqların öhdəsindən uğurla gəlməsinə öz qayğınızı göstərmisiniz.

Erkən neft layihəsi Qərbin neft şirkətlərinin Azərbaycan Respublikasında uğurla fəaliyyət göstərə biləcəyini sübut edən bir pilot layihəsi idi. Həmin layihə Azərbaycana investisiyaların uğurla cəlb olunmasına şərait yaratdı, atanız Zati-aliləri Heydər Əliyevin və daha sonra Sizin Prezidentliyiniz dövründə “Azəri-Çıraq-Günəşli” yatağının tam istismara verilməsi, Bakı-Tbilisi-Ceyhan əsas ixrac boru kəməri, “Şahdəniz” və “Cənub Qaz Dəhlizi” kimi layihələrin həyata keçirilməsi üçün xarici sərmayələrin Azərbaycana cəlb edilməsində olduqca mühüm rol oynadı. Neft-qaz sənayesindən əldə edilən gəlirlər maliyyə, əmlak, telekommunikasiya və digər xidmət sahələri də daxil olmaqla, Azərbaycanın iqtisadiyyatının sürətli inkişafına təkan verdi.

Erkən neft layihəsi çərçivəsində təyinatım başa çatdığına görə 1997-ci ildə Azərbaycandan geri qayıtmalı oldum. Sonra 2004-cü, 2006-cı, 2009-cu, 2011-ci və 2014-cü illərdə yenidən ölkənizə səfər etdim. Azərbaycana etdiyim hər səfərdə əvvəlki səfərlərlə müqayisədə daha böyük iqtisadi inkişaf və ümumiyyətlə, ölkənin müsbət istiqamətdə transformasiyasını görürəm. Həmçinin Azərbaycan Dövlət Neft Fondunun gələcək nəsillər üçün qoyduğu sərmayələrdən də böyük məmnunluq hissi keçirirəm.

2010-cu ildən Azərbaycan Respublikasının ABŞ-ın Nyu-Meksiko ştatında fəxri konsulu kimi fəaliyyət göstərmək mənim üçün böyük şərəfdir. Mənə Azərbaycan Respublikasının maraqlarına xidmət etmək imkanı yaratdığınız üçün Sizə təşəkkürümü bildirirəm. Fəxri konsul olduğum bu illər ərzində Azərbaycan Respublikası və Nyu-Meksiko ştatı arasında möhkəm və qarşılıqlı faydalı əlaqələr qurulmuşdur. Nyu-Meksiko ştatının qanunverici orqanı Azərbaycan-ABŞ strateji tərəfdaşlığını və Azərbaycanın ərazi bütövlüyünü dəstəkləyən, həmçinin Ermənistan tərəfindən Azərbaycan torpaqlarının işğalını və azərbaycanlılara qarşı aparılan etnik təmizləmə siyasətini, eləcə də Xocalıda törədilmiş qətliamı pisləyən çoxsaylı qətnamələr qəbul etmişdir. Bu müddət ərzində mən Nyu-Meksiko ştatının rəsmi nümayəndələri ilə görüşlər keçirmiş, müxtəlif ictimai tədbirlərdə Azərbaycan haqqında mühazirələr oxumuşam. Ticarət, mədəniyyət, həmçinin təhsil sahəsində mübadilələr təşkil etmişəm. 2018-ci ilin yanvar ayında Nyu-Meksiko Nümayəndələr Palatası tərəfindən Azərbaycan Xalq Cümhuriyyətinin 100 illiyi ilə bağlı tarixi qətnamənin qəbul olunmasında iştirak etmişəm.

Sizi bir daha təbrik edir və yeni prezidentlik müddətinizdə böyük uğurlar arzulayıram. Başa düşürəm ki, Sizin çox gərgin iş qrafikiniz var, ancaq Bakıya növbəti səfərim zamanı Sizin tərəfinizdən qəbul edilmək mənim üçün yüksək şərəf olardı.

Dərin hörmətlə,

Art Makhaffi

Azərbaycan Respublikasının ABŞ-ın

Nyu-Meksiko ştatındakı fəxri konsulu

Azərbaycan.- 2018.- 28 aprel.- S.3.