Bakıda unikal “Formula-1” günləri

Azərbaycan bu beynəlxalq idman yarışını da yüksək səviyyədə keçirir

Yüz miloynlarla izləyici auditoriyasına malik olan “Formula-1” yarışlarının həyəcanı hazırda respublikamızda yaşanır. Artıq dünəndən etibarən Bakıda dünyanın bir nömrəli avtomobil yarışının Azərbaycan Qran-pri mərhələsinə start verilib. Bakı Şəhər Halqasında dünyanın ən məşhur pilotları - Luis Hamilton, Fernando Alonso, Sebastian Vettel, Valteri Bottas, Daniel Rikkardo və digərləri yarışırlar. Bu günlərdə planetimizdə avtomobil idmanına maraq göstərən hər kəsin diqqəti paytaxtımıza yönəlib.

Ölkəmiz yüksək təşkilatçılıq ənənəsinə bu dəfə də sadiqdir

Mötəbər idman yarışlarına evsahibliyi etmək hər bir ölkənin, o cümlədən şəhərin arzusudur. Amma hər ölkənin bütün dünyanın izlədiyi, sayları minlərlə ölçülən idmançıların iştirak etdiyi tədbiri təşkil etməyə, birdən-birə on minlərlə turisti qarşılamaq imkanı olmur. Hətta bir çox inkişaf etmiş ölkələr belə müəyyən tələblərə cavab vermir. Bu da təbiidir. Çünki qlobal miqyaslı idman tədbirinə evsahibliyi üçün kompleks və beynəlxalq standartlara cavab verən infrastruktur olmalıdır.

Azərbaycan isə bu baxımdan örnək sayılacaq ölkələrdən biridir. Çünki respublikamızda ilk növbədə ən müasir tələblərə cavab verən idman infrastukturu formalaşıb. İkincisi isə Bakı şəhəri və eləcə də regionlarımız istənilən sayda xarici qonağı qəbul edə bilər. Ötən illər Bakıda keçirilən I Avropa Oyunları və İslamiada yüksək təşkilatçılıq baxımından respublikamızın imkanlarının əyani təsdiqi oldu. Azərbaycan bu idman yarışlarına ən ideal şəkildə evsahibliyi etməklə Avropanın və İslam dünyasının idman tarixinə öz möhürünü vurdu.

Ölkəmiz bütün dünyaya evsahibliyinin və yüksək təşkilatçılığın necə olduğunu göstərdi.

İndi isə Bakı “Formula-1”ə evsahibliyi edir. Azərbaycan artıq “Formula-1” yarışlarının yeni ünvanı sayılmır. Çünki bundan əvvəl Bakıda iki dəfə Qran-pri mərhələsi keçirilib.

Bu il də “Formula-1” yarışlarına mart ayından Avstraliyada start verilib. Pilotlar və komandalar noyabr ayına qədər 21 yarış mərhələsi keçməlidirlər. Son yarış Abu-Dabidə baş tutacaq. Sayca 3-cü Qran-pri 13-15 aprel tarixlərində Çində keçirilib. Azərbaycan Qran-prisi təqvimin sayca dördüncü yarışıdır. Bu dəfə Azərbaycan Qran prisi təqvimdə ötən illərdə oluğundan əvvələ çəkilib.

Azərbaycan Qran-prisinə dünəndən start verilsə də, Bakıda uzun müddətdən bəridir ki, bu idman hadisəsinin ab-havası yaşanır. Çünki hazırlıq işlərinə aylar öncədən başlanıb və əsas məqsəd 2018-ci il üçün 4-cü olan və Avropa Qran-prisi adlanan Bakı mərhələsini layiqincə təşkil etmək, ideal evsahibliyi nümunəsini ortaya qoymaqdır. Fərəhli haldır ki, aparılan hazırlıq işlərini Beynəlxalq Avtomobil Federasiyasının rəsmiləri, o cümlədən yarışda iştirak edən pilotlar təqdir ediblər. Beləliklə, bu günlərdə bir daha bütün dünya və ölkəmizə təşrif buyuran xarici qonaqlar Azərbaycanın yüksək evsahibliyinin şahidi olmaqdadırlar. Tək yarışın keçirilməsi deyil, qonaqların, tamaşaçıların ölkəmizlə, milli dəyərlərimizlə tanışlığı, şəhərimizdə olduğu günlərdə vaxtlarını səmərəli keçirmələri üçün yaradılan şərait, bütün dünyada sevilən populyar müğənnilərin iştirakı ilə konsert proqramlarının təşkili Azərbaycanın mükəmməl evsahibliyi nümunəsinin ayrı-ayrı detallarıdır. Beləliklə, Azərbaycan yüksək təşkilatçılıq ənənəsinə bu dəfə də sadiqdir.

Hər bir tədbir maraqla qarşılanır

“Formula-1” tamaşaçı sayına görə yalnız futbol üzrə dünya çempionatı və yay olimpiya oyunlarından geri qalsa da, mübarizə aparan idmançıların sayı sarıdan onlardan geri qalır. Bununla belə, “Formula-1” spesifik idman növüdür. Çünki burada gündəlik həyatda görmədiyimiz və xüsusi olaraq bu idman növü üçün hazırlanan avtomobillər yarışır. Avtomobillərin sürətli yürüşündən ibarət olan bu çempionatın ayrı-ayrı mərhələləri il ərzində dünyanın müxtəlif şəhərlərində təşkil olunur. Bunun üçün isə tələblərə cavab verən trekin olması vacib şərtdir. Xüsusi olaraq inşa olunmuş Bakı Şəhər Halqası “Formula-1” təqviminə ən yeni əlavədir. Amma Bakıda bolidlər avtodromda deyil, məhz şəhərin küçələrində yarışacaqlar. Bakı trekinin uzunluğu 6 km-dən bir qədər artıqdır. Bu, uzunluğuna görə dünyada ikincidir.

Bakı indiyədək onlarla beynəlxalq çempionata evsahibliyi etsə də, 2016-cı ilə qədər “Formula-1” yarışları keçirilməmişdi. Bu mənada Azərbaycan üçün artıq yenilik sayılmasa da, “Formula-1” Bakı sakinləri tərəfindən hər dəfə böyük maraqla qarşılanır. Çünki yarış təşkilatçılarının hər bir tədbiri, “Formula-1” pilotları ilə tanışlıq olduqca maraqlıdır. Dünəndən etibarən “Formula-1” azarkeşləri sevdikləri pilotlarla görüşərək onlardan avtoqraf alırlar.

Dünya musiqisinin məşhur ulduzlarından olan Jamiroquai, Kristina Aquilera, Dua Lipa, Afrojack, Axwell & Ingrosso, Martin Solveig Azərbaycan Qran-prisinin musiqili proqramının əsas ifaçılarıdır. Artıq dünəndən Jamiroquai və Afrojackun ifalarında əyləncə proqramına start verilib. Bu gün estafeti qəbul edəcək Kristina Aquilera, Axwell & Ingrosso və digər ifaçılar coşqulu konsert proqramı ilə “Crystal Hall” səhnəsində yer alacaqlar. Bazar günü axşam isə dünyanın tanınmış ulduzlarından olan Dua Lipa, Martin Solveig və DJ-lər öz musiqili proqramları ilə 2018-ci il “Formula-1” Azərbaycan Qran-prisinə yekun vuracaqlar.

“F1” sadəcə bir yarışma deyil

Qran-pri çərçivəsində Azərbaycan mədəniyyəti guşəsi də fəaliyyətə başlayıb. Burada yerli musiqiçilərin ifası, xalçaçılıq, dulusçuluq, zərgərlik, şəbəkə, araqçın, kəlağayı və bu kimi incəsənət nümunələri təqdim olunur.

“Formula-1” yarışları ilə əlaqədar Azneft meydanından Dəniz vağzalına qədər bütün Dənizkənarı Milli Park ərazisində əyləncə zonaları fəaliyyətə başlayıb. Uşaq və gözəllik pit-stopları, “Formula-1” Qran-pri qalibi olmağın necə bir hiss olduğunu yaşamaq istəyənlər podiumun real ölçülü maketi, Bakı Şəhər Halqasının böyük rəngləmə divarı, konseptual yarış bolidinin unikal instalyasiyası, retro avtomobil sərgisi və daha nələr… Bu sırada təşkilatçılar azarkeşlərin yarış simulyatorlarında güclərini sınayaraq, özlərini əsl “Formula-1” pilotu kimi hiss etmələrini, uşaqlar üçün əyləncəli yarışların təşkilini də unutmayıblar. Elə bir unikal əyləncə-istirahət proqramı hazırlanıb ki, yarışın hər dəqiqəsi tamaşaçılar üçün maraqlıdır. Fərqli əyləncələr yarışların hər bir pərəstişkarında xoş təəssüratlar oyadır. Beləliklə, Bakıda keçirilən Azərbaycan Qran-prisi göstərir ki, “Formula-1” sadəcə yarışma deyil, eyni zamanda bir həyat tərzi və unudulmaz istirahət deməkdir.

Rəşad CƏFƏRLİ,

Azərbaycan.- 2018.- 28 aprel.- S.1; 6.