Bakıda “Formula-1” coşqusu

Paytaxtımız Azərbaycan Qran-prisi ilə uğur estafetini davam etdirir

Dünyanın ən mükəmməl idman mərkəzlərindən birinə çevrilən Azərbaycan demək olar ki, hər il mötəbər yarışlara evsahibliyi edir. Ölkəmizdə keçirilən Avropa və dünya çempionatları silsilə xarakteri daşıyır. Onlardan biri də artıq üçüncü dəfə Bakıda gerçəkləşən “Formula-1” Qran-prisidir.

Yarım milyard tamaşaçısı olan bu yarışa 2016-cı ildən evsahibliyi etməyə başlayan Azərbaycan öz ənənəsinə sadiq qalaraq ən mükəmməl təşkilatçılıq modelini yaradıb.

Sürət həvəskarlarının diqqəti Bakıya yönəlib

Aprelin 27-də növbəti dəfə bütün sürət, adrenalin həvəskarlarının nəbzi Bakıda - Şərq ilə Qərbin koloritinin cəmləşdiyi şəhərdə döyündü. Dünyanın ən möhtəşəm idman yarışlarından biri olan “Formula-1” üzrə Azərbaycan Qran-prisi start götürdü.

Çoxlu sayda siyasi, mədəni, idman və digər səpkili tədbirlərin ən mötəbər ünvanına çevrilən respublikamız növbəti beynəlxalq tədbirə layiqincə evsahibliyi etməklə dünyanın diqqətini Bakıya cəlb edib. “Formula-1” Azərbaycan Qran-prisi ilə bağlı Bakıya gələn hər kəs ölkəmizin inkişafını, xalqımızın qonaqpərvərliyini, zəngin mədəniyyətini öz gözləri ilə gördü. Hər kəs yüksək səviyyəli təşkilatçılığın növbəti dəfə şahidinə çevrildi.

Qürur və sevinc hissi yaşadan möhtəşəm evsahibliyi

Bir nömrəli avtomobil yarışına ölkəmizin evsahibliyi etməsinin qürur və sevincini yaşamaqdayıq. Belə bir möhtəşəm yarışın Azərbaycanda keçirilməsi dünyaya növbəti dəfə azərbaycanlıların mehribanlığı, qonaqpərvərliyi, qədim tarixi, füsunkar təbiəti, mentaliteti, sürətlə inkişaf edən müasir ölkə ilə tanışlıq fürsəti verib.

Yarışın ilk günündə yaşananlar göstərdi ki, bu idman növünə təkcə dünyada deyil, Azərbaycanda da böyük maraq yaranıb. Bunu yarışları izləmək üçün alınan biletlərlə də müəyyən etmək olur. Belə ki, hər il olduğu kimi, bu il də yarışa bilet alanlar arasında yerli

“Formula-1” həvəskarları üstünlük təşkil edir.

Eyni zamanda, bu il yarışa beynəlxalq səviyyədə də böyük maraq göstərilir. Şübhəsiz ki, bunda Bakı Şəhər Halqasının möhtəşəm yarışa evsahibliyi etməsi ilə yanaşı, burada tamaşaçıların müxtəlif zövqlərinə uyğun çoxsaylı əyləncə və konsert proqramının olmasının da böyük rolu var.

Ümumilikdə 68 ölkədən bilet alınıb və bu biletlərin 45 faizi xarici ölkələrin payına düşür. İlk onluğa Rusiya, Monako, Böyük Britaniya, Ukrayna, Avstriya, Gürcüstan, Hollandiya, Türkiyə, Birləşmiş Ərəb Əmirlikləri və Amerika Birləşmiş Ştatları daxildir.

Xatırladaq ki, ilin əvvəlində Prezident İlham Əliyev bu il “Formula-1” Azərbaycan Qran-pri yarışının təşkili və keçirilməsi ilə bağlı ölkəmizə gələcək əcnəbilər, vətəndaşlığı olmayan şəxslər üçün viza prosedurlarının sadələşdirilməsi haqqında sərəncam imzalamışdı. Bu da onu təsdiqləyir ki, Azərbaycan dövləti yarışları izləmək üçün ölkəmizə gəlmək istəyən azarkeşlərə hərtərəfli imkanlar yaradır.

Yarışlara 68 ölkədən bilet alınıb

Yarışları izləmək üçün 68 ölkədən bilet alışı onu təsdiq edir ki, bu il də “Formula-1” mərhələsini izləmək üçün ölkəmizə gələnlərin sayında artım olub. Çünki kiçik müqayisə bunu təsdiq edir.

İlk dəfə, yəni, 2016-cı ildə Bakıda keçirilən Avropa Qran-prisini izləmək üçün ölkəmizə 30 min tamaşaçı gəlmişdi. 2017-ci ildə isə Azərbaycan Qran-prisini izləməyə gələnlərin sayı 71, 541 nəfərə yüksəldi. Bu isə o deməkdir ki, Bakıda baş tutan ikinci “Formula-1” yarışına 2016-cı ildəkindən 30 faiz çox tamaşaçı gəlib. Yəni, xaricdən gələn avtoidman azarkeşlərinin sayı iki dəfə çox olub. Ümumilikdə isə 65 ölkədən azarkeş gəlib.

Bu il isə 68 ölkənin azarkeşinin Bakıda “Formula-1” həyəcanını yaşaması turistlərin sayında artımın olduğunu təsdiq edir. Bu göstəricilərə əsaslanaraq deyə bilərik ki, bu yarış Azərbaycanın turizm sənayesinin inkişafı istiqamətində həyata keçirilən proqramların artıq müsbət nəticələr verdiyini bir daha göstərir.

“Formula-1”in Azərbaycan nümunəsi

Son illər beynəlxalq əhəmiyyətli tədbirlərin keçirilməsi üçün Bakı şəhərinin seçilməsi ölkəmizin nüfuzunun yüksəldiyini sübut edir. Çoxsaylı idman tədbirləri, sərgilər, konfranslar, Azərbaycan mədəniyyətinin xarici ölkələrdə təqdimatı artıq dünya ictimaiyyətinə ölkəmiz haqqında kifayət qədər dolğun məlumatın çatdırılması üçün şərait yaradır.

Azərbaycan Avropa ilə Asiyanı, sivilizasiyaları birləşdirir, qarşılıqlı anlaşmanın bərqərar olması üçün səylərini gücləndirir.

Mədəniyyətlər, sivilizasiyalar və konfessiyalar arasında zəngin əməkdaşlıq ənənələri olan Azərbaycan mötəbər tədbirlərin keçirilməsi üçün ideal məkandır. Azərbaycan qədimliklə müasirliyin qovuşduğu coğrafi areal olaraq bu məqsədlərə yönəlmiş mühüm təşəbbüslərlə çıxış edir. Əlbəttə ki, bu məqamda Azərbaycanın təşkilatçılığının beynəlxalq miqyasda yüksək dəyərləndirildiyi faktını da xüsusi qeyd etmək lazımdır.

Bir sözlə, təkcə Cənubi Qafqazın deyil, Avropanın tolerantlıq, sülh və inkişaf mərkəzlərindən biri kimi tanınan Azərbaycan “Fomula-1” ilə uğur estafetini davam etdirdi. Ölkəmizin bu mötəbər idman tədbirini yüksək səviyyədə keçirmək iddiası ilə imkanlarının üst-üstə düşdüyünü isə xüsusi vurğulamağa ehtiyac yoxdur. Çünki beynəlxalq ictimaiyyət aprelin 27-də start götürən möhtəşəm idman yarışını izləməklə bunun bir daha əyani şahidi olacaq.

Rəşad BAXŞƏLİYEV

Azərbaycan.- 2018.- 29 aprel.- S.1; 6.