Ənənəvi sahə olan çəltikçilik ikinci həyatını yaşayır

Sitrus meyvələri, çəltik, çay... Bunlar heç də hər yerdə bitən, araya-ərsəyə gələn məhsullar deyil. Lənkəranın torpağı, havası, suyu isə onların hamısını yetişdirməyə qadirdir. Həm də çayın ən ətirlisini, limonun, portağalın ən ləzizini, çəltiyin ən bərəkətlisini...

Təəssüf ki, bir müddət məlum səbəblərdən bu bitkilərə diqqət azalmışdı. İndi torpaq yenidən canlanıb, unudulmuş sahələr bərpa edilib və onlara öz keçmiş şöhrəti qaytarılır. Bütün bunlar dövlətin qayğısı və əməli köməyi sayəsində gerçəkləşir. Prezident İlham Əliyevin bölgəyə səfərləri kəndli və fermerləri yeni nailiyyətlərə ruhlandırıb. Odur ki, rayonda sözügedən sahələrin hər biri ildən-ilə daha da inkişaf edir.

Ölkədə aqrar sahənin inkişafına və şaxələndirilməsinə töhfə verən təsərrüfatlardan biri də Lənkəranda yeni yaradılmış “Qreen EAST” MMC-dir. Təsərrüfatın çəltikçiləri keçən il 100 hektar sahədən 400 tondan çox məhsul götürüblər. Bu il çəltik sahələri daha da genişləndirilərək 160 hektara çatdırılıb.

Sahələrdə keyfiyyətli çəltik yetişdirilir və məhsulun bol olacağı gözlənilir. Hazırda biçin üçün də ciddi hazırlıq işləri aparılır. Texnikaya baxış keçirilir. Biçinin yüksək səviyyədə başa çatması üçün əvvəlcədən lazımi tədbirlər görülür.

Azərbaycan.- 2018.- 4 avqust.- S.5.