Vüsalın uğur hekayəti
Yaxud bir gənc sahibkarın manifesti
Azərbaycan gəncləri bu gün tarixinin ən məsuliyyətli dövrünü yaşayır. Çünki qloballaşmanın vüsət aldığı və informasiya cəmiyyətinin sürətlə formalaşdığı hazırkı mərhələ respublikamızda sosial-iqtisadi, elmi-mədəni, təhsil və digər sahələrdə gənclərin daha fəal iştirakını təmin etmək istiqamətində aparılan işlərin yeni səviyyəyə yüksəldilməsini tələb edir.
7 il Çində ali
təhsil
Məhz buna görə də cəmiyyətin maraqlarının təmin edilməsi və ölkə iqtisadiyyatının rəqabətədavamlılıq qabiliyyətinin artırılması üçün gəncliyin potensialından geniş istifadə olunur. Ölkəmizdə bacarıqlı, istedadlı, müasir gənclərin öz potensiallarını, qabiliyyətlərini nümayiş etdirmələri üçün münbit şərait yaradılıb. Əlbəttə ki, bu şəraitdən yararlanan istedadlı Azərbaycan gəncləri həm ölkəmizdə, həm də təhsil aldıqları, yaşadıqları xarici ölkələrdə Azərbaycan adına uğurlu təmsilçiliyə imza atırlar. Artıq ölkəmizin iqtisadi inkişafına hər cür töhfə verməyə hazır olan gənc sahibkarlar ordusu da formalaşıb. Onlardan biri də 31 yaşlı gənc iş adamı Vüsal Qurbanovdur.
1986-cı ildə Gəncə şəhərində anadan olan Vüsal Qurbanov 2004-cü ildə Bakı Dövlət Universitetinin Beynəlxalq hüquq fakültəsinə daxil olub. 2005-ci ildə Təhsil Nazirliyinin xətti ilə təhsilini Çin Xalq Respublikasının Pekin Dillər Universitetində davam etdirməyə başlayıb. Bir il burada Çin dilini öyrəndikdən sonra 2006-cı ildə Çin Renmin Universitetinin Hüquq fakültəsinə qəbul olunub. 2010-cu ildə təhsilinin bakalavr pilləsini başa vurduqdan sonra “2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı” əsasında 2010-2012-ci illərdə Çinin Tsinghua Universitetində beynəlxalq hüquq üzrə magistr təhsili alıb.
22 yaşında Çində Azərbaycan şirkəti
yaradıb
Ancaq 4 il ərzində, yəni Çində təhsil aldığı müddətdə gənc hüquqşünas təkcə elmlə məşğul olmayıb, o həm də dünyanın ticarət mərkəzi hesab olunan bu ölkədə özünü ticarət sahəsində sınamaq qərarına gəlib. 2008-ci ildə gənc mütəxəssis həm azərbaycanlı, həm də çinli tələbə yoldaşları ilə birgə bu ölkədə “GA” Ticarət və Konsultasiya Şirkətini təsis edib. Gənc sahibkarın icraçı direktor kimi çalışdığı şirkətin fəaliyyət istiqaməti həm beynəlxalq ticarət, beynəlxalq daşımaçılıq, həm də Azərbaycandan gələn iş adamları üçün ticari işlərlə bağlı məsləhətlər verməkdən ibarət olub.
22 yaşlı bir gəncin uzaq Çində Azərbaycan şirkəti yaratması və beynəlxalq ticarətlə məşğul olması həqiqətən də böyük uğur idi. Gənc iş adamı ilə söhbət zamanı o da bəlli oldu ki, 10 il öncə özünü iqtisadiyyatda sınayan hüquqşünas artıq bu sahədə yetərincə təcrübə toplayıb: “Şirkəti yaratdıqda ilk olaraq beynəlxalq daşımaçılıqla məşğul olmağa başladıq. Əlaqələr yaratdıq və imkanlarımız getdikcə genişləndi. Sonra Azərbaycandan gələn iş adamlarına kömək göstərməyə başladıq. Çində iş qurmaq, şirkət açmaq, oradakı bazarlarda hansı məhsulların satışından daha çox gəlir əldə etməklə bağlı məsləhətlər verirdik. Eyni zamanda hüquqi ixtisasımız olduğu üçün bu istiqamətdə də soydaşlarımıza yardımlarımızı əsirgəmirdik. Hüquqi prosedurlar, vizaların alınması və digər məsələlərlə bağlı çətinliyi olanlara kömək göstərirdik. 2012-ci ilədək Çində bu sahə üzrə xeyli təcrübə topladıq və vətənə qayıdıb işimizi bu sahədə davam etdirdik”.
“Global Assistant” qlobal şirkətə çevrilmə yolundadır
2012-ci ildə təhsilini
başa vurub Azərbaycana qayıdan Vüsal Qurbanov məhz sahibkarlıq fəaliyyətinə üstünlük
verir. Həmin il Amerika
Birləşmiş Ştatlarında
Corc Vaşinqton Universitetinin nəzdində
iqtisadi hüquq ixtisası üzrə kurs keçdikdən sonra Bakıda “Global
Assistant” şirkətini təsis
edərək həm təsisçi, həm də marketinq meneceri kimi çalışmağa
başlayır: “2012-ci ildə
Bakıda təsis etdiyimiz bu şirkətin
fəaliyyət istiqaməti
öncə ölkəmizə
tikinti materiallarının
(istilik sistemləri) idxalı və satışından ibarət
oldu. Bir qədər fəaliyyətdən
sonra imkanlarımız
daha da genişləndi
və bu gün dünyanın 6 ölkəsi ilə əməkdaşlıq edirik.
Bunların sırasında Çin
ilk yerdədir. Bundan başqa,
Türkiyə, İtaliya,
Polşa, Çexiya və Rusiya Federasiyasından müasir
istilik sistemləri (istilik tənzimləyiciləri,
su qızdırıcıları,
müxtəlif ölçülü
borular, qızdırıcılar
üçün elektrik
tənzimləyicilər və
s.) idxal edirik. Şirkətimiz eyni zamanda Çinin 3 böyük müəssisəsinin Azərbaycandakı
rəsmi nümayəndəsidir.
Çin
şirkətləri adətən
heç bir ölkədə rəsmi nümayəndəliklərinin yaradılmasını
istəmirlər. Onlar məhsullarını
istənilən şirkətə
satırlar. Ancaq bizim
bu sahədə zəngin təcrübəmizi
və Çindəki
fəaliyyətimizi nəzərə
alaraq öz məhsullarının məhz
“Global Assistant” tərəfindən Azərbaycan bazarında satışının təşkil
edilməsinə razılıq
veriblər. Bunların sırasında
dünyanın nüfuzlu
şirkətlərindən olan “STABA” da var. Mərkəzi ofisi Çində yerləşən
bu şirkət əsasən dünya bazarına elektrik işıqlanma cihazları
ixrac edir. Bundan başqa, “Shanhai Zenit” şirkətinin də rəsmi distribüteriyik. Bu şirkət əsasən
müxtəlif avadanlıqlar,
polad dəzgahlar istehsal edir. Azərbaycanda həmin materialların,
məhsulların satışını
yalnız biz həyata
keçiririk”.
Ətrafına gəncləri toplayan Vüsal Qurbanov deyir ki, “Global Assistant” şirkəti ticarətlə
yanaşı digər
firma və şirkətlərin
biznes inkişafının
artırılması üçün
servis xidmətlərini
də həyata keçirir. Bundan başqa, şirkət Azərbaycandakı iş adamlarına xaricdən zavod və fabriklər
almaları üçün
yardım göstərir:
“Məsələn, əlində
müəyyən qədər
investisiyası olan sahibkar onu hansı
istiqamətə yönəltməkdə
tərəddüd edir.
Bu şəxs bizə müraciət edir və razılaşma
olduqda hansısa xarici ölkədə fəaliyyət göstərən
zavodla danışıqlar
apararaq səhmlərini
alırıq və gəlib Azərbaycanda da həmin müəssisəni
qururuq. Tam hazır olduqdan sonra sahibkara təhvil veririk. Son zamanlar belə
təkliflərin sayı
artmaqdadır. Bu da onu təsdiq
edir ki, ölkədə sahibkarlar
üçün dövlət
tərəfindən yaxşı
imkanlar yaradılır.
Sahibkarlar da yeni-yeni istehsal sahələri yaradaraq biznes fəaliyyətlərini genişləndirməkdə
maraqlıdırlar”.
Yeni müəssisə
Ələtdə yaradılacaq
“Global Assistant” şirkəti beynəlxalq dəniz daşımaçılıq prosesini
də həyata keçirir. 2017-ci il
oktyabrın 30-dan Avrasiya
məkanı üçün
yeni yüksəliş
və uzunömürlü
rifah layihəsi olan Bakı-Tbilisi-Qars dəmir yolu xəttinin istifadəyə verilməsindən
sonra şirkətin imkanları bir qədər də genişlənib. BTQ-nin açılışı
beynəlxalq daşımaçılıqla
məşğul olan şirkətlərin öz
imkanlarını daha da genişləndirməsi
üçün əlavə
stimul yaradıb.
Çünki əvvəllər yüklər 2 ay müddətinə
daşınırdısa, indi
bu müddət 15 günə enib. Artıq “Global Assistant” şirkəti
həm dəniz, həm də dəmir yolu daşımaçılıq prosesinin
həyata keçirilməsi
ilə məşğuldur:
“İndi idxal etdiyimiz avadanlıqlar, məhsullar həm dəniz xətti, həm də dəmir yolu xətti ilə Azərbaycana gəlir. İndi dövlət tərəfindən
sahibkarlara daha rahat və daha
əlverişli imkanlar
yaradılıb. Sifariş olunan
məhsulları, avadanlıqları
vaxtında ünvanına
çatdıra bilirik.
Onu da deyim ki,
Azərbaycan beynəlxalq
logistik mərkəzə
çevrilib. Vergi və
gömrük sistemində
tətbiq edilən yeniliklər sahibkarlara daha yaxşı imkanlar yaradıb. Məsələn, əvvəllər
malların qəbul edilməsi üçün
gömrük keçid
məntəqəsinə gedirdiksə,
indi bu proses
onlayn həyata keçirilir. Kompüter vasitəsilə bütün
prosesi idarə etmək mümkündür”
deyən gənc iş adamının yeni hədəfləri daha böyükdür.
Vüsal
Qurbanov öz komandası ilə birgə Azərbaycanda müasir istehsal sahəsi yaratmaq fikrindədir. Yeni müəssisəni Prezident
İlham Əliyevin sərəncamı ilə
Ələt qəsəbəsində
yaradılmaqda olan Azad
İqtisadi Zonada qurmağı planlaşdıran
gənc sahibkar deyir ki, burada
əsasən dəmir
istehsalı ilə məşğul olacaqlar:
“Dövlət başçısının
sərəncamı ilə
yaradılan Azad İqtisadi
Zonada sahibkarlara böyük imtiyazlar veriləcək. Vergi, gömrük rüsumlarından
azadolmalar sahibkarlara yeni-yeni istehsal sahələri yaratmağa
geniş imkanlar açacaq. Bu, həm
yeni-yeni iş yerlərinin açılması,
həm də gənc sahibkarlara real imkanların yaradılması
baxımından çox
mühüm bir addımdır”.
Daha böyük hədəflərə
doğru
Vüsal Qurbanov deyir ki, əgər əvvəllər gənclərimiz xaricdə təhsil alıb ölkəyə qayıtdıqdan sonra hansısa peşə fəaliyyəti ilə məşğul olurdularsa, artıq buna ehtiyac qalmayıb: “Çünki Azərbaycanda mövcud olan ali təhsil müəssisələri yetərincə potensial gənc mütəxəssislər yetişdirir. Bütün bunlar isə Azərbaycanın uğurlu gələcəyinə hesablanmış proqramlardır. Əminliklə söyləmək olar ki, gələcək uğurların əldə edilməsində cəmiyyət həyatının hər bir sahəsində fəallığı ilə seçilən bugünkü Azərbaycan gəncliyinin mühüm töhfələri olacaq. Bu gün ölkəmizdə istənilən sahədə özünü sınayıb, yeni ideyalar ortaya qoyaraq uğur qazanan gənclər kifayət qədərdir və gənc sahibkarlara həqiqətən dövlət tərəfindən lazımi dəstək göstərilir.
İstənilən gənc “ASAN xidmət” mərkəzinə müraciət edərək 2 saat müddətində yeni şirkət yarada bilər. “Bir Pəncərə” İxraca Dəstək Mərkəzi isə sahibkarlara öz məhsullarını xarici bazarlara çıxarması üçün qısa zaman ərzində bütün lazımi sertifikatları verir. Məhsullarımız “Made in Azerbaijan” brendi ilə dünya bazarlarına çıxarılır. Artıq dünyanın bir çox ölkələrində Azərbaycan məhsulları brendə çevrilib. Yeni yaradılmış Ticarət evləri isə bu prosesə dəstək olur. Xarici ölkələrin iş adamları Azərbaycan məhsulları ilə tanış olurlar. Yaradılan şəraitdən yararlanan gənc sahibkarlarımız da Azərbaycan iqtisadiyyatına öz töhfələrini verirlər”.
Vüsal Qurbanovun hədəfləri böyük və genişmiqyaslıdır. Əsas odur ki, təşəbbüslərinin gerçəkləşdirilməsi üçün münbit mühit, real şərait mövcuddur. Demək, Vüsalın xoş soraqlarını daha çox eşidəcək, yeni nailiyyətlərinin şahidi olacağıq...
Rəşad
BAXŞƏLİYEV,
Azərbaycan.-2018.-2 fevral.- S.5.