“Jara” yenidən Bakıda...

Bu yay mövsümünün ən hərarətli musiqi festivalına üç həftə qalıb. Artıq üçüncü dəfə Bakının “Sea Breeze” məkanında - Xəzər dənizinin sahilində “Jara” Beynəlxalq Musiqi Festivalı keçiriləcək.

Azarkeşlərin səbirsizliklə gözlədikləri möhtəşəm festivalın təşkilatçıları Azərbaycanın xalq artisti, müğənni və bəstəkar Emin Ağalarov, Rusiyanın əməkdar artisti Qriqori Leps, “Russkoye radio”nun və “Qızıl qrammofon” mükafatının təsisçisi Sergey Kojevnikovdur. 26 iyuldan başlayaraq 3 gün davam edəcək konsert proqramında dünya şöhrətli müğənnilər iştirak edəcəklər.

MDB üzrə ən yaxşı yay festivalı

İndiyədək cəmi iki dəfə keçirilməsinə baxmayaraq, “Jara” musiqisevərlərin böyük rəğbətini qazanan mötəbər tədbirə çevrilib. Bunu festivalların reytinqi də təsdiqləyir. Rusiyanın TurStat analitik agentliyi MDB ölkələrinin bu ilin yayında açıq səma altında ən yaxşı festivallarının reytinqini təqdim edib.

Reytinqə əsasən, Minskdə (Belarus) “Rok za Bobrov”, Bakıda (Azərbaycan) “Jara” və Almatıda (Qazaxıstan) “FourG” festivalları MDB-də açıq səma altında keçirilən, rusiyalı turistlər arasında populyarlıq qazanmış musiqi festivallarının üçlüyünə daxildir. Reytinq festivala baxmağa gedən tamaşaçıların sayına əsasən tərtib olunub.

Yubiley konsertləri

Artıq “Jara” Beynəlxalq Musiqi Festivalında 81 ifaçının iştirakı təsdiqlənib. EMİN, Qriqori Leps, Filip Kirkorov, Sergey Lazarev, Timati, Ani Lorak, LOBODA, Aleksey Çumakov, A`Studio, Slava, Qlyuk'oza, Aleksandr Panayotov, Anna Sedokova, Monatik, Qradusı, Maks Barskix, Yeqor Krid, Yuliya Kovalçuk, Burito, Brandon Stone, Pitsa, Alekseyev, Nyusha, Artik & Asti və başqaları musiqisevərlərə ən gözəl anlar bəxş edəcəklər. Builki “Jara”da həmçinin üç konsert - Valeriya, Vladimir Presnyakov və Leonid Aqutinin yubiley gecələri də keçiriləcək.

“Jara” festivalının paytaxt Bakıda təşkil olunması ölkəmizdə bu cür tədbirləri keçirmək üçün geniş imkanların olduğunu bir daha təsdiqləyir. Sevindirici haldır ki, “Jara” Rusiya ilə Azərbaycan arasında mədəni körpü olmaqla yanaşı, digər mühüm bir məqamı da nümayiş etdirir. “Jara” iki ölkə arasında humanitar sahədə genişlənən münasibətlərin sıxlığının göstəricisi kimi xarakterizə oluna bilər. Necə deyərlər, latın dilindən “pərilərin dili” anlamına gələn musiqi bütün dünyada mədəniyyətləri bir-birinə yaxınlaşdıran mühüm vasitədir.

Musiqisevərlər həmin günləri səbirsizliklə gözləyirlər

Bakıda keçirilən “Jara” festivalı haqqında musiqisevərlərlə söhbət etdik. Paytaxt sakinləri bu ilki festivalı da səbirsizliklə gözlədiklərini bizimlə bölüşdülər.

Ayşən Vəliyeva söyləyir ki, ötən ilki “Jara” xoş təəssüratlarla yadında qalıb və bu ilki festivalda da iştirak etmək niyyətindədir: “Müasir zamanda az adam tapılar ki, musiqini sevməsin. Bakıda da bu cür möhtəşəm musiqi festivalının təşkil olunması təqdirəlayiq haldır. Musiqisevərlər bir araya toplaşaraq dincəlir, eyni zamanda, məşhurlarla daha yaxından tanış olmaq imkanı əldə edirlər”.

Bu festivalın artıq musiqi aləmində parlaq mədəni hadisəyə çevrildiyini deyən Samirə Rafaelqızı isə düşünür ki, Bakıda keçiriləcək III “Jara” daha hərarətli olacaq. O konsertə dostları ilə birlikdə qatılacağını bildirdi.

Musiqi həvəskarı olduğunu deyən Kənan Həsənov isə festivalda ilk dəfə iştirak edəcəyini deyir: “Təəssüf edirəm ki, 2016-2017-ci illərdəki “Jara”ya qatıla bilmədim. Amma bu il mütləq gedəcəyəm. Yay mövsümünün ən parlaq festivalı olan “Jara”da bir neçə gün ərzində dünyanın məşhur musiqiçiləri bir araya gəlirlər. Məncə, bu, çox böyük bir şansdır”.

Proqramda dünyaca məşhur və hamı tərəfindən sevilən müğənnilərin iştirakı festivalın bu dəfə də bir-birindən maraqlı konsert proqramları ilə yadda qalacağına şübhə yaratmır.

Səbinə MƏMMƏDOVA

Azərbaycan.- 2018.- 5 iyul.- S.7.