Hüquq elminə
dəyərli töhfə
Professor
Əmir Əliyevin “Azərbaycan beynəlxalq cinayətlər hədəfində:
hüquqi təhlil” kitabı beş dildə çapdan
çıxıb
Bakı Dövlət Universitetinin Hüquq
fakültəsinin dekanı, hüquq üzrə elmlər doktoru,
professor Əmir Əliyevin müəllifi olduğu və
beş dildə - Azərbaycan, fransız, ingilis, rus və
türk dillərində çap edilmiş “Azərbaycan beynəlxalq
cinayətlər hədəfində: hüquqi təhlil”
kitabında Azərbaycan dövlətçiliyinə və
xalqına qarşı ermənilər tərəfindən
törədilən, hazırda da Ermənistan tərəfindən
davam etdirilən beynəlxalq cinayətlərin hüquqi təhlili
aparılıb. Giriş, 6 fəsil və nəticədən
ibarət olan kitabın rəyçiləri Ukrayna,
Qazaxıstan, Rusiya, Gürcüstan, İran, Türkiyə və
digər dövlətlərin beynəlxalq hüquq üzrə
tanınmış alimləridir.
Girişdə qeyd edilir ki, ermənilərin
xalqımıza qarşı XIX əsrdən başlayan, XX əsrdən
isə sürətlənən təcavüzkarlıq və
soyqırımı siyasətinin dünya ictimaiyyətinin
gözü qarşısında davam etməsi beynəlxalq əməkdaşlıq
siyasətinə ağır zərbələr vurmaqdadır.
Bu hadisələrə dünyanın mütərəqqi
qüvvələrinin biganə qalması, son nəticədə
beynəlxalq hüququn fəaliyyətsizliyi təəssüfləndirici
hal kimi qeyd olunur. Ulu öndər Heydər Əliyevin 1997-ci ildə
imzaladığı “1948-1953-cü illərdə azərbaycanlıların
Ermənistan SSR ərazisindəki tarixi-etnik torpaqlarından
kütləvi surətdə deportasiyası haqqında” fərmanında
azərbaycanlıların tarixi-etnik torpaqlarından ədalətsiz
deportasiya siyasətinə ilk dəfə dolğun
hüquqi-siyasi qiymət verilmişdir. Növbəti fərman
1998-ci ilin 26 martında olmuşdur - “Azərbaycanlıların
soyqırımı haqqında”. Burada da erməni millətçilərinin
əməllərinə hərtərəfli hüquqi-siyasi
qiymət öz əksini tapmışdır. Nəhayət,
“1918-ci il azərbaycanlıların soyqırımının
100 illiyi haqqında” 18 yanvar 2018-ci il tarixli Prezident İlham
Əliyevin imzaladığı sərəncamda isə qeyd
edilir ki, erməni millətçiləri tarixin müxtəlif
mərhələlərində mifik “Böyük Ermənistan”
ideyasını gerçəkləşdirmək məqsədilə
soydaşlarımıza qarşı etnik təmizləmə,
deportasiya və soyqırımıları həyata
keçirmişlər.
Bu gün Prezident İlham Əliyev tərəfindən
uğurla davam etdirilən xarici siyasət xətti və
atılan əməli addımlar təcavüzkar Ermənistanı
bir daha işğalçılıq hərəkətlərinə
son qoymağa, münaqişəni dinc yolla həll etməyə
dəvət edir.
Kitabda Birinci vitse-prezident, Heydər
Əliyev Fondunun prezidenti, UNESCO və ISESCO-nun xoşməramlı
səfiri Mehriban xanım Əliyevanın da sözlərinə
istinad edilmişdir: “Bizim heç bir başqa millətin,
başqa xalqın torpağında gözümüz yoxdur. Biz,
sadəcə, öz torpaqlarımızı işğaldan azad
etmək istəyirik. Bu həqiqəti bütün dünya
bilir və artıq qəbul etməlidir… Mən əminəm
ki, ədalət bərpa olunacaq. Azərbaycan torpaqları
işğaldan azad ediləcək, Azərbaycanın ərazi
bütövlüyü bərpa olunacaq”.
BMT Nizamnaməsinin 51-ci maddəsinə
uyğun olaraq Azərbaycanın özünümüdafiə
hüququnun mövcudluğuna baxmayaraq, dövlətimiz beynəlxalq
hüququn ümumtanınmış prinsip və normalarına
sadiqliyini bir daha göstərərək, daim sülhsevər və
müharibədən imtina siyasətini saxlayır, dünyada və
regionda sülh naminə bütün mümkün kompromis
variantları təklif edir. Ermənistan isə ikili standartlarla
pərdələnərək özünün
işğalçılıq və hələ də beynəlxalq
cinayətlər törətmək siyasətindən əl
çəkmir.
Kitabdakı təhlillər əsasən
xarici alimlərin əsərlərinə, ermənilərin
öz mənbələrinə, geniş beynəlxalq
müqavilələrə və beynəlxalq müqavilə
praktikasına əsaslanmışdır. Müəllif vətəndaşlıq
mövqeyindən çıxış edərək göstərir
ki, bu gün də cəmiyyətimiz tərəfindən Azərbaycan
həqiqətlərinin dünyaya
çatdırılmasında və ölkəmizə
qarşı həyata keçirilən ədalətsiz siyasətə
son qoymağa nail olmaqda genişmiqyaslı fəaliyyət tələb
edilir. Professor Əmir Əliyev yazır: “Odur ki, bir
hüquqşünas alim olaraq bizlər də bu məsələyə
biganə qala bilmərik. Məhz bu baxımdan tədqiqatın
nəticələrini müxtəlif dillərdə çap
etdirərək problemin hüquqi təhlilini verib əsl həqiqətləri
dünya ictimaiyyətinə çatdırmağa
çalışmışam, bununla da onları bu məsələdə
ədaləti qorumağa və beynəlxalq hüququn bərqərar
olması istiqamətində fəaliyyət göstərməyə
dəvət edirik”.
Birinci fəsil “Ermənistan-Azərbaycan
münaqişəsi beynəlxalq hüququn prinsipləri
kontekstində” adlanır və burada Ermənistan tərəfindən
ciddi pozuntulara məruz qalmış bütün prinsiplər
ayrı-ayrılıqda geniş təhlil və izah olunur.
Əsas prinsiplər BMT Nizamnaməsində təsbit
olunmuşdur və əksər hallarda BMT Nizamnaməsinin
prinsipləri adlanır. Onların məzmunu və sistemi isə
BMT Baş Assambleyasının 1970-ci il tarixli “BMT Nizamnaməsinə
uyğun olaraq dövlətlər arasında dostluq münasibətlərinə
və əməkdaşlığa dair beynəlxalq hüququn
prinsipləri haqqında” Bəyannamədə müəyyən
edilmişdir. Həmin bəyannamədə beynəlxalq
hüququn 7 mühüm prinsipi əks olunmuşdur: güc tətbiq
etməmək və ya güc tətbiq etməklə hədələməmək
prinsipi; beynəlxalq mübahisələrin dinc yolla həll
edilməsi prinsipi; dövlətlərin suveren bərabərliyi
prinsipi; dövlətlərin daxili işlərinə
qarışmamaq prinsipi; dövlətlərin əməkdaşlığı
prinsipi; xalqların hüquq bərabərliyi və
özünümüəyyənetmə prinsipi; beynəlxalq
öhdəliklərin vicdanla yerinə yetirilməsi prinsipi.
1975-ci ildə Avropada Təhlükəsizlik və Əməkdaşlıq
Müşavirəsinin Helsinki Yekun Aktında isə beynəlxalq
hüququn 3 mühüm prinsipi də təsbit olunmuşdur:
dövlətlərin ərazi bütövlüyü, sərhədlərin
pozulmazlığı, insan hüquqları və əsas
azadlıqlarına hörmət prinsipləri.
Kitabda Ermənistan tərəfindən Azərbaycan
dövlətinə və xalqına qarşı törədilmiş
beynəlxalq cinayətlər ilk növbədə, həm də
beynəlxalq hüququn jus cogens normaları sayılan ümumi
prinsiplərin ciddi, kobud və sistematik pozuntusu hesab edildiyindən,
onların ətraflı təhlili vacib hesab edilmişdir.
Aparılan təhlillər onu göstərir ki, Ermənistan bu
gün beynəlxalq hüququn bütün 10 prinsipini kobud və
sistemli şəkildə pozur. Beləliklə də bu dövlət
özünün beynəlxalq müqavilə xarakterli öhdəliklərinə
heç bir halda əməl etmək istəmir.
İkinci fəsil təcavüz cinayətinə
həsr edilmişdir. Ermənistanın apardığı məqsədyönlü
təcavüz siyasəti nəticəsində (1990-1992-ci illərdə)
Azərbaycanın ayrılmaz tərkib hissəsi olan
Dağlıq Qarabağ bölgəsi (1991-ci ilədək Azərbaycanın
inzibati ərazi bölgüsünə əsasən -
Şuşa, Xocavənd, Əsgəran, Hadrut, Ağdərə
rayonları və Xankəndi daxil olmuşdur) işğal
edilmişdir.
Kitabda “təcavüz” cinayətinin beynəlxalq-hüquqi
tövsifi ilə bağlı məsələlərə
xüsusi diqqət yetirilmiş, BMT Baş Assambleyasının
1974-cü il tarixli “Təcavüzün tərifi haqqında”
3314 nömrəli Qətnaməsi və digər beynəlxalq sənədlər
ətraflı təhlil edilmişdir. Nəticələrə gəldikdə
isə bildirilmişdir ki, təcavüzlə bağlı BMT
Baş Məclisi tərəfindən qəbul edilmiş
1974-cü il qətnaməsinin bütün bəndləri Ermənistan
tərəfindən kobud və sistemli şəkildə
pozulmuş, hazırda da pozulmaqdadır. Digər tərəfdən,
Ermənistanın Dağlıq Qarabağdan başqa, orada tarixən
bir erməni belə yaşamayan Azərbaycanın 7 rayonunu
işğal etməklə bufer zona yaratmaq ideyasını beynəlxalq
hüquq heç vaxt qəbul edə bilməz.
Kitabda İnsan Hüquqları üzrə
Avropa Məhkəməsinin qərarlarının təhlili də
öz əksini tapmışdır. Üçüncü fəsil
ermənilərin törətdikləri soyqırımı
cinayətinə həsr edilmişdir. Qeyd edilir ki, erməni
cinayətkarları tərəfindən azərbaycanlılara
qarşı etnik təmizləmə və soyqırımı
siyasətinin həyata keçirilməsi zaman-zaman davam edərək
yüksələn xətt üzrə özünün
“inkişafı”na doğru irəliləmişdir. Bu zaman XX əsrdə
azərbaycanlılara qarşı ermənilərin etnik təmizləmə
siyasəti dörd mərhələ üzrə nəzərdən
keçirilir: 1905-1907-ci illəri əhatə edən birinci mərhələ;
1918-1920-ci illəri əhatə edən ikinci mərhələ;
1948-1953-cü illəri əhatə edən
üçüncü mərhələ; 1988-1993-cü illəri
əhatə edən, müasir dövr üçün azərbaycanlılara
qarşı soyqırımı, ərazi iddiaları və hərbi
təcavüz üçün geniş zəmin
yaratdığı dördüncü mərhələ.
Erməni daşnakları tərəfindən
təkcə 1918-ci ilin mart-aprel aylarında Bakıda və Azərbaycanın
digər regionlarında 50 minə yaxın insan xüsusi
işgəncələrlə qətlə yetirilmişdir. Ermənilərin
soyqırımı siyasəti təkcə azərbaycanlıların
məhv edilməsi ilə məhdudlaşmır, bu, digər
etnik və milli qrupların da qətlə yetirilməsinə gətirib
çıxarmışdır. Belə ki, Azərbaycan yəhudi
icmasının Azərbaycan Respublikasının Prezidentinə
ünvanladığı məktubdan da göründüyü
kimi, 1918-1919-cu illər ərzində törədilən Quba
soyqırımı zamanı 3000-ə qədər yəhudi
öldürülmüşdür.
Tədqiqat əsərində
Qaradağlı kəndində, Xocalıda və Ağdabanda
törədilən soyqırımı cinayətləri ətraflı
şəkildə qələmə alınmışdır.
Burada Xocalı soyqırımının törədilməsi
ilə bağlı niyyətin mövcudluğu və faktiki
konkret aktın törədilməsi tam sübuta
yetirilmişdir. Həmin dövrdə Ermənistanın
prezidenti olan Levon Ter-Petrosyan erməni ordusuna müraciətində
söyləmişdir: “Siz, ermənilər düşməni
öldürərkən ürəyi yumşaqlıq göstərməməlisiniz.
Dağlıq Qarabağda azərbaycanlı deyilənləri
qırıb qurtarana və orada öz sivilizasiyamızı bərqərar
edənə qədər sizin düşmənə
yazığınız gəlməməlidir”. Ermənistanın
keçmiş prezidenti Serj Sarkisyan isə ermənilərin həqiqi
simasını açaraq xarici jurnalistlə müsahibəsində
bildirmişdir: “Xocalıya qədər azərbaycanlılar elə
bilirdilər ki, bizimlə zarafat etmək olar, onlar fikirləşirdilər
ki, ermənilər mülki əhaliyə əl qaldırmaz.
Biz bu stereotipi dağıtdıq. Məhz bu baş verdi”. Bunlar
ermənilərin soyqırımı törətdiklərinə
dair etiraflarıdır. R.Köçəryanın prezidentliyi
dövründə onun xanımı Bella Köçəryan
Yerevan Qanköçürmə Mərkəzinin
açılışında XXI əsrdə müstəsna
olaraq erməni qanından ibarət ayrıca qan bankı mərkəzinin
açılması təklifini irəli sürərək
söyləmişdir ki, erməni qanında səciyyəvi
genetik faktorlar vardır və ermənilərə yalnız erməni
qanı köçürmək lazımdır. Sual yaranır:
dünyanın heç bir millətinin qanını qəbul
etməyən erməni millətçiləri nə
düşünür? Bu digər dünya xalqlarına
birbaşa hörmətsizlik deyilmi?
Ulu öndər Heydər Əliyevin təşəbbüsü
ilə qəbul edilən Milli Məclisin 24 fevral 1994-cü il
tarixli qərarına uyğun olaraq, erməni təcavüzkarları
tərəfindən törədilmiş Xocalı hadisələri
hər il fevralın 26-da “Xocalı soyqırımı
günü” kimi qeyd edilir. Bundan əlavə, ümummilli lider
Heydər Əliyevin 26 mart 1998-ci il tarixli “Azərbaycanlıların
soyqırımı haqqında” 690 nömrəli Fərmanı
isə tarixin ayrı-ayrı mərhələlərində
xalqımızın üzləşdiyi beynəlxalq cinayətlərin,
soyqırımı aktlarının istənilən aspektdən
araşdırılması, “Azərbaycan xalqına
qarşı törədilmiş bütün
soyqırımı faciələrini qeyd etmək” istiqamətində
mühüm addım hesab olunmalıdır. Həmin sənədə
uyğun olaraq hər il 31 mart Azərbaycanlıların
Soyqırımı Günü kimi qeyd edilir.
Quba şəhərində
“Soyqırımı memorial kompleksi”nin yaradılması
haqqında Prezident İlham Əliyevin 30 dekabr 2009-cu il tarixli Sərəncamında
isə qeyd edilir ki, Quba şəhərindəki kütləvi
məzarlıqda soyqırımı nəticəsində hədsiz
amansızlıq və xüsusi qəddarlıqla
öldürülən azərbaycanlılarla yanaşı, ləzgilərin,
yəhudilərin, tatların və digər milli azlıqlara mənsub
olan minlərlə insanların zorakılığa məruz
qaldığı aşkar edilmişdir. Sərəncamla erməni
millətçilərinin cinayətkar əməllərinin
dünya ictimaiyyətinə çatdırılması, Azərbaycan
xalqının gələcək nəsillərinin milli
yaddaşının qorunması və soyqırımı
qurbanlarının xatirəsinin əbədiləşdirilməsi
məqsədi ilə Azərbaycanın Quba şəhərində
“Soyqırımı memorial kompleksi”nin yaradılması qərara
alınmışdır.
Kitabın növbəti fəsli Azərbaycana
qarşı Ermənistan tərəfindən törədilən
müharibə cinayətlərinə həsr edilmişdir.
Burada söhbət müharibə qurbanlarının beynəlxalq
hüquqi müdafiəsinə dair 1949-cu il Cenevrə
Konvensiyalarının ciddi pozuntusundan gedir. Həmin hissədə
Azərbaycan ərazilərinin işğalı nəticəsində
ətraf mühitə vurulan ciddi ziyan əks olunmuşdur.
Digər bir məsələ: nə qədər
insan girov, əsir götürülüb və itkin
düşüb! Bu insanlar üzərində qanunsuz məhkəmələr
qurulub! Bunlar özü 1949-cu il Cenevrə
Konvensiyalarının ciddi şəkildə pozulması deməkdir
və müharibə cinayətləridir. Azərbaycan
Respublikası Əsir və itkin düşmüş, girov
götürülmüş vətəndaşlarla əlaqədar
Dövlət Komissiyasının 1 fevral 2018-ci ilə olan rəsmi
məlumatına görə qeydiyyatdan keçən itkin
düşmüş şəxslərin sayı 3875 nəfərdir
ki, onlardan 3165 nəfəri hərbçi, 710 nəfəri isə
mülki şəxsdir. İtkin düşmüş şəxslərdən
67 nəfərini uşaqlar (23 nəfər qız, 44 nəfər
oğlan), 265 nəfərini qadınlar, 326 (o cümlədən
166 qadın) nəfərini isə qocalar təşkil edir.
Bununla yanaşı, 871 nəfərin əsir-girov
götürülməsi barədə məlumat mövcuddur
ki, onlardan 602 nəfərini hərbçi, 269 nəfərini
mülki şəxs təşkil edir. Həmin şəxslərin
29 nəfəri uşaqlar (7 nəfər qız, 22 nəfər
oğlan), 98 nəfəri qadınlar, 113 nəfəri (o
cümlədən 64 nəfər qadın) isə qocalardan ibarətdir
Ən mühüm beynəlxalq cinayətlərdən
biri başqa dövlətlərin vətəndaşlarının
- ermənilərin qanunsuz olaraq Qarabağa və ətraf 7
rayona köçürülməsidir. Erməni mənbələrində
bunlar açıq etiraf edilir. Halbuki bunlar ağır
müharibə cinayətləridir. Bu faktlardan bəziləri kitabda
əks olunmuşdur. Azərbaycan Respublikasının Əsir və
itkin düşmüş, girov götürülmüş vətəndaşlarla
əlaqədar Dövlət Komissiyasının 2015-ci il məlumatlarına
görə, Azərbaycanın işğal olunmuş
Dağlıq Qarabağ bölgəsinə 8500, Laçına
13000, Kəlbəcərə 700, Zəngilana 520, Cəbrayıla
280 nəfər olmaqla, cəmi 23000 nəfər şəxs
qeyri-qanuni olaraq məskunlaşma üçün
köçürülmüşdür.
Növbəti beşinci fəsil Ermənistanın
Azərbaycana qarşı törətdiyi insanlıq əleyhinə
cinayətlərdir. Bunlar insanların kütləvi
öldürülməsi, işgəncələr, deportasiyalar
və digər vəhşiliklərdir. Kitabda tam olaraq belə
bir nəticəyə gəlinir ki, azərbaycanlılara
qarşı törədilən insanlıq əleyhinə cinayətlərin
bünövrəsində soydaşlarımızın milli və
etnik əsaslarla təqibi dayanmışdır. Məhz bu təqiblər
insanlıq əleyhinə cinayətlərin törədilməsi
üçün “ideoloji baza” rolunu oynamışdır.
Növbəti altıncı fəsil ermənilərin
ən çox istifadə etdiyi terror cinayətləridir. Ermənilərin
terror cinayətləri 3 qrupa bölünür. Kitabda Ermənistanın
azərbaycanlılara və Azərbaycana qarşı
terrorçuluq hərəkətləri beynəlxalq hüququn
prinsiplərinin pozulması, törədilmiş beynəlxalq
cinayətlərlə qarşılıqlı əlaqədə
olan ictimai-təhlükəli əməl və sadəcə
terrorçuluq kimi nəzərdən keçirilir.
Bütövlükdə
götürdükdə, hədəfləri və zərərçəkən
qurbanlarının tərkibinin müxtəlifliyi
baxımından Ermənistanın dövlət səviyyəsində
terror siyasətini və erməni terror təşkilatlarının
fəaliyyətini üç aspektdən qiymətləndirmək
olar. Bunlardan birincisi erməni terror təşkilatlarının
qlobal miqyasda dünya dövlətlərinin hər hansı
birində müxtəlif terror aktları törətməsi ilə
bağlıdır. Erməni terrorunun hədəfinin ikinci
istiqaməti isə Türkiyə Cümhuriyyəti və
türklər hesab olunur ki, burada qurban qismində türk
diplomatlarını xüsusilə qeyd etmək lazımdır.
Ermənistanın dövlət səviyyəsində terror
siyasəti və erməni terror təşkilatlarının fəaliyyətinin
üçüncü aspekti və ən başlıcası
azərbaycanlılara və Azərbaycana qarşı yönəlmiş
cinayətkar fəaliyyətdir.
Kitab bu sözlərlə bitir:
“Ümidvarıq ki, qeyd edilən məsələlərin həlli
beynəlxalq ədalətin bərpasına, beynəlxalq
hüquq normalarına olan ümidlərin artmasına, beynəlxalq
səviyyədə cəzasızlıq mühitinin aradan
qaldırılmasına, nəhayət, cinayət
qurbanlarının pozulmuş hüquqlarının bərpasına
gətirib çıxaracaqdır”.
İradə
ƏLİYEVA
Azərbaycan.-
2018.- 6 iyul.- S.4; 6.