Strateji yol xəritələri
milli inkişafa yeni təkan verir
Aparılan
monitorinq və qiymətləndirmələr ötən il üçün nəzərdə tutulan
proqramların əksəriyyətinin uğurla icra
olunduğunu təsdiqləyir
Azərbaycanın 2016-2020-ci
illər üçün iqtisadi inkişaf strategiyası tədbirlər
planının, 2025-ci ilədək olan dövr
üçün uzunmüddətli baxışı və
2025-ci ildən sonrakı dövr üçün hədəflərini
müəyyənləşdirən strateji yol xəritələrinin
icrası uğurla davam etdirilir. Aidiyyəti qurumlar
qarşısında qoyulan tapşırıqların icrası
nəticəsində artıq ölkə iqtisadiyyatının
rəqabətqabiliyyətliliyi artıb, ixracyönümlü
qeyri-neft iqtisadiyyatının əsaslı inkişafı təmin
edilib, insan kapitalından səmərəli istifadə etmək
kimi prioritetlər ön plana çəkilib.
Davamlı iqtisadi
inkişafın təmini
Öncə onu vurğulayaq
ki, milli iqtisadiyyat və iqtisadiyyatın əsas sektorları
üzrə strateji yol xəritələri Azərbaycanda
davamlı iqtisadi inkişaf əsasında iqtisadiyyatın rəqabətqabiliyyətliliyini,
inklüzivliyini və sosial rifahın daha da
artırılmasını təmin edəcək sənəddir. Bu sənədə
əsasən qlobal çağırışlara cavab verərək
investisiyaların cəlbi, azad rəqabət mühiti, bazarlara
çıxış və insan kapitalının
inkişafı nəticəsində Azərbaycanın dünya
iqtisadiyyatında mövqeyini gücləndirəcək və
ölkəmiz yüksək gəlirli ölkələr qrupuna
daxil olacaq.
Yol xəritələri təkcə
inkişaf məqsədləri və prinsiplərini deyil, həm
də hər bir istiqamət üzrə qlobal meyilləri,
iqtisadiyyatın 360 dərəcəli diaqnostikasını, görüləcək
tədbirləri, tələb olunan investisiya və nəticə
indikatorlarını əhatə edir.
Yol xəritəsi
üzrə ümumi icra səviyyəsi müsbətdir
Bu günlərdə milli iqtisadiyyat və
iqtisadiyyatın əsas sektorları üzrə strateji yol xəritələrinin
2017-ci il üzrə nəzərdə
tutulan hissəsinin monitorinq və qiymətləndirmə nəticələri
açıqlanıb.
Bütün strateji yol xəritələri
üzrə icra səviyyəsi bir daha onu göstərir ki,
Prezident İlham Əliyevin rəhbərliyi ilə aparılan
iqtisadi islahatlar kursu 2017-ci ildə də uğurla davam edib. 2017-ci ilin sabitləşdirmə
və 2018-ci ilin isə iqtisadi inkişaf ili
olmasında Prezidentin rəhbərliyi ilə həyata
keçirilən strateji yol xəritələrinin xüsusi
rolu olub.
Bu xəritə üzrə nəzərdə
tutulan işlərin ümumi səviyyəsi 92 faiz icra olunub. Milli iqtisadiyyat perspektivi
üzrə Strateji Yol Xəritəsinin 2017-ci il üzrə nəzərdə
tutulan hissəsinin 86 faizinin icrası tamamlanıb, 12 faizi qismən
icra edilib və 2 faizi isə icra edilməyib.
40-a yaxın
müəssisə və obyektin özəlləşdirilməsi
barədə qərar qəbul edilib
2017-ci il ərzində
milli iqtisadiyyat perspektivi üzrə Strateji Yol Xəritəsinin
hədəflərindən biri olan özəlləşdirmə
və dövlət mülkiyyətində olan müəssisələrlə
bağlı islahatların həyata keçirilməsi üzrə
icra səviyyəsi belədir - 71 faiz tam icra, 29 faiz qismən
icra.
Dövlət mülkiyyətçiliyinə
əsaslanan tələbatı müəyyən edən
meyarlar nəzərə alınmaqla “Ortamüddətli dövr
ərzində dövlət mülkiyyətində
saxlanılacaq dövlət müəssisələrinin
siyahısı” yenilənib. Dövlət əmlakının
özəlləşdirilməsi prosesi sürətləndirilərək
40-a yaxın müəssisə və obyektin özəlləşdirilməsi
barədə qərar qəbul edilib və onlardan 13-ü
artıq özəlləşdirilib.
Özəlləşdirilməyə
açıq elan edilən müəssisə və obyektlərə
dair vahid məlumat bazası, “Özəlləşdirmə
Portalı” və 2018-ci il üzrə
“Özəlləşdirmə Gündəliyi”
hazırlanıb. Nüfuzlu beynəlxalq məsləhətçi
şirkətlər cəlb etməklə, əsasən
prioritet sektorları əhatə edən müəssisələrin
qiymətləndirilməsi aparılıb və potensial
inkişaf istiqamətləri təhlil edilib. Yeni yanaşma hesab olunacaq daha bir məqam ondan ibarətdir
ki, bundan sonra özəlləşdirilən istehsal təyinatlı
müəssisələr əsasən investisiya müsabiqələri
vasitəsilə özəlləşdiriləcək və bu
zaman potensial alıcılardan investisiya proqramının
(biznes-planın) icrası tələb olunacaq.
İnsan
kapitalının inkişafı maksimum icra olunub
Milli iqtisadiyyat perspektivi
üzrə Strateji Yol Xəritəsində hədəflərdən
biri insan kapitalının inkişaf etdirilməsidir. Bu istiqamət
üzrə icra səviyyəsi 100 faiz olub. Ötən
ildə “Məktəbəqədər təhsil haqqında” və
“İşsizlikdən sığorta haqqında” qanunlar qəbul
olunub, “Ümumi təhsildə keyfiyyət ili” elan edilib, müəllimlərin
diaqnostik qiymətləndirilməsi davam etdirilib, “Ümumi təhsil
müəssisələrinə direktor vəzifəsinə
işə qəbul Qaydaları” təsdiq edilib və təşkil
olunan müsabiqə nəticəsində 198 nəfər
direktor vəzifəsinə qəbul edilib.
Habelə “Peşə təhsili
haqqında” qanun layihəsi işlənib hazırlanıb, “Ali
təhsil müəssisələrinə tədqiqat universiteti
statusunun verilməsinə dair Tələblər” təsdiq
edilib və “Təhsildə inkişaf və innovasiyalar üzrə
qrant müsabiqəsi” keçirilib. Ölkədə
innovasiya fəaliyyətinə investisiya qoyuluşunun təşviq
edilməsi istiqamətində beynəlxalq təcrübə
öyrənilməklə, Azərbaycanın milli innovasiya
sisteminin formalaşması və inkişafına dair
proqramın layihəsi hazırlanıb.
Əlverişli
biznes mühitinin inkişaf etdirilməsi - 94 faiz
Milli iqtisadiyyat perspektivi
üzrə strateji yol xəritəsində dördüncü
hədəf olan əlverişli biznes mühitinin inkişaf
etdirilməsi üzrə 2017-ci ildə nəzərdə
tutulan hissənin 94 faizinin icrası tamamlanıb, 6 faizi qismən
icra edilib.
Ölkədə biznes
mühitinin əlverişliliyinin artırılması və
beynəlxalq reytinqlərdə ölkəmizin mövqeyinin daha
da yaxşılaşdırılması ilə bağlı
komissiya çərçivəsində Rəqabət Məcəlləsinin
yeni layihəsi hazırlanıb.
“Azərbaycan
Respublikasında biznes mühitinin əlverişliliyinin
artırılması və beynəlxalq reytinqlərdə
ölkəmizin mövqeyinin daha da
yaxşılaşdırılması ilə bağlı əlavə
tədbirlər haqqında” dövlət
başçısının sərəncamının həyata
keçirilməsinə dair Tədbirlər Planı təsdiq
edilib. Bu Tədbirlər
Planı çərçivəsində beş
mötəbər beynəlxalq hesabat üzrə 18 istiqamətdə
biznes mühitinin əlverişliliyinin artırılması
üçün fəaliyyətlər həyata keçirilir.
2017-ci ildə səmərəli
vergi sisteminin təşviq edilməsi istiqamətində
araşdırmalar aparılıb. Dövlət xidmətlərinin
çevikliyi və səmərəliliyinin
artırılması məqsədilə “Dövlət xidmətlərinin
təşkilində DATA analizi”, “Açıq hökumət məlumatlarından
istifadə edilməsi” və “Elektron hökumət həlləri”
kimi araşdırmalar aparılıb. Bu zaman bir
sıra ölkənin təcrübəsi öyrənilib.
Bununla yanaşı, azad ticarət
sazişlərinin bağlanması məqsədilə bir
sıra ölkənin təcrübəsi öyrənilib, həmin
ölkələrin bağladığı analoji sazişlər
və onların ticarətə qarşılıqlı təsiri
ətraflı təhlil edilib. 31 oktyabr 2017-ci il
tarixində Bakı şəhərində “Azərbaycan
Respublikası Hökuməti ilə Türkiyə
Respublikası Hökuməti arasında preferensial ticarət
sazişinin imzalanmasına dair Anlaşma Memorandumu”
imzalanıb. Texniki tənzimləmə və
milli standartlaşdırma sisteminin beynəlxalq tələblərə
uyğun formalaşdırılması məqsədilə
müvafiq qanun layihələri hazırlanıb.
Ağır sənaye
və maşınqayırmanın uğurlu inkişafı
Ağır sənaye və
maşınqayırmanın inkişafına dair Strateji Yol Xəritəsinin
2017-ci il üzrə icrasına dair
monitorinq və qiymətləndirmənin nəticələri də
ürəkaçandır. Öncə onu
vurğulayaq ki, bu strateji yol xəritəsi üzrə icra səviyyəsi
bir daha ölkədə Prezident İlham Əliyevin rəhbərliyilə
aparılan sənayeləşmə siyasətinin uğurla
davam etdiyini təsdiqləyir. Elə bu ilin 6 ayında
qeyri-neft sənayesinin 8,8 faiz artımı
bunun əyani sübutudur.
Adıçəkilən xəritə
üzrə ümumi icra səviyyəsi 68 faizdir. Onu da vurğulayaq ki,
ağır sənaye və maşınqayırmanın
inkişafına dair Strateji Yol Xəritəsinin 2017-ci il
üzrə nəzərdə tutulan hissəsinin 44 faizinin
icrası tamamlanıb, 47 faizi qismən icra edilib və 9 faizi
isə icra edilməyib.
Bu strateji yol xəritəsinin hədəfləri
olan mövcud aktivlərin optimallaşdırılması (tam
icra 52 faiz, qismən icra 48 faiz səviyyəsində təmin
olunub), rəqabətədavamlı sektorun yaradılması (36
faiz tam icra, 44 faiz qismən icra və 20 faiz icra edilməyib),
maliyyə dəstəyinin təmin edilməsi və beynəlxalq
əməkdaşlığın həyata keçirilməsi
(tam icra 45 faiz, qismən icra 50 faiz olub, cəmi 5 faiz tədbir
icra edilməyib) üzrə icra səviyyəsi göz
önündədir.
Milli brendlərin
yaradılması
Daxili istehsal imkanları və
regional tələbat nəzərə alınmaqla ölkəmizdə
həm istehsal potensialı, həm də regional idxal tələbatı
yüksək olan məhsullar üzrə region ölkələrinin
bazarları əsas ticarət göstəricilərindən
istifadə edilməklə araşdırılaraq bir sıra təhlillər
aparılıb, region ölkələrinin bazarlarında idxal tələbatı
yüksək olan məhsullar müəyyən edilib. Bundan əlavə,
müvafiq məhsulların ölkə daxilində istehsal
potensialını və ixrac imkanlarını daha yaxşı
müəyyən etmək üçün rəqabətqabiliyyətli
məhsullar üzrə müəyyən araşdırmalar
aparılıb.
Sənaye müəssisələrinin
fəaliyyətinin səmərəliliyinin qiymətləndirilməsi
və korporativ idarəetmə səviyyələrinin
artırılması ilə bağlı bir sıra normativ
hüquqi aktların layihələri və sənaye müəssisələrində
müasir idarəetmə sisteminin qurulması
qaydalarının ilkin layihəsi hazırlanıb. Milli brendlərin
yaradılması sahəsində həyata keçirilmiş
araşdırmalar nəticəsində brend indeksinin
yaradılmasına dair konseptual təklif hazırlanıb.
Bundan əlavə, “Made in Azerbaijan” brendinin
inkişafına və milli brendlərin
yaradılmasının təşviq edilməsinə həsr
olunmuş birinci Marketinq Sammiti keçirilib.
Əksər
istiqamətlər üzrə proqramlar uğurla icra olunub
Prezident İlham Əliyev tərəfindən
uğurla aparılan davamlı islahatlar nəticəsində Azərbaycan
dünya iqtisadiyyatında yeni çağırışlara
cavab verir. Yeni iqtisadi çağırışlar fonunda
postsovet məkanında ölkəmizdə ilk belə sənəd
olan strateji yol xəritələri isə iqtisadiyyatın
dayanıqlı inkişafına xidmət edir.
Çox ciddi təhlillər
üzərində qurulan sənəd hazırlanarkən Azərbaycanda
mövcud iqtisadi vəziyyət, həm də qlobal və
regional trendlər nəzərə alınıb. Yol xəritələrinin
ötən il üçün icra vəziyyətinin
qiymətləndirilməsi və monitorinqləri bir daha təsdiq
edir ki, bir-iki istiqamət istisna olunmaqla əksər istiqamətlər
üzrə proqramlar, layihələr uğurla icra olunub.
Digər yol xəritələrinin
icra vəziyyəti belədir: maliyyə xidmətləri 87
faiz, kiçik və orta sahibkarlıq səviyyəsində
istehlak mallarının istehsalı 79 faiz, uyğun qiymətə
mənzil təminatı 76 faiz, logistika və ticarət 73 faiz,
peşə təhsili və təlimi 72 faiz, kommunal xidmətlər
(elektrik və istilik enerjisi, su və qaz) 68 faiz, telekommunikasiya
və informasiya texnologiyaları 61 faiz, kənd təsərrüfatı
məhsullarının istehsalı və emalı 46 faiz,
ixtisaslaşmış turizm sənayesi 36 faiz icra olunub.
Ən
aşağı göstərici - ixtisaslaşmış turizm
sənayesi
Göründüyü kimi,
monitorinq və qiymətləndirmələr zamanı ən
aşağı göstərici - 36 faizlə
İxtisaslaşmış turizm sənayesinin inkişafına
dair Strateji Yol Xəritəsi üzrə qeydə
alınıb.
Təhlükəsizlik, sabitlik, qonaqpərvərlik,
gözəl iqlim, tarixi abidələrə, infrastruktura sahib
olan respublikamızda bu sahənin inkişafı ilə
bağlı 2017-ci il üçün
müəyyən edilən layihələrin icrasının cəmi
36 faiz yerinə yetirilməsi təbii ki, ürəkaçan
deyil.
Prezident İlham Əliyev
Nazirlər Kabinetinin ötən ilin birinci rübünün
yekunlarına və qarşıda duran vəzifələrə
həsr olunan iclasında bu sahədə böyük
pozuntuların olduğunu demişdi. Bunun ilk növbədə aeroportlarda
turistlər üçün yaradılan əngəllərdən
başladığını söyləyən dövlət
başçısı ciddi xəbərdarlıq da etmişdi:
“Aeroportlarda gələn turistlərə əziyyət verirdilər,
əsassız pul tələb edirdilər. Bu
biabırçılığı
yığışdırmışıq. Bu biabırçılığı, bu
pozuntuları, bu cinayəti törədənlər də cinayət
məsuliyyətinə cəlb olunub. Hamı
bilsin ki, bu cinayətlər cəzasız qalmayacaq. Bəzi hallarda gələnləri incidirlər, yolda
saxlayırlar, onlardan əsassız rüşvət, pul tələb
edirlər, dilənçilik edirlər, keçidlərdə
duran o adamlar xalqımızı, dövlətimizi biabır
edirlər. Mən aidiyyəti qurumlara
çox ciddi xəbərdarlıq etdim, onları tənbeh
etdim. Bu pozuntular
yığışdırılmalıdır. Ölkəmizin imicinə xələl gətirən
adamlar cəzalandırılacaqlar. Sərhəd-keçid
məntəqələri elə olmalıdır ki, xaricdən
gələn qonaq orada əziyyət çəkməsin”.
Dövlət başçısı
vurğuladı ki, əgər bu sahədə və hər
hansı bir başqa sahədə bu pozuntular olarsa və
ümumiyyətlə, rüşvətxorluqla bağlı əgər
bundan sonra bu özbaşınalıq davam edərsə,
çox ciddi tədbirlər görüləcək, heç
bir keçmiş xidmət nəzərə alınmadan
bütün məsul şəxslər cəzalandırılacaqlar.
Bu tənqiddən sonra bu sahədə ciddi dönüş yarandı. İxtisaslaşmış turizm sənayesinin inkişafı istiqamətində mühüm addımlar atıldı. Təkcə bir fakta nəzər yetirsək görərik ki, son altı ayda Azərbaycana dünyanın 189 ölkəsindən 1,3 milyon nəfərdən çox xarici turist gəlib. Bu da onu təsdiq edir ki, ölkəmizə gələnlər üçün yaradılan şərait get-gedə daha da yaxşılaşdırılır. Yəqin ki, bu istiqamət üzrə əldə olunan uğurlu göstəricilər adıçəkilən sənəd üzrə layihələrin 2018-ci il üçün icra vəziyyətinin monitorinq və qiymətləndirilməsində öz əksini tapacaq.
Monitorinqlər şəffaflıq və
hesabatlılıq meyarına uyğundur
Bu gün Azərbaycanda
tamamilə yeni strategiya formalaşdırılır. Ölkə
Prezidenti tərəfindən iqtisadi artımın alternativ mənbələri
formalaşdırılıb. Bunlar qeyri-neft
sənayesi, kənd təsərrüfatı və valyuta gətirən
xidmətlərdir. Əsas məqsəd Azərbaycanın
uzun müddət dayanıqlı inkişafını təmin
etmək, qeyri-neft sektorunun daha da inkişafı və bu sahənin
ölkədə prioritet sahə təşkil etməsidir.
Məhz bu baxımdan dövlət
başçısı tərəfindən təsdiq edilən
strategiyada 11 istiqamətin müəyyənləşməsi
çox önəmli və mühüm hadisələrdən
biridir.
Strateji yol xəritələrinin
monitorinq və qiymətləndirmə nəticələrinin
ictimaiyyətə təqdim edilməsi açıq hökumət,
yaxşı idarəetmə, şəffaflıq və
hesabatlılıq meyarlarına uyğundur. Bu xəritələrin
uğurlu icrası makroiqtisadi sabitlik, qeyri-neft sektorunun və
ixracının artımı, əlverişli biznes mühiti və
sərmayə cəlbi, infrastrukturun davamlı təkmilləşdirilməsi,
əhalinin sosial rifahı, habelə ölkəmizin beynəlxalq
mövqelərinin güclənməsi işlərinə xidmət
edir.
Rəşad BAXŞƏLİYEV
Azərbaycan.-
2018.-25 iyul.- S.1; 3.