“İlham Əliyev öz ordusu ilə əslində, Yerevana doğru irəliləyir”

Azərbaycanın son hərbi qələbələri Ermənistanda böyük xof yaradıb

Müzəffər Azərbaycan Ordusunun 26 ildir işğal altında olan Şərur rayonunun Günnüt kəndinə nəzarəti tam əlinə alması və bir sıra yüksəklikləri azad etməsi hələ də Ermənistanı çalxalamaqdadır. Düşmən bununla anlayır ki, Azərbaycan ərazisinin işğal faktı ilə heç vaxt barışmayacaq.

Qarşı tərəf onu da aydın sezir ki, gec-tez ölkəmiz düşmənin işğalçılıq siyasətinə son qoyacaq. Günnüt zəfəri bunun növbəti real təsdiqidir. Digər tərəfdən, Azərbaycan Ordusunun Naxçıvan istiqamətində 11 min hektar ərazini düşmən işğalından azad etməsi Ermənistanda hakimiyyətə yeni gələn və Dağlıq Qarabağ münaqişəsi ilə bağlı hədyanlar danışan Nikol Paşinyana Silahlı Qüvvələrimizin, şəxsən Ali Baş Komandan İlham Əliyevin vurduğu sərt sillədir.

Bununla ona başa salınır ki, özünü düzgün aparmasa, danışıqlarda konstruktiv olmasa, onda başıqapazlı olacaq, sələfi Serj Sarkisyan kimi cəbhədə məğlubiyyətlərə məruz qalacaq. Paşinyanın bu sillədən, Günnüt mesajından hansı dərs çıxaracağını qarşıdakı günlər ərzində görə biləcəyik. İndi isə onun başı sələfinin tərəfdarlarına qarşı təzyiqlərə qarışıb.

N.Paşinyan “repressiya maşını”nı işə salıb

Ermənistanda uzun müddət hakimiyyətdə olan Serj Sarkisyanın və ətrafının əlində böyük miqdarda varidat toplanması heç kimə sirr deyil. Amma işğalçı ölkədə məlum hakimiyyət dəyişikliyindən sonra bu varidatın əldə saxlanılması ciddi problemə çevrilib. Xüsusən də Sarkisyan tərəfdarlarına qarşı hakimiyyətin başladığı repressiv siyasət vəziyyəti daha da qəlizləşdirir. Sarkisyan tərəfdarları ya varidatlarını itirməklə barışmalı, ya da mövcudluqlarını qorumaq üçün vuruşmalıdırlar. Hadisələrin gedişi göstərir ki, onlar ikinci yola baş vurmağa hazırlaşırlar. Buna əsas səbəb hakimiyyətin təzyiq siyasətini daha da artırmasıdır.

Son məlumatlara görə, Serj Sarkisyanın başçılıq etdiyi partiyanın daha bir üzvü həbs edilib. Keçmiş deputat Arakel Movsisyan Milli Təhlükəsizlik Xidməti (MTX) tərəfindən həbs olunub. “Şmays” ləqəbi ilə məşhur olan Arakel Movsisyan MTX-nin təcridxanasına yerləşdirilib. Movsisyanın evində axtarış zamanı silah-sursat aşkar edilib. Arakel Movsisyan Manvel Qriqoryanın yaxın adamlarından biri olub. Movsisyanın parlamentdə deputat seçilməsinə məhz Qriqoryan şərait yaradıb.

Qriqoryanın keçmiş döyüş yoldaşı olan Movsisyan sonralar Ermənistan hökumətinin əmri ilə müxtəlif cinayətlərin təşkilində iştirak edib. Bəzi mənbələr onun Ermənistan parlamentində 1999-cu ildə təşkil edilən teraktın dolayısı iştirakçısı olduğunu da bildiriblər. Belə ki, Movsisyanın qardaşı Muşeq Movsisyan o zaman parlamentdə deputat idi. İddiaya görə, məhz o, terrorçuların parlamentə girişinə şərait yaradanlardan biri olub.

Arakel Movsisyan Serj Sarkisyana son xidmətini Yerevandakı etiraz aksiyaları zamanı göstərib. Onun adamları etirazçılar arasına daxil olaraq onları qarşıdurmaya çəkməyə cəhd edib və polislə etirazçıların toqquşmalarına şərait yaradıblar. Movsisyanın Ayqek kəndindəki villasında axtarış aparan MTX əməkdaşları isə sonda onu baş idarəyə aparıblar. MTX əməkdaşları iki saat ərzində keçmiş deputatın evində silah axtarıblar.

Sarkisyanın qudası da istintaqa cəlb edilib

Serj Sarkisyanın qudası Ara Minasyanın sahibi olduğu Yerevandakı “İşıqlandırıcı Qriqori” tibb mərkəzində ölkənin Səhiyyə Nazirliyi tərəfindən yoxlamalar aparılır. Bildirilir ki, yoxlamalar iki ay davam edəcək, lakin artıq ilk mərhələdə pozuntular aşkar olunub. Hələlik bu pozuntuların nədən ibarət olması barədə məlumat verilmir. Əldə olunan informasiya hüquq mühafizə orqanlarına təqdim ediləcək.

Digər tərəfdən, Ermənistan İstintaq Komitəsi Serj Sarkisyanın mühafizəsinin rəhbəri Vaçaqan Kazaryana məxsus olan, Yerevanın mərkəzində yerləşən “Yans” restoran kompleksində aparılmış yoxlamalar barədə məlumat verib. Burada hesabatlarda qeydə alınmamış 1 milyon 441 min dollar həcmində pul aşkarlanıb. Restoranlar kompleksində külli miqdarda maliyyə fırıldaqçılığı və mənimsəmə faktları aşkarlanıb.

İstintaq Komitəsinin mətbuat xidməti bildirib ki, kompleksin mühasibi 2012-ci ilin oktyabrından 2017-ci ilin mayınadək sifarişlər və maliyyə vəsaitləri ilə bağlı məlumatları saxtalaşdıraraq fərdi şəkildə, yaxud da menecerin köməyi ilə 25 milyon dram pul mənimsəyib.

Yerevan meri həbs edilib

Açılan cinayət işi çərçivəsində Sarkisyanın yaxınlarına məxsus “Selena” şirkətinin direktoru Samvel Karapetyanın və şirkətin faktiki sahibi Ruben Beqlaryanın evlərində də axtarış həyata keçirilib. Nəticədə 2 ədəd odlu silah və 1 milyon dollardan çox pul aşkarlanıb.

Bundan əlavə, Ermənistan polisinin Mütəşəkkil Cinayətkarlıqla Mübarizə Baş İdarəsinin Korrupsiya və İqtisadi Cinayətkarlıqla Mübarizə İdarəsi Yerevan meri Taron Markaryana qarşı cinayət işinin başladılması üçün ölkənin Baş Prokurorluğuna müraciət edib. Mətbuat Baş Prokurorluğun artıq Markaryana qarşı cinayət işi başladığını bildirib. Onun böyük məbləğdə pul vəsaitinin mənimsənilməsində, eyni həcmdə vergidən yayınmaqda, dövlət sənədlərinin saxtalaşdırılmasında ittiham olunduğu vurğulanıb.

“General rütbəsi hansısa xidmətlərə görə hədiyyəyə çevrilib”

Serj Sarkisyanın hərbi sahədə tərəfdarlarına qarşı da müəyyən addımların atılması üçün işlər görülür. Ermənistan Milli Təhlükəsizlik Xidmətinin sərhəd qoşunlarının keçmiş komandanı, general-mayor Levon Stepanyanın bu xüsusda açıqlamaları xüsusilə diqqət çəkir. O bildirir ki, artıq Ermənistanda generalların sayına və rütbələrin təqdim edilməsi meyarlarına yenidən baxılmalıdır. Onun sözlərinə görə, Ermənistanda general rütbəsi lap əvvəldən ləkələnib: “Yalnız hərbi təlim üçün 8-10 il vaxt tələb olunur, hələ mən orduda xidməti demirəm. Hərbçi hərbi məktəbdən ali rəhbərliyə qədər yol keçməlidir. Bu proses ən azı 18 ilə yaxın vaxt aparır”.

Onun sözlərinə görə, bu rütbə Ermənistanda hansısa xidmətlərə görə hədiyyəyə çevrilib. Bu məsələdə hərbi kadrlarla səhra komandirləri arasında həmişə mübahisələr olub. Stepanyan bildirir ki, bir neçə generalın rütbəni siyasi oyunlara görə aldığı sirr deyil: “Məsələn, seçkiləri saxtalaşdırdıqlarına, səs gətirdiklərinə görə. Bu, sirr deyil”.

Azərbaycanın son hərbi zəfərlərinin Ermənistanda böyük xof yaratdığını qeyd edən Stepanyan xatırladıb ki, Qarabağın “müdafiə ordusu”nun keçmiş komandanı Samvel Babayanın belə generalları kolxoz sədrlərinə bənzətməsi yanlış fikirdir. Onun sözlərinə görə, kolxoz sədrləri barədə daha yaxşı fikirdədir: “İlham Əliyev öz ordusu ilə əslində, Yerevana doğru irəliləyir. Ancaq Ermənistanda general tanıyıram ki, rütbəni şöhrətpərəstlik üzündən alıb, eləsi də var ki, heç hərbi salam verə bilmir. Hətta general var ki, Ararat dağının Ermənistan ərazisində olduğunu bilmir”. O ki qaldı həbs edilmiş general Manvel Qriqoryana, Stepanyan burada qəribə bir şey görmür. Onun fikrincə, bu şəxsin cinayətlərini hamı bilirdi.

Hesab edilir ki, hərb sahəsində də vəziyyətə əl gəzdirilməsi, burada Sarkisyanın tərəfdarlarının sıradan çıxarılması onun mövqelərini daha da zəiflətməyə hesablanıb. Qarşı tərəfin buna müqaviməti isə Ermənistanda daxili qarşıdurmanı daha da kəskinləşdirəcək.

Elçin CƏFƏROV

Azərbaycan. - 2018.-26 iyun.- S.1; 4.