Azərbaycan əsgərinin böyük vətənpərvərlik ruhu var

Silahlı Qüvvələrin 100 illik yubileyi münasibətilə Bakının Azadlıq meydanında keçirilən möhtəşəm hərbi parad bütün dünyaya bir daha göstərdi ki, Azərbaycan heç vaxt işğalla barışmayacaq və öz ərazi bütövlüyünü bərpa etməyə tam qadirdir. Azərbaycan dövləti ordu quruculuğunu əsas prioritetlərdən biri hesab edir. Bunun nəticəsidir ki, ordumuz dünyanın ən güclü orduları sırasındadır.

Biz - yaşlı nəslin nümayəndələri bütün bunlardan daha çox qürur duyuruq. Çünki vətənimizin, xalqımızın ağır günlər yaşadığının çox şahidi olmuşuq. Mən bu təntənəli paradı izlədikcə gözlərim önünə keçən əsrin sonlarında baş verən acınacaqlı olayları gətirirdim. Azərbaycanlıların Ermənistandakı dədə-baba yurdlarından vəhşicəsinə qovulması, Qara Yanvarda əliyalın insanların gülləbaran edilməsi, Dağlıq Qarabağda, sərhədyanı bölgələrdə baş verən qanlı hadisələr, torpaqlarımızın 20 faizinin işğalı... Üstəlik, ölkə daxilindəki çəkişmələr, hakimiyyət uğrunda mübarizə vəziyyəti daha da gərginləşdirirdi.

Hərbi paraddakı nitqində möhtərəm Prezident, Ali Baş Komandan İlham Əliyevin vurğuladığı kimi, Azərbaycan xalqı müdrik xalqdır və tarixinin həmin çətin məqamında da düzgün qərar qəbul etdi. Ulu öndər Heydər Əliyev böyük təkidlə hakimiyyətə dəvət olundu. Bununla da Azərbaycan xalqı öz nicatını tapdı. Azərbaycan iqtisadiyyatı dirçəldi, cəbhədə atəşkəs elan edildi, insanlar qəddini düzəltdi, ölkə güclənməyə başladı.

Bugünkü gücümüz və yüksəlişimiz həmin düzgün və uzaqgörən siyasətin uğurla davam etdirilməsindədir. Artıq 15 ildən çoxdur Prezident İlham Əliyevin apardığı məqsədyönlü siyasət nəticəsində Azərbaycan güclənib, qüdrətlənib, dünyada söz sahibi olub. Ötən illər ərzində ölkəmiz böyük beynəlxalq layihələri gerçəkləşdirib. İndi dünyada ən nəhəng layihələrdən biri olan “Cənub qaz dəhlizi”ni həyata keçirməkdəyik. Dövlət başçısı neft-qaz sektorunda əldə olunan gəlirləri insan kapitalına çevirib, iqtisadiyyatı şaxələndirib.

İqtisadi imkanlarımız bizə ordumuzun gücünü də artırmağa imkan verib. Təsadüfi deyil ki, 2003-cü ildən indiyədək hərbi xərclərimizi 15 dəfə artıra bilmişik. Hərbçilərin xidmət şəraiti getdikcə daha da yaxşılaşır. Neçə-neçə yeni hərbi şəhərcik yaradılıb, köhnələri isə əsaslı təmir edilib.

Bu gün Azərbaycan Ordusu ən müasir silahlarla və texnika ilə təchiz olunub. Bir çox hərbi təyinatlı məhsulların məhz ölkəmizdə istehsal olunması da Azərbaycanın gücünü göstərən amillərdəndir. Son illər ərzində 20-dən artıq hərbi zavod yaradılıb. Bu müəssisələrdə 1200 adda hərbi təyinatlı müxtəlif məhsullar buraxılır. Azərbaycan artıq özünün hərbi məhsullarını da ixrac etməyə başlayıb.

Azadlıq meydanındakı hərbi parad düşmənə bir daha sübut etdi ki, Azərbaycan Ordusu onun istənilən hərbi və strateji obyektini məhv edə bilər.

2016-cı ilin aprel döyüşlərində, 2018-ci ilin Naxçıvan əməliyyatında işğalçılardan azad edilmiş torpaqlarımızda Azərbaycan bayrağı dalğalandı. Bu bayrağın tezliklə Şuşada, Xankəndidə, Laçında, Kəlbəcərdə, müvəqqəti işğal altında olan digər bölgələrimizdə qaldırılacağına da heç bir şübhə yoxdur. Çünki biz təkcə hərbi gücə deyil, həm də böyük vətənpərvərlik ruhuna malikik. Çünki Azərbaycan dövlətinin müdrik başçısı, Azərbaycan Ordusunun güclü sərkərdəsi var. Azərbaycanın əsgər, zabit və generalları əsl qəhrəmanlıq və rəşadət göstərərək strateji yüksəklikləri əldə etmişlər. Odur ki, bu gün ermənilərin işğal edilmiş torpaqlarımızda qazdıqları səngərlərdə Azərbaycan əsgəri xidmət göstərir. Lələtəpədə, Ağdərə dağlarında bayrağımız ucalır.

Bizim - müharibə və əmək veteranlarının, dünyanın çox gərdişini görmüş yaşlı insanların, ağsaqqal və ağbirçəklərin böyük qələbəmizin heç də uzaqda olmadığına şübhəmiz yoxdur. Biz bir neçə gün bundan əvvəl keçirilmiş parada baxdıqca böyük qələbə paradımızı gözümüz önünə gətirir, o xoşbəxt günün tezliklə gələcəyini arzulayır, dualar edirdik.

Cahangir NƏSİROV,

Müharibə, Əmək və Silahlı Qüvvələr

Veteranları Təşkilatının komissiya sədri

Azərbaycan.- 2018.- 29 iyun.- S.4.