Moskvada MDB İqtisadi Şurasının 77-ci iclası keçirilib

Moskvada Müstəqil Dövlətlər Birliyinin (MDB) İqtisadi Şurasının 77-ci iclası keçirilib. İclasda Azərbaycanı Baş nazirin birinci müavini Yaqub Eyyubov təmsil edib.

AZƏRTAC xəbər verir ki, iclasın gündəliyinə MDB ölkələrinin iqtisadiyyat sahəsində qarşılıqlı fəaliyyəti ilə bağlı geniş məsələlər daxil olub. İclas iştirakçıları MDB Hökumət Başçıları Şurasının müzakirəsinə təqdim ediləcək bir sıra sənədlərin layihələrini bəyəniblər. Söhbət Birlik dövlətlərinin intellektual mülkiyyət bazarının formalaşması və inkişafı haqqında Sazişin, Dövlətlərarası standartlaşdırmaya aid sənədlərin yayılması haqqında Sazişin, Energetikanın innovasiyalı inkişafı və qabaqcıl energetika texnologiyalarının işlənib hazırlanması sahəsində MDB ölkələrinin əməkdaşlığı Konsepsiyasının və bu konsepsiyanın reallaşdırılması ilə bağlı Təxirəsalınmaz Tədbirlər Planının, habelə 2025-ci ilə qədər olan dövr üçün quduzluğun profilaktikası və ona qarşı mübarizə sahəsində MDB ölkələrinin Birgə Fəaliyyəti Kompleksinin layihələrindən gedir.

İqtisadi Şura xidmətlərin azad ticarəti barədə Sazişin layihəsi üzərində işi davam etdirmək üçün Birlik ölkələrinin iqtisadiyyat nazirlərindən (nazir müavinlərindən) ibarət yüksək səviyyəli işçi qrup yaradılmasını qərara alıb və 2018-ci il üçün həmin qrupun iclaslarının qrafikini təsdiq edib.

İclas iştirakçıları 2018-2020-ci illər üçün Qazaxıstan Materialşünaslıq Tokamakında elmi tədqiqatlar proqramını təsdiq ediblər.

İqtisadi Şuranın qərarı ilə Rusiya Federal Nüvə və Radiasiya Təhlükəsizliyi Mərkəzinə MDB iştirakçıları olan dövlətlərin işlənilmiş nüvə yanacağı, radioaktiv tullantılarla davranış və nüvə-radiasiya təhlükəli obyektlərin istismardan çıxarılması məsələləri üzrə baza təşkilatı statusu verilib.

İqtisadi Şura məhsulların və xidmətlərin keyfiyyəti sahəsində qazanılmış nailiyyətlərə görə 2017-ci ilin Müstəqil Dövlətlər Birliyi Mükafatı üzrə müsabiqənin Münsiflər Heyətinin təqdimatını nəzərdən keçirərək Birlik ölkələrinin bir sıra idarə və müəssisələrinə bu mükafatın laureatları və diplomantları adları verilməsini qərara alıb.

İclasda bir sıra büdcə-maliyyə məsələləri və təşkilati məsələlər də müzakirə olunub.

MDB İqtisadi Şurasının növbəti iclasını cari ilin iyun ayında Moskvada keçirmək nəzərdə tutulub.

Azərbaycan.- 2018.-3 mart.- S.4.