Katerina Yuşenko: “Gənclərin Qlobal Bakı Forumuna cəlb edilməsi sevindirici haldır”

Altıncı Qlobal Bakı Forumunda gənc liderlərlə bağlı ayrıca panel iclasın keçirilməsi, müxtəlif ölkələrdən gənclərin bu tədbirə cəlb edilməsi sevindirici haldır.

Bu fikri AZƏRTAC-a müsahibəsində Forumun iştirakçısı, Ukraynanın sabiq Prezidenti Viktor Yuşenkonun xanımı Katerina Yuşenko söyləyib. O deyib: “Moderatorluq etdiyim “Nəsillər arasındakı boşluqlar: Gənclər danışır, biz dinləyirik” panel iclasında dünyanın müxtəlif ölkələrindən təmsil olunan gənclər fəallıq nümayiş etdirdilər. Forumda iştirak edən gənclər çox ağıllı, təşəbbüskardırlar. Onlar siyasət, biznes və digər sahələrdə gələcəyin liderləridir. Maraqlısı odur ki, gənclər VI Qlobal Bakı Forumu çərçivəsində ayrı-ayrı ölkələrin dövlət və hökumət başçılarının çıxışlarını dinləmək, onlarla ünsiyyət qurmaq imkanı əldə etdilər. Beləliklə, Forum çərçivəsində aktual mövzularla bağlı fikir mübadiləsi aparıldı. Eləcə də gənclərin çıxışlarını, təkliflərini dinləmək yaşlı nəsil üçün maraqlı oldu. Əlbəttə ki, bütün bunlar Azərbaycan üçün də faydalıdır. Çünki müxtəlif ölkələrdən ayrı-ayrı sahələr üzrə gənc liderlər Azərbaycana gəlib ölkənin müsbət təcrübəsi ilə tanış olurlar. Düşünürəm ki, onlar buraya yenidən gəlmək istəyəcəklər".

Azərbaycan.- 2018.-18 mart.- S.4.