Baharın gəlişi Şəkidə təmtəraqla qeyd olundu

Novruz bayramı respublikamızın hər yerində olduğu kimi, qədim Şəkidə də böyük təntənələrlə qeyd olunub. Bu münasibətlə martın 20-də Şəki şəhərindəki “Yuxarı baş” Dövlət Tarix-Memarlıq Qoruğunun ərazisində ümumşəhər şənliyi keçirilib.

Bayram tədbiri qədim memarlıq abidəsi olan “Qala divarları”nın həyətində başlanıb. Bayram tonqalı alovlandırıldıqdan sonra pəhləvanlar və kəndirbazlar məharətlərini nümayiş etdiriblər. Novruzun personajları olan Kosa və Keçəl məzəli zarafatları ilə iştirakçılara xoş ovqat bəxş ediblər.

Sonra bayram tədbiri XVIII əsrə aid nadir tarixi-memarlıq abidəsi olan Şəki xan sarayının həyətində bədii proqramla davam edib.

Bayram iştirakçıları qoruğun ərazisindəki V-VI əsrlərə aid Dairəvi Məbədin həyətində milli rəqsləri, idmançıların çıxışlarını izləyib, Şəki sənətkarlarının əl işlərindən ibarət sərgilərə baxıblar.

Bayram tədbiri “Yuxarı Karvansaray” mehmanxana kompleksinin həyətində rəngarəng konsert proqramı ilə başa çatıb.

Ə.SƏLİMOV

Azərbaycan.- 2018.- 22 mart.- S.5.