Ulu öndər minnətdarlıqla yad edildi

Dünən “Azərbaycan” qəzeti və Yeni Azərbaycan Partiyası Yasamal rayon təşkilatı birlikdə ümummilli lider Heydər Əliyevin anadan olmasının 95 illiyi münasibətilə tədbir keçirmişlər.

Redaksiyada keçirilən tədbiri qəzetin baş redaktoru, Milli Məclisin deputatı Bəxtiyar Sadıqov açaraq ulu öndər Heydər Əliyevin Azərbaycan mətbuatının inkişafına göstərdiyi böyük qayğı və dəstəkdən ətraflı bəhs etdi. Həmçinin qeyd etdi ki, qəzetin “Azərbaycanın özü qədər əbədi” adlı daimi rubrikası var. Bu rubrika altında ulu öndərin həyat və fəaliyyəti barədə çoxsaylı materiallar, haqqında unudulmaz xatirələr dərc olunur. Qəzetin səhifələrində müasir Azərbaycan dövlətinin və müstəqil azad mətbuatın banisi Heydər Əliyevin siyasi xəttinə əsaslanan ölkəmizin dinamik inkişafı daim öz əksini tapır.

YAP Yasamal rayon təşkilatının sədri Tağı Əhmədov ümummilli lider Heydər Əliyevin Azərbaycan xalqının və dövlətinin tarixində çətin dövrlər zamanı misilsiz xidmətlər göstərdiyindən danışdı. Ulu öndər Azərbaycana rəhbərlik etdiyi birinci dövrdə onu SSRİ-nin 15 respublikası sırasında son cərgələrdən önə çıxartdı. SSRİ hakimiyyətində rəhbər vəzifələrdə çalışdığı illərdə də Azərbaycanın inkişafı üçün əlindən gələni etdi. 1990-cı ilin qara Yanvar hadisələrindən dərhal sonra özünün və ailəsinin həyatını riskə ataraq haqq səsini ucaltdı. Moskvanın və Azərbaycanda sapı özümüzdən olan baltaların təzyiqlərinə baxmayaraq, xalqının harayına çatdı. Xalqın tələbi ilə ikinci dəfə hakimiyyətə gələrək Azərbaycanı qardaş qırğınından xilas etdi və böyük bir inkişaf yoluna çıxartdı.

Tədbirdə YAP Yasamal rayon təşkilatının İdarə Heyətinin üzvü akademik Qərib Məmmədov da çıxış etdi. O, ulu öndər Heydər Əliyevin Azərbaycan xalqı qarşısında digər misilsiz xidmətlərini qeyd etməklə yanaşı, aqrar sahənin inkişafına yönəldilmiş uzaqgörən siyasətinin əhəmiyyətindən də danışdı. Belə ki, istər 1969-cu ildə respublikaya rəhbərlik etməyə başlayanda, istərsə də 1993-cü ildə yenidən hakimiyyətə qayıdandan sonra ümummilli lider kənd təsərrüfatında vəziyyəti öyrənməyi, müvafiq tədbirlər görməyi, torpaq islahatları aparmağı birinci dərəcəli vəzifələrdən hesab etmişdir.

Tədbirdə ulu öndər Heydər Əliyevin uzaqgörən sosial-iqtisadi siyasətinin, əsasını qoyduğu nəhəng işlərin bu gün onun layiqli siyasi varisi Prezident İlham Əliyev tərəfindən uğurla davam etdirildiyi bir daha məmnunluqla vurğulandı.

Tədbirin sonunda “Azərbaycan” qəzetinin bir qrup gənc əməkdaşı Yeni Azərbaycan Partiyasına üzv qəbul olundu.

Azərbaycan.- 2018.- 3 may.- S.5.