Liderlik örnəyi

18 aprel 2018-ci il, Milli Məclisin iclas salonu...

Parlamentin zalındakı abu-hava xüsusi məna kəsb edir ...

Azərbaycan xalqının yüksək etimadı ilə dövlətə rəhbərlik missiyasını növbəti dəfə üzərinə götürmüş İlham Əliyevin parlamentdə Vətənə, dövlətə və xalqa sədaqət andı içəcəyi mərasimə sayılı dəqiqələr qalır...

Müstəqilliyimizin və inkişafımızın təminatçısını hamı böyük səbirsizliklə gözləyir.

Xoş duyğuların təsiri ilə bir anlıq 25 il əvvələ dönərək xalqımızın ümummilli lideri Heydər Əliyevin müstəqil Azərbaycan Respublikasının Prezidenti kimi 1993-cü il oktyabrın 10-da keçirilmiş andiçmə mərasimini xatırladım...

O illərdə kifayət qədər çətin, mürəkkəb və ziddiyyətli hadisələri taleyimizdə yaşasaq da, ümummilli liderin parçalanmaq, müstəqilliyini itirmək təhlükəsi ilə üzləşmiş dövlətin idarəçilik sükanı arxasına keçməsi qəlbimizdə gələcəklə bağlı qubar salmış nisgili, nigaranlığı birdəfəlik aradan qaldırmışdı. Oktyabrın 3-də keçirilmiş prezident seçkilərində ulu öndərin ölkə seçicilərinin 95 faizindən çoxunun səsini qazanaraq inamlı qələbə qazanması çarəsizlik, bədbinlik burulğanında olan insanların daxilində işıqlı sabaha, təminatlı gələcəyə ümid qığılcımları alovlandırmışdı.

Ümummilli lider 25 il öncəki andiçmə mərasiminə xilaskar və qalib rəhbər kimi qatılmışdı. Heydər Əliyev dühasının 1993-cü ilin iyununda - ölkənin vətəndaş müharibəsi, xaos, anarxiya və iqtisadi tənəzzül mərhələsində olduğu ağır siyasi dönəmdə Naxçıvandan Bakıya dönüşü xalqımızın və müstəqil respublikamızın taleyində Qurtuluş anına çevrilmişdi. Cəmi 3-4 ayın içində qətiyyətli və müdrik siyasi gedişləri ilə daxili böhranı, vətəndaş qarşıdurmasını aradan qaldıran, Cənubda və Şimalda cərəyan edən separatçılıq meyillərinin qarşısını qətiyyətlə alan, qanunsuz silahlı qüvvələri zərərsizləşdirən, sosial-iqtisadi sahədə radikal islahatlara başlayan ulu öndər xalqımızda sabaha ümid və özünəinam hissini bərpa etməyi bacarmışdı.

Bu günlərdə anadan olmasının 95-ci ildönümünü qeyd etdiyimiz ümummilli liderin ilk andiçmə mərasimindəki çıxışını sabitlik, həmrəylik və inkişaf manifesti kimi xatırlayıram. Müdrik rəhbər kifayət qədər həssas mərhələdə Azərbaycana rəhbərlik edəcək lider olaraq dövlət müstəqilliyinin və suverenliyinin müdafiəsi naminə əzmlə çalışacağını, qətiyyətlə mübarizə aparacağını, bu məqsədlə bütün imkanlarını səfərbər edəcəyini cəsarətlə bəyan edirdi. “Bu gün mənim üçün tarixi, əlamətdar bir gündür. Mənə göstərilən bu böyük etimada görə Azərbaycan vətəndaşlarına, Azərbaycan xalqına bir daha dərin minnətdarlığımı, hörmətimi, məhəbbətimi bildirir və əmin etmək istəyirəm ki, həyatımın sonuna qədər xalqıma sədaqətlə xidmət edəcək və bütün fəaliyyətimi Azərbaycan Respublikasının gələcək inkişafına sərf edəcəyəm. Əlimi Azərbaycan Respublikasının Konstitusiyasına basaraq and içirəm ki, biliyimi, təcrübəmi, qüvvəmi Azərbaycan xalqının, Azərbaycan Respublikasının rifahına həsr edəcəyəm” - deyən Heydər Əliyev bu vədinə sonadək sadiq qaldı, dövlətinə, xalqına sədaqətlə, vicdanla xidmət etdi.

Aradan 25 il ötüb və biz bu gün tamamilə fərqli bir Azərbaycanda yaşayırıq. Ümummilli lider Heydər Əliyevin 1993-2003-cü illərdə böyük siyasi iradə, müdriklik hesabına tənəzzül və böhrandan dayanıqlı sabitlik və tərəqqi yoluna çıxardığı respublikamız milli dövlətçilik tarixinin ən qüdrətli dövrünü yaşayır. 2003-cü ildə ulu öndər Heydər Əliyevin “Mən ona özüm qədər inanır və gələcəyinə böyük ümidlər bəsləyirəm” - deyərək cəmiyyətə özünün layiqli davamçısı, siyasi varisi kimi təqdim etdiyi İlham Əliyev bu ali etimadı yüksək səviyyədə doğruldaraq milyonların alternativsiz liderinə çevrilib. Son 15 ildə uğur estafetini inamla davam etdirərək respublikamızı bütün sahələrdə inkişaf edən, tamamilə müstəqil siyasət yürüdən, milli maraq və mənafeyini müdafiə edən dövlətə çevirməyə nail olub.

Ulu öndər hələ 25 il əvvəl müasir Azərbaycanı indiki statusda təsəvvür edir, onun əzəmətini - üfüqdəki qüdrətli və güclü dövlətin ürəkləri “dağa döndərən” tablosunu uzaqgörənliklə canlandırırdı.

...25 il sonra biz artıq fərqli bir Azərbaycanda - hər vədini əməli fəaliyyəti ilə doğruldan, xalqını və dövlətini sevən, ona layiqli xidməti həyat amalı hesab edən bir liderin - Heydər Əliyev ideyalarının layiqli davamçısının andiçmə mərasimindəyik...

İlham Əliyev özünəməxsus məğrur addımlarla Milli Məclis salonuna daxil olaraq tribunaya yaxınlaşır, əlini Azərbaycan Respublikasının Kontitusiyasına və müqəddəs “Qurani-Kərim”ə basaraq vətənə, xalqa və dövlətə sədaqət andı içir!

Prezidentin nəcib və müdrik xarakterinə xas şəkildə - hər cür dəbdəbədən, təntənədən uzaq, təvazökar, sadə atmosferdə gerçəkləşən bu mərasim həm də qanunverici orqana və onun üzvlərinə göstərilən yüksək etimadın təcəssümü idi...

Dövlət başçısının dərin məzmunlu, konseptual çıxışı, əslində, Azərbaycanın yaxın tarixinə nəzər salan, bugününü obyektiv dəyərləndirən, gələcəklə bağlı hədəflərini səhih müəyyən edən Strateji Yol Xəritəsi idi.

Xalqın sarsılmaz inamı, böyük dəstəyi ilə prezidentlik səlahiyyətlərinin icrasını növbəti mərhələdə də həyata keçirəcək möhtərəm Prezidentin bu məzmunlu nitqi təkcə 15 illik möhtəşəm tarixin müfəssəl hesabatı deyildi. İlham Əliyev, eyni zamanda Azərbaycanın möhkəm iqtisadi, siyasi və mənəvi təməl üzərində bundan sonra daha sürətlə inkişaf edəcəyinin, yaxın perspektivdə ən çox inkişaf etmiş ölkələr sırasına daxil olacağının xoş müjdəsini verirdi.

Dövlət rəhbəri andiçmə mərasimində əldə olunmuş və gözlənilən böyük nailiyyətlərin ən dəqiq ünvanını, səbəbkarını da növbəti dəfə bəyan etdi: Heydər Əliyev ideyaları müasir, inkişaf edən, qüdrətli Azərbaycanın mayakı və inkişaf lokomotividir!

İlham Əliyev son 15 ildə hər addımda Heydər Əliyev ideyalarından güc aldığını, ulu öndərin hər bir vətəndaşın mənafeyinə xidmət edən inkişaf strategiyasına əsaslandığını səmimiyyətlə vurğuladı: “Mən 2003-cü ildə, prezident seçkiləri ərəfəsində xalqa müraciət edərək demişdim ki, əgər mənə xalq etimad göstərərsə, mən ulu öndər Heydər Əliyev siyasətinə sadiq qalacağam, bu siyasəti davam etdirəcəyəm. Mən fəxr edirəm ki, xalq mənə inandı, məni dəstəklədi və mən də öz növbəmdə sözlərimə əməl etdim. Son 15 il ərzində Azərbaycanda hərtərəfli inkişaf təmin edilmişdir. Bunun əsas şərti ondan ibarətdir ki, biz ulu öndərin yolu ilə gedirik. Onun qoyduğu yol yeganə düzgün yoldur və Azərbaycanın müstəqillik tarixi bunun əyani sübutudur”.

Xalqlarının tarixində müstəsna xidmətləri olan böyük liderlər qurub yaratdıqları dövlətlərin inkişaf hədəflərini, tərəqqi yolunu dəqiq müəyyən etməklə əbədiyaşarlıq zirvəsinə yüksəlirlər. Bu mənada, ulu öndər Heydər Əliyev Azərbaycan tarixinə təkcə milli müstəqillik ideyasını gerçəkləşdirmiş lider kimi düşməyib. Ulu öndər həm də qurub-yaratdığı dövlətin möhkəmliyini təmin edən, hərtərəfli inkişafı üçün zəmin hazırlayan, ən başlıcası, bu strategiyanı özündən sonra inamla davam etdirməyə qadir davamçı yetişdirən rəhbər kimi əbədiyaşarlıq qazanıb.

İlham Əliyevin andiçmə mərasimindəki nitqi məni yenə də yaxın keçmişə qaytarır. 1993-cü ilin 10 oktyabrında keçirilmiş andiçmə mərasimində ulu öndər böyük uzaqgörənliklə deyirdi: “Müstəqil Azərbaycan Respublikasının qarşısında duran əsas vəzifələrdən biri respublikanın dövlət quruculuğunu təşkil etməkdir. Bizim yolumuz aydındır, bunu dəfələrlə bəyan etmişik. Yolumuz demokratiya yoludur. Müstəqil Azərbaycanda demokratik, hüquqi dövlət qurulmalıdır. Azərbaycan dövləti demokratik prinsiplər əsasında fəaliyyət göstərməlidir, öz tarixi ənənələrindən, milli ənənələrindən bəhrələnərək, dünya demokratiyasından, ümumbəşəri dəyərlərdən səmərəli istifadə edərək demokratik dövlət quruculuğu yolu ilə getməlidir. Bizim yolumuz bu yoldur və mən sizə bir daha söz verirəm ki, biz məhz bu yolla gedəcəyik”.

Heydər Əliyev Azərbaycan tarixində silinməz iz qoymuş dahi şəxsiyyət olaraq bir çox mühüm yeniliklərin, saysız-hesabsız ilklərin müəllifi kimi xatırlanır. Ulu öndərin müstəqil Azərbaycan Respublikasının demokratik seçki yolu ilə hakimiyyətə gələn və səlahiyyətlərini sonadək icra edən ilk prezidenti olduğunu da qürur hissi ilə vurğulamaq istərdik. Yəqin ki, orta və yaşlı nəslin nümayəndələri 80-ci illərin sonu 90-cı illərin əvvəllərində respublikamızda hakimiyyət uğrunda gedən amansız və çirkin mübarizənin xalqın, dövlətin taleyindəki ağrı-acısını, fəsadlarını unutmayıblar.

Bəli, ulu öndər Heydər Əliyevə qədər Azərbaycana rəhbərlik edənlər onlara həvalə olunan rəhbərlik missiyasını sonadək həyata keçirə bilməmiş, xalqın qəzəbinə tuş gələrək hakimiyyətdən uzaqlaşmışdılar. Azərbaycan rəhbərliyində xalqın inam və etimadını qazanmış real siyasi qüvvənin olmaması o illərdə üzləşdiyimiz böyük faciə və fəlakətlərin, ərazi və insan itkilərinin başlıca səbəblərindən birinə çevrilmişdi.

Bütün bunlara nəzərən əminliklə deyə bilərik ki, məhz Heydər Əliyev dühasının müdrikliyi və dövlətçilik məharəti sayəsində Azərbaycanda hakimiyyətin dinc şəkildə, qansız-qadasız, sivil, demokratik, şəffaf seçkilər yolu ilə ötürülməsi ənənəsi formalaşdı.

Ulu öndər Heydər Əliyev respublikaya rəhbərlik edən şəxsin zorakılıqla, xalqın qəzəbi ilə, məğlub durumda hakimiyyətdən kənarlaşdırılması “ənənəsini” tarixin arxivinə ataraq siyasətdə sivil varisliyin əsasını qoydu.

Bu mənada, Heydər Əliyev fenomeni ən yeni tariximizə hakimiyyətə qalib kimi gələrək qalib kimi də gedən, ideyalarının davamlılığını təmin edən böyük lider kimi möhürünü vurub.

Ümummilli liderin milli dövlətçiliyimiz qarşısındakı böyük xidmətlərindən biri də xalqın gələcək tərəqqi yolunu, inkişaf perspektivlərini müdrikliklə irəli sürməsidir. Bununla yanaşı, Heydər Əliyevin milli birliyi və həmrəyliyi təmin edən, xalqı azərbaycançılıq ideyası ətrafında səfərbər edən birləşdirici şəxsiyyət olmasını da xüsusi vurğulamaq lazımdır. O, bütün varlığı ilə bağlı olduğu Azərbaycan xalqının milli psixologiyasını duyur, insanların arzularını bilir, bu arzuların həyata keçməsi üçün yüksək qətiyyət göstərirdi. Azərbaycan xalqının nəzərində Heydər Əliyev mümkünsüzü mümkünə çevirməyi bacaran, onun gələcəyi üçün məsuliyyəti üzərinə götürən sarsılmaz güc idi. Xalq böyük güvən hissi ilə öz taleyini bu qüdrət sahibinə əmanət etmişdi. Böyük şəxsiyyət bu mənəvi əmanətə - insanların inamına hər zaman sadiq qaldı. Heydər Əliyev üzərinə götürdüyü missiyanın məsuliyyətini gözəl dərk edir, tarix üçün yaşamağın, öz ömrü ilə tarix yaratmağın, milli dövlətçilik tarixinin işıqlı bir parçasına çevrilməyin nə demək olduğunu yaxşı bilirdi.

Böyük şəxsiyyətlə hələ ötən əsrin 70-80-ci illərində birgə işləmək, onun komandasının üzvü olmaq imkanı əldə etdiyimə görə taleyimdən çox razıyam. Yaxşı yadımdadır, ulu öndər Heydər Əliyevin həmin illərdə vəzifəyə təyin etdiyi kadrlardan yalnız bir istəyi, tələbi var idi - insanlara layiqli və təmənnasız xidmət! Ulu öndər mənə yüksək etimad göstərərək Ordubad, Culfa rayonlarına rəhbər təyin edərkən qarşıda məhz insanlarla daim ünsiyyətdə olmaq, onların problemlərinə, qayğılarına həssaslıqla yanaşmaq vəzifəsini qoymuşdu. Ulu öndərin verdiyi hər bir tapşırığı ciddi nəzarətdə saxlaması, tələbkarlığı hələ o illərdə məmurları daim səylə işləməyə sövq edir, onların məsuliyyətini artırırdı.

Heydər Əliyevin liderlik taleyinin başlanğıc səbəbi, onun çətin və şərəfli ömür yolunda xalqımıza qazandırdığı böyük uğurların mənəvi qaynağı isə ədalət prinsipinə sadiqlik idi. Hələ 1981-ci ildə “Literaturnaya qazeta”ya müsahibəsində “Qoy ədalət zəfər çalsın” çağırışını əsas devizə çevirən Heydər Əliyev bütün fəaliyyətini cəmiyyətdə ədalətin təntənəsinə yönəltmişdi. Bu deviz ümummilli liderin xalqın rəhbəri kimi özünə seçdiyi yolun, əqidənin bəyanı olmaqla yanaşı, həm də qəlbinin səsi, milli dəyərlərə sadiqliyinin ifadəsi idi. Onun verdiyi bütün qərarlar ədalət meyarlarına söykəndiyi üçün hər bir vətəndaşın qəlbində, düşüncəsində adil rəhbər mücəssəməsinə çevrilə bilmişdi. İnsanların Heydər Əliyev şəxsiyyətinə olan inamı, onun haqq işinə dəstəyi də məhz bu dəyərə əsaslanırdı.

Bütün böyük şəxsiyyətlər, qüdrətli liderlər kimi, həyatı çətin sınaqlardan keçən, bəzən haqsızlıqlarla, xain xislətlilərin təzyiq və təhdidləri ilə üzləşən Heydər Əliyev bütün bədxahlarından güclü idi. Haqsızlığın üzərinə haqqın bükülməz qolu ilə getməsi, ədalətsizlik zülmətini ədalət işığı ilə aydınlatması Heydər Əliyevi zamanın bütün sınaq və mücadilələrindən qalib çıxarırdı. İnsanpərvər və humanist lider olmasının ən qabarıq təzahürləri həm də onun tolerant şəxsiyyət olmasında özünü ehtiva edirdi. Böyük ürək sahibi olan bu dahi insan hətta özünə qarşı edilmiş ədalətsizlikləri, haqsızlıqları da bağışlamağı bacarırdı. Milli-mənəvi dəyərlərə bağlı olan ümummilli lider geniş ürək sahibi kimi ona qarşı səhv etmiş şəxsləri də bağışladı.

Ulu öndər müstəqil Azərbaycana rəhbərlik etdiyi 1993-2003-cü illərdə cəmiyyətdə sabitliyi, hüquq qaydalarını, insan amilinin ucalığını təmin etdi. Ümummilli lider müstəqil Azərbaycanın milli inkişaf strategiyasını özünəməxsus müdrikliklə irəli sürərək onun həyata keçirilməsinə başladı. Ümummilli liderin rəhbərliyi ilə demokratik, hüquqi və dünyəvi dövlət quruculuğu yolunda atılan addımlar, milli dövlətçilik ənənələrinə, beynəlxalq standartlara əsaslanan köklü hüquq islahatları insan hüquq və azadlıqlarının təminatı sahəsində əsaslı dönüşə səbəb oldu. Azərbaycanın inkişaf prioritetlərini düzgün müəyyənləşdirən ulu öndər sivil dəyərlərin cəmiyyətdə tam mənimsənilməsinə hər zaman diqqətlə yanaşdı.

Heydər Əliyev özünün zəngin iqtisadi bilik və təcrübəsi əsasında Azərbaycanın yeni dövr üçün iqtisadi inkişaf yolunu dəqiq müəyyənləşdirdi. Bu sahədə mövcud problemlərin həlli yollarını elmi-nəzəri və praktiki əsasda göstərdi. Demokratik inkişaf yolunu seçmiş bütün ölkələrdə olduğu kimi, Azərbaycanda da bazar iqtisadiyyatı prinsipləri - xüsusi mülkiyyətçilik, azad sahibkarlıq fəaliyyəti, özəlləşdirmə, qeyri-neft sektorunun, sənayenin inkişafı və sosial infrastrukturun yeniləşdirilməsi prioritet seçildi. Heydər Əliyev keçmiş ittifaq məkanında ilk dəfə məhz Azərbaycanda torpağı əsl sahibinə - kəndlilərə qaytardı. Azərbaycanın yeni neft strategiyasının hazırlanaraq həyata keçirilməsi, 1994-cü ildə “Əsrin müqaviləsi”nin imzalanması da ümummilli liderin Azərbaycan dövlətçiliyi qarşısındakı ən böyük xidmətlərindən biridir.

Bəli, ulu öndər siyasətdə varislik ənənələrini təmin etmiş böyük dövlət xadimi kimi xalqımızın qəlbində özünə möhtəşəm abidə ucaldıb. 2003-cü ilin oktyabrında ümumilli liderin cəmiyyətə özünün layiqli siyasi davamçısı, varisi kimi təqdim etdiyi cənab İlham Əliyev son 15 ildə respublikamızın möhtəşəm inkişaf salnaməsinin müəllifinə çevrilib. Əgər ulu öndər 1990-cı illərdə respublikamızı iqtisadi tənəzzüldən xilas edərək bazar iqtisadiyyatı yoluna çıxarmışdısa, İlham Əliyev son 15 ildə onu regionun sabit inkişaf edən, qlobal layihələri öz gücünə reallaşdıran qüdrətli dövlətinə çevirib.

Ulu öndərin zəruri anda xalqı ətrafında toplamaq, cəmiyyətdə birlik və həmrəyliyə nail olmaq kimi liderlik keyfiyyətlərini biz bu gün Prezident İlham Əliyevin simasında görürük. Dövlət başçısı xaraktercə demokratik və liberal düşüncəli bir şəxsiyyət olsa da, yeri gələndə dövlətin və xalqın maraqları naminə qətiyyətli, prinsipial addımlar atmaqdan çəkinmir. Hələ 2003-cü ilin prezident, 2005-ci ilin parlament seçkilərindən sonra dövlət başçısının xalqın dəstəyi ilə nümayiş etdirdiyi yüksək siyasi sayıqlıq, iradə və qətiyyət Azərbaycanda ictimai-siyasi sabitliyi pozmaq, cəmiyyətdə bölücülük və qarşıdurma yaratmaq istəyən qüvvələrin çirkin niyyətlərini puça çıxardı. İlham Əliyev eynilə ulu öndər kimi ən çətin situasiyalarda yüksək iradə və prinsipiallıq nümayiş etdirərək dövlətçiliyə yönəlmiş qəsdləri qətiyyətlə zərərsizləşdirdi. Bununla yanaşı, liberal dəyərlərə, demokratik prinsiplərə, insan hüquq və azadlıqlarına sadiqliyini hər zaman qoruyub saxladı.

İlham Əlyiev ölkədə siyasi barışığın, vətəndaş həmrəyliyinin və sülhün təmin olunması, etimad mühitinin formalaşdırılması istiqamətində qətiyyətli addımlar atdı. Ölkədə kadr siyasəti və dövlət idarəçiliyi məsələlərində Azərbaycanın bütün vətəndaşlarının iştirakı təmin edildi. Müxalifət sağlam, konstruktiv dialoqa dəvət olundu. Ölkədə əldə edilən iqtisadi nailiyyətlərdən hamının öz bacarıq, zəhmət və əqli imkanlarına görə bəhrələnməsi təmin edildi. Azərbaycan Prezidenti İlham Əliyev aprelin 18-də keçirilmiş andiçmə mərasimindəki çıxışında ölkəmizdə siyasi mübarizə mədəniyyətinin yüksəldiyini, demokratik dəyərlərin möhkəmləndiyini razılıqla qeyd etdi: “Bu 15 il ərzində Azərbaycanda demokratik inkişaf çox sürətlə getmişdir, Azərbaycanda bütün azadlıqlar təmin edilmişdir. Hesab edirəm ki, bu 15 il demokratik inkişaf baxımından çox uğurlu illər olmuşdur. Biz siyasi islahatları dərinləşdirərək bütün azadlıqları - söz azadlığını, mətbuat azadlığını, sərbəst toplaşma azadlığını, siyasi fəaliyyət azadlığını təmin etmişik. Təkcə onu demək kifayətdir ki, bu gün Azərbaycan vətəndaşlarının 80 faizi internet istifadəçiləridir və internet Azərbaycanda azaddır. Yəni demokratik inkişafla bağlı bizim siyasətimiz çox düzgün siyasətdir və bizim milli maraqlarımızı təmin edir. Biz bunu kiminsə xoşuna gəlmək üçün yox, ona görə edirik ki, Azərbaycanda siyasi islahatlar daha da dərinləşsin, Azərbaycan xalqı həmişə öz taleyinin sahibi olsun, necə ki, bu gün Azərbaycan xalqı öz taleyinin sahibidir və seçkilər, onun nəticələri bunu bir daha təsdiqləyir”.

Prezident İlham Əliyev hələ 2013-cü ildə ölkəmizdə sistem islahatlarının dərinləşdirilməsi zərurətini bəyan etmişdir. Söhbət inkişafın keyfiyyətcə yeni mərhələsində insan amilini uca tutan, bütün sahələrdə vətəndaş məmnunluğunu, şəffaflığı və hesabatlılığı təmin edən dövlət idarəetmə sisteminin formalaşdırılmasından gedir. Son prezident seçkilərindən dərhal sonra həyata keçirilən kadr təyinatları ictimai fikirdə müasirləşməyə və inkişafa xidmət edən islahatların sürətlə aparılacağına böyük inam yaradıb.

Dövlət başçısı idarəçiliyin təkmilləşdirilməsi prosesini daim diqqət mərkəzində saxlamaqla, cəmiyyətin inkişafından irəli gələrək yeni, çevik və işlək strukturların yaradılmasını da vacib sayır. Nazirlər Kabinetinin bir müddət əvvəl təsdiqlənmiş yeni tərkibi və yaradılmış yeni qurumlar fonunda bunu bir daha əminliklə söyləmək mümkündür. Yeni islahatlar kursu qarşıya qoyulan hədəflərin uğurla reallaşdırılmasına yaxşı imkanlar açır. “Xalqa doğru - haqqa doğru” prinsipinə əsaslanan bu siyasət vətəndaşların dövlət rəhbərinə olan sevgisini, rəğbətini, inamını daha da artırır.

İlham Əliyev ötən müddətdə müstəqil Azərbaycan dövlətinin təhlükəsizliyinin və inkişafının təminatçısı olduğunu sübuta yetirdi. Respublikamızın ən real inkişaf göstərici qısa müddət ərzində onun iqtisadi inkişaf tempinə görə bütün dünyada liderlərdən birinə çevrilməsi faktıdır. Bakı-Tbilisi-Ceyhan, Bakı-Tbilisi-Ərzurum, Bakı-Tbilisi-Qars, TANAP, TAP kimi enerji, kommunikasiya və nəqliyyat layihələrinin əsas iştirakçısı statusunda çıxış edən respublikamızın ümumilikdə Avropa regionunun gələcək enerji təhlükəsizliyi missiyasını öz üzərinə götürməsi reallığıdır. Azərbaycan insanının dəyişən güzəranı, şəhər, kənd və qəsəbələrimizin abadlığı, respublikamızda işsizlik, yoxsulluq kimi ağır sosial bəlaların kabus kimi çəkilib gözdən itməsidir. Azərbaycanda demokratiyanın təntənəsi, qanunların aliliyi, tədricən haqqın-ədalətin zəfəridir. Korrupsiyaya, digər neqativ hallara qarşı mübarizənin ardıcıl və qətiyyətli xarakter alması, məhkəmələrin tam müstəqilliyinin təmin olunması, insan hüquq və azadlıqlarının yüksək səviyyədə qorunmasıdır. Ölkəmizin beynəlxalq aləmdə gündən-günə güclənən mövqeyi, mövcud iqtisadi potensialın insan kapitalına çevrilməsi istiqamətində atılan addımlardır.

İlham Əliyevin həyata keçirdiyi uğurlu iqtisadi siyasət Azərbaycanın bölgələrini, sözün həqiqi mənasında, işığa, nura boyayıb. Bir zamanlar zülmətə düçar olan yaşayış məntəqələrimiz, rayon və kəndlərimiz bu gün nəinki fasiləsiz elektrik enerjisi, eləcə də içməli su ilə təmin olunub. Hələ keçmiş ittifaq dövründə mavi yanacaq üzü görməmiş rayon və kəndlərimizə qaz xətləri çəkilib, ölkə demək olar ki, tam qazlaşdırılıb. Müasir yol infrastrukturu - logistik imkanları sayəsində Azərbaycan bu gün qitələri birləşdirir, böyük turizm potensialı ilə dünyanın diqqətini cəlb edir.

Hər bir dövlətin inkişafı həm də onun beynəlxalq səviyyədə formalaşmış nüfuzu ilə ölçülür. Bu mənada, son 15 ildə həyata keçirilən xarici siyasət Azərbaycanı beynəlxalq miqyasda müstəqil siyasət yürütməsinə, milli maraq və mənafelərini təmin etməsinə real imkanlar açıb. Əgər 25 il əvvəl respublikamız BMT, ATƏT kimi beynəlxalq qurumların kandarından çətinliklə içəri keçirdisə, bu gün vəziyyət tamam fərqlidir: Azərbaycan BMT Təhlükəsizlik Şurasına üzv seçilir, ATƏT, Avropa İttifaqı kimi təşkilatların toplantılarına, nüfuzlu sessiyalarına rəhbərlik, evsahibliyi edir.

Son illər nüfuzlu beynəlxalq tədbirlərə evsahibliyi etmək Azərbaycanın gündəlik həyat tərzinə, qürur və fəxarət dolu tarixi hadisələri müşahidə etmək isə insanlarımızın yaşam normasına çevrilib. Şübhəsiz, beynəlxalq tədbirlərin Azərbaycanda keçirilməsinin başlıca səbəbi respublikamızın dünya miqyasındakı nüfuzu, hörmətidir. Bu günlərdə Bakıda keçirilmiş “Formula-1” yarışları Azərbaycanın turizm və idman potensialını təsdiqləmək, 500 milyonluq qlobal auditoriyaya nümayiş etdirmək imkanı yaradıb.

İndi Bakı ilə yanaşı, bölgələrimiz də nüfuzlu beynəlxalq tədbirlərə, zirvə toplantılarına evsahibliyi edir. Prezident İlham Əliyevin təşəbbüsü ilə son illər Naxçıvanda, Qəbələdə, Gəncədə beynəlxalq tədbirlər keçirilib. Bu və digər qlobal tədbirlər Azərbaycan xalqının zəngin mədəniyyətinin, incəsənətinin, musiqisinin, mətbəx nümunələrinin dünya miqyasında təbliğinə əvəzsiz imkanlar açır. Mötəbər tədbirlərin Bakı şəhərində keçirilməsi, eyni zamanda Azərbaycanın Birinci-vitse-prezidenti, Heydər Əliyev Fondunun rəhbəri Mehriban xanım Əliyevanın Azərbaycanı dünyada tanıtmaq, haqq səsini beynəlxalq ictimaiyyətə çatdırmaq istiqamətində apardıqları sistemli işin tərkib hissəsidir.

Ümumilikdə müasir Azərbaycanın inkişaf strategiyası, əslində, Heydər Əliyev siyasətinin daha da təkmilləşdirilmiş, müasir dövrün tələblərinə uyğunlaşdırılmış mükəmməl və çevik idarəetmə sistemidir. Heydər Əliyevin banisi olduğu müstəqil Azərbaycan son 15 ildə onun layiqli davamçısının rəhbərliyi altında gələcəyə doğru inamla irəliləyir, böyük quruculuq və inkişaf salnaməsinə imza atır. Heydər Əliyev müstəqilliyimizin banisi idisə, İlham Əliyev tarixin ən qüdrətli Azərbaycanının rəhbəridir.

Bir müddətdən sonra xalqımız Azərbaycan Xalq Cümhuriyyətinin 100-cü ildönümü kimi möhtəşəm hadisəni təntənə ilə qeyd edəcək. Qürur doğuran haldır ki, bu günlərdə həm də Azərbaycanı həqiqi müstəqilliyə qovuşduran, Cümhuriyyətin böyük dühalarının reallaşmayan ideyalarını gerçəkləşdirən ümummilli liderin anadan olmasının 95-ci ildönümünü böyük coşqu və təntənə ilə qeyd edirik. Qətiyyətlə deyə bilərik ki, Heydər Əliyev yüzilliklər boyu istiqlala, müstəqilliyə qovuşmaq üçün mücadilə aparan və bu yolda çoxsaylı qurbanlar verən, 100 il əvvəl müsəlman Şərqində ilk demokratik, hüquqi və dünyəvi dövlət quran xalqın böyük və qüdrətli dövlət memarıdır.

Müstəqil dövlət və güclü lider anlayışları daim bir-birini tamamlayıb. Güclü liderə malik olmayan xalqın qazandığı müstəqilliyi qoruyub saxlaması da asan olmur. Bu mənada, yəqin ki, nə vaxtsa gələcək nəsillər bizə məhz ümummilli lider Heydər Əliyevin müasiri olduğumuza görə qibtə edəcəklər. Yalnız bu səbəbdən ki, xalqın ötən əsrdə yetişdirdiyi bu böyük şəxsiyyətin müasiri olmaq, onun vətən, xalq naminə əzmkar fəaliyyətinin hər bir mərhələsini izləmək, əslində, Azərbaycanın son yarım əsrlik tarixinin bələdçisi, cığırdaşı olmaq deməkdir. Həmin tarixə boylandıqca bu həqiqəti daha aydın dərk edir, Heydər Əliyev dühasının milli dövlətçilik qarşısındakı əvəzsiz xidmətlərini dəqiq görürük.

Əzəmətli tarixə çevrilmiş inkişaf yolumuzun ən parlaq nəticəsi ondan ibarətdir ki, bu gün Azərbaycan, sözün əsl mənasında, tam müstəqil siyasət yürüdən ölkədir. Ötən 15 ildə İlham Əliyevin rəhbərliyi ilə respublikamız ulu öndərin həyata keçməyən ideyalarını layiqincə gerçəkləşdirmək imkanı qazanıb.

11 aprel 2018-ci il seçkilərinin nəticələri Azərbaycan vətəndaşlarında gələcəklə bağlı nikbinlik və inamı daha da gücləndirib. Mütləq əksəriyyət bu qənaətdədir ki, müstəqil republikamızın güclü lideri, sabit və dayanıqlı inkişaf strategiyası var.

Bəli, Heydər ƏLİYEV yolu bundan sonrakı mərhələdə də Azərbaycanı daha böyük uğurlara, zəfərlərə aparacaq!

Fəttah HEYDƏROV,

Milli Məclisin Komissiya sədri,

Respublika Ağsaqqallar Şurasının sədri

Azərbaycan.- 2018.- 4 may.- S.1; 3.