78 ölkə, 94 min azarkeş

“Formula-1” Azərbaycan Qran-prisinin ölkəmizə gətirdiyi turistlərin sayı orta hesabla hər il 30 faiz artır

Aprelin 27-29-da paytaxtımız dünyada bir nömrəli avtomobil yarışı hesab olunan “Formula-1”ə 3-cü dəfə evsahibliyi etdi. “Formula-1” dünya çempionatının 4-cü mərhələsi olan Azərbaycan Qran-prisində yaddaqalan anlar yaşandı və yəqin ki, baş verən maraqlı anlar uzun müddət həm yerli, həm də Bakıya təşrif buyuran əcnəbi azarkeşlər tərəfindən xoş təəssüratlarla xatırlanacaq.

Azərbaycanın nümunəvi təşkilatçılığı və qonaqərvərliyi

Ölkəmizdə keçirilən “Formula-1” yarışlarının təşkilatçılığı yenə də yüksək standartlara cavab verdi. Təhlükəsizlik, infrastruktur hazırlığı, kütləvi tədbirlərin keçirilməsi ilə bağlı təşkilati və texniki bazanın mövcudluğu bunun əyani göstəricisidir.

Ümumiyyətlə, bu yarışın 2016-cı ildən Azərbaycanda keçirilməsi ölkəmiz üçün böyük tarixi nailiyyət hesab olunur. Çünki bu yarış müstəqil ölkəmizin gücünü, xalqımızın qonaqpərvərliyini, yüksək təşkilatçılıq qabilliyyətini bir daha dünyaya göstərdi. Digər tərəfdən bu yarış Azərbaycanın turizm potensialının inkişafında xüsusi rol oynadı və bunun sayəsində ölkəmizi tanıyanların sayı artdı.

Turizm potensialımızın inkişafında xüsusi rol oynayan “Formula-1”

Ölkəyə çoxlu sayda turistin gəlməsi tək turizm sahəsinin deyil, bir çox sahələrin də inkişafına təkan verdi. 2016-cı ildə keçirilən “Formula-1” yarışlarından sonra Azərbaycanda başda turizm sektoru olmaqla, iqtisadiyyatın turizmlə bağlı müxtəlif sahələrində canlanma yarandı.

“Formula-1” azarkeşləri arasında böyük beynəlxalq şirkətlərin rəhbərləri də var. Onlar yarışı izləməyə gəldikləri ölkələrin biznes imkanları ilə yaxından tanış olurlar ki, bu da Azərbaycanda xarici investisiya qoyuluşuna öz töhfəsini verir. Yarış zamanı Azərbaycanda da iqtisadiyyatın bir sıra sahələrində canlanma yarandı və ölkəyə xarici investisiyaların cəlb edilməsinə mühüm töhfələr verildi.

“Formula-1”in ölkəmizdə keçirilməsini dəyərləndirərkən Prezident İlham Əliyev bildirdi ki, bu yarış Azərbaycanın turizm potensialının inkişafında xüsusi rol oynayacaq və ölkəmiz turizm mərkəzinə çevriləcək.

Hər il artan uğur göstəricisi

Müşahidələr və rəqəmlər sübut edir ki, “Formula-1” yarışlarını izləmək üçün Bakıya gələnlərin, şəhərimizi, ölkəmizi tanıyanların sayı hər il artır.

Statistik göstəricilərə nəzər yetirək. İlk dəfə, yəni, 2016-cı ildə Bakıda keçirilən Avropa Qran-prisini izləmək üçün ölkəmizə 30 min tamaşaçı gəlmişdi. 2017-ci ildə isə Azərbaycan Qran-prisini izləməyə gələnlərin sayı 71,451 nəfərə yüksəldi. Bu isə o deməkdir ki, Bakıda baş tutan ikinci “Formula-1” yarışına 2016-cı ildəkindən 40 min nəfərdən çox turist gəlib. Yəni, xaricdən gələn avtoidman azarkeşlərinin sayı iki dəfə çox olub. Ümumilikdə isə ötən il yarışları izləmək üçün 65 ölkədən azarkeş gəlmişdi.

“Formula-1”i izləmək üçün 78 ölkədən bilet alınıb

“Bakı Şəhər Halqası” Əməliyyat Şirkətinin yaydığı məlumata görə, “Formula-1”in ən sürətli şəhər halqasında baş tutan ötənilki yarışla müqayisədə bu il ümumi tamaşaçı sayında 31, bilet satışında isə 21 faiz artım qeydə alınıb. Bu il satılan biletlərin 77 faizi yerli azarkeşlərin payına düşür.

Builki Azərbaycan Qran-prisinə, həmçinin axşam konsertlərinə ümumilikdə 94 min tamaşaçı baxıb.

Beləliklə, “Formula-1” üzrə dünya çempionatının 4-cü yarışında iştirak etmək üçün Bakıya gələn əcnəbi azarkeşlərin sayı ötən illə müqayisədə 31 faiz artıb. Mövsümün gözlənilməzliklərlə və həyəcanlı anlarla dolu yarışına şahid olmaq üçün dünyanın 78 ölkəsindən avtoidman həvəskarları Bakıya təşrif buyurublar. Biletlərin təxminən dörddəbiri əcnəbi tamaşaçılar tərəfindən alınıb.

Bakı Şəhər Halqasında üçüncü dəfə keçirilən yarış azarkeşlərin etimadını doğrulda bilib. Belə ki, həm yarışı yerində canlı, həm də bütün dünyada teleyayım vasitəsilə izləyən milyonlarla tamaşaçı uzun müddət yaddaşlardan silinməyəcək mübarizənin şahidi olublar.

Ötən il 65, bu il isə 78 ölkənin azarkeşlərinin Bakıda “Formula-1” həyəcanını yaşaması turistlərin sayında artımın olduğunu bir daha təsdiq edir. Bu göstəricilərə əsaslanaraq deyə bilərik ki, bu yarış Azərbaycanın turizm sənayesinin inkişafı istiqamətində həyata keçirilən proqramların artıq müsbət nəticələr verdiyini bir daha göstərir.

Son 3 ayda Azərbaycana dünyanın 151 ölkəsindən turust gəlib

Son illər ölkəmizdə turizmin inkişafı ilə bağlı atılan addımlar respublikamıza turist axınının sürətlənməsinə, regionlarda yeni turizm infrastrukturlarının yaranmasına və turistlərə göstərilən xidmətlərin sayının artmasına səbəb olub.

Dövlət Statistika Komitəsinin məlumatına görə, son 3 ayda Azərbaycana dünyanın 151 ölkəsindən 629,4 min və ya ötən ilin müvafiq dövrü ilə müqayisədə 12,4 faiz çox əcnəbi və vətəndaşlığı olmayan şəxs gəlib. Gələnlərin 27,4 faizi Rusiya Federasiyası, 22,1 faizi Gürcüstan, 15,8 faizi İran, 11,6 faizi Türkiyə, 4,7 faizi Birləşmiş Ərəb Əmirlikləri, 1,9 faizi Ukrayna, 1,8 faizi İraq, 14,6 faizi digər ölkələrin vətəndaşları, 0,1 faizi isə vətəndaşlığı olmayan şəxslərdir. Gələnlərin 67,9 faizini kişilər, 32,1 faizini isə qadınlar təşkil edib.

Əcnəbi və vətəndaşlığı olmayan şəxslərin 29,6 faizi yanvar, 26,4 faizi fevral, 44 faizi isə mart ayında ölkəyə gəlib. Mart ayında ölkəmizə gələnlərin 25,8 faizini İran vətəndaşları təşkil edib və onların sayı ötən ilin mart ayında gələnlərdən 4,6 faiz çox olub.

Rəşad BAXŞƏLİYEV

Azərbaycan.- 2018.-4 may.- S.1; 11.