İlham Əliyev müstəqillik dövrünün ən böyük əfvini elan etdi

Prezident bu dəfə 634 ailəni sevindirdi

Azərbaycanın dövlət müstəqilliyinin 1993-cü ilin iyunundan sonrakı dövrünü xarakterizə edən amillərdən biri cəmiyyətdə insanlıq və humanizm prinsiplərinə xidmət edən siyasətin bərqərar olmasıdır. Belə ki, həmin vaxt ulu öndər Heydər Əliyevin hakimiyyətə qayıdışından sonra demokratikləşmə mərhələsinə qədəm qoyan Azərbaycanda humanist aktların həyata keçirilməsi ənənəsinin də təməli qoyuldu.

Şəxsiyyət azadlığına humanist münasibət

Heydər Əliyevin böyük şəxsiyyət və lider kimi mühüm keyfiyyətlərindən biri də məhz o idi ki, günahkarı cəzalandırmağı, şans verərək bağışlamağı, islah etməyi də bacarırdı. Ulu öndərin humanistliyinin nəticəsi olaraq 1995-ci ildən sonra ölkəmizdə məhkum olunmuş şəxslərin əfv edilməsi, bağışlanması ənənəyə çevrildi. Şəxsiyyət azadlığına humanist münasibətin formalaşdığı respublikamızda 1995-2003-cü illərdə Heydər Əliyev tərəfindən 32 əfv fərmanı imzalandı və bu, 3104 məhkuma şamil edildi.

Heydər Əliyev böyük humanistlik nümayiş etdirərək imzaladığı əfv fərmanları ilə 1994-1995-ci illərdə dövlət çevrilişi cəhdlərində iştirak edən insanların da bir qismini bağışladı. Həmçinin 1996-2003-cü illərdə 7 dəfə amnistiya elan edilib. Amnistiya aktları törətdiyi cinayət əməlindən səmimi peşmançılıq hissi keçirən 77 mindən çox insana şamil edilib, 21 min 325 nəfər cəzasının çəkilməmiş hissəsindən azad olunub.

Əlavə edək ki, 1993-cü ilin iyun ayından Azərbaycanda ölüm hökmünün icrası dayandırıldı. Sonrakı illərdə bu cəzanın tamamilə ləğv olunması istiqamətində bir sıra addımlar atıldı. Heydər Əliyevin təşəbbüsü ilə Azərbaycanın odövrkü Cinayət Məcəlləsində ölüm cəzası ilə əlaqədar olan maddələrə yenidən baxıldı, 21 maddədən ölüm cəzası götürüldü. 1998-ci ildə isə ölüm hökmü tamamilə ləğv edildi. Beləliklə, Azərbaycanın adı Şərqdə bu cəzanı ləğv edən ilk ölkə kimi tarixə düşdü.

Mərhəmət və insanpərvərlik məfkurəsinə söykənən siyasət

Ötən 15 ildə Prezident İlham Əliyev əfvetmə institutunun çevik və işlək mexanizm əsasında fəaliyyətini təmin edib, hər zaman mərhəmət, insanpərvərlik və humanizm məfkurəsinə söykənib. Törətdiyi cinayət əməlindən səmimi peşmançılıq keçirən, azad cəmiyyətə və normal həyata qovuşmaq istəyən məhkumların əfvlə bağlı müraciətlərini, səhhətini, ailə vəziyyətini, cəza çəkdikləri müddətdə davranışlarını nəzərə alan dövlət başçısı bayram və əlamətdar günlərdə imzaladığı əfv sərəncamları ilə onların bir qismini cəzalarının çəkilməmiş hissəsindən tam və ya qismən azad edib.

Bu dövrdə Azərbaycanda həm də 4 dəfə amnistiya elan edilib. Milli Məclis 2007-ci il mayın 8-də “Azərbaycan xalqının ümummilli lideri Heydər Əliyevin xatirəsinə həsr olunmuş amnistiya haqqında”, 2009-cu il martın 17-də “Novruz bayramı münasibətilə amnistiya elan edilməsi haqqında”, 2013-cü il mayın 7-də “Azərbaycan xalqının ümummilli lideri Heydər Əliyevin 90 illik yubileyi münasibətilə amnistiya elan edilməsi haqqında” və 2016-cı il mayın 2-də 28 may - Respublika Günü münasibətilə amnistiya elan edilməsi haqqında qərarlar qəbul edib. Bütün bu amnistiya qərarlarının təşəbbüskarı isə Heydər Əliyev Fondunun prezidenti, o zaman Milli Məclisin deputatı olan Azərbaycanın Birinci-vitse prezidenti Mehriban xanım Əliyevadır.

15 ilin 32-ci əfvi

Prezident İlham Əliyevin “Məhkum edilmiş bir sıra şəxslərin Azərbaycan Xalq Cümhuriyyətinin 100 illiyi münasibətilə əfv olunması haqqında” 24 may tarixli sərəncamı bir daha Azərbaycan dövlətinin humanist siyasət yürütdüyünü və dövlət başçısının mərhəmət dəyərlərinə bağlı olduğunu göstərir.

Sərəncama əsasən Azərbaycan Xalq Cümhuriyyətinin yaradılmasının xalqımızın müstəqilliyi tarixində əlamətdar hadisə olduğu vurğulanaraq, ümummilli lider Heydər Əliyevin müasir Azərbaycan dövlətinin qurulmasında ümumbəşəri dəyərlər, qanunun aliliyi, ədalət və demokratiya ideallarına xüsusi önəm verdiyi xatırlanaraq, Heydər Əliyev siyasətinin mərhəmətlik və humanizm ənənələrinə sadiq qalaraq və cəzadan azad olunacaq şəxslərin cəmiyyətə qovuşaraq müstəqil dövlətimizin inkişafı yolunda fəaliyyət göstərəcəklərinə inanaraq 634 nəfər əfv edilib.

Prezident İlham Əliyevin sonuncu əfv sərəncamı Azərbaycan Xalq Cümhuriyyətinin 100 illiyi ərəfəsində qohum-əqrəbası həbsdə olan ailələrə sonsuz sevinc bəxş etdi. Müxtəlif səbəblərdən azadlıqdan məhrum edilərək həbsə alınan və artıq cəzalarının müəyyən hissəsini çəkən, eyni zamanda islah olunma istiqamətində müsbət nəticələr əldə edənlər azad cəmiyyətə qovuşdular. Şübhə yoxdur ki, onlar ictimai həyatda öz yerlərini tutacaqlar. Bu, həmin insanlara bundan sonra həyatda öz yollarını düzgün seçməklə bağlı verilmiş şansdır. Bu isə dövlətimizin humanizm siyasətinin mahiyyətindən və məzmunundan doğur.

Əfv sərəncamının Respublika Günü ərəfəsində imzalanması xüsusilə yüksək ovqat yaradır. Çünki həm əfvə düşən insanlar, həm də onların ailə üzvləri və yaxın qohumları qarşıdan gələn bayram günlərini daha xoş əhvali-ruhiyyədə qeyd edəcəklər.

Xatırladaq ki, bu, Prezident İlham Əliyevin 2003-cü ildən bu vaxta qədər verdiyi sayca 32-ci əfv qərarıdır. Sonuncu sərəncamı da nəzərə alsaq, Azərbaycan Prezidenti ötən 15 ildə 7530 nəfəri əfv edib. Azərbaycan Xalq Cümhuriyyətinin 100 illiyi münasibətilə imzalanan əfv həm də müstəqillik dövrünün ən böyük əfvidir. Ümumilikdə isə 1995-ci ildən sonra ölkədə 64 əfv fərman və sərəncamı imzalanıb.

Rəşad CƏFƏRLİ

Azərbaycan.- 2018.- 26 may.- S.1; 11.